1, 2. Chawaananyi chalema chatwinkayi Yehova?

YEHOVA watwinka wonsu wetu chawaana chachiwahi nankashi. Hichawaana chawumi. (Kutachika 1:27) Nakukeña nindi tushakameña chiwahi. Dichi watwinka yishina yatukwashaña kufuukula chiwahi yuma yitunakukeña kwila. Twatela kuzatisha iyi yishina kulonda ‘twaambuleña yayiwahi nayatama.’ (Aheberu 5:14) Neyi tukuyizatishaña, dikwila nawu tunakumwiteja Yehova yatudizisheña kutoñojoka chiwahi. Chitukulondelaña yishina yaNzambi nakumona chiyinakutukwasha mukuhanda kwetu, tukwiluka chikupu netu yalema nankashi.

² Mpinji jikwawu, yuma yakalaña. Kwekalaña yuma yamwekanaña yabula kushimunawu muBayibolu. Chakutalilahu, twatela kufuukulahu neyi tunakukeña atuuki chakadi kutwisha mashi. Tunateli kwila ñahi kulonda tufuukulihu njila yikumuzañalesha Yehova? MuBayibolu mwekala yishina yatukwashaña kwiluka chamonañayi Yehova wumi nimashi. Chitwayiluka iyi yishina, tukufuukula chiwahi nawa tukwikala  nachinleji chitooka. (Yishimu 2:6-11) Tusambilenu dinu kuhanjeka haniyi yishina.

3, 4. (a) Indi Nzambi wamwekesheli ñahi chamonañayi mashi? (b) Mashi emenañaku chumanyi?

³ Bayibolu yatulejaña nawu mashi ajila muloña emenañaku wumi. Wumi niwena walema kudi Yehova. Chelili Kena najahi dehi manakwindi, Yehova wamulejeli nindi: ‘Mashi amanakweyi anakundilila hamaseki.’ (Kutachika 4:10) Mashi aAbeli emeneneñaku wumi, dichi Kena chamujahiliyi Abeli, wakisañeni wumi windi.

⁴ Kufuma haDibaji damumafuku aNowa, Nzambi wayilejeli antu nindi akudaña mbiji. Ilaña wayilejeli cheñi nindi: ‘Mbiji nawumi wayu, wowu mashi ayu, bayi muyidaku.’ (Kutachika 9:4) Ilu lushimbi lwakundama kudi ejima afuma kudi Nowa, kushilahu ninetu. Kudi Yehova, mashi emenañaku wumi. Ninetu dichi twatela kumona mashi.—Masamu 36:9.

5, 6. Nshimbi jaMosi jamwekesheleña ñahi chamonañayi Yehova wumi nimashi?

⁵ MuNshimbi jaheniyi Yehova kudi Mosi, Wahosheli nindi: ‘Neyi muntu wukuda muchidi wejima wamashi, ami nakamutala nakuhila muntu wunakuda mashi, nawa nakamufumishahu hadi akwawu. Muloña wumi wamujimba wekala mumashi.’—Alevi 17:10, 11.

⁶ MuLushimbi lwaMosi neyi muntu najahi kanyama wakuda, wateleli kumwaña mashi heseki. Chumichi chamwekesheleña nawu wumi wakanyama anawuhani cheñi kudi Yehova, Nleñi yakanyama. (Kuhituluka 12:16; Ezekeli 18:4) Ilaña Yehova hakeñeleña nindi aIsarela ahuñununeña mashi ejima adi mukanyama  anajahiwuku. Neyi mashi analeki kuvwa, adileña oyu mbiji nachinleji chitooka. Mukubula kuda mashi akanyama, amwekesheleña nawu amulemesha Mukwakuhana wumi, Yehova. Lushimbi lwayilejeli cheñi aIsarela kulambula nyilambu yawanyama yakubuta nachu nshidi jawu.—Talenu Mazu Adi Kunsa 19 ni 20.

