1. Chumanyi chitwatela kwila hakwila nawu kudifukula kwetu kumuzañalesheña Yehova, nawa muloñadi?

Yesu wahosheli nindi: “Akwakudifukula alala [akadifukulaña] kudi Tata muspiritu nimuwalala, muloña Tata nakukeña antu adi neyi awa kulonda adifukuleña kudi yena.” (Yowanu 4:23; 6:44) Muntu-himuntu watela kutwalekahu “kwiluka yuma yetejañayi Mwanta.” (Aefwesesa 5:10) Ilaña chumichi hichapelaku. Satana nakuzata nañovu kulonda yatuleteshi twileña yuma yamuneñeshaña Yehova.—Chimwekeshu 12:9.

2. Lumbululenu chuma chamwekeni kuMpidi yaSinayi.

² Satana wesekaña ñahi kutuluwañesha? Njila yimu, hikubula kwiluka yayiwahi niyatama. Talenu yuma yamwekeneni muza waIsarela hampinji yadiñawu muchilombu kwakwihi naMpidi yaSinayi. Mosi wakandukili kumpidi, nawa antu adiña nakumuhembelela nawu yafunti muchilombu. Nkumininaku, azeyeli nakumuhembelela nawa amulejeli Aroni nawu yayituñili nzambi. Wayituñilili mukishi wamwekeneña neyi mwana kañombi. Nawa antu ekalili nachawija. Ahañeni nakumunyeñumuka iwu mwana kañombi nikumufukamina. Akuhweleleli nawu chinakudifukulawu kudi iwu  mwana kañombi, adiña nakudifukula kudi Yehova. Hela chakwila awa antu amweneña nawu “chawija chaYehova,” elileña mwaluwa. Yehova wamweni nindi hikupesha, nawa amavulu afwili. (Kwidika 32:1-6, 10, 28) Chumanyi chitukudizilaku? Bayi mudidimba enu aweniku. “Bayi mukunka kuchuma chamajiluku,” nawa mwitejenu Yehova ayidizishi yayiwahi niyatama.—Isaya 52:11; Ezekeli 44:23; Añalija 5:9.

3, 4. Chalemenadi kwiluka kwafuma yidika yinatandi makonu?

³ Hampinji yadiñayi Yesu heseki, wayidizishili apostolu indi kwikala akutalilahu mukudifukula kwalala. Hanyima yakufwa kwindi, apostolu atwalekelihu kuyidizisha atumbanji amaha yishina yaYehova. Ilaña chelili apostolu afwi, antañishi ansakililu jakutwamba aleteli yitoñojoka yakutwamba, tushidikilu twakutwamba nikwililaña yidika muchipompelu. Nawa iyi yidika ayitumbili majina kulonda yimwekaneña neyi yawakwaKristu. (2 Atesalonika 2:7, 10; 2 Yowanu 6, 7) Nawa iyi yidika yinakumwekana nimakonu nawa yichidi kuleta ntañishilu yakutwamba, niandemoni. *—Chimwekeshu 18:2-4, 23.

⁴ Kunyeñumuka kaayi kejima, antu alemesha nankashi yidika nimafuku akunooka. Hela chochu, chimukutwalekahu kwiluka chamonañayi Yehova yuma, mukutachika kuhimpa yitoñojoka yenu kutalisha hayidika yikwawu. Kuhimpa yitoñojoka kwapela wanyi, ilaña ilukenu nenu Yehova wukuyikwasha. Tushinshikenu kwafuma yidika yinatandi nankashi kulonda twiluki Yehova chatiyañayi naniyi yidika.

