Nshimbi jaNzambi jashindamena hayishina yindi. Iyi yishina hinsañu yalala yekala muBayibolu. Yatukwashaña kwiluka chatoñojokañayi Nzambi nichatiyañayi nakukala. Yishina yatukwashaña kufuukula chiwahi nikwila yuma yaloña muchihandilu chetu. Yatukwashaña cheñi munsañu jikwawu jabula kushimunawu jiika munshimbi jaNzambi.

▸ Kapetulu 1, paragilafu 8

Kumwovwahila Yehova kwatalisha mukwila mwejima mwatulejañayi. Yehova wakeñaña nindi tumwovwahileña muloña twamukeña. (1 Yowanu 5:3) Neyi twamukeña nikumukuhwelela Nzambi, tukwovwahilaña kufumba kwindi munjila jidi jejima. Hela chinatukalili chamuchidinyi tukumwovwahilaña. Chalema nankashi kumwovwahila Yehova, muloña watudizishaña chakwikala nachihandilu chachiwahi chayinu mpinji nawa watukana nindi tukadiluñishaña nkisu jajivulu kumbidi.—Isaya 48:17.

▸ Kapetulu 1, paragilafu 10

Yehova watwinka wonsu wetu wuswa hela ñovu yakufuukula chiwahi. Atuleñeli neyi marobotiku. (Kuhituluka 30:19; Yoshuwa 24:15) Tunateli kuzatisha weniwu wuswa wetu hakwila nawu tufuukuli chiwahi. Ilaña neyi kubabala nehi, tunateli kufuukula chiwahi wanyi. Kwikala nawuswa wakufuukula kwatalisha mukwila nawu twatela kudifuukwila neyi chakwila tunakukeña kwikala ashinshika kudi Yehova nikumwekesha netu twamukeña chikupu.

▸ Kapetulu 1, paragilafu 12

Yehova washaku nshimbi jajiwahi, hela yuma yatulombolaña muyilwilu nimuyuma yitwelaña. MuBayibolu dimu tunateli kudiza chekala iyi nshimbi nichiyinateli kutukwasha kwikala nachihandilu chachiwahi. (Yishimu 6:16-19; 1 Akorinda 6:9-11) Iyi nshimbi yatukwashaña kwiluka  yuma yamonañayi Nzambi nindi yayiwahi hela yatama. Yatukwashaña cheñi kwiluka chakwikala nakukeña, chakufuukula chiwahi nikwikala naluwi. Hela chakwila nshimbi jamukaayi jinakufunta mwishina, nshimbi jaYehova hijabalumukañaku. (Kuhituluka 32:4-6; Malaki 3:6) Kujilondela kwatukiñaña kuyuma yinateli kuleta wubanji kumujimba wetu nikutuletela chikela.

▸ Kapetulu 1, paragilafu 17

Chinleji chetu hiwuntu wamukachi watulejaña yuma yayiwahi niyatama. Yehova watwinka wonsu wetu chinleji. (Aroma 2:14, 15) Hakwila nawu chinleji chetu chizateña chiwahi twatela kuchidizisha kwesekeja nanshimbi jaYehova. Kufumahu chinleji chetu chikutukwashaña kufuukula mwamuzañaleshaña Nzambi. (1 Petulu 3:16) Chinleji chetu chinateli kutusoñamisha neyi hitukukeña kufuukula mwatama hela chikutuletesha kuneña nankashi hayuma yatama yituneli. Chinleji chetu chinateli kuzeya ilaña nawukwashu waYehova, tunateli kuchikolesha cheñi. Chinleji chachiwahi chatuleteshaña kwikala nakuwunda kwamuyitoñojoka nikudilemesha.

▸ Kapetulu 2, paragilafu 3

Kumutiya Nzambi woma kwatalisha mukwila nawu twatela kumukeña nikumulemesha nankashi, chakwila tunateli kumuneñesha wanyi. Kumutiya Nzambi woma kwatukwashaña kwila yuma yayiwahi nakubula kwila yatama. (Masamu 111:10) Kwatukwashaña kutiyilila nakanañachima yuma yejima yahoshañayi Yehova. Kwatukwashaña cheñi kuhemba mutwamukanini muloña twamulemesha nankashi. Kumutiya Nzambi woma kwatukwasha kutoñojoka chiwahi, chitwadikundaña nawantu nimuyuma yitwafuukulaña mafuku ejima.

