1, 2. Muwulu neyi mudi kukala komana dikwila nawu munakañanyi kuwuhemba? Lumbululenu.

WULU hichawaana chafuma kudi Yehova. Waleteshaña muntu kwikala namuzañalu. Hela chochu, muwulu wejima mwekalaña kukala. Mpinji yikwawu kukala kwamwekanaña neyi kwakamana wanyi chakwila nikukeña hakachi keyala namumbanda kwekalaña neyi chikwadiña wanyi.

² Dichi bayi tuhayama neyi tunakumona kukala muwulu wetu mumpinji mumpinjiku. Muloña kukala kweniku hikunakumwekesha nawu tunakañanyi kuhemba wulu wetuku. Niadisumbula adiña nakukala kweneni muwulu awana njila jakukoleshelamu wubwambu wawu nawa wulu wawu wakola. Elaña ñahi?

3, 4. Mpinji yikwawu yumanyi yinateli kumwekana muwulu?

³ Wulu wabombaña antu ayedi ambuka, muntu-himuntu kudi yuma yakeñayi niyahelayi, yuma yelukayi ninjila mwelilañayi yuma. Cheñi, hadaha awa eyala namumbanda afuma kuyitachi yashiyashana. Hahitaña mpinji nawa chakeñekaña kuzata nañovu hakwila nawu eyala namumbanda adiluki chiwahi.

 ⁴ Mukuhita kwampinji, awa adisumbula akutachika kusha muchima hakukala kukwetiwu chakwila kukeña kukufwomoka. Akumwekanaña neyi adishakaminaña hohu. Yumanyi yatela kwilawu yikuyikwasha kwikala anuñañana?

5. (a) Chumanyi chikumukwasha mukwaKristu kukeña nankashi mwinikwindi? (b) Kwesekeja naAheberu 13:4, wulu twatela kuwumona ñahi?

⁵ Yehova watwinkaña maana atukwashaña etu nienikwetu kukundama kwakwihi nayena nimwinikwetu. (Masamu 25:4; Isaya 48:17, 18) Watulejaña nindi: “Wulu wiikali walema kudi antu ejima.” (Aheberu 13:4) Chuma chimwalemesha dichuma chalema chikupu. Mwachikiñaña nikuchikwata namakasa ayedi. Dichinakukeñayi  Yehova nindi twikali naniyi yitoñojoka kutalisha hawulu.

6. Indi Matewu 19:4-6 yamwekeshaña ñahi Yehova chamonañayi wulu?

⁶ Yehova diyi wasumbwishili antu akusambila. Mwanindi, Yesu, nindi: “Enu komana kanda mutañeñahu dehi nawu owu wayileñeli kufuma kukutachika, wayileñeli iyala nimumbanda? Cheñi nawa kanda mutañeñahu dehi nawu: ‘Hamuloña wachumichi, iyala wakashiya tata yindi nimama yindi nakukakela ñodindi, nawa wejima wawu ayedi akekala mujimba wumu’? Dikwila nawu hiyadi cheñi ayediku, ilaña adi mujimba wumu. Dichi, chuma chinabombiyi Nzambi hamu, muntu bayi yachaambulaku.” (Matewu 19:4-6) Kufuma tuhu kutachi, Yehova wakeñeleña adisumbula kubula kudiseña. Wakeñeleña yisaka yishakameña hamu nakutiyañana.

7. Amayala niambanda atela kukoleshaña ñahi wulu wawu?

⁷ Hela chochu, adisumbula makonu anakumona kukala kweneni kubadika chichadiña kunyima. Mpinji jikwawu kukala kwayiswejelaña chakwila atoñojokaña nawu hiyakutwesha kushakama hamuku, adiseñaña. Ilaña yuma yikutuwahila neyi twiluka chamonañayi Yehova nsañu yawulu.—1 Yowanu 5:3.

8, 9. (a) Mpinjinyi yitwatela kwila mwatulejañayi Yehova hansañu yawulu? (b) Tukumwekesha ñahi netu wulu wetu twawilemesha nankashi?

⁸ Yuma yatulejañayi Yehova yatukwashaña nankashi. Neyi chitunamoni, watulejaña nindi: “Wulu wiikali walema.” (Aheberu 13:4; Mukwakutañisha 5:4) Dichi neyi  tukwilaña mwatulejañayi Yehova hela chakwila yuma yinakali, twakahetelamu nankashi.—1 Atesalonika 1:3; Aheberu 6:10.

⁹ Chineli wulu hichuma chitwalemesha, kwila twila chuma chidi chejima hela kuhosha mazu akuwukisañana nehi. Ilaña, tukufwilaña kukolesha wubwambu wetu namwinikwetu. Yumanyi yitwatela kwila?

