1, 2. Muloñadi chitwatela kwikalila ababala neyi hitukusakula jakumanishilamu wuudi?

FWIKIJENU munakukeña kubokola mukabu, nenu mutali owu mukabu watoka chibalu chimu. Mukwila ñahi? Mukukumina dakuwida? Tahindi mukuwunata? Hela mukusembulaku chibalu chatoka nakuda chachiweni?

² Munjila jikwawu, yuma yakukeheshelamu wuudi niyena yidi neyi mukabu. Yuma yikwawu yayiwahi, ilaña yayivulu yatoka muloña mwekala yilwilu yawuvumbi, madombu hela nsañu jawandemoni. Dichi neyi munakukeña yuma yakukeheshelamu wuudi,  mwahoshaña nenu: “Hikadikeñeli kami. Nukusakula jakukeheshelamu wuudi jinakeñi ami aweni”? Tahindi mwahoshaña nenu: “Jakukañeshelamu wuudi jejima jatama”? Indi kwiji mwasakulaña chiwahi jakukeheshelamu wuudi nakutondolwela yatama nakukeña yayiwahi?

3. Twatela kutoñojokadi neyi hitukusakula yuma yakumanishilamu wuudi?

³ Yisela niyuma yakumanishilamu wuudi twayikeña wonsu wetu, dichi twatela kusakula chiwahi. Twatela kudihula kulonda twilukeña yuma yakumanishilamu wuudi chiyakwashaña hela kuluwañesha kudifukula kwetu naYehova.

4. Lushimbinyi lumu lukutukwasha kusakula chiwahi yuma yakumanishilamu wuudi?

⁴ Chitwadihana kudi Yehova, twamushiikaña netu chihandilu chetu chikwikala chakumukalakela. (Tañenu Mukwakutañisha 5:4.) Twashiikaña netu “[tukwilaña] yuma yejima yikumulemesha Nzambi.” (1 Akorinda 10:31) Ichi chinayi mukwila nawu twadihana kudi Nzambi hela chakwila tunakunooka hela tunakwila yuma yakumanishilamu wuudi, bayi neyi hampinji yitudi hakupompa hela mwihaku.

5. Munjilanyi mutwatela kudifukwila kudi Yehova?

⁵ Yuma yejima yitwelaña mukuhanda kwetu yakundama kukudifukula kwetu naYehova. Dichuma chashimwiniyi Pawulu nindi: “Hanenu nyijimba yenu yiikali mulambu wamumi, wajila nawa wetejawu kudi Nzambi.” (Aroma 12:1) Yesu nindi: “Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima niñovu jeyi jejima.”  (Maku 12:30) Twafwilaña kumwinka Yehova yayiwahi mpinji yejima. MuIsarela wakushankulu, neyi antu anakukeña kuhana mulambu wakanyama kudi Yehova, ahanineña kanyama wamuwahi. Neyi mulambu wudi nehuji, Nzambi hawutambwileñaku. (Alevi 22:18-20) Munjila yoyimu, Yehova nateli kukaana kudifukula kwetu. Munjilanyi?

6, 7. Indi yuma yakumanishilamu wuudi yinateli kukwasha hela kutamisha ñahi wubwambu wetu naYehova?

⁶ Yehova watulejaña nindi: “Mwatela kwikala ajila, muloña ami najila.” (1 Petulu 1:14-16; 2 Petulu 3:11) Yehova wukwiteja kudifukula kwetu chiña hohu neyi kwikala kwajila hela kutooka. (Kuhituluka 15:21) Kudifukula kwetu kukwikala kwamajilu neyi twilaña yuma yahelayi Yehova, yidi neyi wuvumbi, madombu hela kudikunda nawandemoni. (Aroma 6:12-14; 8:13) Tukumuneñesha cheñi Yehova neyi tukwiteja yumiyi yituzañalesheña. Neyi tukwilaña yumiyi, Yehova wukumonaña kudifukula kwetu nindi kwatama nawa niwubwambu wetu nayena wukumana.

⁷ Hanu dinu tunateli kusakula ñahi yuma yakumanishilamu wuudi chachiwahi? Yishinanyi yikutukwasha kwiluka yuma yakumanishilamu wuudi yayiwahi niyatama?

8, 9. Yumanyi yakumanishilamu wuudi yitwatondolwelaña? Nawa muloñadi?

⁸ Makonu mukaayi mudi yuma yashiyashana yakumanishilamu wuudi. Yuma yikwawu yayiwahi kudi akwaKristu, ilaña yayivulu yatama. Tusambilenu kwiluka yuma yimu yakumanishilamu wuudi yitwatela kutondolwela.

