1, 2. Twatela kwiladi hakwila nawu tutwalekihu kushakama mukukeña kwaNzambi?

WEJIMA wetu twakeñaña kwikala akola kumujimba. Dichi twadaña yakuda yayiwahi, kwila maekisayizi nikuhemba mujimba wetu chiwahi. Hela chakwila iyi yuma yakeñekaña kuzata nañovu, twalekaña wanyi muloña yuma yafumañamu yayiwahi. Ilaña kudi cheñi muyuma yikwawu mutwatela kwikalila akola kumujimba.

² Hela chakwila tunamwiluki Yehova chiwahi, twatela kutwalekahu kukolesha wubwambu wetu mudi yena. Yuda chayikolesheleñayi akwaKristu “[kushakama] mukukeña kwaNzambi,” walumbulwili chatela kwilawu. Wayilejeli nindi: “Dituñenuña enu aweni muchikuhwelelu chenu chajila.” (Yuda 20, 21) Hanu dinu tunateli kukolesha ñahi chikuhwelelu?

3-5. (a) Satana nakukeña nindi nshimbi jaYehova mujimoneña ñahi? (b) Mwatiyaña ñahi nayishina ninshimbi jaYehova?

³ Mwatela kwiluka halwenu nenu njila jaYehova jabadika kuwaha. Satana nakukeña mutoñojokeña nenu nshimbi jaNzambi jakala kujilondela nawa nindi mukwikala  namuzañalu neyi mukudifuukwilaña enu aweni yuma yayiwahi niyatama. Kufuma tuhu mwitempa daEdeni, Satana neseki kuluwañesha antu kulonda akuhweleli iku kutwamba. (Kutachika 3:1-6) Dichinakwilayi nimakonu.

⁴ Mwahoshañayi Satana mwalala? Komana nshimbi jaYehova jakala? Inehi. Chakutalilahu, fwikijenu munakwenda mupaki yayiwahi. Nenu mutali kumbidi anatuñiku mbañu yayilehi. Hadaha mukudihula nenu, ‘Muloñadi chinajikiliwu munjila?’ Hohenohu, mukutiya nimutupa hakubuluma kwishinadi dambañu. Mukutoñojoka nenudi haniyi mbañu? Mukutiya kuwaha muloña yinayikiñi kudi mutupa. Nshimbi jaYehova jidi neyi yina mbañu nawa Diyabolu wudi neyi ona mutupa. Izu daNzambi datusoñamishaña nawu: “Hembenuña yitoñojoka yenu, tonenuña! Mukwankunyi nenu Diyabolu wendujolaña neyi mutupa wunakubuluma, wunakukeñakeña watela kudayi.”—1 Petulu 5:8.

⁵ Yehova nakukeña nindi twikali nachihandilu chachiwahi. Nakukeña wanyi nindi Satana yatudimbeña. Dichinatwinkeliyi nshimbi niyishina kulonda jitukiñeña nawa twikali namuzañalu. (Aefwesesa 6:11) Yakoba wasonekeli nindi: “Muntu washinshikaña chikupu munshimbi jawanina jakusubuka nakujilondela . . . wazañalalaña nayuma yelañayi.”—Yakoba 1:25.

6. Tunateli kwiluka ñahi netu mwalala njila Nzambi jabadika kuwaha?

⁶ Neyi tulondela mwatulejañayi Yehova, chihandilu chetu chawahaña nawa wubwambu wetu nayena wakolelañaku. Chakutalilahu, neyi tulombaña mpinji yejima kudi yena, mwafumaña yuma yayiwahi. (Matewu 6:5-8; 1 Atesalonika 5:17) Twekalaña namuzañalu neyi twovwahila kufumba kwindi kwakupompa hamu nakudifukula  kudi yena, kudikolesha wumu namukwawu nikudikita chikupu mumudimu wakushimwina niwakudizisha. (Matewu 28:19, 20; Añalija 6:2; Aheberu 10:24, 25) Neyi tutoñojoka iyi yuma chiyinakoleshi chikuhwelelu chetu, twelukaña chikupu netu mwalala njila jaYehova jabadika kuwaha.

7, 8. Chumanyi chinateli kutukwasha kubula kwakama nakweseka kunateli kutumwekena?

⁷ Tunateli kwakama netu hadaha kumbidi twakamona kukala kwakaleñela chikuhwelelu chetu chikekali mukweseka. Neyi mutoñojoka muniyi njila, anukenu mazu aYehova akwila nawu: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi. Yowe! Neyi watiyilili munakulejeli! Mutenowu kuwunda kweyi kwadi kwinzala neyi kaloña, nikuloña kweyi kwadi kwikala neyi mankanda akukaluñalwiji.”—Isaya 48:17, 18.

 ⁸ Neyi tumwovwahila Yehova, kuwunda kwetu kukwikala neyi kaloña kabulaña kuuma nawa kuloña kwetu kukwikala neyi mankanda amukaluñalwiji atwalekañahu kushika kuchikumu. Hela chakwila tukumona kukala muchihandilu, tukutwalekahu kwikala ashinshika. Bayibolu yatukana nawu: “Umbilaku chiteli cheyi hadi Yehova, yena wukukukwashaku; hamba kamwiteja mukwakuloña kukosomokaku.”—Masamu 55:22.

