1, 2. (a) Wunlomboli wanyi wutwatela kulondela? (b) Malwihwinyi itukuhanjeka mukanu kapetulu?

HIMWADIÑA kansi, hadaha kwadiña mpinji yayilejeleñawu anvwali jenu kwila yuma yimwabulileña kukeña. Mwayikeñeli anvwali jenu nawa mwelukili nenu mwatela kuyovwahila. Hela chochu, mpinji jikwawu himwakeñeleña kuyovwahilaku.

² Tuneluki netu Yehova, Tata yetu, watukeña. Watwakamenaña nawa watwinkaña yuma yejima yitwakeñaña mukuhanda kwetu. Watulombolaña kulonda yuma yituwahileña. Mpinji jikwawu, wazatishaña antu kulonda yatulomboli. Mwalala, twatela kulemesha wunlomboli waYehova. (Yishimu 24:21) Hanu dinu muloñadi chichatukalilaña mpinji yikwawu kwovwahila anlomboli? Muloñadi Yehova chatulejelañayi nindi twovwahileña anlomboli? Tukumwekesha ñahi netu twalemesha mwatulejañayi?—Talenu Mazu Adi Kunsa 9.

3, 4. Antu ekala ñahi abula kuwanina? Muloñadi chichatukalilaña kwiteja antu kutulombola?

³ Etu antu twekala nachaaku chakudikaña. Kudikaña kwatachikili hampinji yavulumwiniwu aAdama naEva.  Hela chakwila adiña awanina, akaanini kwovwahila mwayilejeliyi Nzambi. Kufuma hayina mpinji, antu ejima awanina wanyi. Chuma chimu chaleñelaña chitukalileña kumwovwahila Yehova niakwetu antu hikubula kuwanina. Chikwawu chaleñelaña chinakundami kudi antu abula kuwanina azatishañayi Yehova nindi atulomboleña.—Kutachika 2:15-17; 3:1-7; Masamu 51:5; Aroma 5:12.

⁴ Twatachikaña kudisamba muloña wakubula kuwanina. Kudisamba kwatuleñelaña kukaana munakutufumbawu. Chakutalilahu, Yehova wamusakwili Mosi nindi alomboleña antu Jindi muIsarela. Ilaña iyala wejina daKora, wamukalakeleli Yehova hadi yaaka yayivulu watachikili kudisamba nawa wamusawileña Mosi nankashi. Hela chakwila Mosi wayilombweleña antu jaNzambi, hadisambileñaku. Amushimuna nawu hayina mpinji yena diyi wadiña wadizoza nankashi. Ilaña Kora wakaanini nindi Mosi kwila yamulombola nehi. Wafuumbili niizaza deneni kulonda dimwimakeni Mosi. Chumanyi chamumwekeneni Kora niakwawu akwakudikaña? Ayijahili. (Kuchinda 12:3; 16:1-3, 31-35) MuBayibolu, twatañañamu nsañu yawantu yatudizishaña nawu kudisamba kwatama.—2 Kushindulula 26:16-21; talenu Mazu Adi Kunsa 10.

5. Indi antu amakwawu azatishaña ñahi ñovu yawu chatama?

⁵ Hadaha mwatiyahu dehi nhoshelu yakwila nawu “Kaada ñandu kamuwana hejiya.” Kufuma tuhu kunyima, antu amavulu anakuzatisha wuswa wawu chatama. (Tañenu Mukwakutañisha 8:9.) Chakutalilahu, Sawulu wadiña iyala wamuwahi nawa wadizoza hamusakwiliwu kudi Yehova nindi ekali mwanta  waIsarela. Ilaña wetejeli yilwilu yakudisamba nilwisu kutanda mumuchima windi, chakwila wamuyandishili Davidi, iyala wakadi muloña. (1 Samweli 9:20, 21; 10:20-22; 18:7-11) Nkumininaku, Davidi wekalili mwanta, diyi mwanta wabadikili anyanta ejima muIsarela kwikala chiwahi. Ilaña mukuhita kwamafuku, Davidi wazatishili wuswa windi chatama. Wakamini naBatisheba, ñoda iyala wejina daUriya, Davidi wesekeli kusweka nshidi yindi chelili yamutemeshi Uriya kulonda akamujahi kunjita.—2 Samweli 11:1-17.

6, 7. (a) Indi kukeña kutwamukeña Yehova kwatuleteshaña etu kwiladi? (b) Chumanyi chikutukwasha kwovwahila hela chakwila chinatukalili?