5. Wunsahwinyi wunakumwekesha nawu Yesu wasemukili wanyi haDecember 25?

⁵ Mumaluña amavulu kunyeñumuka kaayi kejima, anakanaña Krisimansi haDecember 25, ifuku datoñojokañawu nawu didavwalikiliyi Yesu. Bayibolu yashimuna wanyi kakweji hela ifuku davwalikiliyi Yesu, ilaña yatulejaña yuma yimu yamwekanaña muchaaka. Luka wasonekeli nindi hampinji yavwalikiliyi Yesu muBetelemi, “atubiña ashakamineña mwisaña” nakuhemba nyikoku yawu. (Luka 2:8-11) Mukakweji kaDecember, muBetelemi mwekalaña mutuuta, nvula yanokaña nawa mwekalaña sino, dichi atubiña hiyadi kuya nakuhemba nyikoku nawufukuku. Chumanyi chitunakudizilaku? Yesu wasemukili mpinji yachaaña, muDecember wanyi. Bayibolu ninsañu yakunyima yekala nawunsahu wamwekeshaña nawu hadaha wasemukili mutukweji tutwatenaña makonu netu September niOctober.

6, 7. (a) Tushidikilu twaKrisimansi twatachikili ñahi? (b) Muloñadi chitwatela kuhanina yawaana?

⁶ Hanu dinu Krisimansi yatachikili ñahi? Yafumini kuyidika yawasenji, chidi neyi chawija chawaRoma asenji chaSateneliya, chidika chakulemesha nzambi yawundimi, Saturn. Encyclopedia Americana yahosha nawu: “Sateneliya, chawija chawaRoma adiña nakuchanakana hakachi kakakweji kaDecember, dihelileñawu yuma yachisemwa yaKrisimansi. Chakutalilahu, hanichi chidika adiña nakwila yidika yamaneni, kuhana yawaana nikubutula makendo.” Cheñi, haDecember 25 adiña nakwanakana ifuku davwalikiliyi nzambi yamwaana Mithra, wakuPeresi.

⁷ Hela chochu, antu anakanaña Krisimansi makonu,  atoñojoka wanyi kuyatachikilili. Ilaña atalilaña idi ifuku daKrisimansi kulonda akekali nayisaka yawu, kuda yakuda yayiwahi nikudinka yawaana. Eña, twakeña yisaka yetu niamabwambu jetu nawa Yehova wakeñaña nindi ambuñindi adinkeña. Neyi chatulejaña 2 Akorinda 9:7 nawu, “Nzambi wakeña muntu wahanaña namuzañalu.” Yehova hakeñaña nindi tuhaneña hohu yawaana hefuku datoñolawuku. Antu jaYehova atiyaña kuwaha  kudinka yawaana, kwikala hamu nawamabwambu jawu niyisaka yawu mpinji yidi yejima muchaaka chakubula kutalila chidi chejima. Ahanaña muloña akeña antu.—Luka 14:12-14.

8. Komana akwakuhoña natutumbwa amwinkeli Yesu yawaana hadiñayi nkemba? Lumbululenu.

⁸ Hakwiteja yitoñojoka yakuhana yawaana haKrisimansi, antu amavulu ahoshaña nawu amayala asatu akwamaana atwalili yawaana kudi mwana wavwalikili Yesu hadiñayi mwitaña. Chalala izanvu dawamayala damuhempwili Yesu nawa damuleteleli yawaana. Kushankulu, antu ahanineña yawaana kudi muntu walema. (1 Anyanta 10:1, 2, 10, 13) Komana mweluka chahosha Bayibolu nawu awa amayala adiña akwakuhoña natutumbwa, antu elileña majiki nawa adifukwileña wanyi kudi Yehova? Cheñi, amuhempwili wanyi Yesu hachidiñayi nkemba mwitaña. Amuhempwili mpinji yacheñi, iku wekala dehi “mwana wanyanya” nawa nakushakama mwitala.—Matewu 2:1, 2, 11.

9. Yidikanyi yashimunawu muBayibolu yamafuku akuvwalika?

⁹ Ifuku dakuvwalika dekala damuzañalu chikupu. (Masamu 127:3) Ilaña hichinayi mukwila nawu twatela kwanakana mafuku akuvwalikaku. Toñojokenu hanichi: MuBayibolu atenamu yidika yiyedi hohu yamafuku akuvwalika. Chidika chimu chadiña chaFwaro wakuEjipitu, chikwawu chaMwanta Herodi Antipasi. (Tañenu Kutachika 40:20-22; Maku 6:21-29.) Hadi awa anyuuli hosi wadiña kambuña aYehovaku. Hela chochu, muBayibolu hosi hashimunawu nawu ambuña aYehova adiña nakwanakana mafuku akuvwalika.

