1, 2. Mwamukeñeladi Yehova Nzambi?

MWAMUKEÑA Nzambi? Hadaha mwamukeña nankashi chakwila mwadihana dehi kudi yena. Hadaha munakutoñojoka nenu Hibwambu denu nankashi. Ilaña henohu kanda mumukeñi Yehova, yena wadiña wayikeña dehi. Twatañaña muBayibolu nawu: “Twamwekeshaña kukeña, muloña yena diyi wasambilili kutukeña.”—1 Yowanu 4:19.

² Toñojokenu njila mwatumwekeshelañayi Yehova kukeña. Watwinka iseki dadiwahi kushakamahu niyuma yikwawu yatukwashaña kudiluñisha muchihandilu. (Matewu 5:43-48; Chimwekeshu 4:11) Nakukeña nindi twikali amabwambu jindi nawa natukwashi kulonda tumwiluki. Neyi tunakutaña Bayibolu, tunakutiya chinakuhoshayi Yehova. Nawa neyi tunakulomba, watiyaña kulomba kwetu. (Masamu 65:2) Watulombolaña nawa watukoleshaña naspiritu yindi yajila yañovu. (Luka 11:13) Watemesheli niMwanindi waswejayi kukeña hamaseki kulonda yatukuuli kunshidi nikukufwa—Tañenu Yowanu 3:16; Aroma 5:8.

3. Tunateli kutwalekahu ñahi kwikala nawubwambu wawuwahi naYehova?

 ³ Toñojokenu hadi ibwambu denu imwakeña nankashi, ibwambu denu imunakulujoki nindi mumpinji yayiwahi niyatama. Mwatela kuzata nañovu kulonda wubwambu wenu naniwu muntu wubuli kumana. Dichi twatela kwila ninawubwambu wetu naYehova, Ibwambu detu wabadika chikupu. Wubwambu wetu nayena wunateli kushakama haya nyaaka. Dichatulejelaña Bayibolu nawu: ‘Shakamenuña mukukeña kwaNzambi.’ (Yuda 21) Tunateli kwila ñahi mwenimu? Bayibolu yakula nawu: “Kumukeña Nzambi kwatalisha mukwila nawu tuhembeña nshimbi jindi; nawa nshimbi jindi hijakalaku.”—1 Yowanu 5:3.

4, 5. (a) Indi “kumukeña Nzambi” kwatalisha mudihi? (b) Mwatachikili ñahi kusweja kumukeña Yehova?

⁴ Bayibolu yatalisha mudihi hakuhosha nawu “kumukeña Nzambi”? Awa mazu hiyanatalishi kukukeña kwatukeñayi Nzambiku ilaña atalisha kukukeña kutwamukeña. Munakwanuka chimwatiyili hefuku datachi dimwatachikili kumukeña Yehova?

⁵ Anukenu chimwazañaleli himwelukili katachi nenu Yehova nakukeña nindi mwakashakameña haya nyaaka mwituña dadiha. Mwadizili yuma yejima yelayi kulonda mwakashakameña haya nyaaka, nawa mwelukili nenu Yehova watwinka chawaana chabadika chakwila watemesheli Mwanindi heseki. (Matewu 20:28; Yowanu 8:29; Aroma 5:12, 18) Chimwelukili nenu Yehova wayikeña nankashi, muchima wenu wazañaleli, nawa mwatachikili kumukeña.—Tañenu 1 Yowanu 4:9, 10.

6. Mukumukeña muntu mwabombeladi? Kumukeña Nzambi kunayisañumuni kwiladi?

 ⁶ Hela chochu, chipepa chimwatiyileña chakumukeña Nzambi dihu chatachikili. Chakutalilahu, neyi muntu twamukeña, twamwililaña jajivulu, hitwakuminaña dakuhosha hohu netu “Nakukeñaku.” Kukeña kukumusañumuna kulonda yamwilili mukwawu yuma yikumuzañalesha. Munjila yoyimu, hamuloña wakumukeña Yehova chaletesheli kuhimpa chihandilu chenu kulonda mumuzañalesheña. Chimwaswejeli kumukeña, hadaha mwadihanini kudi yena nawa mwapapatisheweli. Chimwelili chumichi, mwamushiikili Yehova nenu mukumuzatilaña haya nyaaka. (Tañenu Aroma 14:7, 8.) Chumanyi chikuyikwasha kuhemba ichi chikaninu?

7. Neyi twamukeña Yehova, tukwiladi? Nshimbinyi jikwawu jahanayi?

⁷ Chineli twamukeña Yehova, “twahembaña nshimbi jindi.” Twajihembaña ñahi? Twamwovwahilaña. Bayibolu yatulejaña chakeñañayi Yehova nindi tushakameña. Chakutalilahu, watulejaña nindi kusheta, kwiya, kutwamba, kukaama namuntu wunabuli kwikala mwinikwetu, nikudifukula kudi muntu hela chuma chidi chejima chatela tudifukuleña kudi yena chatama.—1 Akorinda 5:11; 6:18; 10:14; Aefwesesa 4:28; Akolosi 3:9.

