1, 2. (a) Yumanyi yafwilañawu anadisumbuli? (b) Malwihwinyi itukuhanjekahu mukanu kapetulu?

FWIKIJENU muzañalu watiyañawu akalemba nakankaña hefuku dachawija. Atiyaña kuwaha nawu akushakamaña chiwahi. Atoñojokaña nawu wulu wawu wukutwalekañahu namuzañalu.

² Hela chochu, maluwi amavulu hiyatwalekañahu kwikala namuzañaluku. Hakwila wulu wutwalekihu nawa mwikali muzañalu, adisumbula atela kwovwahila nshimbi jaNzambi. Dichi tutalenu Bayibolu chiyakula awa malwihu: Yumanyi yayiwahi yekala muwulu? Neyi munakukeña kwiñila muwulu, munateli kusakula ñahi watela kwikala mwinikwenu? Munateli kwikala ñahi iyala hela mumbanda wamuwahi? Nawa yumanyi yaleteshaña wulu kutwalekahu?—Tañenu Yishimu 3:5, 6.

3. Munakutoñojoka nenu muntu nateli kwikala namuzañalu neyi yeñila muwulu? Lumbululenu.

³ Antu amakwawu atoñojokaña nawu anateli kwikala hohu namuzañalu neyi asumbula hela asumbuka. Ilaña dimu wanyi. Yesu wahosheli nindi wujiki hichawaana.  (Matewu 19:11, 12) Kapostolu Pawulu nindi muwujiki mwekala yuma yayivulu yayiwahi. (1 Akorinda 7:32-38) Dichi chidi kudi enu aweni neyi mukukeña kwiñila muwulu hela nehi. Bayi musumbula hela kusumbuka muloña anakuyikakeja kudi akwenu, chisaka chenu hela neyi dichelañawu antu amwiluña denuku.

4. Yumanyi yayiwahi yekala muwulu wawuwahi?

⁴ Bayibolu yashimunaña nawu wulu niwena hichawaana chatwinkayi Nzambi nawa wukweti muwawahila. Yehova wamulejeli iyala watachi, Adama, nindi: “Hichinawahi iyala kushakama kanka winduku; nukumwilila nkwashi wamutelela.” (Kutachika 2:18) Yehova wamuleñeli Eva nindi ekali ñoda Adama, nawa diwu adiña atachi kwikala chisaka. Neyi adisumbula ekala nawanyana, atela kukolesha wulu wawu kulonda akulishi chiwahi anyanawu. Ilaña kwikala nawanyana hidiyi hohu nkeñelu yawuluku.—Masamu 127:3; Aefwesesa 6:1-4.

5, 6. Wulu wunateli kwikala ñahi neyi “chibaaba chanyonji yisatu”?

⁵ Mwanta Solomoni wasonekeli nindi: “Antu ayedi anabadiki wumu muloña akweti wuloku wawuwahi wanyidimu yawu yakukabakanawu. Muloña neyi wumu wukudimbuka, wumu wukuhindwisha mukwawu. Ilaña chumanyi chikumwekana kudi muntu wukudimbuka chakadi mukwawu wakumuhindwishaku? . . . Chibaaba chanyonji yisatu hichaketukaña swayuku.”—Mukwakutañisha 4:9-12.

⁶ Wulu wawuwahi waleteshaña adisumbula kwikala amabwambu chikupu, kudikwasha, kudikundeja nikudikiña. Kukeña kwakoleshaña wulu, ilaña wulu waswejelañaku kukola neyi eyala namumbanda adifukulaña  kudi Yehova. Dihakwikala wulu wawu neyi “chibaaba chanyonji yisatu,” mwonji wantambu jisatu jinapikwiliwu hamu. Mwonji wamuchidiwu wakolaña nankashi kubadika mwonji wudi nantambu jiyedi. Wulu wakolaña nankashi neyi Yehova yekala mukachi.

7, 8. Kufumbanyi kwaheniyi Pawulu hansañu yawulu?

⁷ Chadisumbulawu eyala namumbanda, akukamaña hamu nawa akuditiyishaña kuwaha. (Yishimu 5:18) Hela chochu, neyi muntu wukwiñila muwulu muloña nakukeña kumanisha mpwila yakukama neyala hela namumbanda, wukusakula chiwahi wanyi. Dichahoshelaña Bayibolu nawu muntu watela kwiñila muwulu neyi nahiti dehi “muyaaka yawansi,” mpinji yatiyañayi nankashi muntu wuvumbi. (1 Akorinda 7:36) Chikubadika kuwaha neyi tukuhembelela sampu iyi mpwila yinawundi. Muloña wukutuñojokaña chiwahi nawa wukusakula chiwahi.—1 Akorinda 7:9; Yakoba 1:15.

