1. Chumanyi chatoñojokeleñayi Yesu hawufuku henohu kanda yafwi?

YADIÑA mpinji yawufuku henohu Yesu kanda yafwi. Welukili nindi keña ambuki nawatumbanji twindi nawa watoñojokeleña chikekala chihandilu chawu kumbidi. Wayilejeli nindi: ‘Himudi amukanu kaayiku.’ (Yowanu 15:19) Chihahitili mpinji, wayilombeleliku kudi Tata yindi nindi: “Hiyadi amukaayiku neyi chochinabula ami kwikala wamukaayi.” (Yowanu 17:15, 16) Yesu watalishili mudihi?

2. Yesu wateneni “kaayi” kamuchidinyi?

² Izu dakwila nawu “kaayi” datalisha kudi antu abula kumwiluka Nzambi nawa anakuyuulawu kudi Satana. (Yowanu 14:30; Aefwesesa 2:2; Yakoba 4:4; 1 Yowanu 5:19) Yumanyi yitwatela kwila kulonda tubuli kwikala ‘amukanu kaayi’? Mukanu kapetulu, tukuhanjeka hanjila jajivulu: Chitwovwahilaña Wanta waNzambi nichitwabulaña kudiñija mujamapolitiki. Twadikañaña naspiritu yakaayi. Nvwalilu nimmwekenu yetu yakalemesha, nawa hitwakeñesha maliku. Twadimanyekaña cheñi yitwa yanjita yatwinkañayi Nzambi.—Talenu Mazu Adi Kunsa 16.

3. Yesu wamweneña ñahi mapolitiki?

³ Yesu chadiñayi hamaseki, wamweni kukala kwadiña nawantu nawa wamweni nindi chihandilu chawu chadiña chakala. Wayakameneni nankashi nawa wakeñeleña kuyikwasha. Wekalili mukulumpi wamapolitiki? Inehi. Welukili nindi chuma chakeñeleñawu antu hiWanta waNzambi, hela nfulumendi. Yesu diyi wadi kekala Mwanta waniwu Wanta nawa wahosheleñahu nankashi haniwu Wanta neyi nakushimwina. (Danyeli 7:13, 14; Luka 4:43; 17:20, 21) Yesu hadiñijileña munsañu jamapolitiki hela chantiku. Yesu hemeniyi kumesu aNguvulu Pontusi Pilatu wakuRoma, wahosheli nindi: “Wanta wami hiwudi wamukanu kaayiku.” (Yowanu 18:36) Atumbanji twindi niwena hiyadibombeli mujamapolitikiku. Mukanda waOn the Road to Civilization wahosheli nawu akwaKristu akusambila “hiyahosheleña hansañu jamapolitikiku.” Makonu, akwaKristu alala dichinakwilawu. Twakwashaña Wanta waNzambi nikubula kudiñija munsañu jamukaayi jamapolitiki.—Matewu 24:14.

4. AkwaKristu alala akwashaña ñahi Wanta waNzambi?

⁴ Añimeni emenañaku jinfulumendi jamatuña awu hiyadiñijaña mumapolitiki amunodu iluñaku. Awayishewa, ekala nakuchiñeja kwakuyuula hamu naYesu mwiwulu, niwena dichekalawu. Pawulu wayisonekeleli akwaKristu awayishewa nindi: “Tudi añimeni emenañaku Kristu.” (2 Akorinda 5:20) Awayishewa emenañaku nfulumendi yaNzambi. Hiyadiñijaña mujamapolitiki nimunsañu janfulumendi yamukanu kaayiku. (Afwilipi 3:20) Ilaña, awayishewa anakwashi antu amavulu kwiluka nfulumendi yaNzambi. “Anyikoku acheñi,”  akweti chikuhwelelu chakushakama haya nyaaka mwituña dadiha daNzambi, akwashaña awayishewa. Niwena hiyadiñijaña mujamapolitikiku. (Yowanu 10:16; Matewu 25:31-40) Chalala, kwosi mukwaKristu walala wunateli kudiñija mujamapolitiki amukanu kaayiku.—Tañenu Isaya 2:2-4.

