1, 2. Yehova watiyaña ñahi neyi tuzata nañovu kwikala ashinshika?

MWANA chinakuyayi kwitala kufuma kushikola, nawani fuba yamali yidi heseki. Wukwila ñahi? Nateli kudiswekela. Ilaña namutwalili yomweni fuba yamali. Mama yindi chinatiyiyi iyi nsañu, natiyi kuwaha.

² Anvwali atiyaña kuwaha neyi anyanawu ekala ashinshika. Tata yetu wamwiwulu, Yehova, hiNzambi “yansañu yalala,” nawa watiyaña kuwaha neyi twikala ashinshika. (Masamu 31:5) Tunakukeña kumuzañalesha nikufwila “kwikala ashinshika muyuma yejima.” (Aheberu 13:18) Tuhanjekenu yuma yiwana munateli kutukalila kumwekesha kashinshi. Nawa tukuhanjeka yuma yayiwahi yinateli kufumamu neyi tumwekesha kashinshi.

3-5. (a) Tunateli kwikala ñahi ashinshika kudi etu aweni? (b) Yumanyi yinateli kutukwasha kwikala ashinshika kudi etu aweni?

³ Hakwila nawu twikali ashinshika kudi akwetu, twatela kusambila kwikala ashinshika kudi etu aweni. Ichi chuma hichapelaku. Muyaaka nkulakaji yakusambila, amanakwetu muchipompelu chamuLayodikeya atoñojokeleña nawu anakumuzañalesha Nzambi iku hiyadiña nakumuzañaleshaku. (Chimwekeshu 3:17) Ninetu  tunateli kutoñojoka netu tunakwila yuma yayiwahi, komana nehi.

⁴ Kambanji Yakoba walumbulwili nindi: “Dichi neyi muntu wadimonaña nindi himukwakudifukula kudi Nzambi, ilaña hayuulaña idimi dindiku, dikwila nawu nakudimba muchima windi yomweni, nawa kudifukula kwindi kwamukunkulwayi.” (Yakoba 1:26) Chaluwa kutoñojoka netu Nzambi wukuhila wanyi neyi twila yuma yatama hela tutwamba chineli twakoñeli yuma yayiwahi kunyima. Yumanyi yinateli kutukwasha kubula kutoñojoka muniyi njila?

⁵ Neyi tutala muchibanjilu, tukudimona chitwekala kumesu. Ilaña neyi tutaña Bayibolu, tukudimona chitwekala mukachi. Bayibolu yinateli kutukwasha kwiluka hitwakolela nihitwazeyela. Twelukaña chitwatela kuhimpa muyitoñojoka, muyilwilu nimunhoshelu yetu. (Tañenu Yakoba 1:23-25.) Ilaña neyi tudimonaña netu twaluwañeshaña wanyi, hitukuhimpa mutwaluwañeshañaku. Dichi twatela kuzatishaña Bayibolu kulonda tudilukeña chitwekala. (Mukeña 3:40; Hagayi 1:5) Kulomba nikwena kwatukwashaña kwiluka chitwekala. Twatela kumwihula Yehova mukulomba yatushinshiki nikutukwasha kumona yiluwa yetu kulonda tuzatilihu. (Masamu 139:23, 24) Tweluka netu “Yehova [wamonaña] muntu waheña, nindi hichishimashima; ilaña Yena wayaña hampuña nawakwakwoloka.”—Yishimu 3:32.

6. Muloñadi adisumbula chatela kwikalila ashinshika kudi wumu namukwawu?

⁶ Kashinshi kakeñekaña muchisaka. Neyi adisumbula ekala ashinshika kudi wumu namukwawu, ekalaña  akiñewa nawa akudikuhwelela. Neyi muwulu mubula kashinshi, mwafumaña yuma yayivulu. Chakutalilahu, muntu wudi muwulu nateli kutachika kukenkamina muntu wacheñi hela kutala nyevulu yanzekesi indi kwiji kwikala nakajila hambadi. Talenu ñimbi yamasamu chahosheliyi: “Hinashakami hamu nawantu amaswimbuku; hinukwiñila mwaduwu akwakujinda nsañuku.” (Masamu 26:4) Neyi kwikala ashinshika munhoshelu yenu namwinikwenu nehi, wulu wenu wukwikala mukukala.