 ⁹ Mumafwilimu amavulu, hamawebusayiti, maprogilamu ahaTV, yisela yamavidiyo nitumina mwekala wuvumbi, madombu hela jawandemoni. Kakavulu amwekeshaña yuma yatama neyi yayiwahi nawa yakuzañalesha. Ilaña akwaKristu akela ababala nawa akaanaña yisela yamuneñeshaña Yehova. (Yilwilu 15:28, 29; 1 Akorinda 6:9, 10) Neyi tukaana yuma yakumanishilamu wuudi yamuchidiwu, tukumwekesha kudi Yehova netu twahela yuma yatama.—Masamu 34:14; Aroma 12:9.

10. Yumanyi yikufumamu neyi tusakula chatama yuma yakumanishilamu wuudi?

¹⁰ Antu amakwawu amonaña nawu yuma yakumashilamu wuudi yidi neyi madombu, wuvumbi, niyawandemoni yatama wanyi. Atoñojokaña nawu: ‘Wubanjinyi wudimu? Ami kwila nila iyi yuma nehi.’ Neyi tutoñojokaña muniyi njila, tunakudidimba. Bayibolu yatulejaña nawu: “Muchima wasweja kudimbana, wadimbana chakubadika yuma yejima, wasweja nikukata.” (Yeremiya 17:9) Neyi tukumanishaña wuudi nayuma yamuneñeshaña Yehova, tukuhosha ñahi netu twayihela iyi yuma? Neyi tukuzañalalaña nayumiyi, tukutachika kuyimona netu yayiwahi. Mukuhita kwampinji, yinleji yetu yikuzeya nawa yikuleka kutusoñamisha neyi tunakukeña kwila chuma chabula kutelela.—Masamu 119:70; 1 Timotewu 4:1, 2.

11. Indi Añalija 6:7 yatukwashaña ñahi kusakula chiwahi yuma yakumanishilamu wuudi?

¹¹ Izu daNzambi datulejaña nawu: “Chuma chinakukuwayi muntu, dichakamunayi.” (Añalija 6:7) Neyi tumanishaña wuudi nayuma yatama, tukatachika kuyila mukuhita kwampinji. Chakutalilahu, antu amakwawu  elaña wuvumbi muloña wakudizañalesha nayuma yakumanishilamu wuudi yawuvumbi. Dimuloña waweni wunakutukwashilayi Yehova nindi tusakuleña chiwahi yumiyi.

12. Yumanyi yikutukwasha kusakula chiwahi yuma yakumanishilamu wuudi?

¹² Kudi yuma yimu yakumanishilamu wuudi yitweluka netu yamuneñeshaña Yehova, nawa twatela kuyitondolwela. Hanu tukwila ñahi neyi tuneluki wanyi? Yehova hatwinka lisiti yanshimbi yayuma yitwatela kutala niyitwatela kutondolwela, kutiya hela kutañaku. Ilaña, nakukeña nindi tuzatisheña chinleji chetu chadizishewa naBayibolu. (Tañenu Añalija 6:5.) Yehova watwinka yishina, hela netu yuma yalala yatudizishaña chamonañayi yuma. Iyi yishina yatukwashaña kudizisha chinleji chetu. Yatukwashaña kwiluka “chidi nkeñelu yaYehova” kulonda tusakuleña yuma yikumuzañaleshaña.—Aefwesesa 5:17.

13. Muloñadi akwaKristu chasakwilañawu yuma yashiyashana yakumanishilamu wuudi? Chumanyi chalemeshawu akwaKristu ejima?

¹³ Kakavulu, yuma yakumanishilamu wuudi yikusakulayi mukwaKristu wumu yikwambuka nayikusakulayi mukwawu. Muloñadi? Wejima wetu twakeña yuma yashiyashana. Cheñi, yuma yikukeñayi wumu, mukwawu wukuyikeña wanyi. Hela chochu, hakwila tusakuli chiwahi, akwaKristu ejima atela kulondela yishina yamuBayibolu. (Afwilipi 1:9) Iyi yishina yikutukwasha kusakula chiwahi yuma yakumanishilamu wuudi  yamuzañaleshaña Nzambi.—Masamu 119:11, 129; 1 Petulu 2:16.

14. (a) Chumanyi chitukutoñojokañahu nankashi munsañu jakuzatisha mpinji? (b) Pawulu wayifumbili akwaKristu nindidi?

