1, 2. Muloñadi chimwakeñelaña wakuyilombola neyi mudi kwiluña dimwabula kwiluka? Yehova watwinka chumanyi chakutulombola nachu?

FWIKIJENU munakuketula chinkalampanta cheneni nankashi. Dichi mwanuka nikwanuka nenu hakwila mushiki kumunakuya chakadi kujimbala kwatela kwikala wakuyilombola. Mukwila ñahi kulonda mushiki kumunakuya? Mukwila muntu weluka ochu chinkalampata kulonda yayitwali. Neyi nehi mukutalaña chinakwenda  itena hela tutumbwa. Neyi kwikala yuma yikuyilombola, yikuyikwasha nankashi kulonda mubuli kufwila muchinkalampata.

² Wonsu wetu twamonaña kukala kwakuvulu, chakwila mpinji jikwawu twakañanya nimwakwilila. Ilaña Yehova, watwinka wonsu wetu chinleji. (Yakoba 1:17) Tunakukeña kwiluka chinleji kwiji hichumanyi nichichazataña. Tukudiza cheñi chitunateli kudizisha chinleji chetu, muloña wutwatela kwakamena yinleji yawakwetu, nikwikala nachinleji chachiwahi chikwatukwashaña kwikala nanshakaminu yayiwahi.

3. Chinleji hichumanyi?

³ Chinleji hichawaana chachiwahi chatwinkayi Yehova. Chinleji hichinsahu watulejaña nindi ichi chachiwahi ichi chatama. Izu dachiGiriki dabalumunawu muBayibolu nawu “chinleji” daya mukwila nawu “kudiluka.” Chinleji chetu neyi chazataña chiwahi chikutukwasha kwiluka chitwekala. Chatukwashaña kuhosha yuma yitunakutoñojoka mumuchima. Chatukwashaña kwila yayiwahi bayi yatamaku. Chatuzañaleshaña neyi tuneli chuma chachiwahi hela kutwinka nyiloña neyi tunatamishi.—Talenu Mazu Adi Kunsa 5.

4, 5. (a) Chumanyi chamwekeni chelili aAdama niEva adikañi nayinleji yawu? (b) Anyi ashimunawu muBayibolu elileña yuma yamwekeshaña chazataña chinleji?

⁴ Wejima wetu twatela kufuukulahu kutiyilila chinleji chetu hela nehi. Adama niEva afuukwilihu kubula kutiyilila chayilejeleña yinleji yawu, chafuminimu avulumwini. Hanyima yachi aneñeli, hela chochu  adiña avulumuna dehi. Adikañili naNzambi. (Kutachika 3:7, 8) Hela chakwila adiña nayinleji yawanina nawa elukili nawu ateleli kumwovwahila Nzambi, akaanini kulondela mwayilejeli yinleji yawu.

⁵ Antu amavulu abula kuwanina niwena hiyalondelaña mwayilejaña yinleji yawuku. Tuhanjekenu hadi Yoba. Chineli wafuukwileña chiwahi, wahosheli nindi: “Muchima wami hiwakanyinka muloñaku mafuku ami ejima.” (Yoba 27:6) Yoba hakutena “muchima” windi, wateneneña chinleji chindi, chamulejeleña nawu ichi chatama ichi chachiwahi. Mpinji jikwawu, Davidi wakaanineña mwamulejeleña chinleji chindi nawa wadikañileña naYehova. Chafuminimu waneñeleña chakwila muchima windi “hiwukumutapa.” (1 Samweli 24:5) Chinleji chaDavidi chamulejeleña nawu yuma yelileñayi yadiña yatama. Ilaña wadizilili kuyuma yamulejeleña chinleji chindi, nawa chamukwashili kubula kufuntila kumasanjila.

6. Muloñadi chitukuhoshela netu chinleji hichawaana chatwinkayi Nzambi?

⁶ Niantu abula kumwiluka Yehova niwena eluka nawu kwekala yuma yayiwahi niyatama. Bayibolu yahosha nawu: “Yitoñojoka yawu yayinkaña nyiloña hela kuyiyiñisha.” (Aroma 2:14, 15) Chakutalilahu, antu amavulu eluka nawu hiyatela kujaha muntu hela kwiyaku. Hela awenawu elukaña wanyi nawu anakwila yuma kwesekeja nachinakuyileja chinleji chawu, ilaña chinleji chayinkayi Yehova dichayikwashaña kwiluka nawu ichi chachiwahi ichi chatama. Alondelaña cheñi nshimbi jaNzambi hela netu yishina yalema yatwinkayi Yehova kulonda yitukwasheña kufuukula chiwahi.