7, 8. Munateli kuzatisha ñahi Bayibolu kudizisha anyanenu kwiluka kulema kwakwikala ashinshika?

⁷ Anyana niwena atela kwiluka nawu kashinshi  hichilwilu chalema chikupu. Anvwali anateli kuzatisha Bayibolu kuyidizisha anyanawu ichi chilwilu. Mudi yakutalilahu yawantu abulili kwikala ashinshika: Akani, wekalili ikombi; Gehazi, watwambili kulonda yasendi mali; nawa Yudasi, weyili mali nawa wamufukejeleli Yesu  namawayawaya 30 asiliva.—Yoshuwa 6:17-19; 7:11-25; 2 Anyanta 5:14-16, 20-27; Matewu 26:14, 15; Yowanu 12:6.

⁸ MuBayibolu mwekala cheñi yakutalilahu yawantu adiña ashinshika: Yakoba, wayilejeli anyanindi kufuntisha mali awaniniwu, Yefwata nimwanindi, ahembeli mwamukaniniwu Nzambi, Yesu niyena, wadiña washinshika nimumpinji jakala. (Kutachika 43:12; Ansompeshi 11:30-40; Yowanu 18:3-11) Iyi yakutalilahu, yinateli kukwasha anyana kwiluka kulema kwakwikala ashinshika.

9. Anvwali anateli kukwasha ñahi anyanawu neyi wena ekala ashinshika?

⁹ Anvwali anateli kudizila kunichi chishina chalema chamuBayibolu: “Dichi eyi watañishaña mukwenu, waditañishaña eyi aweni tahindi? Eyi welaña neyi, ‘Bayi wiyaku,’ eyi weyaña tahindi?” (Aroma 2:21) Anyana elukaña neyi anvwali anakuhosha hachuma ilaña anakwila jacheñi. Neyi tuyileja anyanetu netu atela kwikala ashinshika ilaña etu aweni kwikala ashinshika nehi, anyana akuluwankana. Neyi anyana eluka nawu anvwali jawu atwambaña, nimutuyuma twanyanya, niwena akutwambaña. (Tañenu Luka 16:10.) Munjila yoyimu, neyi anyana amona nawu anvwali jawu ashinshika, akuyikuhwelela anvwali jawu nawa niwena akwikala neyi wena.—Yishimu 22:6; Aefwesesa 6:4.

10. Tunateli kwikala ñahi nanhoshelu yayiwahi neyi tudi nawakwetu akwaKristu?

¹⁰ Twatela cheñi kwikala ashinshika kudi anakwetu niahela akwaKristu. Chinateli kwikala chapela kutuñula akwetu hela kuyihosha chatama. Neyi tuhoshaña nsañu yitunabuli kwiluka, tunateli kutachika kutandisha makudi. Chikuwaha neyi ‘tukuhemba nyivumbu yetu.’ (Yishimu 10:19) Kwikala washinshika bayi neyi kwatalisha mukuhosha nsañu yimunakutoñojoka, yimweluka hela yimwatiyaku. Hela chakwila nsañu yitunakukeña kuhosha yalala, ilaña hadaha yinatukumi wanyi indi kwiji chikumwekana chiwahi wanyi neyi tuhoshahu. (1 Atesalonika 4:11) Amakwawu amwekeshaña hohu nawu adi nawinyi chahoshañawu nawu: “Inakushaku wanyi.” Ilaña etu chineli tudi antu jaYehova, mpinji yejima nhoshelu yetu yatela kwikala yayiwahi.—Tañenu Akolosi 4:6.