▸ Kapetulu 2, paragilafu 9

Kubalumuka mumuchima kwabombelamu chineñi chatiyañayi muntu  neyi neli yuma yatama. Antu amukeña Nzambi atiyaña kutama nankashi neyi eluka nawu anakoñi yuma yatama. Neyi tunavulumuni, twatela kumulomba Yehova yatwanakeni kushindamena hefutu danyiloña daYesu. (Matewu 26:28; 1 Yowanu 2:1, 2) Neyi tubalumuka chikupu mumuchima nakuleka kwila yatama, twatela kukuhwelela chikupu netu Yehova wukutwanakena. Hitwatela kudinkaña nyiloña hamuloña wayuma yitwelileña kunyimaku. (Masamu 103:10-14; 1 Yowanu 1:9; 3:19-22) Twatela kuzata nañovu kulonda tudizili kuyiluwa yetu, lekenu yitoñojoka yatama nawa shakamenu kwesekeja namwaya nshimbi jaYehova.

▸ Kapetulu 2, paragilafu 18

Neyi muntu nakoñi nshidi yahamesu bwi-i nawa yakaana kulondela nshimbi jaYehova, hatela kwikala muchipompeluku. Atela kumuhaña. Neyi muntu anamuhañi, hitwatela kudikundaña nindi hela kuhoshaña nindiku. (1 Akorinda 5:11; 2 Yowanu 9-11) Ntanjikilu yakuhaña muntu muchipompelu yakiñaña ijina daYehova nichipompelu. (1 Akorinda 5:6) Kuhaña muntu muchipompelu hinjila yimu yakubabeshelamu muntu kulonda yabalumuki nakufunta kudi Yehova.—Luka 15:17.

▸ Kapetulu 3, paragilafu 19

Yehova watukeña nawa nakukeña kutukwasha. Dimuloña waweni watulejelañayi, kutulombola nikutufumba kuhitila muBayibolu nimudi antu amukeña Nzambi. Chineli twawanina wanyi, tunakukeña iwu wukwashu. (Yeremiya 17:9) Neyi tutiyililaña antu azatishañayi Yehova kutulombola, tukumwekeshaña netu twamulemesha nawa tunakukeña kumwovwahila.—Aheberu 13:7.

▸ Kapetulu 4, paragilafu 2

Chineli twawanina wanyi chinateli kwikala chaswayi kwikala adikeña nawa adinka wanta. Ilaña Yehova wakeñaña nindi twikaleña adizoza. Kakavulu twadizozaña neyi tudesekeja naYehova nikumona chitwekala akeha kudi yena. (Yoba 38:1-4) Chuma chikwawu chinateli kutukwasha kwikala adizoza hikutoñojokelaku akwetu niyuma yinateli kuyitiyisha kuwaha kubadika etu aweni. Kudinka wanta kwaleñelaña muntu kudimona nindi wabadika akwawu. Muntu wadizoza wadishinshikaña yomweni nakumona ñovu jindi nikuzeyazeya kwindi. Wetejaña neyi naluwañeshi, wadanakenaña, watiyililaña munakumulejawu nawa wetejaña nikufumba. Muntu wadizoza wamushindamenaña Yehova nikunlondela wunlomboli windi.—1 Petulu 5:5.

▸ Kapetulu 4, paragilafu 4

Wuswa hiñovu yakuleja antu yuma yakwila nikufuukula. Yehova diyi wukweti wuswa wabadika mwiwulu nihamaseki. Chineli diyi waleñeli yuma yejima, diyi Muntu wabadika mukuleña kwejima. Mpinji yejima wazatishaña wuswa windi kulonda yakwashilimu yileñaleña yindi. Yehova wayinka antu amakwawu kukooleka kwakutunlombola. Chakutalilahu, anvwali, akulumpi muchipompelu, niakwanfulumendi akweti wuswa nawa Yehova nakukeña nindi tuyovwahileña. (Aroma 13:1-5; 1 Timotewu 5:17) Ilaña neyi nshimbi jawantu jinakuzuña nanshimbi jaNzambi chikuwaha nankashi kwovwahila Nzambi kubadika antu. (Yilwilu 5:29) Neyi twiteja chinakutulejawu antu anakuzatishayi Yehova, twamwekeshaña netu twalemesha mwafuukulañayi.

▸ Kapetulu 4, paragilafu 7

Yehova wazatishaña akulumpi akulukila kulonda akameneña chipompelu. (Kuhituluka 1: 13; Yilwilu 20:28) Awa amayala atukwashaña kutwalekahu kwikala nawubwambu wakola naYehova nikudifukula kudi yena mukuwunda nimunjila yatelela. (1 Akorinda 14:33, 40) Hakwila akulumpi ayitondi kudi spiritu yajila, atela kushikija yuma yashimunawu muBayibolu.  (1 Timotewu 3:1-7; Titusa 1:5-9; 1 Petulu 5:2, 3) Twakuhwelela kuloñesha kwaNzambi nawa twakwikwashaña, chafumañamu twazataña namuzañalu hamu nawakulumpi.—Masamu 138:6; Aheberu 13:17.