10. Indi akwaKristu akusambila amweneña ñahi kwanakana mafuku akuvwalika?

 ¹⁰ Mukanda wumu wahosha nawu, AkwaKristu akusambila “amweneña kwanakana kuvwalika kwamuntu wudi wejima nawu hichaaku chawasenji.” (World Book Encyclopedia) Yidika yamuchidiwu yashindameneni hantañishilu yakutwamba. Chakutalilahu, aGiriki akushankulu akuhweleli nawu muntu-himuntu wukweti spiritu yamukiñaña nawa yenjili hefuku davwalikiliyi nawa diyamuhembeleña. Nawa atoñojokeleña nawu iyi spiritu yadiña nakafuta kanuñañana nanzambi wavwalikili ifuku dodimu nanowu muntu. Kubombela hayuma yakuhweleleliwu, elukili nawu mafuku akuvwalika endeleleña hamu nakwiluka tutumbwa nikuhoña natutumbwa.

11. Yehova watiyaña ñahi hachisambu chetu?

¹¹ Antu amavulu atoñojokaña nawu ifuku davwalikiliwu hifuku dalema diyatela kuyisakililawu nikuyimwekeshela kukeña. Ilaña twatela kumwekesha kukeña kudi yisaka yetu niamabwambu jetu mpinji yejima, bayi hefuku dimu hohuku. Yehova wakeñaña nindi twikaleña naluwi nichisambu mpinji yejima. (Tañenu Yilwilu 20:35.) Twamusakililaña hachawaana chawumi watwinkañayi, bayi neyi hefuku dakuvwalika hohuku.—Masamu 8:3, 4; 36:9.

12. Ifuku dakufwa dinateli kwikala ñahi dadiwahi kubadika dakuvwalika?

¹² Mukwakutaŋisha 7:1 yahosha nawu: “Ijina dadiwahi dabadika malasha evumba dadiwahi, niifuku dakufwa dabadika dakuvwalika.” Ifuku dakufwa dinateli kwikala ñahi dadiwahi kubadika dakuvwalika? Neyi tunasemuki, twekalaña kanda twilihu chimu nichimu muwumi wetu, chachiwahi hela chatama.  Ilaña neyi tuzatisha chiwahi wumi wetu kumuzatila Yehova nikukwashaku amakwawu, tukutuña “Ijina dadiwahi,” nawa Yehova wakatwanukaña hela tunafwi. (Yoba 14:14, 15) Antu jaYehova hiyanakanaña mafuku awu akuvwalika hela ifuku davwalikiliyi Yesuku. Hela chochu, chidika chimu hohu chatulejeliyi Yesu kwanakana hiChanukishu chakufwa kwindi.—Luka 22:17-20; Aheberu 1:3, 4.

13, 14. Chidika chaIsita chakundama kunka?

¹³ Antu amavulu neyi anakwanakana Isita atoñojokaña nawu anakwanakana ifuku damusañwiliwu Yesu. Ilaña, chidika chaIsita achesekeja naEostre, hela Ostara, nzambi wamumbanda wawaAnglo-Saxon wachejeji ninnoña. Mukanda wumu waMythology walumbulula nawu wadiña cheñi nzambi wamumbanda walusemu. Tushidikilu tukwawu twaIsita twakundama kuniyi yuma. Chakutalilahu, mukanda wumu wahosha nawu mateta “ekala yinjikijilu yalema yakuvwalika nikusañuka,” (Encyclopædia Britannica). Cheñi, kachinchi akizatishaña neyi chinjikijilu chalusemu kufuma tuhu kunyaka. Chinamwekani hatooka nawu Isita hichidika chakundama kukusañuka kwaYesuku.

¹⁴ Neyi Yehova yamona antu anakubomba tushidikilu twansakililu yakutwamba nakusañuka kwaMwanindi, komana watiyaña kuwaha? Inehi. (2 Akorinda 6:17, 18) Mwamweni, Yehova hatuleja kwanakana kusañuka kwaYesuku.