5. Akwakristu abulilañadi kuzuña njita?

⁵ AkwaKristu alala amonaña akwawu akwakwitiya nawu hiyantaña jawu nawa ekala anuñañana hichidi namuloña netuña hela yitachi yawuku. (1 Akorinda 1:10) Neyi twayileña kunjita kachi twazuñaña nayisaka yetu niakwetu akwakwitiya atulejeliyi Yesu nindi tuyikeñi. (Yowanu 13:34, 35; 1 Yowanu 3:10-12) Kubombelahu, Yesu wayilejeli atumbanji twindi nindi mukeñeña niayilumbu jenu.—Matewu 5:44; 26:52.

6. Ambuña aYehova adihana amonaña ñahi jinfulumendi?

 ⁶ Hela chakwila etu akwaKristu hitwadiñijaña mujapolitikiku, twazataña nañovu kulonda twikali enimbu amawahi. Chakutalilahu, twalemeshaña nfulumendi kuhitila mukwovwahila nshimbi nikufweta nyisonku. Ilaña twazataña nañovu hakwila nawu ‘yuma yaNzambi, tumwinki Nzambi.’ (Maku 12:17; Aroma 13:1-7; 1 Akorinda 6:19, 20) “Muyuma yaNzambi” mwabombela kumukeña kutwamukeña, kwovwahila nikudifukula kwetu. Tunateli kuhana wumi wetu kukola Yehova chatela tubuli kumwovwahila.—Luka 4:8; 10:27; Tañenu Yilwilu 5:29; Aroma 14:8.

7, 8. “Spiritu yamukaayi,” hichumanyi nawa yaluwañeshaña ñahi antu?

⁷ Kubula kudibomba nakaayi kaSatana chatalisha mukwila nawu hitwetejaña ‘spiritu yamukaayi’ kutuyuulaku. Iyi spiritu hiyitoñojoka niyilwilu yafumaña kudi Satana, nawa yayuulaña antu abulaña kumukalakela Yehova. Ilaña akwaKristu adikañaña nanichi chilwilu. Neyi chochahosheliyi Pawulu nindi: “Etu hitwatambwilili spiritu yamukaayiku, ilaña twatambwilili spiritu yafumaña kudi Nzambi.”—1 Akorinda 2:12; Aefwesesa 2:2, 3; talenu Mazu Adi Kunsa 17.

⁸ Spiritu yamukaayi yakojejaña antu kudikeña, kudinka wanta nikudikaña. Yayikojejaña kutoñojoka nawu hiyatela kumwovwahila Nzambiku. Satana wakeñaña antu eleña yuma yejima yinakukeñawu chakubula kutoñojoka hakukala kwafumañamu. Wakeñaña nindi antu akuhweleli nawu “yuma yafwilaña mujimba [niyuma] yafwilaña mesu” diyuma yalema muchihandilu.  (1 Yowanu 2:16; 1 Timotewu 6:9, 10) Diyabolu nakukeña nankashi kuluwañesha ambuña aYehova nikutudimba kulonda tutoñojokeña neyi yena.—Yowanu 8:44; Yilwilu 13:10; 1 Yowanu 3:8.

9. Spiritu yamukaayi yinateli kutuluwañesha ñahi?

⁹ Neyi chekala mpepela yitonaña, spiritu yamukaayi niyena yatunyeñumuka. Neyi tubula kuzata nañovu kukaana iyi spiritu, yikutuluwañesha. (Tañenu Yishimu 4:23.) Chumichi chinateli kumwekena munjila jidi neyi jajiwahi, chidi neyi kwiteja kutuluwañesha nayitoñojoka niyilwilu yawantu abulaña kudifukula kudi Yehova. (Yishimu 13:20; 1 Akorinda15:33) Hela tunateli kuluwankana nayuma yidi neyi nyevulu yanzekesi, akwakusekesha hela kudiñija muyisela yakudibecha.—Talenu Mazu Adi Kunsa 18.

