1-3. (a) Nsañwinyi yitwadizaña yidi haYishimu 13:20? (b) Muloñadi chitwatela kuwundishila mumesu hakusakula amabwambu?

MWAMUMONAHU dehi mukeki chatalañayi anvwali jindi? Hela kanda yatachiki kuhosha, washaña muchima kuyuma yinakutiyayi niyinakumonayi. Chikukulañayi, wukutachika kuyimbujola anvwali jindi muyuma yinakwilawu. Tukuhayama wanyi neyi tumona akulumpi niwena atachika kutoñojoka nikwila yuma yelañawu akwawu mwadikundilañawu.

² HaYishimu 13:20, twatañañahu nawu: ‘Wendaña nawakwamaana wakekala mukwamaana.’ Mazu akwila nawu ‘wendaña’ abombelamu muntu wakeña nankashi kwikala hamu namuntu wadikundañayi nindi. Bayi neyi kudikunda nindi hakapinji kantesha hohuku. Muntu wumu wadiza Bayibolu wahosheli nindi, kwenda namuntu kwabombelamu kumukeña owu muntu nikudikunda nindi. Twelaña yuma yelañawu antu itwadikundaña nawu, sweje-e dinu neyi hiyamabwambu jetu.

³ Amabwambu jetu atuleteshaña twileña yuma yayiwahi hela yatama. Yishimu 13:20 yatwalekahu nawu: “Wadikunda nawayisupi wakamwenamu jakala.”  MuchiHeberu, izu dakwila nawu “wadikunda” namuntu daya mukwila nawu ‘kukwata wubwambu’ nanowu muntu, dikwila nawu, kwikala ibwambu dindi. (Yishimu 22:24; Ansompeshi 14:20) Amabwambu amukeña Nzambi akutukoleshaña kutwalekahu kwikala ashinshika kudi Nzambi. Hakwila twiluki antu atela kwikala amabwambu jetu, tusambilenu kutala antu etejañayi Yehova kwikala amabwambu jindi.

4. Muloñadi chitukuhoshela netu twakooleka nankashi hakwikala amabwambu jaNzambi? Muloñadi Yehova chamuteneniyi Abarahama nindi ‘ibwambu dami’?

⁴ Yehova, Mwanta Wakuleña Kwejima watwinka kukooleka kwakwikala amabwambu jindi. Twakooleka nankashi. Yehova wasakulaña chiwahi antu atela kwikala amabwambu jindi. Wasakulaña antu amukeña nawa amukuhwelela. Toñojokenu hadi Abarahama. Wadihanini kwila mwejima mwadi kumulejawu kudi Nzambi. Mpinji yejima, Abarahama wadiña washinshika nawa wovwahila. Wafwilileña nikulambula mwanindi Isaka. Abarahama wakuhweleli nindi “Nzambi wukutwesha kumusañula kufuma mudi afu.” (Aheberu 11:17-19; Kutachika 22:1, 2, 9-13) Abarahama wadiña washinshika nawa wovwahila, dihafumini Yehova hakumutena nindi ‘ibwambu dami.’—Isaya 41:8; Yakoba 2:21-23.

5. Yehova wayimonaña ñahi antu ashinshika kumesu indi?

⁵ Yehova wayimonaña amabwambu jindi nindi alema. Amabwambu jindi asha muchima hakwikala ashinshika kubadika kwikala ashinshika kuchuma chikwawu. (Tañenu 2 Samweli 22:26.) Ekala ashinshika nawa ovwahila muloña amukeña. Bayibolu yahoshaña nawu ‘antu aloña diwu amabwambu jaNzambi chikupu,’  dikwila nawu ejima amwovwahilaña. (Yishimu 3:32) Yehova watambikaña amabwambu jindi kwikala enyi “mwitenti” dindi. Wayilaña nindi adifukuleña nikulomba kudi yena kala mpinji.—Masamu 15:1-5.

6. Tukumwekesha ñahi netu twamukeña Yesu?

⁶ Yesu nindi: “Muntu wankeña, wukuhemba mazu ami, Tata yami niyena wukumukeña.” (Yowanu 14:23) Hakwila twikali amabwambu jaYehova, twatela kumukeña Yesu nikwila yuma yatulejeliyi. Chakutalilahu, twovwahilaña nshimbi yakwila nawu tushimwineña nsañu yayiwahi nikwilisha atumbanji. (Matewu 28:19, 20; Yowanu 14:15, 21) Chineli twamukeña Yesu, ‘twalondelaña chikupu muntampu jindi.’ (1 Petulu 2:21) Yehova wazañalalaña neyi yatumona tunakudishaku chikupu kumwimbujola Mwanindi muyuma yejima yitwahoshaña niyitwelaña.