15. Indi Halloween yatachikili ñahi?

¹⁵ Halloween, yatenañawu cheñi nawu Melela Ajila hela Ifuku Dawakwakujila Ejima, dakundama kudi aloji, atububu aletaña wupila nianyisalu. Ichi chidika chachiha wanyi. Neyi kakweji nashiki dehi mwiwulu kwakwihi naNovember 1 aCelt akushankulu akuBritain niIreland adiñi nakwanakana chidika chatenañawu nawu Samhain. Akuhweleleli nawu hanichi chidika, aspiritu awafu afuntileña hamaseki. Antu atulileña yakuda niyakunwa kulonda aspiritu abuli kuyikatisha.  Neyi anyana avwala neyi mujimu hela muloji, aya kwitala nikwitala nakuhosha nawu “Twinkenu yuma,” elukaña wanyi nawu anakwimbujola ichi chidika chakushankulu chawandemoni.

16, 17. Yumanyi yitwatela kutoñojoka neyi tunakufuukulahu kwikala nachawija?

¹⁶ Ifuku dakudisumbula dekala damuzañalu. Yawija yawulu ayanakanaña mwamboka-mboka kunyeñumuka kaayi kejima. Kakavulu antu atoñojokaña wanyi kwafuma tushidikilu twamawija, nawa eluka wanyi nawu tushidikilu tukwawu twafuma kudi akwakudifukula akutwamba. Ilaña akwaKristu anakufuukula jakudisumbula akeñaña nawu chawija chawu chimutiyishi Yehova kuwaha. Neyi eluka chatachikili tushidikilu twachawija, akufuukulahu chiwahi.—Maku 10:6-9.

¹⁷ Tushidikilu tukwawu twachawija atukuhwelela nawu twaletaña ‘kukooleka’ kudi anakudisumbula. (Isaya 65:11 NWT) Chakutalilahu, mumaluña amakwawu antu anatilaña losu hela yuma yikwawu yadifwanaku hadi kalemba nakankaña. Akuhwelelaña nawu yikukwasha anadisumbuli kwikala nanyana, muzañalu, kushakama yaaka yayivulu nikuyikiña kuyuma yatama. Ilaña akwaKristu asoñamaña hakwila nawu abuli kudibomba kutushidikilu twakundama kunsakililu yakutwamba.—Tañenu 2 Akorinda 6:14-18.

18. Yishinanyi yikwawu yamuBayibolu yahosha hayawija?

¹⁸ AkwaKristu anakudisumbula akeñaña chawija chawu kwikala chamuzañalu, chakalemesha nawa antu adiluñishi. Antu anenzi kuchawija chawakwaKristu hiyatela kuhosha chakubula luwi, kuhosha nhoshelu  yawuvumbi, kuhosha mazu akasawuntu kudi anakudisumbula hela kudi antuku. (Yishimu 26:18, 19; Luka 6:31; 10:27) Chidika chawakwaKristu chakonkomwenaña wanyi “kudisamba nayuma yikwetiyi muntu.” (1 Yowanu 2:16) Neyi munakufuukulahu kwikala nachawija, monenu nenu mwakashala nakuditoñesha wanyi.—Talenu Mazu Adi Kunsa 28.

19, 20. Kuhumañesha makaapu kwatachikili ñahi?

¹⁹ Kuhumañesha makaapu kwavula nankashi hamawija awulu nihayidika yikwawu. Haniyi mpinji, muntu wumu wukunyamuna kaapu nakuhosha mazu amu iku amakwawu ananyamuni makaapu. Indi akwaKristu atela kumona ñahi kuhumañesha makaapu?

²⁰ Mukanda wumu wahosha nawu kuhumañesha makaapu hadaha kwafuma kukashidikilu kukupesha kakushankulu “kwamwañilileñawu walwa heseki wakulambula anzambi.” (International Handbook on Alcohol and Culture) Elileña mwenimu kulonda ayidimbeki, nakulomba kwalombeleñawu namazu antesha nawu ‘shakamaku yaaka yayivulu!’ hela ‘wikaleña wakola kumujimba!’” Kushankulu, antu anyamwineña makaapu nakulomba nkisu kudi anzambi jawu. Ilaña dichakiswilañayi Yehova wanyi.—Yowanu 14:6; 16:23.