7. Davidi wamwekesheli ñahi nindi walemesha mashi?

⁷ Tunateli kumona chalemenawu mashi hampinji yazuñileñayi Davidi nawaFwilistinu. Antu jaDavidi amumweni nawu nafwi mpwila, dichi ashili wumi wawu muwubanji nakuya mwiluña dawayilumbu jawu nakutehuna menji. Chayileteliwu kudi Davidi, wakaanini kuyinwa, “hakuyimwañila kudi Yehova.” Davidi wahosheli nindi: “Eyi Yehova ami kwila mwenimu kwakulehi nankashi. Ninwi mashi awantu aditwala kukufwa?” Davidi welukili nindi Nzambi walemesha nankashi wumi nimashi.—2 Samweli 23:15-17.

8, 9. Yitoñojoka yawakwaKristu yekala ñahi kutalisha hamashi?

⁸ Mumpinji yawakwaKristu akusambila, antu jaNzambi hiyalambwileña nyilambu yawanyamaku. Hela chochu, ateleli kulemesha mashi. Kwadiña nshimbi jimu jakeñeleñayi Yehova nindi akwaKristu alondeleña yahosheleña nawu, “Muleki . . . mashi.” AkwaKristu ateleli kuleka mashi neyi chatondolwelañawu wuvumbi hela kupesha.—Yilwilu 15:28, 29.

⁹ Nikulelu. Etu akwaKristu, tweluka netu Yehova diyi Nsulu yawumi nawa mawumi ejima indi. Tweluka cheñi netu mashi ajila muloña emenañaku wumi. Dichi, twalondelaña yishina yamuBayibolu neyi tunakufuukula hanjila yakuuka yinabombelimu kusha mashi.

10, 11. (a) Yitoñojoka yawaYinsahu jaYehova yekala ñahi kutalisha hakusha mashi ejima hela yuma yiwana yatuña mashi? (b) Yumanyi yatela kudifuukwila mukwaKristu wejima?

¹⁰ A Yinsahu jaYehova eluka nawu ‘kuleka . . . mashi’ mwabombela yuma yayivulu yinabadiki hakubula kuyida nikuyinwa. Chaya mukwila nawu kubula kutwinka mashi, kuhana mashi hela kuhemba mashi etu kulonda akatushili mumujimba neyi tunakati. Cheñi, chinayi mukwila nawu akaanaña kuyisha yuma yamaneni yiwana yatuña mashi, yidi neyi masewuzi achinana (red cells), masewuzi atooka (white cells), mashi adikwataña (platelets) nimenji amumashi (plasma).

¹¹ Muniyi yuma yamaneni yatuña mashi mwekala tuyuma twanyanya twekala mumashi. MukwaKristu wejima watela kudifuukwila neyi wukwiteja tuyuma twanyanya twamumashi hela nehi. Dichuma chochimu chatela nikuzatika hanjila yakuukilamu kuzatisha mashi ayamweni wakata. Yomweni wukudifuukwilahu chakelawu hakumuladika, hakumuuka nihakuzatisha mashi indi.—Talenu Mazu Adi Kunsa 21.

12. (a) Tukuhosheladi netu kufuukula kwetu kwashindamena hachinleji Yehova wakwilukaña? (b) Yumanyi yikutukwasha kufuukula chiwahi hanjila jakuukilamu?

¹² Komana Yehova wamonaña yuma yitwafuukulaña kuzatisha chinleji? Eña. Yehova wakeña kwiluka chidi yitoñojoka nimaana etu. (Tañenu Yishimu 17:3; 24:12.) Chineli welukaña, neyi tunakukeña njila yakutuukilamu, twatela kulomba kudi Yehova kulonda yatulomboli, kufumahu dinu hitukukeñakeña njila yakutuukilamu. Kufumahu, tukufuukula kuzatisha chinleji chetu chadizishewa naBayibolu. Bayi  tuya nakwihula akwetu kulonda atuleji chadi kwilawu neyi diwu adiña nakukala kutukwetiku, nawa bayi twiteja akwetu atuleji mwakwililaku. Muloña mukwaKristu wejima ‘wukudisendela chiteli chindi.’—Añalija 6:5; Aroma 14:12.