7. Muloñadi chitwatela kwilukila netu antu itunasakuli kwikala amabwambu jetu hiyamabwambu jaYehova?

⁷ Amabwambu jaYehova atiyililaña, ashinshika, ovwahila nawa amukeña Mwanindi. Kwiji twasakulaña antu adi neyi asakulañayi Yehova kwikala amabwambu jindi? Neyi amabwambu jenu amwimbujolaña Yesu nawa adizishaña antu kulonda eluki Wanta waNzambi, akuyikwasha kwikala amawahi kulonda mwikali ashinshika kudi Yehova.

8. Chumanyi chinayitiyishi kuwaha hawubwambu wadiña hadi Luti naNyawomi?

⁸ MuBayibolu, twatañañamu nsañu yawubwambu, wudi neyi wadiña hakachi kaLuti namukuwindi, Nyawomi. Awa ambanda afumini kumatuña niyitachi  yashiyashana nawa Nyawomi wadiña mukulumpi nankashi hadi Luti. Ilaña ekalili amabwambu nankashi muloña amukeñeli Yehova. Chelili Nyawomi hakukeña kufuma mwituña daMowabi nakufunta kuIsarela, “Luti wamukakeleli mbe.” Wamulejeli Nyawomi nindi: “Antu eyi akwila antu ami. Nzambi yeyi wukwila Nzambi yami.” (Luti 1:14, 16) Luti wamukeñeli nankashi Nyawomi. Chashikiliwu muIsarela, Luti wazatili nañovu kulonda yamukwashi ibwambu dindi. Nyawomi wamukeñeli Luti nankashi chakwila wamulejeli mwakwilila. Luti watiyili nawa chafuminimu, mwayedi wawu ayikiswilili nankashi.—Luti 3:6.

9. Yumanyi yinayizañaleshi hawubwambu waDavidi naJonatani?

⁹ Davidi niJonatani niwena adiña amabwambu amawahi chikupu nawa adiña ashinshika kudi Yehova. Jonatani wamubadikili Davidi nayaaka 30 nawa diyi wateleli kuswana tata yindi hawanta waIsarela. (1 Samweli 17:33; 31:2; 2 Samweli 5:4) Jonatani chatiyiliyi nawu Yehova namusakuli Davidi kwikala mwanta, hamutiyilili ichimaku. Ilaña, Jonatani wazatili nañovu kulonda yamukwashi Davidi. Chakutalilahu, hampinji yakeñeleñawu kumujaha Davidi, Jonatani wamukwashili nindi ‘yamukuhweleli Yehova.’ Washili wumi windi hakatoña kukoola Davidi. (1 Samweli 23:16, 17) Davidi niyena wadiña ibwambu dindi washinshika. Wahosheli nindi wukahembaña chisaka chaJonatani, nawa chafwiliyi Jonatani dimweliliyi.—1 Samweli 18:1; 20:15-17, 30-34; 2 Samweli 9:1-7.

10. Munadiziliku kwodi kuwubwambu wadiña nanawa aHeberu asatu?

¹⁰ Anyikwenzi asatu achiHeberu aShadaraki, Meshaki niAbedinego asendeliwu muwunkoli adiña amabwambu  chikupu. Hela antaña jawu adiña kwakulehi, adikwashileña kutwalekahu kwikala ashinshika kudi Yehova. Mukuhita kwampinji, chakuliliwu, chikuhwelelu chawu achesekeli chelili Mwanta Nebukaneza yayileji nindi atela kudifukula kumukishi wawuru. A Shadaraki, Meshaki niAbedinego akaanini kudifukula kumukishi nawa amulejeli mwanta nawu: “Etu kwetu kwonti kwetu kupesha akishi eyi, hela kudifukula kudi mukishi weyi wawuru wuwunemiki.” Neyi aholokela mukweseka, awa amabwambu asatu atwalekeleñahu kwikala ashinshika kudi Nzambi.—Danyeli 1:1-17; 3:12, 16-28.

11. Tuneluki ñahi netu aPawulu niTimotewu adiña amabwambu chikupu?

¹¹ Kapostolu Pawulu chadilukiliyi namukwenzi Timotewu, welukili nindi Timotewu wamukeñeli Yehova nawa washili muchima hachipompelu. Pawulu wamudizishili Timotewu kulonda yakwasheña amanakwindi niahelindi mumaluña ashiyashana. (Yilwilu 16:1-8; 17:10-14) Timotewu wadishiliku chakwila Pawulu wahosheli nindi: ‘wakalakeli hamu nanami hakutwala nsañu yayiwahi kumbidi.’ Pawulu welukili nindi Timotewu ‘wukwakamenaña’ amanakwetu niahela chikupu. Chamuzatilileñawu Yehova wonsu wawu, aPawulu naTimotewu ekalili amabwambu chikupu.—Afwilipi 2:20-22; 1 Akorinda 4:17.