21. Yidikanyi yikwawu yatela kutondolwelawu akwaKristu?

²¹ Neyi himukukeña kufuukula neyi chakwila mwatela kwanakanaku chidika hela nehi, sambilenu kutoñojoka hayuma yikufumamu. Chakutalilahu,  yidika yikwawu mwabombela kuhañana kwasañumunaña wuvumbi, kunwa walwa chatama, niwuvumbi. Yidika yamuchidiwu yinateli kuleta wutumwa hela kuleta chaambu chamatuña. Neyi twanakanaña yidika yamuchidiwu, komana twahela yuma yahelayi Yehova?—Masamu 1:1, 2; 97:10; 119:37.

22. Chumanyi chinateli kumukwasha mukwaKristu neyi nakukeña kuya kuchidika?

²² AkwaKristu atela kwikala asoñama kulonda abuleña kwanakana yidika yamusawulaña Nzambi. Kapostolu Pawulu wasonekeli nindi: “Hela munakuda, hela munakunwa, hela munakwila chuma chidi chejima, ilenuña yuma yejima yikumulemesha Nzambi.” (1 Akorinda 10:31; talenu Mazu Adi Kunsa 29.) Hela chochu, bayi neyi muyidika yejima mwekala wuvumbi, nsakililu yakutwamba hela chaambu chamatuñaku. Dichi neyi chidika chinakufumpa yishina yamuBayibolu wanyi, twatela kufuukula etu aweni neyi chakwila twatela kwanakanaku hela nehi. Twatela kwiluka netu mutunafuukuli mukuhukesha amakwawu wanyi.

23, 24. Tunateli kulumbulwila ñahi antaña jetu abula kwikala aYinsahu hachitunafuukuli kubula kwanakana yidika yikwawu?

²³ Hadaha munaleki kudibomba muyidika yabulaña kumulemesha Yehova. Ilaña antaña jenu abula kwikala aYinsahu jaYehova anateli kutoñojoka nawu mwayihela nawa himunakukeña kwikala nawu cheñiku. Anateli kutoñojoka nawu mafuku akunooka diwu mafuku akuhanjeka nayisaka. Hanu dinu, munateli kwila ñahi?  Kudi njila jajivulu jimwatela kwila hakwila amoni nawu mwayikeña nawa mwayilemesha. (Yishimu 11:25; Mukwakutaŋisha 3:12, 13) Mpinji yikwawu munateli kuyitambika nakuda nawu hamu.

²⁴ Neyi antaña jenu anakukeña kwiluka chimwalekela kwanakana mafuku akunooka, mwatela kukeña nsañu yikuyikwasha kulumbulula chimwalekela munyikanda yetu niha jw.org. Bayi muditadikishaña nawu nikumwekesha nenu mumunakuhosha mwalala hela kuyikanjikija kutoñojoka neyi chimwatoñojokañaku. Kwashenu chisaka chenu chiluki nawu mwadizili nsañu yayivulu yalema nawa mwafuukwilihu enu aweni. Wundenu, nawa “mazu enu mpinji yejima ekaleña amawahi, akutoweja namuñwa.”—Akolosi 4:6.

25, 26. Anvwali anateli kukwasha ñahi anyanawu kukeña nshimbi jaYehova?

²⁵ Chalema nankashi hakumona nawu muntu himuntu weluka chalekelayi kwanakanaku yidika yikwawu. (Aheberu 5:14) Twafwilaña kumuzañalesha Yehova. Nawa neyi tudi anvwali, twatela kwikalaña nampinji yakudizisha anyanetu kulonda eluki nikukeña yishina yamuBayibolu. Neyi amwiluka Yehova niwena akukeñaña kumuzañalesha.—Isaya 48:17, 18; 1 Petulu 3:15.

²⁶ Yehova wazañalalaña neyi yamona tunakuzata nañovu kulonda tudifukuli kudi yena nawunyonji nimuwalala. (Yowanu 4:23) Ilaña antu amavulu atoñojokaña nawu muntu kwila ekala washinshika nehi mukanu kaayi kabula kushinshika. Komana dimu? Tuhanjekenu haniyi nsañu mukapetulu kanalondelihu.