1, 2. Indi Balami welili ñahi hakuleta wubanji hadi antu jaYehova?

CHIBINDA chanshi wayaña hachilondu hanelukiyi nindi wukukwata inshi jinakukeñayi. Washaña ndiisha kwilowa nakudinatila hamenji. Watalilaña nichikwinza inshi nakuminya ndiisha yidi kwilowa, hakuvubula nakumulowa ona inshi.

² Dichi chekalaña nikudi antu. Chakutalilahu, chashikiliwu aIsarela kwakwihi nakwiñila Mwituña daChikaninu, atuñili chilombu muYaana yaMowabi. Mwanta wakuMowabi wamukanini iyala wejina daBalami nindi wukumwinka mali amavulu neyi wukuyishiña aIsarela. Nkumininaku, Balami wawanini njila yakwilishilamu aIsarela adileteli aweni ishiñu. Waweni ndiisha yatelela. Watemesheli atunkaña awambanda awaMowabi muchilombu chawaIsarela kulonda ahuñumuni amayala.—Kuchinda 22:1-7; 31:15, 16; Chimwekeshu 2:14.

3. AIsarela akwatikili ñahi nandiisha yaBalami?

³ Komana ndiisha yaBalami yazatikili? Eña. AIsarela amavulu awamayala elili “wuvumbi nawanyana  kawaMowabi awambanda.” Atachikili cheñi nikupesha ankishi, apesheleña nikudi Bayali wakuPeyori, nzambi wawuvumbi. Chafuminimu, aIsarela 24,000 afwilili hohañinza Netuña daChikaninu.—Kuchinda 25:1-9.

4. Muloñadi aIsarela amavulu chelililiwu wuvumbi?

⁴ Muloñadi aIsarela amavulu chakwatikiliwu kukafuta kaBalami? Atoñojokeleña hohu hayuma yakudizañalesha aweni chakwila avulameneni nikwanuka yuma yayikoñeleliyi Yehova. Nzambi wayikoñeleli aIsarela yuma yayivulu yadi kuyilisha kwikala ashinshika. Wayifumishili muwuduñu muEjipitu, wayidiishileña muchinkalampata nawa wayishikijili kuñinza Netuña daChikaninu. (Aheberu 3:12) Ilaña, afwili mumuhetu wawuvumbi. Kapostolu Pawulu wasonekeli nindi: “Bayi twila wuvumbi neyi cheliliwu amu wuvumbiku, chakwila . . . ”—1 Akorinda 10:8.

5, 6. Yumanyi yitukudizila kuyuma yamwekeni muYaana yaMowabi?

⁵ Ituña dadiha didi kwakwihi nankashi. Ninetu tudi neyi aIsarela adi hañinza Netuña daChikaninu. (1 Akorinda 10:11) Mwituña mutunakushakama antu adi nantuuya yawuvumbi kubadika chadiña aMowabi. Ichi chilwilu chinateli kuhuñumuna antu jaYehova. Wuvumbi diyi ndiisha yinakuzatishayi Diyabolu kukwatilamu antu amavulu.—Kuchinda 25:6, 14; 2 Akorinda 2:11; Yuda 4.

⁶ Dihulenu nenu, ‘Nukukeña kudiluñisha yuma yakudizañalesha hakapinji kantesha tahindi nukukeña nakashakami namuzañalu haya nyaaka mwituña dadiha?’ Komana mukuhetelamu wanyi mukwovwahila lushimbi lwaYehova lwakwila nawu “Temukenu wuvumbi!”?—1 Akorinda 6:18.

7, 8. Wuvumbi hichumanyi? Wuvumbi wataminadi?

⁷ Antu amavulu makonu akweti yilwilu yawukapwa nsonyi nawa hiyalemeshaña nshimbi jaNzambi jahosha hawuvumbiku. MuBayibolu, izu dawuvumbi dakundama kukubulakana kwawantu abula kudisumbula kwesekeja nachahosha Nsona. Mwabombela nikubulakana kweyala neyala nimumbanda namumbanda nikukaama kanyama. Muwuvumbi weniwu mudi kubulakana kweyala namumbanda, kwilila wuvumbi mukanwa, kumahanda hela kuhemesha kuyiidi yamuntu yalusemu kulonda yatiyi wuvumbi.—Talenu Mazu Adi Kunsa 23.