12, 13. (a) Muloñadi chitwatela kubabela hakusakula amabwambu hela tuhu muchipompelu? (b) Muloñadi kapostolu Pawulu chahosheleliyi mazu akusoñamisha ha 1 Akorinda 15:33?

¹² Muchipompelu, tunateli kudizila kudi amanakwetu niahela kulonda tudikwasheña kwikala ashinshika.  (Tañenu Aroma 1:11, 12.) Hela tuhu muchipompelu, twatela kubabala nawantu itwasakulaña kwikala amabwambu jetu. Tukweti amanakwetu niahela akweti yilwilu yayiwahi afuma kuyitachi niyisemwa yashiyashana. Amakwawu anenzi katataka muchipompelu, amakwawu anamukalakeli Yehova hadi yaaka yayivulu. Hela chochu, hahitaña mpinji hakwila muntu ekali nawubwambu wawuwahi naYehova neyi chochashimbulaña mukabu kuha. Dichi twatela kudiwunjika  nikukeñañana nawa twatela kusakula chiwahi amabwambu.—Aroma 14:1; 15:1; Aheberu 5:12–6:3.

¹³ Mpinji jikwawu, muchipompelu munateli kumwekana kukala kweneni, twatela kubabala nankashi. Hadaha manakwetu hela muhela nakwila yuma yakaanisha Bayibolu. Indi kwiji muntu wumu natachiki kutoba-toba chakwila antu muchipompelu anakutiyañana wanyi. Tukuhayama wanyi neyi chinamwekani, muloña nikunyima chamwekeni, mpinji jikwawu muchipompelu mwadiña kukala. Dihafumini kapostolu Pawulu hakusoñamisha akwawu akwaKristu nindi: “Bayi ayiluwañeshaku. Kudikunda nawantu atama kwakisañanaña yilwilu yayiwahi.” (1 Akorinda 15:12, 33) Pawulu wamulejeli cheñi Timotewu nindi watela kubabala hakusakula amabwambu. Ninetu dichitwatela kwila.—Tañenu 2 Timotewu 2:20-22.

14. Antu itwasakulaña kwikala amabwambu anateli kuluwañesha ñahi wubwambu wetu naYehova?

¹⁴ Twatela kuhemba wubwambu wetu naYehova. Muloña hichuma chalema nankashi. Hitukukwata wubwambu namuntu wukuzeyesha chikuhwelelu chetu kulonda tubuli kwikala amabwambu naNzambiku. Neyi Chochitwabulaña kutumpika wanda muwalwa nakukuhwelela netu wanda wukwikala menji, hitukukuhwelela netu antu elaña yuma yatama anateli kutukwasha kwila yuma yayiwahiku. Dichi twatela kubabala hakusakula amabwambu.—1 Akorinda 5:6; 2 Atesalonika 3:6, 7, 14.

15. Chumanyi chimwatela kwila chikuyikwasha kwikala nawamabwambu amawahi muchipompelu?

¹⁵ Muchipompelu chenu, munateli kuwanamu antu  amukeña Yehova nankashi nawa anateli kwikala amabwambu jenu chikupu. (Masamu 133:1) Amabwambu jenu anateli kwikala atwansi hela akulumpi hela akuyitachi yacheñi. Anukenu nenu Jonatani wadiña mukulumpi nankashi hadi Davidi, Luti niyena wadiña kansi chikupu hadi Nyawomi. Tunakukeña kwila mwatulejaña Bayibolu nawu: “Enzununenu chikupu nyichima yenu.” (2 Akorinda 6:13; tañenu 1 Petulu 2:17.) Neyi mukumwimbujolaña Yehova, amavulu akukeñaña kukwata wubwambu nanenu.

16, 17. Neyi muntu wamuchipompelu yatuneñesha, chumanyi chitukubula kwila?

¹⁶ Muyisaka yejima, mwekala antu akweti yilwilu niyaaku yashiyashana nawa elaña yuma munjila yambukaku. Dichekala nimuchipompelu. Nawa dichaleteshaña niyuma kuwaha, dichi twadizilañaku jajivulu kudi akwetu. Ilaña mpinji jikwawu twahilaña neyi amanakwetu niahela anahoshi hela aneli chuma chimu muloña twambuka yitachi. Mpinji jikwawu atuneñeshaña. (Yishimu 12:18) Komana kukala kwamuchidiwu kwatela kutuneñesha hela kutufumisha muchipompelu?