8, 9. Tunateli kwiluka ñahi chinakukeñayi Yehova neyi kwosi lushimbi lwamuBayibolu lwakaanisha ochu chuma? Hanenu chakutalilahu.

⁸ Neyi tunakukeña kumuzañalesha Yehova, kudi jajivulu jitwatela kwila bayi neyi kwovwahila hohu  nshimbi jindiku. Yehova hanatwinki nshimbi jejima jinateli kutukwasha mukukala kutwamonañaku. Mpinji jikwawu muBayibolu himukuwanamu lushimbi lukutulejaña chakwilaku. Hanu dinu, tunateli kufuukula ñahi chiwahi? (Aefwesesa 5:17) MuBayibolu mwekala yishina hela netu yuma yalala yatukwashaña kwiluka chamonañayi Yehova yuma. Chitukutañaña Bayibolu, tukumwiluka Yehova netu wudi neyi Muntu. Tukwiluka chatoñojokañayi niyuma yakeñayi niyahelayi.—Tañenu Masamu 97:10; Yishimu 6:16-19; talenu Mazu adi Kunsa 1.

⁹ Chakutalilahu, tunateli kusakula ñahi yuma yitukutala haTV hela yitukutala haIntaneti? Yehova hatulejaña yuma yayeni yitwatela kwilaku. Ilaña yishina yatwinkañayi yatukwashaña kufuukula chiwahi. Yuma yakuzañalesha yitwatalaña makonu mwekalaña nankashi madombu niwuvumbi. MuBayibolu, Yehova watulejaña nindi ‘wahela muntu wakeña madombu’ nawa “wakasompesha ayivumbi niakwawujila.” (Masamu 11:5; Aheberu 13:4) Iyi yishina yinateli kutukwasha ñahi kufuukula chiwahi? Chitweluka netu Yehova wahela ochu chuma hela wachimonaña nindi chazonda, bayi tuchikoñaku.

10, 11. Muloñadi chitwamwovwahilaña Yehova?

¹⁰ Muloñadi chitwamwovwahilaña Yehova? Hitwovwahilaña kuchiina akenda katubabesha hela kumona yihuñu yafumaña mukufuukula chatamaku. (Añalija 6:7) Twamwovwahilaña Yehova muloña twamukeña. Chochakeñaña anyana kuzañalesha tata yawu, ninetu tunakukeña kumuzañalesha Tata yetu wamwiwulu. Neyi twiluka netu tunakumuzañalesha Yehova dichuma  chachiwahi.—Masamu 5:12; Yishimu 12:2; talenu Mazu adi Kunsa 2.

¹¹ Hitwamwovwahilaña Yehova neyi yuma yidi chiwahi hela neyi yuma yinatukaliliku. Nawa hitwasakulaña nshimbi jitwatela kwovwahila nijikwawu jitwatela kudikaña najuku. (Kuhituluka 12:32) Ilaña, twamwovwahilaña chikupu, neyi chahosheliyi ñimbi yamasamu nindi: ‘Nadiluñishaña kuleja kweyi, nakukeña.’ (Masamu 119:47; Aroma 6:17) Tunakukeña kumufwana Nowa, wamukeñeli Yehova nawa welili mwejima mwamulejeliwu kudi Yehova kwila. Bayibolu yashimuna nawu “dimu mweliliyi,” Nowa. (Kutachika 6:22) Komana munakukeña Yehova yakahoshi chochenichi hadi enu?

12. Tunateli kumuzañaleshaña ñahi Yehova?

¹² Yehova watiyaña ñahi neyi tumwovwahila? ‘Twatiyishaña muchima’ windi kuwaha. (Yishimu 11:20; 27:11) Okuwaha! Twamuzañaleshaña Nleñi wayuma yejima neyi tumwovwahila. Ilaña, watukanjikijaña wanyi. Watwinka wuswa wakwila mutunakeñi. Dikwila nawu tunateli kwila chuma chidi chejima chachiwahi hela chatama. Yehova nakukeña nindi tufuukuleña kushindamena hakukeña kutwamukeña kulonda twikali nachihandilu chachiwahi nankashi.—Kuhituluka 30:15, 16, 19, 20; talenu Mazu adi Kunsa 3.

13, 14. Tuneluki ñahi netu nshimbi jaNzambi hijakala nankashi kwovwahilaku? Lumbululenu.