⁸ Bayibolu yashimuna hatooka nawu neyi muntu wukutwalekahu kwila wuvumbi, akumuhaña muchipompelu. (1 Akorinda 6:9; Chimwekeshu 22:15) Cheñi, muntu welaña wuvumbi wadilemeshaña wanyi hela kumukuhwelela kudi akwawu. Wuvumbi wamuletelaña muntu kukala. Watamishaña chinleji nawa mwafumaña mavumu, yikonkojola muwulu, nyisoñu nikufwa. (Tañenu Añalija 6:7, 8.) Dichi neyi muntu wukutachika kutoñojoka hayuma yafumaña muwuvumbi, hadaha wukuleka kuwila. Ilaña antu avula kutoñojoka hakudizañalesha aweni neyi anashi dehi muchima hawuvumbi. Chuma chatachi chelañawu atalaña nyevulu yanzekesi.

9. Muloñadi kutala nyevulu yanzekesi chikwatamina?

⁹ Kutala nyevulu yanzekesi kwasañumunaña wuvumbi. Makonu, nyevulu yanzekesi yidi kwejima,  mumagazini, munyikanda, mutumina, hamaTV nihaIntaneti. Amavulu atoñojokaña nawu nyevulu yanzekesi yatama wanyi, ilaña yafwana nankashi. Muloña yateñwishaña muntu kwikala nantuya yakwila wuvumbi munjila yabula kutelela. Chatachikayi muntu kutala nyevulu yanzekesi, natachiki kwila yuma yikumuletesha kwikala nayilwilu yakudichuka, kuleta wufwinda muwulu nikudiseña tuhu.—Aroma 1:24-27; Aefwesesa 4:19; talenu Mazu Adi Kunsa 24.

10. Indi chishina chidi haYakoba 1:14, 15 chatukwashaña ñahi kutondolwela wuvumbi?

¹⁰ Twatela kwiluka yuma yatuleteshaña kuhuñumuka nansañu yawuvumbi. Talenu iku kusoñamisha kudi haYakoba 1:14, 15: “Muntu wejima amwesekaña kuhitila mukumukokola nikumudimbeka kukufwila kwindi yomweni. Kufumahu, neyi kufwila kusweja chikupu, kwaleñelaña muntu kukoña nshidi; nawa hanyima yakwila nakoñi dehi nshidi, mwafumaña kufwa.” Chimwatachika kutoñojoka hayuma yatama, nyakalenu kuyifumishamu. Neyi mumona nyevulu yanzekesi, talenu kwacheñi! Jimenu kompyuta, hela himpenu progilamu. Bayi mwikala nachipepa chakwila yatamaku. Neyi nehi, yilwilu yeniyi yikusweja chakwila mukukañanya kuyifwomona.—Tañenu Matewu 5:29, 30.

11. Yehova nateli kutukwasha ñahi neyi tunakutoñojoka hayuma yatama?

¹¹ Yehova watwiluka chiwahi kubadika chitwadiluka etu aweni. Weluka nindi twawanina wanyi. Weluka cheñi nindi tunateli kufwomona yilwilu yatama. Yehova watulejaña nindi: “Jahenu yiidi yenu  yamujimba yidi hanu hamaseki mwamwekenaña yilwilu yatama, yidi neyi wuvumbi, wuzondu, mpwila yakutiya wuvumbi yakubula kudiyuula, kufwila kwatama, nilwisu, dikwila nawu kupesha.” (Akolosi 3:5) Hela chakwila kwila mwenimu kwakala, ilaña Yehova wadiwunjikaña nawa wukutukwashaña. (Masamu 68:19) Manakwetu wumu wakansi wadiña nachaaku chakutala nyevulu yanzekesi nikudichuka. Akwawu hashikola ayimweneña iyi yuma nawu yatama wanyi muloña dichelañawu antu hakukula, wahosheli nindi: “Chinleji chami chafwili nawa neñijili mutu mukwila wuvumbi.” Watoñojokeli cheñi nindi wateleli kuhimpa yilwilu yindi, nawukwashu waYehova, walekeli chikupu. Neyi munakutoñojoka hawuvumbi, lombenu kudi Yehova yayinki “ñovu yabadika hañovu jawantu” kulonda mubuli kutamisha yitoñojoka yenu.—2 Akorinda 4:7; 1 Akorinda 9:27.