⁶ Twalondelaña mwatulejañayi Yehova muloña twamukeña. Tunakukeña kumuzañalesha muloña twamukeña Yehova kubadika chuma chidi chejima. (Tañenu Yishimu 27:11; Maku 12:29, 30.) Kufuma hampinji yadiñawu antu akusambila ayedi mwitempa daEdeni, Satana wakeñaña nindi antu ajinokeña chiyuulu chaYehova. Diyabolu wakeñaña tutoñojokeña netu Yehova hakweti wuswa wakutuleja yuma yitwatela kwilaku. Ilaña tweluka netu hikutwamba. Tweteja awa mazu akwila nawu: “Yehova Nzambi yetu, watelela kutambwila kulema, kalemesha niñovu, muloña yeyi waleñeli yuma yejima.”—Chimwekeshu 4:11.

⁷ Himwadiña akansi, ayidizishili kwovwahila anvwali jenu hela chakwila mwakeñeleña kuyovwahila wanyi. Dichichekala nikudi ambuña aYehova, mpinji jikwawu chayikalilaña kwovwahila. Ilaña twamukeña  nikumulemesha Yehova, nawa twelaña yuma yidi yejima kulonda tumwovwahili. Yesu diyi twatela kwimbujola. Wamwovwahilileña Yehova hela chakwila yuma yamukalilileña nankashi. Dihafumini hakuhosha kudi Tata yindi nindi: “Itejaku nkeñelu yeyi yishikijewi, bayi yamiku.”—Luka 22:42; talenu Mazu Adi Kunsa 11.

8. Njilanyi jimu mwatulombwelañayi Yehova? (Talenu chikasha chinakuhosha nawu “ Tiyenu Munakuyilejawu.”)

⁸ Makonu, Yehova watulombolaña munjila jashiyashana. Chakutalilahu, watwinka Bayibolu. Watwinka cheñi akulumpi muchipompelu. Tukumwekesha netu twalemesha wunlomboli waYehova kuhitila mukulemesha antu anakuzatishayi hakutulombola. Neyi tukaana munakutulejawu, chidi neyi tunakumukaana Yehova. AIsarela chamukaaniniwu Mosi, Yehova waneñeli nankashi. Wachimweni neyi anamukaani yena.—Kuchinda 14:26, 27; talenu Mazu Adi Kunsa 12.

9. Indi kukeña kwatukwashaña ñahi kwila munatulejiwu?

⁹ Neyi tukulemeshaña anakutulombola, chikumwekesha nawu twayikeña amanakwetu niahela. Toñojokenu muniyi njila. Neyi kunamwekani wubanji, amanakwetu akwashaña antu anaholokeli mukukala azatilaña hamu kulonda akwashi antu. Hakwila azati chiwahi, chiña kwikala muntu wunakuyileja mwakwilila nawa muntu-himuntu watela kulondela munakumulejawu. Chumanyi chikumwekana neyi wumu yadiwula munayilejiwu nakudilila munakeñiyi? Hela nakukeña kukwasha antu, chakaanayi kwovwahila munakumulejawu, akwawu akwikala mukukala hadaha anateli nikudikatisha nankashi. Ninetu neyi tukukaanaña munakutulejayi Yehova nimunakutuleja  antu enkayi wuswa, akwetu akuyandilamu. Ilaña neyi tukumwovwahilaña Yehova, tukumwekesha netu twayikeña amanakwetu nawa twalemesha ntanjikilu yaYehova.—1 Akorinda 12:14, 25, 26.

10, 11. Yumanyi yitukuhanjekahu?

¹⁰ Yuma yejima yatulejañayi Yehova nindi twileña yatukwashaña. Neyi tukulemeshaña atulombolaña muchisaka, muchipompelu nimunzatilu yetu niañimeni janfulumendi, yuma yikuwahaña.—Kuhituluka 5:16; Aroma 13:4; Aefwesesa 6:2, 3; Aheberu 13:17.

¹¹ Neyi twiluka chakeñelañayi Yehova nindi tulemesheña akwetu chikutukwasha kuyilemesha. Tuhanjekenu njila jisatu mutunateli kumwekeshelamu kalemesha.

