1, 2. Yumanyi yitwatela kwiluka hadi Satana niandemoni jindi?

CHIHANDILU chikekala chachiwahi mwituña daYehova dadiha. Nkumininaku, tukashakamaña neyi chakeñeleñayi Nzambi. Ilaña yinu mpinji tunakushakama mwituña dinakuyuulawu kudi Satana niandemoni jindi. (2 Akorinda 4:4) Ekala kwoku hela chakwila twayimonaña wanyi nawa akweti ñovu chikupu.

² Mukanu kapetulu, tukudiza chitunateli kuswina kwakwihi naYehova nichitunateli kudikiña kudi Satana. Yehova watukana nindi wukutukwashañaku. Ilaña twatela kwiluka tufuta twazatishañayi Satana niandemoni jindi hakutuluwañesha nihakutulukuka.

3. Diyabolu wakeñaña kutwila chumanyi?

³ Satana wahoshaña nindi antu amukalakelaña Yehova muloña kudi yuma yakeñañawu nawa nindi tunateli kuleka kumukalakela Nzambi neyi yuma yitutamina. (Tañenu Yoba 2:4, 5.) Neyi muntu yamwekesha nindi nakukeña kumwiluka Yehova, Satana niandemoni jindi elukaña nawa akeñaña kumulekesha. Ahilaña neyi amona muntu nadihani kudi Yehova nikupapatishewa. Bayibolu yamwesekeja Diyabolu “[namutupa] wunakubuluma, wunakukeñakeña watela kudayi.” (1 Petulu 5:8)  Satana wakeñaña kuluwañesha wubwambu wetu naYehova.—Masamu 7:1, 2; 2 Timotewu 3:12.

4, 5. (a) Chumanyi chinateli kukañanyayi Satana kwila? (b) ‘Kudikaña naDiyabolu’ kwatalisha mudihi?

⁴ Hitwatela kumutiya woma Satana niandemoni jindiku. Bayi neyi Yehova watela kuyiteja kwila yuma yejima yinakukeñawu hadi etuku. Yehova wakana nindi “izaza deneni” dawakwaKristu alala dikapuluka ‘halukadi lwasweja.’ (Chimwekeshu 7:9, 14) Kwosi chuma chinateli kwilayi Diyabolu hakwila nindi alekeshi ichi  chuma kumwekanaku, muloña Yehova nakukiña antu Jindi.

⁵ Neyi tuswina kwakwihi naYehova, Satana wukutwesha wanyi kuluwañesha wubwambu wetu naNzambi. Izu daNzambi datukana nawu: ‘Yehova wudi nanenu chakala hohu mutwalekahu kwikala nayena.’ (2 Kushindulula 15:2; tañenu 1 Akorinda 10:13.) Amayala niambanda akunyima amavulu adi neyi Abeli, Enoki, Nowa, Sara niMosi, adikañili naDiyabolu chaswininiwu kwakwihi naYehova. (Aheberu 11:4-40) Dichitwatela kwila ninetu. Izu daNzambi datukana nawu “Dikañenu naDiyabolu, niyena wukuyitemuka.”—Yakoba 4:7.

6. Satana watulukukaña ñahi?

⁶ Hela chakwila Satana neluki nindi Yehova hakumwiteja kutwila chatamaku, wukwesekaña nañovu kulonda yazeyeshi wubwambu wetu naNzambi. Makonu, Diyabolu watulukukilaña munjila jamboka-mboka nawa wazatishaña tufuta twazatishiliyi muyaaka yakunyima. Tufuntanyi twenitu?

