1-3. (a) Chawaananyi chachiwahi chatwinkayi Yehova? Tunateli kuchizatisha ñahi chatama? (b) Tunateli kuzatisha ñahi chawaana chakuhosha?

TATA YAWANTU namwinki mwanindi weyala nkinga. Nazañalali chikupu chinamwinkiyi mwanindi ichi chawaana. Indi neyi mwana yendesha nkinga chatama nawa yachika muntu nikumukatisha? Tata yindi wukutiya ñahi?

² Yehova diyi Mukwakuhana “yawaana yayiwahi yejima niyawaana yabadika kuwaha yejima.” (Yakoba 1:17) Wuswa wakuhosha wudi hakachi kaniyi yawaana yatwinkayi. Chawaana chakuhosha chatukwashaña kushimuna chitunakutoñojoka nichitunakutiya. Twatweshaña kuhosha yuma yakwashaña antu nikuyitiyisha kuwaha. Ilaña mazu itwahoshaña anateli cheñi kuneñesha antu nikuyitiyisha kutama.

³ Mazu itwahoshaña akweti ñovu chikupu nawa Yehova watudizishaña kuzatisha chiwahi chawaana chakuhosha. Watulejaña nindi: “Mukanwa kenu bayi mwidika mazu atokaku, chiña amawahi hohu, anateli kutuña akwenu hampinji yinakukeñawu kuyikwasha kulonda  atweshi kuhetesha antiyilili.” (Aefwesesa 4:29) Tushinshikenu chitunateli kuzatisha ichi chawaana chafuma kudi Nzambi munjila mutunateli kumuzañaleshela nikukolesha amakwawu.

4, 5. Yishimu yamuBayibolu yatudizishañadi kutalisha hañovu yekala mumazu?

⁴ Mazu akweti ñovu, dichi twatela kwikala asoñama namazu itwahoshaña nichitwayihoshaña. Yishimu 15:4 yahosha nawu: “Idimi dakoleshaña akwawu himutondu wawumi; ilaña daluwalala dabalulaña muchima wamuntu.” Neyi chochitwatiyaña kuwaha neyi tudi muwulelu wamutondu nimazu amawahi atiyishaña kuwaha antu anakuyitiya. Munjila yikwawu, mazu atama akatishaña antu nikuyileñela kutiya kutama.—Yishimu 18:21.

⁵ Yishimu 12:18 yahosha nawu: “Kwekala muntu wahoshaña mazu akutuboka neyi wudi nakukutapola mpoku yakabali.” Kuhosha mazu atama kunateli kuleñela muntu kutiya chikela nawa kunateli kumanisha wubwambu. Hadaha munakwanuka mpinji yayihosheliwu mazu atama nakuyineñesha chikupu. Hela chochu, ichi chishimu chatwalekahu nawu: “Madimi awakwamaana akoleshaña antu.” Mazu amawahi anateli kukolesha muchima wunabaluki nikuleñela antu ambukili muloña wakubula kutiyashana kwikala amabwambu cheñi. (Tañenu Yishimu 16:24.) Neyi twiluka netu mazu etu anateli kuneñesha antu, tukuyizatishaña chiwahi.

6. Muloñadi chichinateli kwikala chakala kuyuula nhoshelu yetu?

⁶ Muloña wukwawu wutwatela kwikalila asoñama nanhoshelu yetu wudi wakwila nawu twawanina wanyi. “Kufuukula kwamumuchima wamuntu kwatama,”  nawa mazu itwahoshaña amwekeshaña jidi mumuchima wetu. (Kutachika 8:21; Luka 6:45) Chinateli kutukalila kuyuula nhoshelu yetu. (Tañenu Yakoba 3:2-4.) Ilaña twatela kuzata nañovu kulonda tuhosheña chiwahi nawakwetu.

7, 8. Nhoshelu yetu yinateli kuleñela wubwambu wetu naYehova kwila ñahi?

⁷ Cheñi twatela kwikala asoñama nanhoshelu yetu muloña twakalumbulula kudi Yehova hayuma yitwahoshaña ninjila mutwayihoshelaña. Yakoba 1:26 yahosha nawu: “Dichi neyi muntu wadimonaña nindi himukwakudifukula kudi Nzambi, ilaña hayuulaña idimi dindiku, dikwila nawu nakudimba muchima windi yomweni, nawa kudifukula kwindi kwamukunkulwayi.” Dichi neyi twahembaña nhoshelu yetu wanyi, wubwambu wetu naYehova wunateli kumana.—Yakoba 3:8-10.