12. Indi iyala nateli kumwekeshaña ñahi nindi walemesha wunlomboli?

¹² Yehova diyi watachikili chisaka nawa wejima muchisaka amwinka mudimu watela kuzatayi. Neyi muntu-himuntu yeluka mudimu wamwinkayi Yehova, chisaka chejima chikuzataña chiwahi nawa ejima akuhetelamu. (1 Akorinda 14:33) Yehova wamwinka iyala nawu diyi mutu wachisaka. Ichi chinatalishi mukwila nawu Yehova wakeñaña nindi iyala ahembeña ñodindi nianyanindi chiwahi. Dichi iyala wakaakula kudi Yehova munjila yahembelañamu amwitala dindi. Iyala mukwaKristu watela kwikala mukwaluwi nikukeña nawa watela kuhemba chisaka chindi neyi chahembeliyi Kristu chipompelu. Chelayi mwenimu, dikwila nawu  nakumulemesha Yehova.—Aefwesesa 5:23; talenu Mazu Adi Kunsa 13.

13. Mumbanda wamwekeshaña ñahi nindi walemesha nfumwindi?

¹³ Mumbanda mukwaKristu niyena wukweti mudimu weneni muchisaka. Wamukwashaña nfumwindi hampinji yinakuzatayi nañovu hakulombola chisaka. Kuzatila hamu nanfumwindi, wukweti mudimu wakudizisha anyana. Yuma yelañayi hinjila yimu mwadizishilañayi anyanindi kwikala nakalemesha. (Yishimu 1:8) Wamulemeshaña nfumwindi nawa walondelaña mwafuukulañayi. Hela munafuukuliyi nfumwindi nakeñimu wanyi, wukuhosha mumesu awunda nakalemesha. Neyi mukwaKristu wasumbuka namuntu wabula kwikala Chinsahu, wukumonaña kukala kumu. Ilaña neyi wukutwalekahu kumukeña nikumulemesha nfumwindi, hadaha ifuku dimu wakakeña kumwiluka Yehova nakutachika kudifukula.—Tañenu 1 Petulu 3:1.

14. Anyana anateli kulemesha ñahi anvwali jawu?

¹⁴ Yehova wayikeña nankashi anyana, dichi atela kukiñewa nikuyilombola. Neyi anyana akwovwahilaña anvwali jawu, anvwali akuzañalalaña. Sweje-e dinu, neyi akwovwahilaña akumwekeshaña nawu amulemesha Yehova nawa akumuzañalesha. (Yishimu 10:1) Muyisaka yayivulu, anyana ayihembaña hohu kudi nvwali wumu. Chumichi chinateli kumukalila nvwali nianyana. Dichi neyi anyana anakwovwahila nawa anakumukwasha mama yawu hela tata yawu, yuma yikwendaña chiwahi. Hela chochu, antu ejima ekala muyisaka awanina wanyi. Ilaña ejima muchisaka akwikala namuzañalu neyi anakwovwahila munakuyilejayi Yehova. Chumichi chikuleta mpuhu kudi Yehova, Nleñi wayisaka yejima.—Aefwesesa 3:14, 15.

15. Tunateli kumwekesha ñahi netu twalemesha atulombolaña muchipompelu?

¹⁵ Yehova watulombolaña kuzatisha chipompelu chawakwaKristu, nawa wamwinka Yesu wuswa wakuchilombola. (Akolosi 1:18) Yesu, wamwinka “nduñu wamaana nikashinshi” mudimu wakwakamena antu jaNzambi hamaseki. (Matewu 24:45-47) Makonu, “nduñu wamaana nikashinshi” hiIzanvu Dalombolaña. Izanvu Dalombolaña datwinkaña yuma yitwakeñaña hampinji yatelela kulonda yitushimatishi muchikuhwelelu. Akulumpi, ankoñi akuzatila niankoñi endaña akwashaña yipompelu mukaayi kejima nawa Izanvu Dalombolaña dayilejaña mwakwilila. Awa manakwetu ejima akweti mudimu wakutwakamena. Akaakula kudi Yehova nachazatañawu nyidimu yawu. Dichi neyi tuyilemesha awa antu, tunakumulemesha Yehova.—Tañenu 1 Atesalonika 5:12; Aheberu 13:17; talenu Mazu Adi Kunsa 14.

16. Muloñadi chitukuhoshela netu akulumpi niankoñi akuzatila ayitondaña kudi spiritu yajila?

 ¹⁶ Akulumpi niankoñi akuzatila akwashaña antu muchipompelu kwikala ashinshika nawa anuñañana. Ilaña dinu, niwena awanina wanyi neyi yowetu. Hanu dinu ayitondaña ñahi? Awa amanakwetu atela kuwanisha yuma yashimunawu muBayibolu. (1 Timotewu 3:1-7, 12; Titusa 1:5-9) Yehova wazatishili spiritu yajila kulonda yakwashi ansoneki aBayibolu kushimuna iyi yuma yatela kuwanishawu. Akulumpi alombaña spiritu yajila kudi Yehova neyi hiyakuhanjeka hadi manakwetu anakukeña kutondawu kwikala mukulumpi hela nkoñi wakuzatila. Mwamweni, Yehova niYesu diwu alombolaña yipompelu. (Yilwilu 20:28) Antu atondawu nawu atukwasheña nikutwakamena hiyawaana yatwinkayi Nzambi.—Aefwesesa 4:8.