¹⁴ Twatela kutoñojoka cheñi hakutoha kwampinji yitombaña hayuma yakumanisha nachu wuudi. Mpinji yitukumbilahu yikumwekesha chitwalemesha ochu chuma. Hakwikala akwaKristu, kumukalakela Yehova dichuma chitwalemesha nankashi. (Tañenu Matewu 6:33.) Neyi kubabala nehi, tukwiluka wanyi netu yuma yakumanishilamu wuudi yinakutudiila mpinji yeneni. Pawulu wayifumbili akwaKristu nindi: “Ilukenu chimwendaña, bayi mwendeña neyi antu abula maanaku, ilaña neyi akwamaana, zatishenuña chiwahi  mpinji yenu.” (Aefwesesa 5:15, 16) Dichi twatela kwikala nahakukumina mujakumanishilamu wuudi kulonda tutwamijeñaku mudimu waNzambi mukuhanda kwetu.—Afwilipi 1:10.

15. Tunateli kudikiña ñahi kuyuma yakumanishilamu wuudi yinateli kuluwañesha wubwambu wetu naYehova?

¹⁵ Mwamweni, twatela kutondolwela yuma yakumanishilamu wuudi yituneluki netu yamuneñeshaña Yehova. Indochu neyi tunakujinoka netu oyu yuma yakumanishilamu wuudi yikumuneñesha? Komana twatela kwikala asoñama? Tuhanenu chakutalilahu. Neyi munakuya munjila yakalolu hampidi, komana mukuya nakushika kwakweni kunsa? Inehi. Neyi mwalemesha wumi wenu, mukwimena hahalehi, kulonda mubuli kwikala muwubanji. Dichidi niyuma yitwasakulaña yakumanishilamu wuudi. Izu daNzambi datulejaña nawu: “Fumishaku mwendu weyi kuyuma yatama.” (Yishimu 4:25-27) Hitwatondolwelaña jakumanishilamu wuudi jitweluka netu jatama hohuku, ilaña twalekaña niyuma yakumanishilamu wuudi yitwajinokaña netu yayiwahi indi kwiji yatama nawa yinateli kuluwañesha wubwambu wetu naYehova.

16. (a) Yumanyi yikwawu yahelayi Yehova? (b) Tukumwekesha ñahi netu twahela yuma yahelayi Yehova?

¹⁶ Ñimbi yamasamu nindi: “Enu mwamukeña Yehova helenu yatama.” (Masamu 97:10) Bayibolu yatulejaña chatoñojokañayi Yehova nichamonañayi yuma. Dihulenu kulonda mumoni neyi yuma yimwadizaña yinakuyikwasha kumona yuma neyi chayimonañayi Yehova. Chakutalilahu, tweluka netu Yehova wahela “idimi  datwambaña, makasa apwekeshaña mashi akadi muloña, muchima wafuukulaña yitoñojoka yatama, nyendu yayaña lufuchi kuyuma yatama.” (Yishimu 6:16-19) Twadizaña netu twatela kutondolwela “wuvumbi, . . . kupesha, kupanda, . . . ichima, kuzuwa, . . . lwisu, kusheta, yidika yamapumba, niyuma yafwana iyi.” (Añalija 5:19-21) Munamoni iyi yishina yamuBayibolu chiyikuyikwasha kusakula yuma yakumanishilamu wuudi? Twatela kulondela nshimbi jaYehova muyuma yejima yamukuhanda kwetu, hela tudi nawakwetu hela nkawetu. (2 Akorinda 3:18) Nawa yuma yakumanishilamu wuudi yitwasakulaña nkawetu yamwekeshaña chitwekala.—Masamu 11:4; 16:8.

17. Henohu kanda tusakuli jakumanishilamu wuudi, malwihwinyi itwatela kudihula?

¹⁷ Dichi, neyi munakusakula yuma yakumanishilamu wuudi, dihulenu nenu: ‘Yuma yinnakeñi yikukwasha ñahi wubwambu wami naYehova? Yikukwasha ñahi chinleji chami?’ Tuhanjekenu hayishina yikwawu yikutukwashaña neyi hitusakula yuma yakumanishilamu wuudi.

18, 19. (a) Kufumbanyi kwafumbiliyi Pawulu akwaKristu? (b) Yishinanyi yikutukwasha kusakula yuma yakumanishilamu wuudi?