10, 11. (a) Kukalanyi kweneni kwekala mudi adisumbula amakwawu? (b) Muloñadi chitukushila muchima munjila yitwahoshelañamu nawanfumwetu hela nawañodetu?

¹⁰ Muntu nateli kuneñesha mwinikwindi munjila jajivulu. Tweluka netu akwaKristu hiyatela kuhumpula enikwawu hela kwila chuma chikuyisha muwubanjiku. Kubombelahu, tunateli kudikatisha munhoshelu. Mazu adi neyi yitwa. Mumbanda wumu nindi: “Nfumwami wankatishaña munhoshelu. Hamujimba wami hosi yibata, ilaña nhoshelu yindi yakasawuntu, wukutiya nindi ‘Wudi luchiteli!’ nawa nindi ‘Wudi wamukunkulwayi!’ mwani yanneñeshaña.” Iyala wumu nindi ñodindi wamuneñeshaña nankashi nanhoshelu yindi nikumutañola. Wahosheli nindi: “Yuma yanlejañayi kwila niyihosha kudi antu nehi. Dichinabulilaña kuhosha nindi nawa dichinafuntilaña hetala wufuku kufuma kumudimu. Kumudimu kwawahañaku kubadika hetala.” Kasawuntu, nhoshelu yakuseñula niyuma yabula kutelela yaneñeshaña antu, yinatandi nankashi.

¹¹ Neyi eyala namumbanda akudihosholaña, akwikala nayilonda yashimbulaña kukusuka munyichima. Yehova hanakukeña nindi adisumbula adikabisheña  muniyi njilaku. Mpinji jikwawu munenzi mumuneñeshi mwinikwenu chakadi enu kwiluka. Hadaha mukwila nenu mwahoshaña chiwahi kudi mwinikwenu, hanu dinu mwinikwenu watiyaña ñahi kumuchima? Neyi yuma yimunahoshi yinamutapi kumuchima, kwiji mukukeña kuhimpa?—Añalija 5:15; tañenu Aefwesesa 4:31.

12. Chumanyi chinateli kuletesha muntu wudi muwulu kubula kwikala ibwambu kumana daYehova?

¹² Yehova wamonaña chimwahoshaña namwinikwenu hadi antu hela kumbadi. (Tañenu 1 Petulu 3:7.) Mukanda waYakoba 1:26 watulejaña nawu: “Neyi muntu wadimonaña nindi himukwakudifukula kudi Nzambi,  ilaña hayuulaña idimi dindiku, dikwila nawu nakudimba muchima windi yomweni, nawa kudifukula kwindi kwamukunkulwayi.”

13. Njilanyi yikwawu adi muwulu munateli kuneñeshelawu mwinikwawu?

¹³ Kudi yuma yikwawu yatela kubula kwilawu adisumbula kulonda abuleña kudineñesha. Chakutalilahu, mwinikwenu wukutiya ñahi neyi mutachika kuhanjeka namuntu wacheñi mpinji yeneni? Hela chakwila chuma chimunakwila chatama wanyi, hadaha munakushimwina nindi hela munakumukwasha hakukala kukwetiyi, komana mwinikwenu wukuneña? Muhela wumu wasumbuka nindi: “Chankataña kumuchima hakumona nfumwami nashi nankashi muchima hadi muhela wacheñi muchipompelu. Natoñojokaña nami iwu muhela wambadika kulema.”

14. (a) Chumanyi chitwadizilañaku haKutachika 2:24? (b) Twatela kudihula netudi?

¹⁴ Chineli tudi akwaKristu, twatela kuyisha muchima anvwali jetu, amanakwetu niahela muchipompelu. Ilaña chitweñila muwulu, tukusha nankashi muchima hadi nfumwetu hela ñodetu. Yehova wahosheli nindi iyala ‘wakakakela ñodindi.’ (Kutachika 2:24) Twatela kusha nankashi muchima hayuma yakeñañayi mwinikwetu. Dihulenu nenu: ‘Nekalaña nampinji yakwikala namwinikwami? Namusha muchima? Komana namwekeshaña nami namukeña?’

15. Muloñadi akwaKristu adisumbula chatondolwelañawu kudikunda nankashi namuntu wabula kwikala mwinikwawu?

¹⁵ Chitwasweja kudikunda namuntu wunabuli kwikala mwinikwetu, wulu wetu wukwikala mwiyena. Yitoñojoka yetu yikwikala hadi yena nawa tukutachika  kumufwila. (Matewu 5:28) Yitoñojoka yamuchidiwu chiyasweja yikuyiletesha mwili chuma chikusawula wulu wenu.