13. Yumanyi yitwadizaña hadi Yehova kutalisha kunshimbi niyishina yahosha hamashi?

¹³ Yuma yatulejañayi Yehova nindi twili yatukwashaña nawa yamwekeshaña nawu watukeña. (Masamu 19:7-11) Bayi neyi twamwovwahilaña hohu hamuloña wakwila nshimbi jindi jatukwashañaku. Twamwovwahilaña muloña twamukeña. Kukeña kutwamukeña Yehova dikwatuleñelaña tukaaneña kutwisha mashi. (Yilwilu 15:20) Cheñi, twakiñewaña kunyisoñu. Antu amavulu makonu aneluki wubanji wenzaña mukusha mashi chakwila niandotolu amavulu eluka nawu kuladika muyeji chakadi kumusha mashi kukumukwasha kuhanda chiwahi. Mwalala nshimbi jaYehova jajiwahi nankashi.—Tañenu Isaya 55:9; Yowanu 14:21, 23.

14, 15. (a) Nshimbinyi jaheniyi Yehova kudi antu jindi nindi jiyikiñeña? (b) Yishinanyi yidi muniji nshimbi yitukuzatishaña?

¹⁴ Nshimbi jaNzambi jayikwashaña nankashi antu jindi. Yehova wayinkeli aIsarela akushankulu nshimbi kulonda jiyikiñeña kuwubanji. Chakutalilahu, lushimbi lumu lwahosheli nawu muntu watela kutuña ikoli kwiwulu detala dindi kuchiina muntu kuholoka. (Kuhituluka 22:8) Lushimbi lukwawu lwakundamini kudi atunyama. Neyi muntu wukweti ñombi wazuwa,  wateleli kumuhemba chiwahi kulonda yabuli kuhuma hela kujaha muntu. (Kwidika 21:28, 29) AIsarela adikañileña naniji nshimbi, ekalileña namuloña neyi muntu amujaha.

¹⁵ Iji nshimbi jinakutuleja nawu Yehova walemesha wumi. Tukwiluka ñahi netu iyi nsañu yinakundami nikudi etu? Twatela kumwekesha netu twalemesha wumi chitwahembaña itala detu nimotoka yetu, chitwendeshaña niyuma yitwasakulaña yakumanishilamu wuudi. Antu amakwawu, sweje-e atwansi, wubanji awumonaña wanyi niwoma wayimana dehi, nawa adiwulaña wubanji wunateli kwinza. Yehova hanakukeña nindi twileña yuma muniyi njilaku. Nakukeña tumoneña mawumi ejima netu alema, dikwila nawu wumi wetu niwawakwetu.—Mukwakutañisha 11:9, 10.

16. Indi Yehova wamonaña ñahi kufumisha ivumu?

¹⁶ Yehova walemesha nankashi mawumi awantu ejima. Walemesha niwumi wamwana wuchidi mwivumu. MuNshimbi jaMosi, neyi muntu yakatisha mumbanda wudi nevumu chakuluwukila nawa ona mumbanda hela mwanindi afwa, owu muntu wadiña namuloña kudi Yehova wakujaha muntu. Ichi chinatalishi mukwila nawu hela chakwila awa himaposu, ilaña muntu nafwi nawa wunamujahi watela kufweta. (Tañenu Kwidika 21:22, 23.) Nzambi wamonaña mwana wuchidi kanda yavwaliki nindi himuntu. Munakutoñojoka nenu Nzambi watiyaña ñahi neyi muntu nafumishi ivumu? Munatoñojoki nenu watiyaña ñahi hakumona nyana yayivulu yinakusulumunawu hachaaka-hachaaka?