7. Muloñadi Satana chinakulukukilayi antu jaYehova?

⁷ Kapostolu Yowanu wasonekeli nindi: “Kaayi kejima kadi mumakasa awatama.” (1 Yowanu 5:19) Satana diyi wayuulaña kaayi kejima nawa nakukeña kutachika kuyuula niantu jaYehova. (Mika 4:1; Yowanu 15:19; Chimwekeshu 12:12, 17) Diyabolu neluki nindi nashali nakapinji kantesha hohu, dichi nakuzata nañovu kulonda yatuluwañeshi wejima wetu tubuli kwikala ashinshika kudi Nzambi. Mpinji yikwawu Diyabolu washikenaña kutulukuka, ilaña mpinji yikwawu watulukukaña chakadi etu kwiluka.

8. Chumanyi chatela kwilukayi mukwaKristu wejima?

 ⁸ Twatañaña haAefwesesa 6:12 netu: “Tunakulwisha [“kuzuña,” tumazu twaheshina] . . . namazaza awandemoni adi mumaluña amwiwulu.” MukwaKristu wejima wazuñaña naDiyabolu niandemoni jindi. Twatela kwiluka netu antu ejima adihanaña kudi Yehova adi muniyi njita. Mumukanda wayisonekeleliyi Aefwesesa, kapostolu Pawulu wayilembeleli akwaKristu kapampa kasatu nindi atela “kwimana akola mbe-e.”—Aefwesesa 6:11, 13, 14.

9. Satana niandemoni jindi akeñaña kutwila chumanyi?

⁹ Satana niandemoni jindi asekaña kutudimba munjila jashiyashana. Bayi tutachika kutoñojoka netu neyi tumushinda Satana munjila yimu yena hanateli kutushindila munjila yikwawuku. Diyabolu wakeñaña kwiluka hitwazeyela kulonda yeluki nyihetu yatela kuzatishayi. Ilaña bayi tufwa munyihetu yindiku, muloña Bayibolu yatulejaña nyihetu yaDiyabolu. (2 Akorinda 2:11; talenu Mazu Adi Kunsa 31.) Muhetu wumu wazatishañayi hiyandemoni.

10. (a) Andemoni hichumanyi? (b) Yehova wayimonaña ñahi andemoni?

¹⁰ Andemoni, mwabombela yuma yakupesha yaleteshaña muntu kudikunda nawandemoni yidi neyi kuhoña, wuloji, kukaya, hela kweseka kuhanjeka nawafu. Bayibolu yatulejaña nawu yuma mwadibombela andemoni ‘hiwuzondu’ nawa hitwatela kudibomba nawandemoni hampinji yoyimu nikudifukula kudi Yehovaku. (Kuhituluka 18:10-12; Chimwekeshu 21:8) AkwaKristu atela kutondolwela yuma yejima mwadibombela andemoni.—Aroma 12:9.

11. Chumanyi chinateli kufumamu neyi twiñija mutu mujakupesha?

 ¹¹ Satana weluka nindi neyi twakeña yuma yakupesha, chekalaña chaswayi kutukundamisha kudi andemoni. Chuma chejima munadibombeli andemoni, chinateli kukisañana wubwambu wetu naYehova.

12. Satana wesekaña ñahi kuluwañesha yitoñojoka yetu?

¹² Satana wesekaña kuluwañesha yitoñojoka yawantu. Washaña yitoñojoka yakujinoka mudi antu kulonda abalumuneña ‘yatama nawu yayiwahi yayiwahi nawu yatama.’ (Isaya 5:20) Diyabolu wahoshaña nindi kusoñamisha kwekala muBayibolu kwakwashanaña wanyi nawa nindi tunateli kwikala namuzañalu neyi tubula kulondela nshimbi jaNzambi.