12. Muloñadi chitwatela ‘kuhembela muchima wetu’?

 ¹² Solomoni wasonekeli nindi: ‘Hembaku muchima weyi kubadika chiwahembaña yuma yejima, muloña mwenimu dimu mwedikaña wumi.’ (Yishimu 4:23) “Muchima” wetu diwu wuntu wetu wamukachi, wuntu wamonañayi Yehova. Yuma yitwatalaña yikutukwasha hela kutuhuñumuna. Yoba washinshika wahosheli nindi: “Natiyañana dehi namesu ami; indi chañadima nukumutala ñahi?” (Yoba 31:1) Kufwana Yoba, twatela kubabala nayuma yitwatalaña nikutoñojokahu. Nawa kufwana ñimbi yamasamu, twalombaña netu: ‘Balumunaku mesu ami abuleña kutala yuma yamukunkulwayi.’—Masamu 119:37.

13. Antu amuchidinyi asakwiliyi Dina kwikala amabwambu jindi?

¹³ Amabwambu jetu akweti wuswa wakutwilisha kwila yayiwahi hela yatama. Neyi mukwata wubwambu nawantu alemesha nshimbi jaNzambi, akuyikwasha ninenu kujilemesha. (Yishimu 13:20; tañenu 1 Akorinda 15:33.) Chuma chamumwekeneni Dina chatulejaña nawu twatela kusakula chiwahi amabwambu. Dina wadiña mwana kaYakoba wamumbanda, wakulilili muchisaka chadifukwileña kudi Yehova. Dina wadiña nayilwilu yayiwahi, ilaña watachikili kudikunda chikupu nawayañadima akuKenani abulileña kudifukula kudi Yehova. AkwaKenani adiña nayitoñojoka yambuka nayaYehova kutalisha hakubulakana kweyala namumbanda nawa ayilukili nawu adiña ayivumbi. (Alevi 18:6-25) Hadiñayi Dina nawamabwambu jindi, wadiweni namukwenzi Shekemi wakuKenani wamutiyili  kuwaha. Shekemi diyi ‘alemesheliwu chakubadika’ akwawu ejima muchisaka chawu. Ilaña hamukeñeli Yehovaku.—Kutachika 34:18, 19.

14. Chumanyi chamumwekeneni Dina?

¹⁴ Shekemi welili chuma chamweniyi nindi chachiwahi. Chineli wamukeñeli Dina, ‘wamusendeli,’ nawa “hakumutamisha.” (Tañenu Kutachika 34:1-4, NWT.) Ichi chuma chamwekeni chaletesheli Dina nichisaka chindi chejima kwiñila mukukala.—Kutachika 34:7, 25-31; Añalija 6:7, 8.

15, 16. Tunateli kwikala ñahi namaana?

¹⁵ Hitwatela kwila yuma yeliliyi Dina mwaka dinu twiluki netu nshimbi jaYehova jajiwahiku. Nsona yahosha nayu: ‘Muntu wendaña nawakwamaana wakekala mukwamaana, ilaña wadikunda nawayisupi wakamwenamu jakala.’ (Yishimu 13:20) Dichi dikasenu mumuchima kulonda mwiluki “njila jejima jajiwahi” kulonda mwakabuli kwaaba kumbidi.—Yishimu 2:6-9; Masamu 1:1-3.