¹⁸ Hakusakula jakumanishilamu wuudi, tunakusakula yuma yitukwinzesha muyitoñojoka yetu. Pawulu nindi: “Toñojokenuña hayumiyi, yuma yejima yalala, yuma yejima yalema, yuma yejima yaloña, yuma yejima yakadi majilu, yuma yejima yasañumunaña kukeña, yuma yejima yatenañawu antu nawu yayiwahi, yuma yejima yayiwahi niyuma yejima yahamekañawu.” (Afwilipi 4:8) Neyi twinzesha yitoñojoka yetu naniyi yuma yayiwahi, tunateli kuhosha netu:  “Mazu amukanwa kami, niyitoñojoka yamumuchima wami yiikali yakukutiyisha kuwaha, eyi Yehova.”—Masamu 19:14.

¹⁹ Dihulenu nenu: ‘Yumanyi yinenzeshaña muyitoñojoka yami? Neyi natali fwilimu, nekalaña nayitoñojoka yayiwahi? Nekalaña mukuwunda, nichinleji chachiwahi? (Aefwesesa 5:5; 1 Timotewu 1:5, 19) Nekalaña wakasunuka kulomba kudi Yehova? Tahindi natiyaña kutama? Komana chuma chinatalaña hakumanisha wuudi chinaleteshi kutoñojoka hamadombu hela hawuvumbi? (Matewu 12:33; Maku 7:20-23) Komana “nshakaminu yamakonu yinnakumbalumuna” namuloña wayuma yinasakulaña? (Aroma 12:2) Neyi twakula awa malwihu chakufuma hamuchima chikutukwasha kuwana njila yakukoleshelamu wubwambu wetu naYehova. Twatela kulomba neyi ñimbi yamasamu: ‘Balumunaku mesu ami abuli kutala yuma yamukunkulwayi.’ *—Masamu 119:37.

20, 21. Muloñadi chitwatela kutoñojokelaku akwetu neyi hitukusakula yuma yakumanishilamu wuudi?

²⁰ Chishina chikwawu chalema chitukwanukaña dichichi: “Yuma yejima ayiteja munshimbi, ilaña bayi neyi yuma yejima yayiwahiku. Dichi, muntu-himuntu bayi yafwileña yuma yakuditiyisha kuwaha yomweniku, chiña yuma yakutiyisha mukwawu kuwaha.” (1 Akorinda 10:23, 24) Hela tukweti wuswa wakwila yuma yimu, hichinayi mukwila nawu twatela kuyilaku. Twatela  kutoñojoka chikupu hayuma yitunakukeña kwila chiyikukwasha hela kuluwañesha amanakwetu niahela.

²¹ Antu akweti yinleji yashiyashana. Chakutalilahu, chinleji chenu chikuyiteja kutala progilamu yimu yahaTV. Indi neyi mumona nenu progilamu yoyimu yamuneñeshaña manakwenu hela muhela. Mukwila ñahi? Hela chakwila mukweti wuswa wakuyitala, hadaha mukwila nenu mukuyitala wanyi. Muloñadi? Muloña himunakukeña ‘kuvulumuna anakwenu’ hela ‘kumuvulumuna Kristuku.’ (1 Akorinda 8:12) Hitukukeña kwila chuma chikuhukesha akwetu akwaKristuku.—Aroma 14:1; 15:1; 1 Akorinda 10:32.

22. Tukumwekesha ñahi netu twatoñojokelañaku akwetu akwaKristu kutalisha hayuma yasakulañawu?

²² Hanu dinu, mukwila ñahi neyi chinleji chenu chinayiteji wanyi kutala, kutaña hela kwila chuma chinakumonayi mukwenu nindi chachiwahi? Chineli mwamukeña manakwenu nawa mwamulemesha, himukukeña kumukanjikija kulonda yeli jimunakukeña enuku. Ñendeshi yamotoka welukaña nindi amakwawu anateli kwendesha lufuchi hela chovu kubadika yena ilaña hiyañendeshi amawahi. Munjila yoyimu, enu nimanakwenu munateli kulondela yishina yamuBayibolu, hela chochu, munateli kwikala nayitoñojoka yambuka kutalisha hayuma yakumanishilamu wuudi yetejewa.—Mukwakutaŋisha 7:16; Afwilipi 4:5.

23. Yumanyi yikutukwasha kusakula yuma yakumanishilamu wuudi chiwahi?

²³ Yumanyi yikutukwasha kusakula chiwahi yuma yakumanishilamu wuudi? Neyi tukuzatishaña chinleji chetu chadizishewa nayishina yamuBayibolu nawa neyi twayikeña nankashi amanakwetu niahela, tukusakulaña chiwahi. Nawa tukuzañalalaña netu tunakwila “yuma yejima yikumulemesha Nzambi.”