13. Satana watandishili ñahi yitoñojoka yakujinooka?

¹³ Kutandisha yitoñojoka yakujinooka hinjila yimu yazatishañayi Satana. Hanashimbuli hatachikililiyi kuzatishayi iyi njila. Mwitempa daEdeni, washili yitoñojoka yakujinooka mudi Eva hamwihwiliyi nindi: “Chalala Nzambi nahoshi nindi, Nyitondu yejima yamwitempa bayi mwakayidyaku, tahindi?” (Kutachika 3:1) Kuhiñahu mumpinji yaYoba, Satana wamwihwili Yehova hamesu awañelu nindi: “Ochu Yoba wamwakama Nzambi chamukunkulu, tahindi?” (Yoba 1:9) Satana wamwilili Yesu hanyima yakupapatishewa nindi: “Neyi wudi mwana kaNzambi, ilaku awa malola abalumuki mankendi.”—Matewu 4:3.

14. Satana nateli kuluwañesha ñahi antu kutoñojoka nawu yuma mwadibombela andemoni yatama wanyi?

¹⁴ Diyabolu natwalekihu kutandisha yitoñojoka yakujinooka nimakonu. Waleteshaña antu kujinooka  neyi chakwila yuma yejima munadibombeli andemoni yatama kuhitila mukuyimwekesha neyi yayiwahi. AkwaKristu amakwawu niwena aneluki wanyi yuma yatama yinateli kufumamu. (2 Akorinda 11:3) Yumanyi yitunateli kwila hakwila tudikiñi? Tunateli kwila ñahi hakwila nawu Satana yabuli kutudimba natufuta twindi? Tuhanjekenu yuma yiyedi munateli kutudimbilayi: yisela nimpinji yinakutuukawu.

15. Yisela yinateli kutuletesha ñahi kudibomba nawandemoni?

¹⁵ Makonu, mumafwilimu amavulu, mumavidiyo, hamaTV, magemu ahakompyuta nihamaIntaneti munadibombeli andemoni, mamajiki niaspiritu atama. Amavulu amonaña iyi yuma nawu hiyinateli kuleta wubanji hela kukala kunateli kufuma mukwiteja andemoni muchihandilu chawuku. Muntu nateli kudibomba nawandemoni kuhitila mukushimuna yuma yakumbidi, kutaña nyifunda yamumakasa, nikuhoña. Diyabolu waluwañeshaña antu kubula kumona wubanji wudi muniyi yuma nikuyileñela ayimoneña neyi yakuzañalesha, yakusehesha nawa yayiha. Muntu nateli kutachika kutoñojoka nindi kwosi kukala kukufuma mukutala yuma munadibombeli andemoni hela aspiritu atama, chakala hohu nindi nakwilamu wanyi. Muloñadi iyi yitoñojoka chiyinatamini?—1 Akorinda 10:12.

16. Muloñadi chitwatela kutondolwela yisela mwadibombela aspiritu atama?

¹⁶ Satana niandemoni elukaña wanyi yuma yitunakutoñoka. Ilaña anateli kwiluka yuma yitwakeña nichitwatoñojokaña kuhitila mukumona yuma yitwatondaña  etu aweni niyisaka yetu, kushilahu niyisela yitwatondaña. Neyi tutonda mafwilimu, tumina hela nyikanda yahosha hadi akishi azakukaña, nyikayi, nyidimu yawandemoni, wuloji, yishimukulu hela yuma yadifwanaku, Satana niandemoni akwiluka nawu iyi yuma tunayikeñi. Dichi akukeña kutukundamisha chikupu kwakwihi nawandemoni.—Tañenu Añalija 6:7.

17. Satana nateli kuzatisha ñahi mpinji yitunakukeña kutuuka?

¹⁷ Satana nateli cheñi kuzatisha mpinji yitunakukeña netu atuuki kutudimba nachu. Antu amavulu makonu, anakukabakana nayikatu. Muntu nateli kweseka njila jajivulu jakumukilamu ilaña kukola nehi. (Maku 5: 25, 26) Nateli kuzeya chakwila wukukeña njila yidi yejima yakumukilamu. Ilaña etu akwaKristu, twatela kwikala asoñama kulonda tubuli kutonda njila munabombeli “ñovu jakupanda.”—Isaya 1:13 NWT.