10. Tunateli kukaana ñahi spiritu yamukaayi?

¹⁰ Hanu dinu, tunateli kutondolwela ñahi kutuyuula kudi spiritu yamukaayi? Twatela kuswina kwakwihi naYehova nikwiteja maanindi kutulombola. Twatela kulomba spiritu yindi yajila nikwikala adikita mumudimu windi. Yehova diyi Muntu wañovu muyuma yejima yaleñeliyi. Tunakuhweleli netu wukutukwasha kukaana spiritu yamukaayi.—1 Yowanu 4:4.

11. Spiritu yamukaayi yinaleteshi antu kwikala nanvwalilu yamuchidinyi?

¹¹ Twamwekeshaña cheñi netu hitudi amukaayiku kuhitila munvwalilu yetu nimmwekenu yetu. Antu amavulu mukaayi avwalaña nawu ayimoni kulonda asañumuni akwawu mpwila yawuvumbi, amwekeshi nawu hiyakwakudikaña hela kumwekesha nawu akweti mali. Antu amakwawu akamenaña wanyi mmwekenu  yawu. Anateli kutondahu kumwekana majilu. Hitwatela kwiteja yilwilu yamuchidiwu kutuluwañesha munvwalilu yetu nimummwekenu yetuku.

12, 13. Yishinanyi yinateli kutukwasha hakutonda yakuvwala?

¹² Chineli tudi ambuña aYehova, mpinji yejima twatela kuvwalaña yakuvwala yashikila, yawunyonji, yakavumbi nawa yatelela kwesekeja nakutudi. Twavwalaña “nakalemesha nikutoñojoka mwamaana,” kulonda tumwekeshi ‘chitwamwakama Nzambi.’—1 Timotewu 2:9, 10; Yuda 21.

 ¹³ Nvwalilu yetu yinateli kuletesha antu kumulemesha Yehova niantu jindi hela nehi. Tunakukeña kwila “yuma yejima yikumulemesha Nzambi.” (1 Akorinda 10:31) Mukudizoza mwabombela kulemesha chinakutiyawu antu nikutiya chidi yitoñojoka yawu. Dichi neyi tunakutonda yakuvwala yitwatela kuvwala, twanukeña netu yakuvwala yitwatondaña yikuluwañeshaña antu hela nehi.—1 Akorinda 4:9; 2 Akorinda 6:3, 4; 7:1.

14. Chumanyi chitwatela kutoñojokahu etu akwaKristu neyi tunakutonda yakuvwala yitwatela kuvwala?

¹⁴ Twavwalaña ñahi neyi tudi kukupompa hela mumudimu wakushimwina? Komana nvwalilu yetu yaleteshaña antu asheña maana hadi etu? Komana nvwalilu yetu yatiyishaña antu nsonyi? Komana twatoñojokaña netu kwosi muntu watela kuhosha hanvwalilu yetu? (Afwilipi 4:5; 1 Petulu 5:6) Hela chochu, twakeñaña kumwekana chiwahi, ilaña yuma yatela kutumwekesha lubanji hiyilwilu yetu yawakwaKristu. Iyi diyi yilwilu yamonañayi Yehova mudi etu neyi yatutala. Yamwekeshaña chitwekala mukachi, ‘wuntu wakujinda wamumuchima, . . . , walema wuseya chikupu kumesu aNzambi.’—1 Petulu 3:3, 4.