¹⁶ Tunateli kwikala namaana neyi tukudizaña Izu daNzambi, kulomba kudi Nzambi henohu kanda twili chuma nikwila mwatulejaña nduñu wamaana nikashinshi. (Matewu 24:45; Yakoba 1:5) Dimu, wejima wetu twaluwañeshaña nawa twawanina wanyi. (Yeremiya 17:9) Mukwila ñahi neyi kudi muntu wunayileji nindi neyi kubabala nehi mukwila wuvumbi? Mukuhila tahindi mukwovwahila munayilejiyi?—2 Anyanta 22:18, 19.

17. Hanenu chakutalilahu chinakumwekesha nawu tunateli kuhetela mukufumba kwamukwetu mukwaKristu.

¹⁷ Chakutalilahu. Twili netu, hamudimu hazatilañayi muhela hadi iyala wamutalaña namesu akumufwila.  Hakumwila nindi akayihu kumu nakwendujola. Iwu iyala hamukalakelaña Yehovaku, ilaña nakumwekana neyi himuntu wamuwahi nankashi. Muhela mukwawu hakuyimona adi hamu, nkumininaku hakumuleja muhela mukwawu nindi wukuholokela mukukala. Indi muhela watachi wukwiladi? Wukutachika kudihakwila tahindi wukusakilila hakumusoñamishaku? Iwu muhela wamukeña Yehova nawa nakukeña kumuzañalesha. Ilaña neyi wukutwalekahu kuhanjeka naniwu muntu, kwiji ‘nakutemuka wuvumbi’ tahindi ‘nakukuhwelela muchima windi’?—Yishimu 22:3; 28:26; Matewu 6:13; 26:41.

18, 19. Shimunenu chatemukiliyi Yosefu kwila wuvumbi.

¹⁸ Muwukwenzi windi, Yosefu wadiña nduñu muEjipitu. Hefuku-hefuku, ñoda mwanta windi  wamwilileña nindi akami nindi, ilaña Yosefu welukili nindi kwila wuvumbi kwatama. Yosefu wamukeñeli Yehova nawa wakeñeleña kumuzañalesha. Dichakaaninineñayi mpinji yejima yamukanjikijileñawu kudi iwu mumbanda. Chineli wadiña nduñu, hadi kushikena dakumutemuka mwanta windiku. Ifuku dimu hanyima yakumukanjikija kudi ñoda mwanta windi kukaama nindi, “watemukilili hanzi.”—Tañenu Kutachika 39:7-12.

¹⁹ Yosefu hadi kutemukaku neyi chakwila watoñojokeleña jakukaama nindi hela neyi wadifwikijileña nakukaama nindi. Ilaña Yosefu walemesheli nankashi wubwambu windi naYehova kubadika chuma chidi chejima. Wamulejeli mumbanda nindi: “Mwanta wami . . . hananlekeshihu chuma chidi chejimaku chiña eyi hohu, nanochu chiwudi ñodindi. Ndochu ami nukutwesha ñahi kukoña chumichi chasweja kutama nakumuvulumuna Nzambi?”—Kutachika 39:8, 9.

20. Tuneluki ñahi netu Yosefu wamuzañalesheli Yehova?

²⁰ Hela chakwila Yosefu wadiña kwakulehi nakwawu nichisaka, wadiña washinshika kudi Nzambi, Yehova niyena wamukiswilili. (Kutachika 41:39-49) Kashinshi kaYosefu kamuzañalesheleña Yehova. (Yishimu 27:11) Kukañesha yilwilu yawuvumbi kwakala. Ilaña anukenu awa mazu: “Enu mwamukeña Yehova helenu yatama; yena wahembaña chachiwahi wumi wawantu indi ajila; wayipulwishaña kudi antu atama.”—Masamu 97:10.