9, 10. Kupama kwatalisha mudihi?

⁹ Chimukukoleshaña wubwambu wenu naYehova, ‘mukupaminañaku.’ (Aheberu 6:1) Kupama kwatalisha mudihi?

¹⁰ Bayi neyi kukula dikwatuleñelaña kwikala akwaKristu apamaku. Hakwila nawu twikali apama, twatela kumwilisha Yehova kwikala Ibwambu detu nikumonaña yuma neyi chayimonañayi. (Yowanu 4:23) Pawulu wasonekeli nindi: “Antu endaña kwesekeja namwaya mujimba wawuntu, atoñojokaña hayuma yakumujimba, ilaña antu endaña kwesekeja namwaya spiritu, atoñojokaña hayuma yakuspiritu.” (Aroma 8:5) Muntu wapama hashaña maana hachiseki hela yuma yakumujimbaku. Ilaña washaña maana hakumukalakela Yehova nawa watondaña chiwahi yuma muchihandilu chindi. (Yishimu 27:11; tañenu Yakoba 1:2, 3.) Hetejaña kumuluwañesha kulonda yakoñeña yuma yatamaku. Muntu wapama weluka yuma yayiwahi nawa wafwilaña kuyila.

11, 12. (a) Pawulu wahosheli nindidi ‘hañovu jakutoñojoka chiwahi’ jawakwaKristu? (b) Kwikala mukwaKristu wapama kunadifwani ñahi nakwikala mukwakuhema yisela?

¹¹ Chakeñekaña kuzata nañovu hakwila nawu muntu yapami. Kapostolu Pawulu wasonekeli nindi: “Yakuda  yakola yawantu apama dehi, [adizisha] ñovu jawu jakutoñojoka chiwahi jakwaambula yuma yayiwahi nayatama.” (Aheberu 5:14) Izu dakwila nawu “adizisha” dinateli kutuleñela kutachika kutoñojoka chadizañayi muntu wahemaña yisela.

¹² Neyi tumona muntu weluka yisela nakuhema, twelukaña netu hahitili mpinji hakwila yadizi nawa yakulukili. Bayi neyi dichasemukiliyiku. Neyi mwana nasemuki, welukaña wanyi chakuzatisha makasa ninyendu yindi. Ilaña mukuhita kwampinji, welukaña chakukwata yuma nichakwenda. Nateli kwiluka chakuhema yisela neyi yadiza. Munjila yoyimu, hakwila nawu twikali akwaKristu apama hahitaña mpinji nawa chakeñekaña kudiza.

13. Yumanyi yikutukwasha kutoñojoka neyi chatoñojokañayi Yehova?

¹³ Muwunu mukanda, tunadizi chitwatela kutoñojoka nikumona yuma neyi chayimonañayi Yehova. Tunadizi chitunateli kusakilila nikukeña nshimbi jaYehova. Neyi tunakufuukula, twadihulaña netu: ‘Nshimbinyi hela yishinanyi yamuBayibolu yinakuhosha haniyi nsañu? Nateli kuyizatisha ñahi? Yehova wukukeña nindi nilidi?’—Tañenu Yishimu 3:5, 6; Yakoba 1:5.

14. Twatela kwiladi hakwila nawu tukoleshi chikuhwelelu chetu?

¹⁴ Hitwalekaña kukolesha chikuhwelelu chetu mudi Yehovaku. Neyi chochakoleshaña yakuda yayiwahi nyijimba yetu, kumwiluka Yehova nikwena kwatukwashaña kukolesha chikuhwelelu chetu. Chitwatachikili kudiza Bayibolu, twelukili chalala chapela chahosha hadi Yehova ninjila jindi. Ilaña mukuhita kwampinji, twatela kwiluka yuma yakunama chikupu. Dimwatalishiliyi Pawulu chahosheliyi nindi: “Yakuda yakola yawantu apama dehi.” Twekalaña namaana neyi tuzatishaña yuma  yitwadizaña. Bayibolu yatulejaña nawu: “Chuma chalema yowu maana.”—Yishimu 4:5-7; 1 Petulu 2:2.

15. Chalemenadi kumukeña Yehova chikupu niamanakwetu niahela?

¹⁵ Muntu nateli kwikala nañovu nawa wakola kumujimba, ilaña hakwila nawu yatwalekihu kwikala muniyi njila, watela kudihemba chiwahi. Munjila yoyimu, muntu wapama weluka nindi watela kuzata nañovu hakwila nawu yakoleshi wubwambu windi naYehova. Pawulu watwanukishaña nindi: “Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni.” (2 Akorinda 13:5) Hela chochu, bayi neyi chikuhwelelu hohu dichinateli kutukwashaku. Kukeña kutwamukeña Yehova, amanakwetu niahela kwatela kuswejelaku. Pawulu wahosheli nindi: “Neyi nikweti . . . nikwiluka kwejima, nawa neyi nikweti chikuhwelelu chakola chikupu chakwila nateli nikutuntulula jimpidi, ilaña nikweti wanyi kukeña, dikwila nawu nidi wamukunkulwayi.”—1 Akorinda 13:1-3.