▸ Kapetulu 4, paragilafu 8

Yehova wayinka atata jawantu mudimu wakwakamena anyanawu niamwitala dawu. Hela chochu, Bayibolu yalumbulula nawu iyala diyi mutu wachisaka. Neyi kwosi iyala, mama yawantu diyi wekalaña mutu wachisaka. Nyidimu yikwetiyi mutu wachisaka yekala yakuloñeshela amwitala dindi yakuda, yakuvwala nihakushakama. Chalema nankashi mutu wachisaka kulombolaña chisaka chindi mukudifukula kudi Yehova. Chakutalilahu, watela kumonaña nindi anakupompa mpinji yejima nikushimwina nawa anakudizila hamu Bayibolu. Mutu wachisaka cheñi diyi watela kufuukulaña muchisaka chindi. Mpinji yejima wafwilaña kumwimbujola Yesu kuhitila mukwikala naluwi nawa wakutoñojokelaku, hekala nalukambu hela kwikala wakalishaku. Chumichi chaleteshaña chisaka kwikala namuzañalu, kulonda ejima muchisaka atiyeña nawu akiñewa nikwikala nawubwambu wakola naYehova.

▸ Kapetulu 4, paragilafu 12

Izanvu Dalombolaña hizanvu dawamayala akweti kuchiñeja kwakuya mwiwulu azatishañawu kudi Nzambi hakulombola mudimu wawantu jindi. Mumafuku awapostolu, Yehova wazatishileña izanvu dalombolaña hakulombola akwaKristu akusambila mukudifukula kwawu nimumudimu wakushimwina. (Yilwilu 15:2) Makonu, izanvu dawamanakwetu ekala mwizanvu dalombolaña diwu atwamininaña, anlombolaña nikukiña antu jaNzambi. Awa amanakwetu neyi anakufuukula ashindamenaña Mwizu daNzambi nihaspiritu yindi yajila. Yesu wateneni idi izanvu dawamayala awayishewa nindi “nduñu wamaana nikashinshi.”—Matewu 24:45-47.

▸ Kapetulu 4, paragilafu 15

Kunateli kwikala mpinji yimu yakwila anateli kuleja muhela nawu yazati mudimu wazatañawu amanakwetu muchipompelu. Neyi hakuzata weniwu mudimu, wamwekeshaña kalemesha kuntanjikilu yaYehova kuhitila mukubuta kumutu windi. Ilaña lubadi lwakubuta kumutu lunateli kuzatika hohu mpinji jikwawu. Chakutalilahu, muhela wukubuta kumutu neyi nakulombola kadizi hadi nfumwindi hela hadi manakwetu wapapatishewa.—1 Akorinda 11:11-15.

▸ Kapetulu 4, paragilafu 17

Twadiñijaña wanyi munsañu jamatuña nachiyulu. (Yowanu 17:16) Antu jaYehova akwashaña Wanta windi. Neyi chochadiñayi Yesu, hitwadibombaña munsañu jamatuñaku.

Yehova watulejeli nindi ‘ovwahilenuña jinfulumendi niakwawuswa.’ (Titusa3:1, 2; Aroma13:1-7) Ilaña nshimbi jaNzambi jahosha cheñi nawu bayi mujahanaku. Dichi chinleji chamukwaKristu kwila chimwiteja kuya kunjita nehi. Neyi mukwaKristu nakukeña kuzata mudimu wakukwasha mashidika watela kumona neyi chinleji chindi chikumwiteja kwila mwenomu.

Twadifukulaña hohu kudi Yehova muloña diyi Nleñi yetu. Hela chakwila twamekeshaña kalemesha kuyifwikija yetuña, hitwatela kubuzwila mpandela hela kwimba kamina ketuñaku. (Isaya 43:11; Danyeli 3:1-30; 1 Akorinda 10:14) Cheñi, antu jaYehova afuukulañahu awenawu kubula kuhakwilaku pati yimu hela muntu wunemani. Twelaña mwenimu muloña twekala dehi akukabadi kanfulumendi yaNzambi.—Matewu 22:21; Yowanu 15:19; 18:36.

▸ Kapetulu 5, paragilafu 2

Kaayi katandishaña yitoñojoka yaSatana. Yitoñojoka yamuchidiwu yinatandi nankashi kudi antu abula kumukeña Nzambi, abulaña kumwimbujola  Yehova nawa adiwulaña nshimbi jindi. (1 Yowanu 5:19) Yitoñojoka yamuchidiwu niyilwilu yamwekanaña, yakojejaña kuyitena nawu spiritu yamukaayi. (Aefwesesa 2:2) Antu jaYehova azataña nañovu hakwila nawu abuli kuyihuñumuna naniyi spiritu. (Aefwesesa 6:10-18) Ilaña, twakeña njila jaYehova nawa twazataña nañovu kulonda tutwalekihu kukolela kuyitoñojoka yindi.