7. Muloñadi chinleji chetu chichapwempukilaña mpinji jikwawu?

 ⁷ Mpinji jikwawu chinleji chetu chinateli kutuleja mwaluwa. Chakutalilahu, yitoñojoka yetu yabula kuwanina yinateli kuchitamisha nawa tukupwempuka. Chinleji chachiwahi hichadinjilaña hohuku. (Kutachika 39:1, 2, 7-12) Twatela kuchidizisha. Yehova watwinka spiritu yajila niyishina yamuBayibolu kulonda yatukwashi. (Aroma 9:1) Tuhanjekenu chitunateli kudizisha chinleji chetu.

8. (a) Yuma yitwakeñaña kwila yaluwañeshaña ñahi chinleji chetu? (b) Twatela kudihula netudi henohu kanda tufuukuli?

⁸ Antu amakwawu atoñojokaña nawu neyi anakwila yuma yinakeñiwu dikwila nawu anakulondela chinleji chawu. Atoñojokaña nawu anateli kwila yuma yejima yinakukeñawu chakala hohu anatiyi kuwaha. Ilaña yitoñojoka yetu yawanina wanyi, yinateli kutuluwañesha. Chinleji chetu chikuluwankana neyi tusha muchima hayuma yitwakeñaña. Bayibolu yatulejaña nawu: ‘Muchima wasweja kudimbana kubadika yuma yejima, wasweja nikukata, wukutwesha kuwiluka hinyi?’ (Yeremiya 17:9) Tukutachika kutoñojoka netu tuneli chiwahi henohu tunaluwañeshi. Chakutalilahu, henohu Pawulu kanda yekali mukwaKristu, wayikabishileña nankashi antu jaNzambi, watoñojokeleña nindi welileña chuma chachiwahi. Yomwenindi, watoñojokeleña nindi wudi nachinleji chachiwahi. Ilaña wahosheli cheñi nindi: “Yehova diyi hohu wanshinshikaña.” (1 Akorinda 4:4; Yilwilu 23:1; 2 Timotewu 1:3) Pawulu chelukiliyi nindi Yehova waneñeleña nayuma yelileñayi, wafuukwilihu kuhimpa. Chumichi chinakumwekesha nawu  henohu kanda twili chuma, twatela kudihula netu, ‘Yehova nakukeña nindi nilidi?’

9. Kumutiya Nzambi woma kwatalisha mudihi?

⁹ Neyi kudi muntu imwakeña, mwakeñaña kumuneñesha wanyi. Chineli twamukeña Yehova, hitunakukeña kwila chuma chikumuneñeshaku. Twatela kuhela nankashi yejima yinateli kumuneñesha Yehova. Dichuma cheliliyi niNehemiya. Hazatishili chifulu chindi chawunguvulu kulonda yekali samahetaku. Muloñadi? Wahosheli nindi ‘muloña wamutiyileña Nzambi woma.’ (Nehemiya 5:15) Nehemiya hakeñeleña kwila chuma chakumuneñesha Yehovaku. Kufwana Nehemiya, ninetu hitunakukeña kwila chuma chikumuneñesha Yehovaku. Kutaña Bayibolu kukutukwasha kwiluka yuma yamuzañaleshaña.—Talenu Mazu adi Kunsa 6.

10, 11. Yishinanyi yamuBayibolu yikutukwasha kufuukula chiwahi hansañu yakunwa?

¹⁰ Chakutalilahu, mukwaKristu wejima watela kufuukulahu neyi watela kunwa walwa hela nehi. Yishinanyi yikumukwasha kufuukula chiwahi? Talenu haniyi yishina: Bayibolu yakaanisha kunwa walwa wanyi. Yatulejaña nikutuleja nawu vinyu hichawaana chatwinkayi Nzambi. (Masamu 104:14, 15) Hela chochu, Yesu walejeli atumbanji twindi nindi bayi ‘asweja kunwaku.’ (Luka 21:34) Pawulu niyena walejeli akwaKristu nindi bayi adiñija “muyidika yamapumba nikushetaku.” (Aroma 13:13) Nindi akwakusheta “hiyamba kaswana Wanta waNzambiku.”—1 Akorinda 6:9, 10.