⁸ Neyi munakutoñojoka jakwiñila muwulu, mwanukeña nenu muwulu wejima mwekalaña kukala. Pawulu nindi antu akusumbula hela kusumbuka “akamonaña yihuñu mumujimba wawu.” (1 Akorinda 7:28) Kukala kwamwekanaña nimuwulu wawuwahi. Dichi neyi munakukeña kwiñila muwulu, sakulenu chiwahi wakudisumbula nindi.

9, 10. Yumanyi yikumwekana neyi tudisumbula namuntu wabulaña kudifukula kudi Yehova?

⁹ Tiyenu chishina chalema chamuBayibolu chimukwanukaña kutalisha hakusakula iyala hela mumbanda: “Bayi mudikasa mumpaanda yabula kutelela nawantu  abula kwitiyaku.” (2 Akorinda 6:14) Ichi chakutalilahu chashindamena hachuma chelañawu andimi. Neyi anyama ayedi ashiyashana muyiminu hela muñovu, ndimi hatela kuyisha mumpanda yimu hakudima ihaku. Muloña awa atunyama akuyanda. Dichidi niwulu wamuntu wadifukulaña kudi Yehova nawabula kumwiluka, munateli kwidika wufwinda weneni. Bayibolu yatulejaña nawu twatela kusumbula hela kusumbukila “hohu mudi Mwanta.”—1 Akorinda 7:39.

¹⁰ Mpinji jikwawu akwaKristu amakwawu ahoshaña nawu chachiwahi kudisumbula namuntu wabula kumwiluka Yehova chatela ashakameña nkawawu. Neyi tudiwula kufumba kwamuBayibolu, kakavulu mwafumaña nyaabu nikuneña. Etu akwakudifukula aYehova, twakeñaña nankashi kumukalakela. Mukutiya ñahi neyi munakukañanya kulejaku mwinikwenu yuma yimwalemesha nankashi mukuhanda kwenu? Antu amavulu afuukulahu kushakama wujiki chatela asumbuli hela kusumbuka namuntu wabula kumukeña nikumukalakela Yehova.—Tañenu Masamu 32:8.

11. Munateli kusakula ñahi chiwahi wakudisumbula nindi?

¹¹ Ichi hichinayi mukwila nawu muntu wejima wamukalakelaña Yehova nashikilimu kwikala mwinikwetuku. Neyi munakutoñojoka kwiñila muwulu, keñenu muntu imunakeñi nankashi nawa imwatiyañanaña nindi. Mwatela kuwundisha muchima kulonda muwani muntu wakeña kwila yuma yimwelaña nawa wamutwamijañaku Nzambi. Ikalenu nampinji yakutaña nikutoñojoka hamazu akufumba kutalisha hawulu, asonekawu munyikanda yanduñu wamaana.—Tañenu Masamu 119:105.

12. Tukudizilaku kwodi kunsañu yamuBayibolu yakukeñela muntu wakudisumbula nindi?

 ¹² Muyisemwa yimu, anvwali diwu akeñelaña anyanawu ambanda akusumbula hela amayala akusumbuka nawu. Atoñojokaña nawu anvwali diwu elukaña mumbanda hela iyala wunateleli mwanawu. Ichi chisemwa dichalondeleleñawu antu kunyima. Neyi chisaka chenu chinakukeña kulondela ichi chisemwa, Bayibolu yikuyikwasha anvwali kwiluka yilwilu yatela kwikala mudi muntu wakadisumbula namwanawu. Chakutalilahu, hakumukeñela mwanindi Isaka mumbanda, Abarahama washili muchima hadi muntu wamukeña Yehova,  bayi hamali hela waya mpuhuku.—Kutachika 24:3, 67; talenu Mazu Adi Kunsa 25.

13-15. (a) Yumanyi yatela kwilayi iyala kulonda yekali iyala wamuwahi? (b) Yumanyi yatela kwilayi mumbanda kulonda yekali mumbanda wamuwahi?

¹³ Neyi munakutoñojoka jakusumbula hela kusumbuka, dishinshikenu mumoni neyi munadiloñeshi. Hadaha mukuhosha nenu munadiloñeshi, tuhanjekenu hayuma yikuletesha muntu kuhosha nindi nadiloñeshi. Hadaha jitukuhosha jikuyihayamisha.