 ⁸ Chakadi nikujina, tukweti wunsahu watela kutukwasha kwikala asoñama nanhoshelu yetu nichitwayihoshaña. Chuma chinateli kutukwasha kuzatisha chiwahi nhoshelu yetu kwesekeja nachakeñañayi Yehova, hikwiluka chakuhosha.

9, 10. (a) Nhoshelwinyi yinavuli makonu mukaayi? (b) Chumanyi chaleteshaña tutondolweleña nhoshelu yawuzondu?

⁹ Nhoshelu yawuzondu diyi nhoshelu yidiku makonu. Amavulu atoñojokaña nawu atela kusanyika nikuzatisha nhoshelu yamatuka kulonda amwekeshi nawu anakuhosha mwalala. Antu elaña maleñu kakavulu azatishaña nhoshelu yatama yakusensekesha nawa yawuzondu kulonda asehesheña antu. Hela chochu, kapostolu Pawulu wahosheli nindi: “Mwatela kuleka yuma yejimiyi: kuzuwa, kuhila, kutama, nawa nhoshelu yakasawuntu ninhoshelu yawuzondu bayi jifumaña mukanwa kenuku.” (Akolosi 3:8) Wahosheli cheñi nindi, “kusenseka kwawuzondu” hiyatela ‘kukwiteja hakachi’ kawakwaKristu alalaku.—Aefwesesa 5:3, 4.

¹⁰ Nhoshelu yawuzondu yamuneñeshaña Yehova niantu amukeña. Yekala yatama chikupu. MuBayibolu “wuzondu” awibombela “[ku]nyidimu yamujimba wanshidi.” (Añalija 5:19-21) ‘Muwuzondu’ munateli kwikala nshidi jajivulu, nawa nshidi yimu yinateli kuleta yikwawu. Neyi muntu wekala nachaaku chakuhosha nhoshelu yawuzondu nawa nakukaana kuleka, hatela kwikala muchipompeluku.—2 Akorinda 12:21; Aefwesesa 4:19; talenu Mazu Adi Kunsa 23.

11, 12. (a) Matuñu hichumanyi? (b) Muloñadi chitunateli kubulila kutwambila muntu?

¹¹ Twatela kutondolwela cheñi matuñu. Chachiwahi  kwakamena akwetu nikuhanjeka chinakuhandawu niyisaka yawu. Nimumafuku awapostolu, akwaKristu akusambila akeñeleña kwiluka chinakuhandawu amanakwetu niahela nichateleliwu kuyikwasha. (Aefwesesa 6:21, 22; Akolosi 4:8, 9) Ilaña chaswayi kuhimpa nsañu yitunakuhosha hadi antu amakwawu nakwikala matuñu. Neyi tutwalekahu nakutuñula antu, tukutwamba nawa tukuhosha nsañu yakajindilu. Neyi kubabala nehi, nsañu yamuchidiwu yinateli kwikala yakutwamba. Afwarisi amutwambilili Yesu chelili amwinki muloña hayuma yabulili kukoñayi. (Matewu 9:32-34; 12:22-24) Kutwamba kwatamishaña yilwilu yamuntu, kwakwojejaña kutoboka, kuneña, nawa kwamanishaña wubwambu.—Yishimu 26:20.

¹² Yehova wakeñaña nindi tuzatisheña mazu etu kulonda tukolesheña antu, bayi kuyibalumuna ekali ayilumbuku. Yehova wahela muntu “waleteshaña yikonkojola kudi antu evumu dimu.” (Yishimu 6:16-19) Mukwakutwamba watachi wadiña Satana Diyabolu, wamutwambilili Nzambi. (Chimwekeshu 12:9, 10) Makonu, chinekali chaswayi antu mukaayi kuditwambila wumu namukwawu. Ilaña ichi hichatela kumwekana muchipompelu chawakwaKristuku. (Añalija 5:19-21) Dichi twatela kwikala asoñama nachitwahoshaña nikutoñojoka mpinji yejima henohu kanda tuhoshi. Henohu kanda muhoshi mazu ahosha muntu, dihulenu nenu: ‘Mwalala mazu inakukeña kuhosha diwu ahoshayi? Chinateleli? Chinateli kukwashana? Komana nateli kukeña muntu inakuhoshahu kutiyaku jinnakuhosha? Nukutiya ñahi neyi muntu yahosha ichi hadi ami?’—Tañenu 1 Atesalonika 4:11.