▸ Kapetulu 5, paragilafu 7

Akwakusekesha hiyantu adimbululaña chalala chamuBayibolu. Adikañaña naYehova niYesu, atondawu kwikala Mwanta muWanta waNzambi, nawa afwilaña kuluwañesha antu kulonda adibombi nawu. (Aroma 1:25) Anakukeña antu adifukulaña kudi Yehova ajinokeña. Antu amakwawu adiña muchipompelu chawakwaKristu akusambila ekalili akwakusekesha, nimakonu akwakusekesha adi kwoku. (2 Atesalonika 2:3) Ilaña antu ashinshika kudi Yehova hiyadikundaña nawakwakusekeshaku. Hitwaketeja ikakeja dawantu kutukojeja kutaña hela kutiyilila kuyitoñojoka yawakwakusekeshaku. Twekala ashinshika kudi Yehova nawa twadifukulaña hohu kudi yena.

▸ Kapetulu 5, paragilafu 9

Munshimbi jaMosi, muza waIsarela wamulombeli Yehova kulonda ayanakeni nshidi jawu. Aleteleña nyilambu yakubuta hanshidi yidi neyi tidiku, manji niayimuna kutembeli. Muniyi njila, aIsarela anukileña nawu Yehova wakeñeleña kuyanakena nshidi jawu, muza wejima hela muntu-himuntu. Hanyima yakwila Yesu nahani dehi wumi windi wakubuta hanshidi jetu, kuhana nyilambu yakubuta hanshidi kwamanini. Yesu wahanini mulambu wawanina “walambwiliyi kamu hohu.”—Aheberu 10:1, 4, 10.

▸ Kapetulu 7, paragilafu 6

Munshimbi jaMosi, antu ayitejeli kuda mbiji. Ayilejeli cheñi kulambula  ayimuna. (Alevi 1:5, 6) Ilaña Yehova hetejeli antu jindi kwikala nalukambu kudi atunyamaku. (Yishimu 12:10) Mwamweni, kwadiña Nshimbi yashimwineña hakukiña ayimuna. AIsarela ayilejeli kuhemba yimuna yawu chiwahi.—Kuhituluka 22:6, 7.

▸ Kapetulu 7, paragilafu 6

Tuyuma twanyanya twekala mumashi. Mashi atuñewa nayuma yamaneni yiwana, yidi neyi masewuzi achinana (red cells), masewuzi atooka (white cells), mashi adikwataña (platelets) nimenji amumashi (plasma). Muniyi yuma yamaneni yatuña mashi mwekala nituyuma twanyanya twekala mumashi. *

AkwaKristu akaanaña kuyisha mashi hela yuma yiwana yamaneni yekala mumashi. Komana atela kwiteja tuyuma twanyanya twekala mumashi? Bayibolu hiyalumbulula chikupuku. Dichi mukwaKristu wudi wejima watela kufuukulahu kushindamena hachinleji chindi chadizishewa naBayibolu.

AkwaKristu amakwawu akaanaña kutambula mashi adi ejima. Anateli kuhosha nawu Nshimbi yaNzambi yayinkeliyi aIsarela yahosha nawu mashi adi ejima anafumishiwu mudi kanyama atela kuyimwaña “hamaseki neyi meji.”—Kuhituluka 12:22-24.

Amakwawu afuukulañahu mwambukaku. Yinleji yawu yayitejaña kutambula tuyuma tukwawu twanyanya twamumashi. Anateli kutoñojoka nawu neyi tuyuma twanyanya anatufumishi dehi mumashi hitwekalaña cheñi kabadi kawumi wachileñaleña wukweti mashi mwanatufumishuwuku.

Neyi himukufuukulahu chimwatela kwila natuyuma twanyanya twamumashi, dihulenu nenu:

•   Komana neluki nami chinakaana tuyuma twejima twamumashi dikwila nawu hinaketeja yitumbu yejima yakañeshaña nyisoñu hela yinateli kulekesha mashi kupwekaku?

• Nateli kumulumbulwila ñahi ndotolu muloña wunaleñeli nikaani hela niiteji kuzatisha kachuma kamu hela tuyuma twanyanya twamumashi?

Njila yakuukilamu. Etu akwaKristu hitwahanaña mashi, hela hitwatentekaña mashi etu kulonda akayizatishi hakatuladikañawuku. Hela chochu, kudi njila jikwawu jinateli kuzatishawu mashi ayomweni muyeji. MukwaKristu yomweni watela kudifuukwilahu chakelawu hakumuladika, hakumuuka nihakuzatisha mashi indi. Hampinji yinakumuladikawu muyeji, mashi indi anateli kuyifumishamu nakuyisha hambadi.—Neyi munakukeña kwilukilaku nsañu yikwawu, talenu Kaposhi Kakutalila, kaOctober 15, 2000, mafu 30-31.

