Kudi ana amukeña Yehova Nzambi niIzu Dindi, Bayibolu:

Yesu wahosheli nindi: “Mukwiluka chalala, chalala nichena chikuyifumisha muwuduñu.” (Yowanu 8:32) Toñojokenu chimwatiyili chimwelukili chalala chamuBayibolu katachi! Chayizañalesheli nankashi chimwelukili nenu tunateli kudiza chalala mukanu kaayi kanenzali namakudi.—2 Timotewu 3:1.

Yehova Nzambi nakukeña nindi tudizi chalala. Nawa chineli twakeña antu, tunakukeña kuyileja eluki chalala. Ilaña kudi jajivulu jitwatela kwila hakumukalakela Nzambi. Twatela kuzata nañovu kulonda tushakameña neyi akwaKristu, muloña twalemesha chikupu nshimbi jaYehova. Yesu walumbulwili njila yalema mutunateli kumwekeshelamu netu twamukeña Nzambi. Wahosheli nindi: “Neyi mukwovwahilaña nshimbi jami, mukushakamaña mukukeña kwami, neyi chochinovwahilaña nshimbi jaTata nawa natwalekahu kushakama mukukeña kwindi.”—Yowanu 15:10.

Mwalala, Yesu wamukeña Tata yindi nawa welaña yuma yidi yejima yamulejañawu kudi Tata yindi nawu yeli. Neyi tumwimbujola Yesu muchihandilu chetu, Yehova wakutukeña nawa tukwikala namuzañalu waweni. Neyi chochahosheli Yesu nindi: “Neyi mweluka yumiyi, mudi namuzañalu neyi muyikoña.”—Yowanu 13:17.

Tunakuhweleli netu awunu mukanda wukuyikwasha kushakama kwesekeja nachalala chamuBayibolu nikwikala ibwambu daNzambi. Tunakulomba netu musweji kumukeña Nzambi nikutwalekahu kushakama “mukukeña kwaNzambi . . . nawumi wahaya nyaaka.”—Yuda 21.