¹³ Tukwila ñahi neyi tunakutoñojoka netu nshimbi jaYehova jakala nankashi kwovwahila hela jikutukañeshaña kwila yuma yitunakukeña? Bayibolu yalumbulula  nawu: “Nshimbi jindi hijakalaku.” (1 Yowanu 5:3) Izu dachiGiriki dabalumunawu nawu “jakala” datalisha mukwila nawu “kulema.” Munsona jikwawu, idi izu dakundama kunshimbi jatama hela kudi antu akeñaña kuyuula hela kukabisha akwawu. (Matewu 23:4; Yilwilu 20:29, 30) Bayibolu yaNew English Translation yahosha nawu: “Nshimbi jindi hijatuzeyeshañaku.” Nshimbi jaYehova ‘jalema’ wanyi, dikwila nawu jakala chakukañanya etu kujovwahilaku. Weluka nindi tunateli kwila yuma yatulejañayi nindi twili.

¹⁴ Chakutalilahu, fwikijenu munakukwashaku ibwambu denu wunakutuntulukila mwitala dikwawu. Naloñeji yiteli yindi yejima muyikasha. Yiteli yikwawu yapela kusenda, ilaña yikwawu yalema chakwila yikukeñeka antu ayedi. Munakutoñojoka nenu ibwambu denu wukuyila nindi musendi chiteli chalema nankashi nkawenu? Inehi. Muloñadi? Muloña neluki nindi mukukata nyima. Kufwana iwu ibwambu, Yehova hanateli kutwila nindi twileña chuma chakala nankashiku. (Kuhituluka 30:11-14) Yehova watwiluka. ‘Weluka chitwekala, wanukaña nindi tudi lunkuñu hohu.’—Masamu 103:14.

15. Muloñadi chitukuhoshela netu nshimbi jaYehova jatukwashaña?

¹⁵ Mosi walejeli muza wawaIsarela nindi neyi ovwahila nshimbi jaYehova ‘akamonaña kuwaha mafuku ejima’ nawa ‘akatwalekahu kuhanda’ muloña wakwovwahila. (Kuhituluka 5:28-33; 6:24) Ninetu makonu. Chuma chejima chikutulejayi Yehova nindi tuchili chikuwahisha chihandilu chetu. (Tañenu Isaya 48:17.) Tata yetu, Yehova, weluka yuma yinateli kutukwasha. (Aroma 11:33) Bayibolu yatulejaña nawu: “Nzambi  hikukeña.” (1 Yowanu 4:8) Yuma yejima yahoshañayi niyelañayi, wayilaña muloña wakukeña.

16. Tuneluki ñahi netu tunateli kwovwahila hela twawanina wanyi nawa tunakushakama mwituña datama?

¹⁶ Hela chochu, kumwovwahila Nzambi mpinji jikwawu kwakalaña. Tunakushakama mwituña datama dinakuyuulawu kudi Diyabolu. Wafwilaña kuluwañesha antu kulonda eleña yuma yatama. (1 Yowanu 5:19) Twanyikaña cheñi nayitoñojoka yetu yabula kuwanina, muloña yatuleteshaña tudikañi naNzambi. (Aroma 7:21-25) Ilaña twekalaña nawuswa wakwila yuma yayiwahi muloña twamukeña Yehova. Wamonaña chitwazataña nañovu kulonda tumwovwahili, nawa watukwashaña kuhitila mukutwinka spiritu yindi yajila yasweja ñovu. (1 Samweli 15:22, 23; Yilwilu 5:32) Spiritu yajila yatukwashaña kwikala nayilwilu yatukwashaña kumwovwahila.—Añalija 5:22, 23.

17, 18. (a) Yumanyi yitukudiza muwunu mukanda? (b) Yumanyi yitukadiza mukapetulu kanalondelihu?

¹⁷ Muwunu mukanda, tukudiza chitunateli kwikala nanshakaminu yamuzañaleshaña Yehova. Tukudiza chitwatela kuzatisha yishina ninshimbi jindi jahosha hayilwilu yamukuhanda kwetu. Hela chochu, mwatela kwanuka nenu Yehova hatukakejaña nindi tumwovwahileñaku. Dichi neyi tumwovwahila, chihandilu chetu chikuwaha nawa yuma yakatuwahila kumbidi. Sweje-e dinu, tukumwekesha kudi Nzambi netu twamukeña nankashi neyi tumwovwahila.—Talenu Mazu Adi Kunsa 4.

¹⁸ Hakwila twiluki yuma yayiwahi niyatama, Yehova watwinka wonsu wetu chinleji. Neyi tudizisha chinleji chetu, chikutukwasha ‘kuhemba nshimbi jindi.’ Hanu dinu, chinleji chetu hichumanyi, nawa tunateli kuchidizisha ñahi? Tutalenu.