21. Indi manakwetu wakansi wumu wamwimbujoleli ñahi Yosefu?

²¹ Hefuku-hefuku, antu jaYehova ahamukaña chamwekeshañawu nawu ‘ahela yatama’ ‘nakukeña  yayiwahi.’ (Amosi 5:15) Hela tudi atwansi hela akulumpi, tunateli kwikala ashinshika kudi Yehova. Manakwetu wakansi wumu waholokeleli mukweseka hashikola. Chañadima wumu wamulejeli nindi wukumwiteja kukaama nindi neyi wukumukwasha kuwana makumi hakusoneka kweseka. Manakwetu welilidi? Welili neyi cheliliyi Yosefu. Wahosheli nindi: “Nashikeneni dakukaana. Nakeñeleña kwikala washinshika, natwalekahu kudilemesha.” “Chiseki . . . chakapinji kantesha” chekala mukwila wuvumbi mwavula kufuma nyaabu niyihuñu. (Aheberu 11:25) Neyi tukumwovwahilaña Yehova tukekala namuzañalu waweni.—Yishimu 10:22.

22, 23. Yehova watukwashaña ñahi hela chakwila tunavulumuni chikupu?

²² Satana wazatishaña chilwilu chawuvumbi kulonda tufwimu, nawa iku hikukala kweneni. Wonsu wetu hadaha twatoñojokaña hayuma yatama mpinji jikwawu. (Aroma 7:21-25) Yehova weluka nawa wanukaña nindi “tudi lunkuñu.” (Masamu 103:14) Indi neyi mukwaKristu nakoñi nshidi yeneni yawuvumbi? Dikwila nawu chinamani? Inehi. Neyi muntu nabalumuki chikupu, Yehova wukumukwasha. Nzambi “waanakenaña.”—Masamu 86:5; Yakoba 5:16; tañenu Yishimu 28:13.

²³ Yehova watwinka cheñi ‘amayala ekala yawaana,’ akulumpi atwakamenaña nawa akweti kukeña. (Aefwesesa 4:8, 12; Yakoba 5:14, 15) Watwinka akulumpi atukwashaña kuwahisha wubwambu wetu naNzambi.—Yishimu 15:32.

24, 25. Kwikala ‘namaana’ kwatukwashaña ñahi kutondolwela wuvumbi?

²⁴ Hakwila tufuukuleña chiwahi yuma yitunakukeña kwila, twatela kwiluka nshimbi jaYehova chijatukwashaña. Twatela kwikala wanyi neyi chadiña iwu mukwenzi ashimunawu haYishimu 7:6-23. Hadiña ‘namaanaku,’ amukwatili nandiisha yawuvumbi. Muntu wukweti maana wabadika wababala. Neyi tunakwila yuma yinakumwekesha nawu tudi namaana, dikwila nawu tunakwiluka yitoñojoka yaNzambi nawa tukuyizatishaña mukuhanda kwetu. Anukenuña awa mazu: “Muntu wadimwenaña maana wakeña wumi windi yomweni; muntu wahembaña kashinshi wakawana yayiwahi.”—Yishimu 19:8.

²⁵ Komana muneluki chikupu nenu nshimbi jaNzambi jajiwahi? Munakuhweleli chikupu nenu neyi mukujilondelaña jikuyikwasha kwikala namuzañalu? (Masamu 19:7-10; Isaya 48:17, 18) Neyi muneluki wanyi, anukenu yuma yejima yinayikoñeliyi Yehova. “Tompenu mutiyi chawahayi Yehova.” (Masamu 34:8) Neyi mukwanukaña yumiyi, mukusweja kumukeña Nzambi. Keñenu yuma yakeñayi nawa helenu yahelayi. Toñojokenuña hayuma yayiwahi, yuma yalala, yaloña, yakadi majilu, yasañumunaña kukeña niyayiwahi. (Afwilipi 4:8, 9) Twatela kwikala neyi Yosefu wahetelelimu mumaana aYehova.—Isaya 64:8.

26. Yumanyi yitukahanjeka?

²⁶ Hela tudi ajiki hela twasumbula, Yehova nakukeña nindi tudiluñishi muwumi wetu nawa twikali namuzañalu. Mutupetulu tuyedi tunalondelihu mudi nsañu yinateli kutukwasha kwikala nawulu wawuwahi.