16. Lushimbinyi lwashimunawu muBayibolu hansañu yawulu?

¹⁶ Hanyima yakuhosha nawu: “Wulu wikali walema,” Bayibolu nayu: ‘Kadidi kawulu bayi katamishewaku, muloña Nzambi wakasompesha ayivumbi niakwawujila.’ (Aheberu 13:4) Izu dakwila nawu ‘kadidi kawulu’ datalisha kukubulakana kweyala nañodindi. (Yishimu 5:18) Twatela kwiladi kulonda tumwekeshi netu twalemesha wulu wetu nawa netu hitunakukeña kuwutamishaku?

17. (a) Antu amavulu atoñojokaña nawudi hansañu yawuvumbi? (b) Indi akwaKristu awumonaña ñahi wuvumbi?

¹⁷ Antu amakwawu atoñojokaña nawu kushiya mwinikweyi nakutala mesu hadi wacheñi chatama wanyi. Etu bayi twiteja antu amuchidiwu atuluwañeshiku. Yehova washimuna hatooka nindi wahela wujila niwuvumbi. (Tañenu Aroma 12:9; Aheberu 10:31; 12:29) Dichi neyi tukukaama namuntu wunabuli kwikala mwinikwetu, tunakutamisha wulu wetu. Tukumwekesha netu twalemesha nshimbi jaYehova wanyi, niwubwambu wetu nayena wukutama. Dichi bayi twilahu chuma hela chimu chikuletesha twili wuvumbiku. Nawa bayi tutoñojokeña jakukaama namuntu wacheñiku.—Yoba 31:1.

18. (a) Muloñadi wuvumbi chitukuwesekejela nakupesha ankishi? (b) Yehova wamonaña ñahi wuvumbi?

¹⁸ Kunyima muNshimbi jaMosi, kwila wuvumbi wadiña himuloña weneni neyi wakupesha ankishi. Antu elileña wuvumbi nikupesha ayijahileña. (Alevi 20: 2, 10) Indi wuvumbi wadifwanini ñahi nakupesha ankishi? Neyi kaIsarela nakupesha ankishi, wafumpileña chikaninu chakwikala washinshika kudi Yehova. Neyi yela wuvumbi, wafumpileña chikaninu chakwikala washinshika kudi mwinikwindi. (Kwidika 19:5, 6; Kuhituluka 5:9; tañenu Malaki 2:14.) Mwamweni, kunyima Yehova wamweneña wuvumbi nindi hinshidi yeneni nankashi.

19. Chumanyi chikutukwasha kulonda tubuli kwila wuvumbi?

¹⁹ Indi makonu? Hela hitudi muNshimbi jaMosiku, yitoñojoka yaYehova kutalisha hawuvumbi yahimpika wanyi. Chochitwabulaña kupesha ankishi, dichitukubula nikukaama namuntu wacheñi. (Masamu 51:1, 4; Akolosi 3:5) Muloña neyi tukwilamu, tukusawula wulu wetu niNzambi yetu, Yehova.—Talenu Mazu Adi Kunsa 26.

20. Kwikala namaana kunateli kuwahisha ñahi wulu?

²⁰ Tunateli kukolesha ñahi wulu wetu? Izu daNzambi dahoshaña nawu: ‘Itala adituñaña namaana, nawa adikoleshaña nakashinshi.’ (Yishimu 24:3) Itala dinateli kwikala datama hela dadiwahi. Dichidi niwulu. Muntu wamaana watela kuzata nañovu kulonda wulu windi wikali wakola nawa wawuwahi.

21. Indi kwiluka kunateli kukolesha ñahi wulu?

²¹ Kutalisha kunidi itala, Bayibolu yatwalekahu nawu: ‘Kwiluka dikwenzeshaña mutupeka twadu maheta ejima alema nawa amawahi.’ (Yishimu 24:4) Yuma yimunakudiza Mwizu daNzambi yinateli kuwahisha wulu wenu. (Aroma 12:2; Afwilipi 1:9) Neyi munakutaña Bayibolu ninyikanda yetu hamu namwinikwenu,  hanjekenu chimunateli kuzatisha yuma yimunakudiza. Toñojokenuña chimunateli kudimwekeshela kukeña nikalemesha, nichakudakamena nikuditoñojokelaku. Lombenuña kudi Yehova kulonda yayikwashi kwikala nayilwilu yikukolesha wulu wenu kulonda mwinikwenu yasweji kuyikeña.—Yishimu 15:16, 17; 1 Petulu 1:7.

22. Muloñadi chitwatela kumwekeshela kukeña nikalemesha kudi mwinikwetu?

²² Tudishenuku chikupu kulonda tumwekesheña netu enikwetu twayikeña nawa twayilemesha. Neyi twila mwenimu, muwulu wetu mwakekala muzañalu nawa wakakola. Sweje-e dinu, twakamuzañalesha Yehova.—Masamu 147:11; Aroma 12:10.