13, 14. (a) Antu anateli kutiya ñahi nanhoshelu yakasawuntu? (b) Muloñadi akwaKristu chatela kutondolwelawu kutukana?

 ¹³ Mpinji jikwawu, tunateli kuhosha yuma yitwenzaña nakuditoñesha. Ilaña hitunakukeña kwikala nachilwilu chakutadikisha amakwawu, kuyihosha mazu abula kutelela hela atamaku. Hitwatela kuzatishaña nhoshelu yakasawuntu muchihandilu chetuku. Pawulu wahosheli nindi: “Lekenu nkunyi yejima, kuhila, kuzuwa, kuzazoka [ninhoshelu] yakasawuntu.” (Aefwesesa 4:31) MaBayibolu amakwawu izu dakwila nawu “nhoshelu yakasawuntu” adibalumuna nawu, “mazu atama,” “kasawuntu,” “ninhoshelu yamatuka.” Nhoshelu yakasawuntu yaleñelaña muntu kudimona nindi wamukunkulwayi nawa washikilamu wanyi. Anyana anateli kuneña swayi, dichi twatela kwikala ababala kulonda tubuli kuyikatisha namazu etu.—Akolosi 3:21.

¹⁴ Bayibolu yatusoñamishaña kubula kuzatisha nhoshelu yakasawuntu hela kutukana. Muntu neyi nakutukana dikwila nawu nakukeña kuneñesha wenowu antu anakutukayi. Chinateli kutama nankashi neyi chakwila kudi muntu welili mwenimu kudi mwinikwindi hela anyanindi. Mwalala, neyi muntu yatwalekahu kutuka akwawu hanateli kwikala muchipompeluku. (1 Akorinda 5:11-13; 6:9, 10) Neyi chitunadizi, neyi tuhoshaña nhoshelu yawuzondu, yakutwamba hela yabula kutelela, wubwambu wetu naYehova wunateli kumana ninawakwetu.

15. Nhoshelwinyi yakoleshaña wubwambu?

¹⁵ Tunateli kuzatisha ñahi chawaana chetu chakuhosha kwesekeja nachakeñañayi Yehova? Hela chakwila Bayibolu yatuleja wanyi chitwatela kuhosha nikubula  kuhosha, ilaña yatulejaña nawu tuhosheña mazu ‘anateli kutuña akwetu.’ (Aefwesesa 4:29) Mazu anateli kutuña ekala amawahi, aluwi nawa alala. Yehova wakeñaña nindi tukolesheña nikukwasha akwetu namazu etu. Chinateli kwikala chakala. Chakeñekaña kuzata nañovu hakwila nawu tuhosheña mazu amawahi chatela tuhoshi mazu atama. (Titusa 2:8) Tuhanjekenu jinjila mutunateli kukoleshela antu namazu etu itwahoshaña.

16, 17. (a) Muloñadi chitwatela kuhamekela antu? (b) Anyi itwatela kuhameka?

¹⁶ Yehova niYesu ahamekaña antu. Tuyimbujoleña. (Matewu 3:17; 25:19-23; Yowanu 1:47) Kuhameka kwakukolesha muntu kwabombelamu kumutoñojokelaku nikumwekesha nawu twamwakamenaña. Yishimu 15:23 yahosha nawu, “Izu dakuhoshela hadu hidinateleli o chidawaha!” Twatiyaña kuwaha neyi muntu yatuhameka hamudimu wutunazati hela hayuma yimu yituneli.—Tañenu Matewu 7:12; talenu Mazu Adi Kunsa 27.