Chakutalilahu, kwekala njila yatenañawu nawu hemodilution, yazatishañawu hakufumisha mashi mumujimba wamuyeji nakuhiñishamu yuma yidi neyi menji. Nkumininaku hanyima yakumuladika mashi ayifuntishañamu cheñi mudi muyeji.

 Njila yikwawu ayitenaña nawu cell salvage. Muniyi njila mashi amuyeji anapweki hampinji yakumuladika ayihembaña, kuyiwahisha, nawa ayifuntishaña mumujimba wamuyeji hampinji yinakumuladikawu hela hanyima yakumanisha.

Ndotolu wudi wejima nateli kuzatisha iji njila munjila jashiyashana. Dichi henohu kanda yeteji njila yidi yejima yakuladikilamu, hakumuuka nihakuzatisha mashi, mukwaKristu watela kwihula ndotolu yindi yamuleji njila yikuzatishayi.

Neyi himukufuukula kutalisha haniji njila jakuyuukilamu, dihulenu awa malwihu analondelihu:

• Neyi mashi ami amakwawu akuyifumisha mumujimba wami nawa akukañesha mashi kuhita hakapinji kanti, komana chinleji chami chikuñiteja kumona awa mashi nawu ami, chatela ‘ayimwañili hamaseki’?—Kuhituluka 12:23, 24.

• Komana chinleji chami chadizishewa naBayibolu chikunkabishaña neyi hampinji yakuñuuka mashi ami amakwawu ayifumishamu, ayiwahisha, nakuyifuntisha cheñi mumujimba wami?

• Komana neluki nami kukaana njila jejima jakuukilamu jinabombelumu kuzatisha mashi ami chinayi mukwila nawu nakaani kumpima mashi, hemodialysis hela kuzatisha ikina daheart-lung bypass?

Henohu kanda tufuukulihu kuzatisha tuyuma twanyanya twamumashi nichakutuuka kuzatisha mashi etu, twatela kulomba wulomboli waYehova  nikusandujola. (Yakoba 1:5, 6) Kuhiñahu dinu, twatela kufuukulahu kuzatisha chinleji chetu chadizishewa naBayibolu. Hitwatela kwihula antu amakwawu chadi kwilawu neyi adiña muniku kukala, hela kwiteja amakwawu kutufuukwilaku.—Aroma 14:12; Añalija 6:5.

▸ Kapetulu 7, paragilafu 11

Kwikala nayilwilu yayiwahi kwatalisha mukwila nawu yilwilu yetu niyuma yitwelaña yatela kwikala yawunyoji kudi Nzambi. Kwikala nayilwilu yayiwahi mwabombela chitwatoñojokaña, chitwahoshaña niyuma yitwelaña. Yehova watuleja kubula kwila wuvumbi hela yuma yawuzondu yidi yejima. (Yishimu 1:10; 3:1) Twatela kufuukula netu tukulondelaña yilwilu yayiwahi yaYehova hela chakwila kanda twiñili mukukala kukutukojeja kwila chuma chatama. Twatela kulomba wukwashu waYehova kulonda yatukwashi kwikala nayitoñojoka yitooka, nawa twatela kukaana yilwilu yatama.—1 Akorinda 6:9, 10, 18; Aefwesesa 5:5.

▸ Kapetulu 8, paragilafu 11

Yilwilu yawuzondu yabombelamu kuhosha hela kwila yuma yafumpaña nshimbi jaNzambi nawa yamwekeshaña yilwilu yansonyi. Muntu welaña yuma yamuchidiwu wamwekeshaña nindi walemesha nshimbi jaNzambi wanyi. Neyi muntu amuwana nawu wudi nayilwilu yawuzondu, akulumpi atela kumutuñila kometi yawunsompeshi. Yilwilu yawukapwa nsonyi yabombelamu yilwilu yayivulu yatama. Chidi nakukala kwakweni chikudi, nsañu jikwawu munadibombeli yilwilu yawukapwa nsonyi hadaha jinateli kukeñeka kometi yawunsompeshi yachipompelu.—Añalija 5:19-21; Aefwesesa 4:19; neyi munakukeña kwilukilahu nsañu yikwawu, talenu chibaaba chinakwila nawu “Malwihu Kufuma Kudi Antañi” muKaposhi Kakutalila kaJuly 15, 2006.