15. Muloñadi Yehova chabulilayi kutuleja chitwatela kuvwala nichitwatela kumwekana?

¹⁵ Yehova hanatwinki jinshimbi kutalisha kuyuma yitwatela kuvwala hela kubula kuvwalaku. Hela chochu, watuloñeshela yishina yamuBayibolu, yinateli kutukwasha kutonda chiwahi. (Aheberu 5:14) Nakukeña nindi yuma yitwafuukulaña yishindameneña hakukeña kutwamukeña yena niakwetu chili yamaneni hela yanyanya. (Tañenu Maku 12:30, 31.) Kunyeñumuka kaayi kejima, antu jaYehova avwalaña chambukaku kwesekeja  nachisemwa chawu niyuma yakeñañawu. Mmwekenu yawu yekala yalubanji nawa yakuhizumwisha.

16. Chamonañawu antu mali mukaayi chinambuki ñahi nachatañishiliyi Yesu? Malwihwinyi itwatela kudihula?

¹⁶ Satana wakeñaña antu atoñojokeña nawu mali nimaheta diyi yuma yinateli kuyiletela muzañalu, ilaña ambuña aYehova eluka nawu iku hikutwamba. Twakuhwelela mazu aYesu akwila nawu: “Hela chakwila muntu wukweti yuma yayivulu nankashi, wumi windi hiwashindamena hayuma yahetayiku.” (Luka 12:15) Mali anateli kutuletela muzañalu wanyi. Hiyanateli kutwinka  amabwambu alala, kuwunda kwamuyitoñojoka hela wumi wahaya nyaakaku. Hela chochu, tunakukeña kwikala nayuma yakumujimba nikudiluñisha muchihandilu. Ilaña Yesu watulejeli nindi tunateli kwikala namuzañalu neyi twikala nawubwambu wawuwahi naNzambi nawa neyi tutwamijaku yuma yakuspiritu muchihandilu chetu. (Matewu 5:3; 6:22, tumazu twaheshina) Dihulenu nenu: ‘Komana ninami innakumona mali neyi chayimonañawu antu amukaayi? Komana nahoshaña nankashi hamali nikutoñojokahu?’—Luka 6:45; 21:34-36; 2 Yowanu 6.

17. Tunateli kwikala ñahi nachihandilu chachiwahi neyi tuleka kumona mali neyi chayimonañawu mukaayi?

¹⁷ Neyi tusha maana hakumukalakela Yehova nikubula kumona mali neyi chayimonañawu mukaayi, chihandilu chetu chikuwaha. (Matewu 11:29, 30) Tukumonaña yuma yitukweti netu yinashikili nawa tukwikala nakuwunda kwamuyitoñojoka nikwamumuchima. (Matewu 6:31, 32; Aroma 15:13) Tukuswejaña kwakama wanyi hayuma yakumujimba. (Tañenu 1 Timotewu 6:9, 10.) Tukudiluñishaña muzañalu wafumaña mukuhana. (Yilwilu 20:35) Nawa chihandilu chetu chikutukwashaña kwikala nampinji yakuhanjeka nawantu itwakeña. Cheñi tukukaamaña chiwahi.—Mukwakutaŋisha 5:12.

18. Satana nakukeña kwiladi hadi etu?

¹⁸ Satana nakukeña kumanisha wubwambu wetu naYehova dichi twatela kuzata nañovu kulonda tuwukiñi. Twazuñaña “namazaza awandemoni.” (Aefwesesa 6:12) Satana niandemoni jindi akeñaña wanyi etu kwikala namuzañalu hela kushakama haya nyaaka. (1 Petulu  5:8) Awa ayilumbu akweti ñovu anakuzuña nanetu, ilaña nawukwashu waYehova tunateli kushinda!