16. Chumanyi chakeñañayi Satana?

¹⁶ Satana wakeñaña nindi tutoñojokeña netu tunashikilimu wanyi kumuzañalesha Yehova. Wakeñaña nindi twikali nachineñi nawa tutoñojokeña netu kukala kutunakumona hikunateli kumanaku. Wakeñaña wanyi nindi tuyikuhweleli akwetu akwaKristu nawa twikali namuzañalu. (Aefwesesa 2:2) Satana weluka nindi yitoñojoka yatama yinateli kutuluwañesha nikumanisha wubwambu wetu naNzambi. Ilaña Yehova watwinka yuma yinateli kutukwasha kumanisha yitoñojoka yatama. Watwinka kuchiñeja.

17. Kuchiñeja kwalemenadi?

 ¹⁷ Ha 1 Atesalonika 5:8, Bayibolu yesekeja kuchiñeja kwetu netepa dakiñaña mushidika neyi wudi kunjita, yaditena nawu itepa “dakuchiñeja dawamwinu.” Kuchiñeja muyikaninu yaYehova kukukiña yitoñojoka yetu nawa kukutukwasha kukaana yitoñojoka yatama.

18, 19. Kuchiñeja kwamukolesheli ñahi Yesu?

¹⁸ Kuchiñeja kwamukwashili Yesu kwikala wakola. Hawufuku wakukumishaku muchihandilu chindi chaheseki, wamweni kukala kwakuvulu. Ibwambu dindi wamufukejeleli. Mukwawu wamukaanini nikuhosha nindi wamwiluka wanyi. Amakwawu niwena amutemukili. Antu amwituña mwashakamiñeñayi amunyamukilili nakuhosha nawu amujahili hamutondu wakuyandishila. Yumanyi yamukwashili kuumika iku kukala? “Muloña wamuzañalu wamuloñesheleliwu kumbidi, womikili hamutondu  wakuyandishila, wadiwili nsonyi, nawa ichi nashakami dehi kuchikasa chachidiilu chetanda daNzambi.”—Aheberu 12:2.

¹⁹ Yesu welukili nindi neyi yekala washinshika, wukuleta kalemesha kudi Tata yindi nikumumwekesha Satana nawu hisakutwamba. Wekalili namuzañalu chikupu muloña waniku kuchiñeja. Welukili cheñi nindi hakushimbula wanyi wukwikala naTata yindi mwiwulu. Iku kuchiñeja kwamukwashili kuumika. Twatela kushindamena hakuchiñeja kwetu neyi cheliliyi Yesu. Kwakatukwasha kuumika hela chakwila tukamona kukala kwamuchidinyi.

20. Yumanyi yinateli kuyikwasha kubula kuluwankana?

²⁰ Yehova wamonaña chikuhwelelu chenu nikuumika kwenu. (Isaya 30:18; tañenu Malaki 3:10.) Wayikana ‘kuyinka yakeña muchima wenu.’ (Masamu 37:4)  Dichi twalekenuhu kushindamena hakuchiñeja kwenu. Satana nakukeña nindi muleki kuchiñeja nawa mutoñojokeña nenu yikaninu yaYehova hiyakashikejewaku. Ilaña bayi musha maana hayitoñojoka yatamaku! Neyi mumona nenu kuchiñeja kwenu hikukufunta mwishina, lombenu wukwashu kudi Yehova. Anukenu mazu ekala haAfwilipi 4:6, 7: “Bayi mwakama chuma hela chimuku, ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yonsu yimunakukeña; nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu kuhitila mudi Kristu Yesu.”

21, 22. (a) Yehova wakeñaña nindi iseki dikekali ñahi? (b) Chumanyi chimunakufwila kwila?

²¹ Mpinji yejima, toñojokenuña hayuma yayiwahi yidi kumbidi. Katataka antu ejima akadifukulaña kudi Yehova. (Chimwekeshu 7:9, 14) Toñojokenu hawumi mwituña dadiha. Wakawaha chikupu! Satana, andemoni jindi niyuma yatama yejima yikekalaku wanyi. Himwakakataña hela kufwaku. Ilaña, mwakahindukaña mafuku ejima iku mudi nañovu nawa amuzañalu hakwikala nawumi. Antu akazatilaña hamu nakwilisha iseki kwikala paradisa. Ejima akekala nayakuda yayiwahi nimaluña akiñewa kushakama. Antu hiyakekala akwamadombuku ilaña akadimwekeshelaña luwi wumu namukwawu. Mukuhita kwampinji, antu ejima heseki akadiluñisha “[kusubuka] mukulema kwawanyana kaNzambi.”—Aroma 8:21.

²² Yehova nakukeña nindi mumwilishi yekali Ibwambu denu. Dichi zatenu nañovu kulonda mumwovwahileña nawa muswineña kudi yena ifuku nifuku. Eña, wejima wetu tutwalekihu kushakama mukukeña kwaNzambi haya nyaaka!—Yuda 21.