¹⁷ Neyi tumonaña yuma yayiwahi mudi akwetu, chikwikala chaswayi kuyihameka chakufuma hamuchima. Chakutalilahu, hadaha munateli kumona nenu muchipompelu mudi muntu waloñeshaña chiwahi mpanji hela wazataña nañovu kulonda yakulihu. Kansi nateli kwikala mukwakuhakwilaku chalala kushikola, hela mukulumpi nateli kwikala wadikita chikupu mumudimu wakushimwina. Muntu wamuchidiwu nateli kukeña kumuhameka namazu enu. Chalema nankashi iyala kuleja ñodindi nindi wamukeña nawa wamulemesha. (Yishimu 31:10, 28) Neyi chochakeñaña mutondu chejeji nimenji, antu niwena akeñaña kuyihameka. Chumichi chakeñekaña nikudi anyana. Wanenuhu njila yimwatela kuyihamekelamu hayilwilu yawu yayiwahi nihañovu  jawu. Kuyihameka kunateli kuyileñela kwikala ahamuka nawa kunateli kuyiletesha kuzata nañovu kulonda eleña yuma yayiwahi.

18, 19. Muloñadi chitwatela kuzata nañovu kulonda tukoleshi nikukundeja antu? Tunateli kwila ñahi mwenimu?

¹⁸ Twamwimbujolaña Yehova neyi tukolesha nikukundeja antu. Wakamenaña nankashi muntu “wadizoza” nawa “wukweti muchima wachikeka.” (Isaya 57:15) Yehova wakeñaña nindi “[tudikolesheña] wumu namukwawu” ‘nikukundeja antu ananeñi.’ (1 Atesalonika 5:11, 14) Wamonaña neyi twila mwenimu nawa wahamekaña.

 ¹⁹ Munateli kumona nenu muntu muchipompelu nazeyi hela naneñi. Mazwinyi imukuhosha anateli kumukwasha? Kwila mumanisha kukala kwindi nehi, ilaña mwatela kwilahu chuma kulonda yamoni nindi mwamwakamenaña. Chakutalilahu, munateli kushakama nindi hamu nakuhanjeka. Munateli kutañahu nindi mavasi amuBayibolu nikulomba. (Masamu 34:18; Matewu 10:29-31) Mulejenu nenu amanakwetu niahela muchipompelu amukeña. (1 Akorinda 12:12-26; Yakoba 5:14, 15) Nawa hoshenu munjila yinateli kumwekesha nawu mumunahoshi mwalala nawa munakuhwelelimu.—Tañenu Yishimu 12:25.

20, 21. Chumanyi chaleteshaña antu kwiteja kufumba?

 ²⁰ Twatuñaña cheñi akwetu neyi tuyifumbaña chiwahi. Chineli twawanina wanyi, mpinji yidi yejima twakeñaña kutufumba. Yishimu 19:20 yahosha nawu: “Tiyaku mwakukulejawu, itejaku kukufumba kulonda wakekali namaana kukukuminina kweyi.” Akulumpi hidiwu hohu anateli kukwasha muntu hela kumufumbaku. Anvwali atela kufumba anyanawu. (Aefwesesa 6:4) Nawa ahela niwena atela kudikwasha wumu namukwawu. (Titusa 2:3-5) Chineli twayikeña amanakwetu niahela, tunakukeña kuyikwasha munjila yinateli kubula kuyineñesha. Chumanyi chinateli kutukwasha?

²¹ Hadaha munakwanuka mpinji yayikwashiliwu chiwahi chakwila chayitiyishili kuwaha. Chumanyi chatiyishili kuwaha? Hadaha mwatiyili nenu muntu wayifumbileña wayakamenaña. Indi kwiji muntu wayifumbileña wahosheleña naluwi nawa nakukeña. (Akolosi 4:6) Mwalala, kufumba kwakweni kwashindameneni haBayibolu. (2 Timotewu 3:16) Hela chakwila tunakuhosha mazu ekala muBayibolu hela nehi, twatela kuzatisha Nsona hakufumba kudi kwejima. Kwosi watela kukanjikija akwawu nindi atiyi munakuhoshayi hela kuzatisha Nsona chatama kulonda etejiku. Kwanuka chayifumbiliwu kunateli kuyikwasha ninenu hampinji yimunakufumba akwenu.

22. Mukukeña kuzatisha ñahi chawaana chenu chakuhosha?

²² Kuhosha hichawaana chafuma kudi Nzambi. Kukeña kutwamukeña kukutuletesha kuzatisha ichi chawaana chiwahi. Anukenu nenu mazu akweti ñovu yakuneñesha muntu hela kumutuña. Dichi, tuzatenu nañovu kulonda tuzatisheña mazu etu munjila yakukolesha akwetu.