¹¹ MukwaKristu watela kudihula nindi: ‘Walwa nawukeñesha nankashi? Natela kuwinwa kulonda nitiyi kuwaha? Komana nanwaña muloña nibuleña kutiya  woma? Natela kukeheshaku kunwa walwa nimapampa akunwa? * Hela chakwila hosi walwa komana nateli kwikala hamu nawamabwambu nakuzañalala?’ Tunateli kumulomba Yehova kulonda yatukwashi kufuukula chiwahi. (Tañenu Masamu 139:23, 24.) Chitwela mwenimu, tunakudizisha chinleji chetu kulondela yishina yamuBayibolu. Kudi yuma yikwawu yitwatela kwila neyi chitukudiza.

12, 13. Muloñadi chinleji chetu chichaambukila nachawakwetu? Tunateli kwila ñahi neyi chinleji chetu chinaambuki nachawakwetu?

¹² Antu akweti yinleji yashiyashana. Chinleji chenu chinateli kuyiteja nawu mwili chuma chimu ilaña mukwenu chikumukaanisha. Chakutalilahu, hadaha mukufuukulahu kunwa walwa, ilaña mukwenu nehi. Muloñadi awa antu ayedi chinekaliliwu nayitoñojoka yashiyashana?

¹³ Yitoñojoka yakukeña kwila yuma yimu yaluwankanaña kwesekeja neluña kwakulilayi muntu, yuma yelukayi hela kukala kukwawu. Kutalisha kunsañu jawalwa, hadaha muntu weñijili mutu mukunwa walwa kunyima wukufuukula nindi wukunwaña wanyi. (1 Anyanta 8:38, 39) Hanu dinu mukwila ñahi neyi mumwinka muntu walwa, ilaña yakaana? Mukuneña? Mukutwalekahu kumukakeja? Tahindi mukukeña nenu chiña tuhu ayileji chinakaaniniyi? Inehi, mukulemesha chinleji chindi.

14, 15. Kukalanyi kwamwekeni mumafuku aPawulu? Mazwinyi akufumba ahosheliyi Pawulu?

 ¹⁴ Mumafuku akapostolu Pawulu, kwamwekeni kukala kwamwekesheli nawu yinleji yawantu yaambuka. Mbiji jikwawu jalandishileñawu hamaketi asambilileña kujitwala kudi ankishi kufumahu hiyakujitwala hamaketi. (1 Akorinda 10:25) Pawulu wachimweni nindi kulanda mbiji yamuchidiwu nakuda kwatama wanyi. Yena nindi, yakuda yejima yafumini kudi Yehova. Ilaña yitoñojoka yawamanakwetu apesheleña ankishi kunyima yambukili. Atoñojokeleña nawu chatama kuda jina mbiji. Komana Pawulu wahosheli nindi: ‘Chinleji chami chinakunkabisha wanyi. Natela kuda yuma yejima yinakukeña’?

¹⁵ Dichahosheliyi wanyi Pawulu. Walemesheli yitoñojoka yawamanakwindi nankashi chakwila wakeñeli kuleka yuma yadiñayi nawuswa wakwila. Pawulu nindi bayi twileña yuma ‘yakututiyisha kuwaha etu aweniku.’ Watwalekelihu nindi: “Muloña niKristu hakoñeli chuma chakuditiyisha hohu yomweni kuwahaku.” (Aroma 15:1, 3) Kufwana Yesu, Pawulu wadiña nakwakamena akwawu kubadika yomwenindi.—Tañenu 1 Akorinda 8:13; 10:23, 24, 31-33.

16. Muloñadi chitwatela kubula kusompeshela akwetu kutalisha hayinleji yawu?

¹⁶ Tukwila ñahi neyi chinleji chamuntu chinamwiteji kwila chuma chitunamoni netu chatama? Twatela kubabala nankashi kulonda tubuli kwikala akalisha nakuhosha netu etu tudi chiwahi kubadika akwetu analuwañeshi. (Tañenu Aroma 14:10.) Yehova watwinka chinleji kulonda tudishinshikeña etu aweni, bayi akwetuku. (Matewu 7:1) Hitunakukeña kwila yuma  yitwakeñesha yileti chaambu muchipompeluku. Ilaña, twatela kuwana njila jikukwasha antu kwikala akeñañana nawa anuñañana.—Aroma 14:19.