11, 12. (a) Chumanyi chinateli kumwekana neyi muntu wunakoñi nshidi ekala wabula kushinshika? (b) Malwihwinyi itunateli kudihula? (c) Tunateli kwikala ñahi ashinshika nakuloñesha kwaYehova?

¹¹ Yehova wayinka akulumpi mudimu wakukwasha chipompelu. Chinateli kuyipelela neyi twikala ashinshika kudi wena. Muloñadi? Neyi muya kudi ndotolu nakulomba wukwashu, komana munateli kumulejaku hohu jantesha hachimunakutiya? Neyi dichi mukwila, komana nateli kuyikwasha? Munjila yoyimu, neyi tukoña nshidi yeneni, bayi tuswekaku. Ilaña twatela kuya kudi akulumpi nakuyilejamu chakadi kuhita mumbadi. (Masamu 12:2; Yilwilu 5:1-11) Talenu chuma chinambukiku: Indi neyi mwiluka nenu mukwenu  nakoñi nshidi yahamesu bwi-i? (Alevi 5:1) Komana mukuhosha nenu: “Chineli nindi ibwambu dindi wahamuchima, natela kumuhembela kajindilu?” Indi kwiji mukwanuka nenu watela kuya kudi akulumpi kulonda amukwashi yekali cheñi nawubwambu wawuwahi naYehova?—Aheberu 13:17; Yakoba 5:14, 15.

¹² Twatela cheñi kwikala ashinshika nakuloñesha kwaYehova hampinji yitunakuhana lipoti, chidi neyi lipoti yamwekeshaña chitunazati mumudimu wakushimwina. Nawa twatela kwikala ashinshika neyi tunakusoneka fomu yawapayiniya nimafomu amakwawu.—Tañenu Yishimu 6:16-19.

13. Tunateli kwikala ñahi ashinshika neyi tunakwila bizinisi namukwetu Chinsahu?

¹³ Amanakwetu niahela akwaKristu hiyatela kuzataña bizinisi hampinji yakudifukulaku. Chakutalilahu, hitwelaña bizinisi Hetala daWanta hela neyi tunakushimwinaku. Nawa hitwayizatishaña amanakwetu niahela mubizinisi chatamaku. Neyi mwiñija akwenu aYinsahu nyidimu, mwatela kuyifweta nampinji, yinkenu mali imwatiyañeni nawa yinkenu yuma yejima yakeñekaña kwesekeja nanshimbi. Iyi yuma munabombeli kumusonekesha kuchipateli hela kumwinka mpinji yakunooka. (1 Timotewu 5:18; Yakoba 5:1-4) Nawa neyi mukwenu Chinsahu nayiñiji mudimu, bayi mukuhweleli nenu wukuyakamenaña chambukakuku. (Aefwesesa 6:5-8) Mwatela kuzataña mpinji yimwaditeja nikuzata chinayifwetiwu nawu muzati.—2 Atesalonika 3:10.

14. AkwaKristu atela kwiladi henohu kanda atachiki kuzatila hamu bizinisi?

¹⁴ Indi neyi tutachika kuzatila hamu namukwetu Chinsahu mubizinisi? Munabombeli yuma yakuzatisha  mubizinisi hela loni. Muyuma yamuchidiwu, kudi chishina chamuBayibolu chatela kuzatika haniyi mpinji: Sonekenu yuma yejima! Kaprofwetu Yeremiya chalandiliyi mpata, wasonekeli makopi ayedi achitiyañenu, kopi yimu hafwachikili ayinsahu, nawa makopi ejima ayedi wayiswekeli kulonda akayizatishi kumbidi. (Yeremiya 32:9-12; talenu cheñi Kutachika 23:16-20) Amakwawu atoñojokaña nawu kufwachika kunateli kumwekesha nawu ayikuhwelela amanakwawu wanyi. Ilaña kufwachika, kwakwashaña kutondolwela kubula kutiyashana hela kufumpa chitiyañenu. Ilaña hela mubizinisi, ilukenu nenu kwikala nakuwunda muchipompelu kwalema nankashi kubadika mabizinisi adi ejima.—1 Akorinda 6:1-8; talenu Mazu Adi Kunsa 30.