▸ Kapetulu 9, paragilafu 7 Kapetulu  12, paragilafu 10

Yehova washiliku kubulakana kweyala namumbanda kulonda adimwekesheleña kukeña. Ilaña neyi muntu yadichuka hela yazatisha yiidi yindi yalusemu munjila yatama kulonda yasañumuni wuvumbi, dikwila nawu nakuzatisha ichi chawana munjila yatama. Ichi chilwilu chinateli kumanisha wubwambu windi naYehova. Chinateli kumukojeja kuteñuka nawuvumbi nawa wukumonaña kudikaama nindi kwatama. (Akolosi 3:5) Muntu wekala nanichi chaaku nawa wakañanyaña kuleka watela kuzeya wanyi. (Masamu 86:5;1 Yowanu 3:20) Neyi diku kukala kumukweti, mulombenu Yehova yayikwashi. Lekenu kutala nyevulu yanzekesi, yinateli kuyikojeja kwikala nanichi chaaku. Lejenuku anvwali jenu akwaKristu hela ibwambu denu walemesha nshimbi jaYehova. (Yishimu 1:8, 9; 1 Atesalonika 5:14; Titusa 2:3-5) Kuhwelelenu chikupu nenu Yehova wamonaña nawa walemesha chimwatwalekañahu kudihemba nawunyonji.—Masamu 51:17; Isaya 1:18.

▸ Kapetulu 9, paragilafu 9

Kashidikilu kakwikala namumbanda wabadika hawumu muwulu akitenaña nawu wuhadi. Yehova washiliku wulu nindi mwikali iyala wumu nimumbanda wumu. MuIsarela wakushankulu, Nzambi wetejeli amayala kwikala nawambanda amavulu, ilaña dichadiña nkeñelu yindi wanyi. Makonu, Yehova wetejaña wanyi wuhadi hadi antu jindi. Iyala watela kwikala hohu namumbanda wumu, mumbanda niyena watela kwikala hohu neyala wumu.—Matewu 19:9; 1 Timotewu 3:2.

▸ Kapetulu 10, paragilafu 12

Yehova wakeñeleña eyala namumbanda kutwalekahu kushakama haya nyaaka. (Kutachika 2:24; Malaki 2:15, 16; Matewu 19:3-6; 1 Akorinda 7:39) Weteja kudiseña chiña hohu neyi wumu hakachika kawu neli wuvumbi. Muniyi njila, Yehova wenka wuswa wakufuukulahu kudi wukweti mwinikwindi wuneli wuvumbi neyi chakwila anateli kudiseña hela nehi.—Matewu 19:9.

 Mpinji jikwawu, akwaKristu amakwawu afuukulañahu kwambuka namwinikwawu hela chakwila hosi muloña wawuvumbi. (1 Akorinda 7:11) MukwaKristu nateli kufuukulahu kwambuka neyi yamona iku kukala kunalondelihu.

• Kuleka kukwasha chisaka mumushikila: Chisaka chinateli kwikala muwuzweñi chikupu, kukankila yuma yakudikwasha nachu, muloña iyala nakaani kuyinka yuma, henohu nateli kuyinka.—1 Timotewu 5:8.

• Kwetana: Muntu wamumaluwi wekala nakukala wakojejaña chihandilu chamwini kwawu niwumi windi kwikala muwubanji.—Añalija 5:19-21.

• Kusweja kukañesha wuswa wamuntu wakudifukula kudi Yehova: Muntu wamumaluwi nateli kukañesha mukwawu kumukalakela Yehova.—Yilwilu 5:29.

▸ Kapetulu 11, paragilafu 19

Wejima wetu twakeñaña kutuhameka nikutukolesha. (Yishimu 12:25; 16:24) Tunateli kudikolesha nikudikundeja wumu namukwawu mukukeña nimunhoshelu yaluwi. Nhoshelu yamuchidiwu yinateli kukwasha amanakwetu nawahela kutwalekahu nakuumika nikumukalakela Yehova hela chakwila anakuhita mukukala kwasweja. (Yishimu 12:18; Afwilipi 2:1-4) Neyi muntu naneñi chikupu, twatela kumutiyilila chiwahi nikweseka kutiya chinakutiyayi. Chikutukwasha kwiluka chitukuhosha nichitukwila kulonda tumukwashi. (Yakoba 1:19) Yilukenu amanakwenu niahela chiwahi kulonda mwilukeña jinakukeñawu. Dikwila nawu mukuyikwasha kubalumukila kudi Yehova Nsulu wakukundeja kwejima nawa wakoleshaña, kunateli kuwanawu kuhizumuka.—2 Akorinda 1:3, 4; 1 Atesalonika 5:11.