19. Mukanda waAefwesesa 6:14-18 wunalumbululi ñahi “yitwa yanjita” yamukwaKristu?

¹⁹ Kunyima, amashidika avwalileña yitwa yanjita kulonda adikiñi nachu hakuzuña. Munjila yoyimu, ninetu twatela kudimanyeka “yitwa yanjita” yatwinkayi Yehova. (Aefwesesa 6:13) Yinateli kutukiña. Iyi yitwa yanjita twayitañaña haAefwesesa 6:14-18 hahosha nawu: “Dichi, imanenu akola mbe-e, iku munakasi mushipi wachalala mumbunda yenu nawa vwalenu chuma chakujika hantulu chakuloña, nikuvwala nkwabilu kunyendu yenu yinakumwekesha nawu munadiloñeshi kushimwina nsañu yayiwahi yakuwunda. Kubombela hayuma yejimiyi, nonenu nkebu yeneni yachikuhwelelu, yimukutwesha kujima nachu nyivu yakesi yanowu watama. Cheñi, vwalenu kumutu wenu itepa dawamwinu, nawa sendenu mpoku yakabali yaspiritu muchikasa chenu, dikwila nawu mazu aNzambi, iku munakulomba mpinji yejima kulomba kwamboka-mboka nikulomba kwejima kwakulembelela kuhitila muspiritu.”

20. Chumanyi chitwatela kwila hakwila nawu “yitwa yanjita” yitukwasheña?

²⁰ Neyi mushidika yashiya chitwa chimu chanjita nawa yabula kuvwala kuchibalu chimu chamujimba, dihu hakumukatishilawu kudi chilumbu chindi. Neyi tunakukeña netu “yitwa yanjita” yitukiñi, hitwatela kuvulamenahu hela chimuku. Twatela kuyivwalaña mpinji yejima nikuyihemba chiwahi. Tukatwalekahu kuzuña sampu kaayi kaSatana anakijilumuni nawa Satana niandemoni jindi anayifumishi hamaseki. (Chimwekeshu 12:17; 20:1-3) Dichi neyi tunakulwisha  nayitoñojoka yatama hela nakuzeya-zeya kwetu hitwatela kuzeyaku!—1 Akorinda 9:27.

21. Tunateli kushinda ñahi?

²¹ Nkawetu, hitwekala akola kubadika Diyaboluku. Ilaña nawukwashu waYehova twakola. Hakwila nawu tutwalekihu kwikala ashinshika, twatela kumulomba Yehova, kudiza Izu dindi nikudikunda nawamanakwetu niahela. (Aheberu 10:24, 25) Kwila iyi yuma kukutukwasha kutwalekahu kwikala ashinshika kudi Nzambi nawa adiloñesha hakuhakwilaku chikuhwelelu chetu.

22, 23. (a) Tunateli kudiloñesha ñahi kuhakwilaku chikuhwelelu chetu mpinji yejima? (b) Tukahanjekadi mukapetulu kanalondelihu?

²² Twatela kwikala adiloñesha kuhakwilaku yuma yitwakuhwelela mpinji yejima. (Yowanu 15:19) Munsañu jikwawu, aYinsahu jaYehova elaña yuma yambukaku nayelañawu antu amakwawu. Dihulenu nenu: ‘Komana neluka muloña waweni chitwekalila ambukaku? Komana nakuhwelela nami chahosha Bayibolu ninduñu wamaana nikashinshi chalala? Komana nazañalalaña chinekala Chinsahu chaYehova? (Masamu 34:2; Matewu 10:32, 33) Komana nateli kulumbulwilaku antu yuma yinakuhwelela?’—Matewu 24:45; Yowanu 17:17; tañenu 1 Petulu 3:15.

²³ Tunadizi njila jashiyashana, nawa tuneluki chitunateli kwila hakwila twikali ambuka nakaayi. Ilaña mpinji jikwawu chekala chapela wanyi. Satana wafwilaña kutulawula nanyihetu yashiyashana. Muhetu wumu wazatishañayi hiyuma yakumanishilamu wuudi. Tunateli kutonda ñahi chiwahi yuma yakumanishilamu wuudi? Tukahanjekahu mukapetulu kanalondelihu.