15. Yehova watiyaña ñahi nawantu abula kushinshika mubizinisi?

¹⁵ Twatela kwikala ashinshika nikudi antu abula kwikala aYinsahu jaYehova. Yehova wakeñaña nindi twikali ashinshika. “Pezu yakutwamba Yehova wayimona nindi, hikushimana; ilaña pezu yata chikupu diyi yatiyayi kuwaha.” (Yishimu 11:1; 20:10, 23) Mumpinji yakunyima, kakavulu mapezu adiña nakuyizatisha mumabizinisi. Ilaña akwakulandisha ayidimbileña antu alandileña nakuyinka yuma yantesha chatela ayinki kwesekeja nachitiyañenu hela kuyifwetesha yuma yayivulu. Kufwana antu amumafuku akunyima, kubula kushinshika kunatandi mumabizinisi makonu. Nimakonu, Yehova wahela kubula kushinshika neyi chakwiheleliyi kumafuku akunyima.

16, 17. Yumanyi yitwatela kutondolwela hakwila tutwalekihu kwikala ashinshika?

¹⁶ Ejima wetu twawanikaña muyuma yinateli kutuletesha  kubula kushinshika chidi neyi hakusonekesha mudimu, kufwachika mafomu anfulumendi hela hakusoneka maekizamu kushikola. Amavulu atoñojokaña nawu chidi hohu chiwahi kutwamba, kulebumuna hela kuhana ñakwilu yakutwamba. Ichi chuma chatuhayamishaña wanyi. Bayibolu yashimwineñahu dehi nawu mumafuku akukuminina, antu akekala “akwakudikeña awenawu, asweja kukeña mali, . . . abulaña kukeña yuma yayiwahi.”—2 Timotewu 3:1-5.

¹⁷ Mpinji yikwawu chamwekanaña neyi antu atwambaña adi mukanu kaayi ashakamaña chiwahi. (Masamu 73:1-8) MukwaKristu anateli nikumuhaña mudimu, kubula kumwinka mali ashikila hela kumukabisha muloña wakashinshi kindi. Ilaña kashinshi hichilwilu chabadika chikupu. Muloñadi?

18. Kwikala nakashinshi kwalemenadi?

¹⁸ Kwikala washinshika, kuyikuhwelela nikuyishindamena hiyuma yalema yabulaña kumwekana mukanu kaayi. Wejima wetu twatela kutuña ijina dadiwahi. (Mika 7:2) Mwalala antu amakwawu anateli kuyiseha muloña wakashinshi kenu, hadaha nikuyila nawu mudi chisupi. Ilaña amakwawu anateli kuyitiya kuwaha nikuyikuhwelela muloña wakashinshi kenu. Mwahita kaayi kejima, aYinsahu jaYehova ayiluka nawu ekala ashinshika. Akwakwiñija nyidimu akeñaña nankashi kwiñija aYinsahu muloña eluka nawu akuzataña nakashinshi. Nawa neyi anakuhaña antu nyidimu muloña wakubula kashinshi, kakavulu aYinsahu hiyayihañañaku.

19. Kwikala ashinshika kunateli kukolesha ñahi wubwambu wenu naYehova?

 ¹⁹ Neyi mwikala ashinshika muyuma yejima, mukwikala nachinleji chamuchima chitooka nikuwunda kwamuyitoñojoka. Tunateli kwikala neyi Pawulu wasonekeli nindi: “Tunakuhweleli netu tukweti chinleji chamuchima chitooka.” (Aheberu 13:18) Chasweja kulema, Tata yenu wukweti kukeña, Yehova, wukuyitiya kuwaha hakumona nindi munekali ashinshika muyuma yejima.—Tañenu Masamu 15:1, 2; Yishimu 22:1.