¹⁷ Inehi. Hela mukwetu natuneñeshi, kwila tufuma muchipompelu nehi. Muloña Yehova hidiyi wunatuneñeshiku. Diyi watwinka wumi niyuma yejima. Twatela kumukeña nikumutiyilila munakutulejayi. (Chimwekeshu 4:11) Chipompelu hichawaana chatwinkayi Yehova chakoleshaña chikuhwelelu chetu. (Aheberu 13:17) Kwila tukaana kutambula chawaana  chinatwinkiyi muloña wakwila kudi muntu wunatuneñeshiku.—Tañenu Masamu 119:165.

18. (a) Chumanyi chikutukwasha kushakama chiwahi nawamanakwetu niahela? (b) Muloñadi chitwatela kwanakena akwetu?

¹⁸ Twayikeña amanakwetu niahela, dichi twatela kushakama nawu chamwena. Yehova hanakukeña nindi twikali awaninaku, ninetu dichitunakukeña wanyi. (Yishimu 17:9; 1 Petulu 4:8) Wonsu wetu twaluwañeshaña, ilaña kukeña kukutukwasha kutwalekahu “kudanakena wumu namukwawu.” (Akolosi 3:13) Neyi tukweti kukeña hitwakatoheshaña yiluwa yawamanakwetuku. Tuneluki netu neyi mukwetu natuvulumuni, chakalaña kuleka kutoñojokahu. Nawa chaswayi kumuhilila nikumuhembela nkunyi. Ilaña neyi tukwila mwenimu, tukwendaña nachikela nawa azuwa. Cheñi, neyi muntu natuvulumuni nawa tunamwanakeni, yitoñojoka yetu yawundaña, sweje-e dinu, twekalaña nawubwambu wawuwahi naYehova.—Matewu 6:14, 15; Luka 17:3, 4; Aroma 14:19.

19. Mpinjinyi yitwatela kuleka kudikunda namuntu wamuchipompelu?

¹⁹ Antu amuchisaka neyi akukeñañana, muntu-himuntu wukwilaña yuma yikuzañaleshaña chisaka. Hanu dinu fwikijenu neyi wumu nadikañi. Ejima muchisaka eseka chikupu nawu amukwashi, ilaña nakuhimpa wanyi. Mpinji yikwawu wukufuukulahu kufuma hetala hela mutu wachisaka wukumuhaña hetala. Chuma chamuchidiwu chinateli kumwekana nimuchipompelu. Muntu nateli kusakulahu kwila yuma yikumuneñesha Yehova nakuleta  wubanji muchipompelu. Wukukaana kumukwasha nawa wamwekeshaña muyilwilu yindi nindi hanakukeña kwikala muchipompeluku. Wukufuukulahu kufuma yomweni muchipompelu hela akumuhaña. Neyi chumichi chinamwekani, Bayibolu yashimuna chikupu nawu twatela “kuleka kudibomba” nindi. (Tañenu 1 Akorinda 5:11-13; 2 Yowanu 9-11) Chumichi chinateli kutukalila neyi iwu muntu hibwambu detu hela hintaña yetu. Yumiyi chiyamwekana, twatela kwikala ashinshika kudi Yehova kubadika kudi antu.—Talenu Mazu Adi Kunsa 8.

20, 21. (a) Indi ntanjikilu yakuhaña muntu muchipompelu yamwekeshaña ñahi kukeña? (b) Muloñadi chitwatela kusakwila chiwahi antu atela kwikala amabwambu jetu?

²⁰ Kuhaña muntu muchipompelu hinjila yamwekeshelañamu Yehova kukeña. Yakiñaña chipompelu kudi antu adiwulaña nshimbi jaYehova. (1 Akorinda 5:7; Aheberu 12:15, 16) Yatulejaña chakukeña ijina daYehova dajila, nshimbi jindi jabadika nikumukeña Yehova yomweni. (1 Petulu 1:15, 16) Ntanjikilu yakuhaña yamwekeshaña nawu Yehova wamukeña owu muntu anahañiwu. Kuhaña muntu muchipompelu kwakwashaña owu muntu yeluki nindi waluwañesheli nawa wahimpaña yilwilu yindi. Antu amavulu ahañiliwu mukuhita kwampinji ayifuntisha kudi Yehova nawa ayitambwilili namakasa ayedi cheñi muchipompelu.—Aheberu 12:11.

²¹ Amabwambu jetu anateli kutukwasha hela kutuluwañesha. Dichi twatela kusakula chiwahi amabwambu. Chitwakeña antu amukeña Yehova, tukekala hakachi kawantu akatukwasha kwikala ashinshika chikupu.