¹⁴ Bayibolu yahosha hadi iyala nimumbanda nawu akweti nyidimu yashiyashana muchisaka. Komana hadi chaambu hakudiloñesha kweyala kwiñila muwulu nakudiloñesha kwamumbanda. Neyi iyala nakukeña kusumbula, watela kudihula neyi nadiloñeshi kwikala mutu wachisaka. Yehova wakeñaña iyala kukeñela ñodindi nianyanindi yuma yinakukeñawu nikuyitoñojokelaku. Sweje-e, iyala watela kulombolaña chisaka mukudifukula kudi Nzambi. Bayibolu yahosha hadi iyala wabulaña kuhemba chiwahi chisaka chindi nawu “watama kubadika muntu wabula kukuhwelela.” (1 Timotewu 5:8) Dichi neyi munakukeña kusumbula, toñojokenu chimwatela kuzatisha ichi chishina chamuBayibolu: “Loñeshaku mudimu hanji, wuwahishi nimwiha deyi; nkumininaku wutuñi itala deyi.” Munjila yikwawu, henohu kanda musumbuli, mwatela kwikala iyala wukweti yilwilu yayiwahi yakeñañayi Yehova.—Yishimu 24:27.

¹⁵ Mumbanda wunakukeña kusumbuka watela kwiluka chikupu neyi nashikilimu kwikala mumbanda nawa  mama yawantu. Bayibolu yashimuna njila jajivulu mwatela kuhembelayi mumbanda nfumwindi nianyanindi. (Yishimu 31:10-31) Makonu, amayala niambanda amavulu atoñojokaña hohu hayuma yakayililañawu kudi mwinikwawu. Ilaña Yehova nakukeña tutoñojokeña hayuma yitwatela kwilila mwinikwetu.

16, 17. Neyi munakukeña kwiñila muwulu, yumanyi yimwatela kutoñojokahu?

¹⁶ Henohu kanda musumbuli hela kusumbuka, toñojokenu hayuma yahoshañayi Yehova hadi iyala nimumbanda. Kwikala mutu wachisaka hichinayi mukwila nawu iyala watela kuyandisha chisaka chindiku. Mutu wachisaka wamuwahi wamwimbujolaña Yesu wadiña namuchima wawushona niwakwakamena antu jindi. (Aefwesesa 5:23) Mumbanda niyena watela kwiluka chakelañayi hakukwasha nfumwindi nikuzatila nindi hamu. (Aroma 7:2) Watela kudihula neyi wakamwekeshaña muchima wakwovwahila nfumwindi wabula kuwanina. Neyi namoni nindi yuma yakamukalila, chikuwaha neyi wukushakama wujiki hanoyu mpinji.

¹⁷ Eyala namumbanda atela kutoñojokaña hayuma yikuzañaleshaña mwinikwawu. (Tañenu Afwilipi 2:4.) Pawulu nindi: “Ninenu muntu-himuntu watela kukeña ñodindi neyi chadikeñayi yomweni; mumbanda niyena nawa watela kwikala nakalemesha chikupu kudi nfumwindi.” (Aefwesesa 5:21-33) Amayala niambanda atela kwiluka nawu mwinikwawu wayikeña nawa wayilemesha. Hakwila yuma yendeña chiwahi muwulu, sweje-e iyala watela kumona nindi ñodindi wamulemesha nawa mumbanda niyena watela kwiluka nindi nfumwindi wamukeña.

18. Eyala namumbanda atela kwikaliladi asoñama neyi anakudiluka?

 ¹⁸ Kudiluka himpinji yayiwahi yatela kudiluñishawu anakukeña kudisumbula kulonda atali neyi owu muntu nashikilimu kusumbuka nindi. Cheñi himpinji yakushinshika chikupu kulonda atweshi kumona neyi anateli kushakama hamu muwulu. Hakudiluka, eyala namumbanda elukaña chakuhanjeka nawa afwilaña kwiluka jidi mumuchima wamukwawu. Chiyatwalekahu nakudiluka, wubwambu wawu wukukolelaku chikupu. Hela  chochu, henohu kanda adisumbuli atela kwiluka mwakukumina kulonda abuli kwila yuma yatama. Kukeña kwalala kukuyikwasha kudiyuula nawa kukuyikañeshaña kwila yuma yikuluwañeshaña wubwambu wawu hakachi kawu ninaYehova.—1 Atesalonika 4:6.