▸ Kapetulu 12, paragilafu 16

Bayibolu hiyashimuna chikupu nshimbi jakulondela hamawija awuluku. Tushidikilu ninshimbi jenda nakwamboka-mboka kwesekeja  namaluña. (Kutachika 24:67; Matewu 1:24; 25:10; Luka 14:8) Chuma chalema chekala hawulu hichikaninu chamukanañawu Yehova kudi antu anakudisumbula. Amavulu neyi anakudisumbula akeñaña yisaka yawu niamabwambu jawu kwikalahu hampinji yinakudikanawu nawa akeñaña mukulumpi yahani mpanji yashindamena haBayibolu. Anakudisumbula aweni diwu atela kudifuukwila kwakayawu neyi chawija chawu chinamani. (Luka 14:28; Yowanu 2:1-11) Mwejima mukufuukulawu anakudisumbula kutalisha hachatela kwikala chawija chawu, atela kumona nawu chikuleta kalemesha hadi Yehova. (Kutachika 2:18-24; Matewu 19:5, 6) Yishina yamuBayibolu yinateli kuyikwasha kufuukula chachiwahi. (1 Yowanu 2:16, 17) Neyi anakudisumbula anakukeña nawu hachawija chawu hekali walwa, atela kumona nawu yuma yejima yikwenda chiwahi. (Yishimu 20:1; Aefwesesa 5:18) Neyi akukeña nawu hachawija chawu hekali tumina hela yisela, atela kumona nawu jikuhana mpuhu hadi Yehova. AkwaKristu anakudisumbula atela kusha maana hawubwambu wawu naNzambi niwena ayedi bayi neyi hefuku dachawija hohuku.—Yishimu 18:22; neyi munakukeña nsañu yikwawu, talenu Kaposhi Kakutalila kaOctober 15, 2006, mafu 18-31.

▸ Kapetulu 13, paragilafu 18

Tunakukeña tufuukuleña chiwahi kushindamena hayishina yaMwizu daNzambi. Chakutalilahu, mukwaKristu anateli kumutambika kudi mwinikwindi wabula kwikala chinsahu chaYehova nawu akadili hamu nawantaña jawu hefuku dakunooka. Neyi mwadiña enu, kachi mwadi kwila ñahi? Neyi chinleji chenu chinayiteji kuya, mulejenu mwinikwenu nenu neyi kukwikala jakundama kutushidikilu twakutwamba, mukudibombamu wanyi. Mwatela kumona cheñi neyi kudi antu amakwawu atela kuhukana neyi chakwila muya.—1 Akorinda 8:9; 10:23, 24.

Hela muntu wayiñija mudimu nateli kuyinka nfwetu yahewulu mumafuku akunooka. Komana mwatela kukaana? Inehi mwani. Kufuukula kwenu kwakwila neyi mwatela kutambula hela nehi kwatela kushindamena  hadi muntu wayiñija mudimu chinakuchimonayi ochu chawaana? Komana nakuchimona nindi chinakundami kuchidika? Indi kwiji nakukeña hohu kuyisakilila? Kutoñojoka hanawa malwihu nihayuma yikwawu, chikuyikwasha kufuukulahu kutambula hela nehi.

Munjila yikwawu, muntu nateli kuyinka chawaana mumafuku akunooka nakuhosha nindi: “Neluki nami wanakanaña wanyi idi ifuku, ilaña inakukeña kukwinka ichi chuma.” Hadaha nakukeña hohu kuyinka. Komana henaha hanateli kwikalahu kujinooka nawu hekwawu nakukeña hohu kweseka chikuhwelelu chami hela kubombelamu muchidika? Hanyima yakutoñojokahu, chidi kudi enu aweni kufuukulahu kutambula hela nehi. Muyuma yejima yitwafuukulaña, tunakukeña kwikala nachinleji chachiwahi nikwikala ashinshika kudi Yehova.—Yilwilu 23:1.

▸ Kapetulu 13, paragilafu 22

Kakavulu neyi nsañu anayihanjekihu mukunyakashana nawa mukuwunda, kwekalaña wanyi yikonkojola. (Matewu 5:23-26) Chuma chatachi chafwilañawu akwaKristu ejima, hikuleta mpuhu hadi Yehova nikutwalekahu kwikala anuñañana muchipompelu.—Yowanu 13:34, 35; 1 Akorinda 13:4, 5.

Neyi akwaKristu anakañanyi kutiyañana hansañu jabizinisi, atela kushakama hamu nakuhanjeka chakadi kuditwala kuchota. Hamukanda waAkorinda watachi 6:1-8 hekala mazu akufumba akapostolu Pawulu kutalisha hanyiloña yawakwaKristu. Kutwala manakwetu kuchota chanyiloña kunateli kutamisha ijina daYehova nichipompelu. HaMatewu 18:15-17, asonekahu njila jisatu jatela kulondelawu akwaKristu anavubiliwu nsañu jakutwamba. (1) Chatachi atela kumanisha kukala muwuyedi wawu. (2) Neyi iyi njila kuzatika nehi, atela kusendaku muntu wumu wapama hela ayedi muchipompelu kulonda ayikwashi. (3) Kuhiñahu dinu, neyi chinatwesheki, atela kutwala nsañu yeniyi kudi akulumpi ayikwashi. Neyi kukala kusweja kutoha, akulumpi akuzatisha yishina yamuBayibolu hakukwasha ejima adimu kwikala  mukuwunda cheñi. Neyi wenawa antu anakukaana kwovwahila nshimbi jamuBayibolu, akulumpi muchipompelu anateli kuyituñila awa antu kometi.