17. Yumanyi yikumukundeja mumbanda wafumishili ivumu henohu kanda yamwiluki Yehova?

 ¹⁷ Indochu neyi mumbanda wafumishili ivumu henohu kanda yamwiluki Yehova? Watela kwiluka nindi Yehova wukumwanakena kushindamena hefutu danyiloña daYesu. (Luka 5:32; Aefwesesa 1:7) Mumbanda welili chuma chamuchidiwu watela kuleka kudinka nyiloña neyi chakwila nakuli mazala helola. “Yehova wenzala wushona, . . . wasweja luwi. . . . Nafumishi nyiloña yetu, nayitwali kwakulehi neyi kufumisha kumusela nakushika kumujika.”—Masamu 103:8-14.

18. Muloñadi chitukuzatila nañovu kulonda tuleki yitoñojoka yatama?

¹⁸ Kulemesha chawana chahanayi Nzambi chawumi kwatachikilaña munyichima yetu. Munabombeli nichitwamonaña akwetu. Kapostolu Yowanu nindi: “Muntu wejima wahela manakwindi, himukwakujaha antu.” (1 Yowanu 3:15) Neyi twamukeña wanyi owu muntu, tunenzi tumuheli. Kuhelañana kwaleteshaña muntu kudiwula akwawu, kuyikasila nsañu yakutwamba hela kukeña nawu afwi. Yehova weluka chatwayimonaña akwetu antu. (Alevi 19:16; Kuhituluka 19:18-21; Matewu 5:22) Dichi neyi tunamoni netu kudi muntu itunaheli, twatela kuzata nañovu kulonda tuleki yitoñojoka yatama.—Yakoba 1:14, 15; 4:1-3.

19. Chineli Yehova wahela madombu, chikutuletesha kwiladi?

¹⁹ Kudi njila yikwawu mutwamwekeshelaña netu twalemesha wumi. HaMasamu 11:5, twadizañahu nawu Yehova ‘wahela muntu wakeña madombu.’ Dichi neyi tusakula yuma yakumanishilamu wuudi  yamadombu, tunakumwekesha netu twakeña madombu. Muloñadi chitukubulila kutala, kutiya hela kutoñojoka hayuma mudi madombu? Muloña tunakukeña kwinzesha yitoñojoka yetu nayuma yayiwahi yikutukwasha kwikala awunda.—Tañenu Afwilipi 4:8, 9.

20-22. (a) Yehova wamonaña ñahi kaayi kaSatana? (b) Indi antu jaNzambi amwekeshaña ñahi nawu ‘hiyadi amukanu kaayiku’?

²⁰ Antu amukaayi kaSatana alemesha wumi wanyi, nawa Yehova nindi akweti muloña wamashi, muloña wakujaha antu. Hadi yaaka yayivulu, akwamapolitiki anajahishi antu amavulu nankashi, kushilahu niantu jaYehova. Bayibolu yatena awa mapolitiki hela nfulumendi nawu adi neyi atunyama azuwa nankashi. (Danyeli 8:3, 4, 20-22; Chimwekeshu 13:1, 2, 7, 8) Mukaayi makonu, kulandisha mata hibizinisi yeneni nankashi. Antu anakuwaninamu mali amavulu mukulandisha iyi yitwa yafwana. Mwalala, “kaayi kejima kadi mumakasa awatama.”—1 Yowanu 5:19.

²¹ Ilaña akwaKristu alala ‘hiyadi amukanu kaayiku.’ Antu jaYehova hiyadiñijaña mujamapolitiki hela kuya kunjitaku. Chochabulañawu kujahañana, hiyadibombaña mumazanvu ajahaña antuku. (Yowanu 15:19; 17:16) Neyi akwaKristu anakuyiyandisha, wena hiyadamwinaña namadombuku. Yesu watudizisha nindi twatela kukeña ayilumbu jetu.—Matewu 5:44; Aroma 12:17-21.