17. Yumanyi yamwekanaña kuyinleji yawantu amakwawu?

¹⁷ Kapostolu Petulu nindi: “Ikalenuña nachinleji . . . chachiwahi.” (1 Petulu 3:16) Chawushona, neyi antu atwalekahu kudiwula nshimbi jaYehova, chinleji chalekaña kuyisoñamisha mukuhita kwampinji. Pawulu nindi chinleji chamuchidiwu “chooma neyi kwiji anachochi nachikuñu chitata.” (1 Timotewu 4:2)  Kwiji mwanhahu dehi nankashi? Neyi muntu nanhi, washalaña nachibata chakwila neyi mukwatahu, kwosi chikutiyayi. Neyi muntu yatwalekahu kwila yuma yatama, chinleji chindi ‘chomaña,’ mukuhita kwampinji, chikaleka kuzata.

18, 19. (a) Indi kuneña muloña wayuma yitwelili kwatudizishañadi? (b) Chumanyi chitwatela kwila neyi tunakudinka nyiloña nanshidi yitwakoñeli yatwanakenawu dehi?

¹⁸ Neyi tunaneñi muloña wachuma chituneli, dikwila nawu chinleji chinakutuleja nawu tunaluwañeshi. Chumichi chikutuleñela kutoñojoka hachuma chituneli kulonda tuchileki. Chitwatoñojokahu tukwiluka chitwatela kwila kulonda tukabuli kufuntilahu cheñi. Chakutalilahu, hela chakwila Mwanta Davidi wavulumwini, chinleji chindi chamukwashili kubalumuka.  Waheleli yuma yakoñeliyi nawa washilimu katwa kulonda yamwovwahileña Yehova. Yuma yamumwekeneni, yamuletesheli Davidi kuhosha nindi Yehova “wumuwahi waanakenaña.”—Masamu 51:1-19; 86:5; talenu Mazu adi Kunsa 7.

¹⁹ Hela chakwila muntu nabalumuki, nateli kutwalekahu kuneña muloña wanshidi yakoñeliyi. Kuneña kwamuchidiwu kwatama nawa kwaleteshaña muntu kudimona neyi wamukunkulwayi. Neyi ninenu mwaneñaña mpinji yikwawu, anukenu nenu himunateli kuhimpa yuma yamwekeni kunyimaku. Hela mwelukili yayiwahi nayatama hela mwelukili wanyi, Yehova wayanakena dehi nawa wajima dehi nshidi jenu. Yehova wayimonaña nindi mudi atooka nawa mwatela kwiluka nenu chayinu mpinji munakwila yayiwahi. Hela  chakwila muchima wenu wunakuyikabisha, Bayibolu nayu: “Nzambi wabadika nyichima yetu.” (Tañenu 1 Yowanu 3:19, 20.) Dikwila nawu kukeña kwatukeñayi nichatwanakenañayi jabadika nyiloña yitwadinkaña ninsonyi yitunakutiya. Dichi mwatela kwiluka nenu Yehova wayanakena dehi. Neyi muntu yeteja nindi Yehova wamwanakena, chinleji chindi chikwikala mukuwunda nawa wukumuzatilaña Nzambi namuzañalu.—1 Akorinda 6:11; Aheberu 10:22.

20, 21. (a) Awunu mukanda anawusoneki nawu wuyikwashi kwiladi? (b) Kusubukanyi kwatwinkayi Yehova? Nawa twatela kukuzatisha ñahi?

²⁰ Awunu mukanda anawusoneki nawu wuyikwashi kudizisha chinleji chenu kulonda chiyisoñamisheña nikuyikiña munanu mafuku akukuminina akala. Yikuyikwasha cheñi kuzatisha yishina yamuBayibolu mukuhanda kwenu. Ilaña awunu mukanda wukutuleja nshimbi jitwatela kuzatisha mukukala kudi kwejima. Twalondelaña “lushimbi lwaKristu,” lwashindamena hayishina yaNzambi. (Añalija 6:2) Chineli nshimbi hijahosha hayuma yejima yitwelaña mukuhanda kwetuku hichinayi mukwila nawu tunekali nahakuleyela kulonda twilileñamu nshidiku. (2 Akorinda 4:1, 2; Aheberu 4:13; 1 Petulu 2:16) Ilaña, twatela kuzatisha kusubuka kwetu kulonda tumwekeshi netu twamukeña Yehova.

²¹ Neyi tutoñojoka nankashi hayishina yamuBayibolu nikuyizatisha, twelukaña chakuzatisha “ñovu [jetu] jakutoñojoka chiwahi” nawa nikutoñojoka neyi Yehova. (Aheberu 5:14) Chuma chikafumamu hichinleji chadizishewa chikatulombolaña muchihandilu nikutukwasha kushakama mukukeña kwaNzambi.