Kudi nyiloña yikwawu yakeñekaña kuditwala kuyota yidi neyi adisumbula anakukeña kudiseña, kwiluka wukuhembaña mwana hakachi kawu, kufwetaña muntu anaseñiwu, kutambula mali ainsurance, hela neyi chakwila mwahembelihu kadali kubanki ilaña anayinki wanyi muloña wakwila mali kwosi, hela jawilu. Neyi mukwaKristu yamutwala mukwawu kuchota nanyiloña yamuchidiwu, dikwila nawu nakudiwula wanyi kufumba kwaPawulu.

Neyi kunamwekani muloña weneni chidi neyi wuvumbi wakukanjikija, kukabisha anyana, kukatishana, wukombi, hela kujahañana, dichi mukwaKristu neyi yashimuna kudi akwanshimbi hanadiwuli kufumba kwaPawuluku.

▸ Kapetulu 14, paragilafu 14

Kufuma tuhu Mwitempa daEdeni, Satana natwalekihu kudimba antu. (Kutachika 3:1-6; Chimwekeshu 12:9) Weluka nindi neyi yaluwañesha yitoñojoka yetu tukwilaña yuma yatama. (2 Akorinda 4:4; Yakoba 1:14, 15) Wazatishaña mapolitiki, nsakililu, nyitayi yakulanda nikulandulula, yisela, shikola niyuma yikwawu yayivulu hakutandisha yitoñojoka yindi nikuyimwekesha neyi yayiwahi.—Yowanu 14:30; 1 Yowanu 5:19.

Satana neluki nindi hakweti mpinji yeneni yakudimba antuku. Dichi nakuzata nañovu chikupu kulonda yadimbi antu amavulu. Nakukeñesha kuhuñumuna antu amukalakelaña Yehova. (Chimwekeshu 12:12) Neyi kubabala nehi, Diyabolu wukuluwañesha yitoñojoka yetu chovu-chovu. (1 Akorinda 10:12) Chakutalilahu, Yehova nakukeña wulu kushakama haya nyaaka. (Matewu 19:5, 6, 9) Ilaña antu amavulu makonu amonaña wulu nawu hichuma chiyanateli kulekawu mpinji yidi yejima. Yitoñojoka yamuchidiwu ayimwekeshaña mumafwilimu niahamaTv nawu yayiwahi. Hitwatela kwiteja yitoñojoka yamukaayi kutalisha hawulu kutuluwañeshaku.

 Njila yikwawu mwesekelañayi Satana kutudimba hikuhitila mukuleta yilwilu yakudimena. (2 Timotewu 3:4) Neyi kubabala nehi, tunateli kuleka kulemesha antu atondayi Yehova. Chakutalilahu, manakwetu nateli kutachika kukaana kulondela wunlomboli wawakulumpi muchipompelu. (Aheberu 12:5) Hela muhela nateli kutachika kujinoka ntajikilu yaYehova yawumutu wachisaka.—1 Akorinda 11:3.

Tufwileña kubula kwiteja Diyabolu kuluwañesha yitoñojoka yetu. Dichi, tunakukeña kwimbujola yitoñojoka yaYehova nikutwalekahu ‘kutoñojoka hayuma yamwiwulu.’—Akolosi 3:2; 2 Akorinda 2:11.

▸ Kapetulu 16, paragilafu 9

Twakeñaña kwikala akola nikutuuka chiwahi neyi tunakati. (Isaya 38:21; Maku 5:25, 26; Luka 10:34) Makonu, kudi njila jajivulu jazatishañawu andotolu niantu amakwawu akuuka nachu. Neyi hitukufuukula njila yatela kuzatishawu hakutuukilamu chalema kulondela yishina yamuBayibolu. Tweluka netu Wanta waNzambi diwukatuuka hohu chahaya nyaaka. Dichi hitunakukeña kusha hohu maana hayikatu yetu chakwila tuvulameni kudifukula kudi Yehovaku.—Isaya 33:24;1 Timotewu 4:16.

Twatela kwikala asoñama kulonda tukaani neyi anakutuuka kuzatisha ñovu yawandemoni. (Kuhituluka 18:10-12; Isaya 1:13) Dichi henohu kanda twiteji kutuuka hela kutwinka yitumbu, twatela kwiluka kuyinafumi niyuma yikwatandishaña. (Yishimu 14:15) Twatela kuvulamena wanyi netu Satana nateli kutudimba kulonda tudibombeña nawandemoni. Neyi twiluka netu njila yinakukeña kuzatishawu hakutuuka yakundama kujawundemoni, twatela kukaana.—1 Petulu 5:8.

▸ Kapetulu 16, paragilafu 18