18. Njilanyi yatela kutondolwelayi mukwaKristu?

¹⁸ Mumpinji yawaIsarela akushankulu, kudi antu amakwawu adiña nakuzatisha “ñovu jakupanda.” Yehova wayilejeli nindi: “Chimukuñolwela makasenu nukuyibutila mesu ami. Mwalala, hela mukuvulisha kulomba hinukutiyaku.” (Isaya 1:15) Toñojokenuhu, Yehova hadiña nakutiyilila kukulomba kwawuku! Hitunakukeña kwilahu chuma hela chimu chikuluwañesha wubwambu wetu naYehova nawa chikuletesha yabuleña kutukwashaku, sweje-e neyi tunakati. (Masamu 41:3) Dichi twatela kwiluka neyi njila yitunakukeña kutukilamu munadibombeli andemoni hela ñovu jawaspiritu atama. (Matewu 6:13) Neyi jinadibombelimu, bayi twitejaku!—Talenu Mazu Adi Kunsa 32.

19. Diyabolu natiyishi ñahi antu amavulu woma?

¹⁹ Antu amakwawu atoñojokaña nawu Diyabolu niandemoni hiyifwikija hohu, amakwawu eluka nawu ekala kwoku muloña wayuma yamonañawu muchihandilu. Antu amavulu atiyaña woma aspiritu atama nawa akuhwelela muyuma yabulaku. Amakwawu niwena atandishaña nsañu yawoma kuhitila mukuhosha yuma yatama chikupu yeleñawu andemoni hadi antu. Kakavulu, antu ayitiyaña kuwaha iyi nsañu nawa alejañaku niakwawu. Iyi nsañu yaleteshaña antu kutachika kumutiya Diyabolu woma.

20. Tunateli kutandisha ñahi nsañu yakutwamba yaSatana?

 ²⁰ Toñojokenu hanichi chuma, Satana nakukeña antu amutiyeña woma. (2 Atesalonika 2:9, 10) Hisakutwamba weluka chakuluwañesha yitoñojoka yawantu akuhwelela mudi andemoni nikuyiletesha akuhweleli yuma yabula kwikala yalala. Awa antu anateli kushimuna nsañu yinakutoñojokañawu nawu ayimweni nikutiya. Neyi antu asweja kuhosha haniyi nsañu, yikuswejelaku kutanda. Hitunakukeña kumukwashaku Satana kutandisha nsañu yindi yakutwambaku.—Yowanu 8:44; 2 Timotewu 2:16.

21. Yumanyi yitwatela kuhoshañahu chatela tuhosheña hadi andemoni?

²¹ Neyi muntu waYehova welilihu yuma mwadibombeleli andemoni, bayi yatachika kuleja akwawu iyi nsañuku. Antu jaYehova akeñaña wanyi kuyitiyisha woma nayuma yinateli kwila Diyabolu niandemoni jindi. Ilaña, twatela kusha maana hañovu yamwinkawu Yesu kudi Yehova. (Aheberu 12:2) Yesu hadiña nakuyileja atumbanji twindi nsañu yahosha hadi andemoniku. Washili maana haNsañu yaWanta “[nihanyidimu] yaNzambi yañovu.”—Yilwilu 2:11; Luka 8:1; Aroma 1:11, 12.

22. Munakufwila kwiladi?

²² Twatela kwanukaña netu Satana nakukeña kuluwañesha wubwambu wetu naYehova. Nakuzata nañovu hakwila yatuluwañeshi. Ilaña tuneluki tufunta twindi nawa tunafwili kutondolwela yuma yejima mwadibombela andemoni. ‘Bayi tumushila Diyabolu hakwiñilila’ kulonda yatuzeyeshiku. (Tañenu Aefwesesa 4:27.) Tukwikala akiñewa kutufuta twaDiyabolu nawa Yehova wukutukiñaña neyi tudikaña naDiyabolu.—Aefwesesa 6:11.