²² Nyitayi yakudifukula niyena yinahondesheshi antu amavulu nankashi. Bayibolu yahosha hadi  Babiloni Muneni, wanta wakaayi wakudifukula kwakutwamba nawu: “Mudi yena mwawanikili mashi awatuprofwetu, awakwakujila nimashi awantu ejima ajahawu hamaseki.” Namoni tuneluki chatulejelañayi Yehova nindi: “Antu jami, fumenu mudi yena.” Antu adifukulaña kudi Yehova hiyekala mukudifukula kwakutwambaku.—Chimwekeshu 17:6; 18:2, 4, 24.

23. Yumanyi yinabombeli ‘mukufuma’ muBabiloni Muneni?

²³ Hakwila tumwekeshi netu muBabiloni Muneni ‘tunafumimu’, twatela kwila yuma yikumwekeshaña nawu hitwakundama kukudifukula kwakutwambaku. Chakutalilahu, twatela kwiluka chikupu netu ijina detu anadijimi hamajina awantu ekala mukudifukula kwamuchidiwu. Twatela kwila cheñi yuma yikwawu. Twatela kuhela nikukaana yuma yatama yelañawu mukudifukula kwakutwamba. Antu amukudifukula kwakutwamba etejaña antu jawu kwila wuvumbi, kudiñija mumapolitiki nilwisu. (Tañenu Masamu 97:10; Chimwekeshu 18:7, 9, 11-17) Mukuhita kwampinji, antu amavulu nankashi anahondekelimu.

24, 25. Indi kumwiluka Yehova kwatukwashaña ñahi kwikala awunda nichinleji chachiwahi?

²⁴ Henohu kanda tumwiluki Yehova, wonsu wetu kudi yuma yatama yitwelileña yelañawu antu amwituña daSatana. Ilaña ichi twahimpa. Tweteja ifutu danyiloña nawa twahana mawumi etu kudi Nzambi. Tunakumona ‘yilaaka yakuzañalesha . . . yinakufuma kudi Yehova yomweni.’ Tukweti kuwunda nichinleji chachiwahi, muloña tuneluki netu tunakumuzañalesha Nzambi.—Yilwilu 3:19; Isaya 1:18.

²⁵ Hela twakundamini kwizanvu dabulaña kulemesha  wumi, Yehova nateli kutwanakena kushindamena hefutu danyiloña. Twamusakililaña Yehova hakutwinka chawana chawumi. Tukumwekesha kusakilila kuhitila mukudikita chikupu kulonda tukwashi antu amwiluki Yehova, afumi mukaayi kaSatana, nikwikala amabwambu jaNzambi.—2 Akorinda 6:1, 2.

26-28. (a) Mudimwinyi walema wamwinkeliwu Ezekeli kudi Yehova? (b) Mudimwinyi wunatwinkiyi Yehova makonu?

²⁶ MuIsarela wakushankulu, Yehova wamulejeli kaprofwetu Ezekeli kusoñamisha antu nawu Yerusalema keña amukisañani nawa nindi ayileji yuma yatela kwilawu kulonda akahandi. Neyi Ezekeli wayisoñamishili antu wanyi, Yehova wadi kumwinka muloña wakujahisha antu. (Ezekeli 33:7-9) Ezekeli wamwekesheli nindi walemesha mashi muloña wadishiliku kuleja antu iyi nsañu yalema.

²⁷ Yehova watwinka iwu mudimu wakusoñamisha antu nawu ituña daSatana keña adikisañani nawa twatela kuyileja amwiluki Yehova kulonda ekeñili mwituña dadiha. (Isaya 61:2; Matewu 24:14) Dichi twatela kudishaku chikupu kulonda tuyileji antu yuma yikamwekana kumbidi. Neyi twila mwenimu, tukuhosha neyi chahosheliyi Pawulu nindi: “Hinikweti muloña wamashi awantu ejimaku, muloña hinnaleki kuyileja enu nkeñelu yejima yaNzambiku.”—Yilwilu 20:26, 27.

²⁸ Kudi yuma yikwawu yitwatela kwila kulonda twikali atooka. Tuhanjekenu hayumiyi mukapetulu kanalondelihu.