19, 20. Yitoñojoka yawakwaKristu yekala ñahi kutalisha hawulu?

¹⁹ Nyikanda nimafilimu amavulu amanaña nayidika yamaneni yawulu wamuzañalu. Ilaña mukuhanda kwawantu, chidika chawulu hintachikilu hohu. Yehova wakeñeli nindi wulu wutwalekeñahu.—Kutachika 2:24.

²⁰ Makonu, antu atoñojokaña nawu wulu watela kwikala wakapinji kantesha. Kusumbula hela kusumbuka kwaswayi nikufumamu kwaswayi. Antu amakwawu atoñojokaña nawu neyi kukala kunenzi atela kumushiya mwinikwawu nakudiseña. Ilaña anukenu chakutalilahu chamuBayibolu chamwonji wakola wayibaaba yisatu yakushintila hamu. Mwonji wamuchidiwu waketuña wanyi hela anawunyoti chamuchidinyi. Chitwakinka manuña hadi Yehova, wulu wetu wakatwalekahu. Yesu nindi: “Chuma chinabombiyi Nzambi hamu, muntu bayi yachaambulaku.”—Matewu 19:6.

21. Chumanyi chikuyikwasha eyala namumbanda kukeñañana?

²¹ Wejima wetu mudi mutwelaña chiwahi nimutwaluwañeshaña. Twanyakalaña kumona yiluwa yawakwetu, sweje-e yamwinikwetu. Neyi dichitwelaña, twakendaña hohu nakuneña. Ilaña neyi twatalaña hayuma yayiwahi yelañawu, wulu wetu wakekala wamuzañalu. Komana tukutalaña hohu hajajiwahi mudi mwinikwetu  wabula kuwanina? Eña. Yehova weluka nindi twawanina wanyi, ilaña watalaña hayilwilu yetu yayiwahi. Toñojokenu jadi kumwekana neyi watalileñahu. Ñimbi yamasamu wahosheli nindi: “Neyi eyi Yehova wukushinshika mwaluwañawu antu, hinyi wukwimana?” (Masamu 130:3) Amayala niambanda akumwimbujolaña Yehova neyi akutalaña yayiwahi mudi enikwawu nawa neyi akunyakalaña kudanakena.—Tañenu Akolosi 3:13.

22, 23. Adi muwulu anateli kudizila kwodi kudi Abarahama naSara?

 ²² Mukuhita kwayaaka, wulu wukukolelañaku. Abarahama niSara ashakamini yaaka yayivulu namuzañalu muwulu. Chamulejeliwu Abarahama kudi Yehova kushiya mukala windi waUri, hadaha Sara wadiña wabadika dehi yaaka 60. Fwikijenu chichamukalilili hakushiya itala dindi dadiwahi nakuya nakushakama mumatenti. Ilaña hadiña wubwambu hakachi kaSara nanfumwindi, nawa wamulemesheleña chikupu. Dichi walondeleli mwafuukwiliyi Abarahama nawa wakeñeli nindi chiña muzatiki.—Kutachika 18:12; 1 Petulu 3:6.

²³ Ilaña kwikala namuzañalu muwulu hichinayi mukwila nawu eyala namumbanda akuditejaña mujejimaku. Mpinji yimu habuliliwu aAbarahama naSara kuditeja, Yehova wamulejeli nindi: “Kuminaku dakwiteja mwizu daSara.” Dicheliliyi Abarahama, mwafumini yuma yayiwahi. (Kutachika 21:9-13) Dichi neyi munaditeji wanyi muyuma yimu, bayi muneñaku. Chuma cheneni chidi chakwila nawu hela munaditeji wanyi, mwatela kumwekesha kukeña nikalemesha.

24. Indi wulu wunateli kuleta ñahi kalemesha kudi Yehova?

²⁴ Muchipompelu chawakwaKristu, mudi adisumbula amavulu adi namuzañalu. Dichi neyi munakukeña kwiñila muwulu, anukenuña nenu mudi namudimu weneni wakusakula wakudisumbula nindi. Chihandilu chenu chejima chikuwaha hela nehi, dichi shindamenenu hadi Yehova. Neyi mwila mwenimu, mukusakula muntu watelela, mukudiloñesha chiwahi kwiñila muwulu, nawa dishenuku kulonda mwikali muwulu wakola mudi kukeña kulonda mumulemeshi Yehova.