17. Muhela watela kwiladi hakwila yamwekeshi kalemesha?

¹⁷ Mpinji jikwawu muyipompelu himwekalaña akulumpi hela ankoñi akuzatila akuzata nyidimuku. Amanakwetu amakwawu apapatishewa ayinkaña iyi nyidimu yimu, ilaña neyi mwosi, muhela nateli kukalakala nyidimu yatela kuzatayi manakwetu wapapatishewa. Neyi muhela diyi wunakuzata, watela kuvwala chuma kumutu, hadaha chitambala hela itepa. (1 Akorinda 11:3-10) Chelayi mwenimu, wukumwekesha nindi nakulemesha ntanjikilu yaYehova yawumutu muchisaka nimuchipompelu.—Talenu Mazu Adi Kunsa 15.

18, 19. (a) Yumanyi yitwadizilaña kumukanda waAroma 13:1-7? (b) Twamwekeshaña ñahi netu twalemesha nfulumendi?

¹⁸ Makonu, Yehova weteja jinfulumendi kuyuula antu, dichi twatela kujilemesha. Jadibombaña namatuña ninamaluña kulonda azateña chiwahi nikwinka antu nyidimu yatelela. AkwaKristu ovwahilaña kufumba kwekala haAroma 13:1-7. (Tañenu.) Twalemeshaña antu “akweti wuswa wabadika” nawa twovwahilaña nshimbi yetuña hela yamuchituñilu mutwashakamaña. Iji nshimbi jinateli kukwasha yisaka yetu, bizinisi yetu, hela maheta itukweti. Chakutalilahu, twahanaña nyisonku kunfulumendi nikuyileja nsañu yinakukeñawu. Hanu dinu tunateli kwila ñahi neyi nfulumendi yituleja kwila yuma yabula kwiteja nshimbi jaNzambi? Kapostolu Petulu wahosheli nindi: “Nzambi  diyi nyuuli wutwatela kwovwahila bayi antuku.”—Yilwilu 5:28, 29.

¹⁹ Neyi tudi nawañimeni janfulumendi, adi neyi ansompeshi hela atupokola, twatela kwikala nakalemesha chikupu. AkwaKristu atwansi amwekeshaña kalemesha kudi antañishi jawu nikudi antu amakwawu hashikola. Hamudimu hitwazatilaña, twamwekeshaña kalemesha kudi muntu watwiñija mudimu, hela chakwila amakwawu hiyakweti kalemeshaku. Neyi twila mwenimu, twamwimbujolaña kapostolu Pawulu, wadiña nakulemesha anlomboli hela chakwila mpinji yikwawu chadiña chakala. (Yilwilu 26:2, 25) Hela chakwila amakwawu atwilaña chiwahi wanyi, twekalaña nakalemesha.—Tañenu Aroma 12:17, 18; 1 Petulu 3:15.

20, 21. Yumanyi yayiwahi yinateli kumwekana neyi tukulemeshaña antu?

²⁰ Mukaayi kejima, antu amwekeshaña kalemesha kakutwamba kudi antu. Ilaña antu jaYehova ambukaku. Twakeñaña kumwekesha kalemesha kudi ejima. Twalondelaña mazu akapostolu Petulu akwila nawu: “Lemeshenuña antu ejima.” (1 Petulu 2:17) Antu elukaña neyi tuyilemesha. Yesu watulejeli nindi: “Chejeji chenu chitoñekeña kudi antu hakwila amoneña nyidimu yenu yayiwahi kulonda amulemesheña Tata yenu.”—Matewu 5:16.

²¹ Neyi tumwekesha kalemesha muchisaka chetu, muchipompelu, nimuyuma yikwawu yamuchihandilu chetu, yakutalilahu yetu yayiwahi yikakwasha amakwawu kwimwiluka Yehova. Nawa neyi tukumwekeshaña kalemesha kudi antu, dikwila nawu tunakumulemesha Yehova yomweni. Ichi chamuzañaleshaña Yehova nawa chamwekeshaña kudi yena nawu twamukeña.