KUDIZA 03
Munateli Kukuhwelela Yuma Yahosha Bayibolu?
Bayibolu yatushiika yuma yayivulu nawa yatufumbaña. Hadaha munakukeña kwiluka chiyadizishaña, ilaña munakujinoka. Komana mukukuhwelela yikaninu nikufumba kudi muniwu mukanda wakushankulu? Munateli kukuhwelela chikupu yuma yahoshaña Bayibolu hansañu yakwikala namuzañalu chayinu mpinji nikumbidi? Antu amavulu dichakuhwelelawu. Tutalenu neyi ninenu mukuyikuhwelela.
1. Komana Bayibolu himukanda mudi nsañu yalala tahindi yakulumbisha?
Bayibolu yatulejaña nawu yikweti “mazu atelela achalala.” (Mukwakutañisha 12:10) Yashimuna yuma yalala yamwekeni niantu adiñaku. (Tañenu Luka 1:3; 3:1, 2.) Antu eluka nsañu yakunyaaka amavulu niakakuvumbujola anawani nawu kudi mafuku amakwawu, antu, maluña niyuma yashimunawu muBayibolu yalala.
2. Tukuhosheladi netu Bayibolu yinateli kutukwasha hela chakwila yinashimbuli?
Bayibolu yahosha nankashi hayuma yabulili kwilukawu antu adiñaku hampinji yayisonekeliwu. Chakutalilahu, yahosha nihansañu yasayansi. Nsañu yayivulu yahosha Bayibolu haniyi nsañu amavulu ayimweneña nawu yakutwamba hampinji yayisonekeliwu. Ilaña, sayansi yamakonu yinamwekeshi hatooka nawu nsañu yidi muBayibolu yoloka. Yatukwashaña “chayinu mpinji nihaya nyaaka.”—Isamu 111:8.
3. Yumanyi yikuletesha tukuhweleli chahosha Bayibolu hayuma yikamwekana kumbidi?
MuBayibolu mwekala wuprofwetu a wahosha ‘hayuma yichidi kanda ayili.’ (Isaya 46:10) Yashimwineñahu dehi kunyima choloka hayuma yachidiña kanda yimwekani. Yashimwineñahu dehi cheñi yuma yejima yinakumwekana makonu. Mukunu kudiza, tukutala hawuprofwetu wukwawu wamuBayibolu. Iwu wuprofwetu wejima washimwiniwu dehi wunakushikijewa.
SANDUJOLENU CHIKUPU
Talenu nsañu yinakuhosha sayansi yamakonu chiyinaditeji nayuma yahosha Bayibolu, nawa talenu wuprofwetu wantesha wamuBayibolu wukuyizañalesha.
4. Nsañu yasayansi yaditeja nachahosha Bayibolu
Kushankulu, antu amavulu akuhweleleli nawu adinu iseki dashakama hachuma chimu. Vumishenu VIDIYO.
Talenu nsañu yasonekeliwu mumukanda waYoba yaaka kwakwihi na 3,500 yinahitihu. Tañenu Yoba 26:7, kuhiñahu hanjekenu hanilu lwihu:
-
Muloñadi nhoshelu yakwila nawu iseki dakukudika “hakadi chuma” chiyinekalili yakuhayamisha?
Mwahitili yaaka kwakwihi na 200 nahelukiliwu asayantisiti nawu menji ayaña mwiwulu diwu anokaña cheñi. Ilaña, talenu yuma yashimwineñahu dehi Bayibolu kwakwihi nayaaka 3,500 yinahitihu. Tañenu Yoba 36:27, 28, kuhiñahu hanjekenu hanawa malwihu:
-
Chumanyi chinayitiyishi kuwaha haniku kulumbulula kwapela?
-
Komana nsona jimunatañi jinayikwashi kukuhwelela nsañu yidi muBayibolu?
5. Bayibolu yashimwineñahu dehi yuma yamaneni yikamwekana
Tañenu Isaya 44:27–45:2, kuhiñahu hanjekenu hanilu lwihu:
-
Yumanyi yahosheleñahu dehi Bayibolu henohu kunashali yaaka 200 nakumushinda Babiloni?
Nsañu yakunyaaka yamwekeshaña nawu Mwanta Kirusi wakuPeresi niamashidika indi ashindili musumba waBabiloni kwakwihi nayaaka 540 henohu Yesu kanda avwaliki. Ateñulwili menji akiñileña iwu musumba. Chelili aneñili dehi muyiisu yamusumba yashiliwu yawashi, atambwili musumba wejima chakadi kuzuña njita. Makonu, munahiti dehi yaaka kubadika ha 2,500, Babiloni washala kwamahembi hohu. Talenu chashimwineñahu dehi Bayibolu.
Tañenu Isaya 13:19, 20, kuhiñahu hanjekenu hanilu lwihu:
-
Kukisika kwaBabiloni kunamwekeshi ñahi nawu iwu wuprofwetu washikijeweli?
Mahembi aBabiloni muIraq makonu
6. Bayibolu yashimwineñahu dehi yuma yitunakumona makonu
Bayibolu yatenaña mpinji yitunakushakamamu nawu “mafuku akukuminina.” (2 Timotewu 3:1) Talenu yuma yashimwineñahu dehi Bayibolu yinakumwekana makonu.
Tañenu Matewu 24:6, 7, kuhiñahu hanjekenu hanilu lwihu:
-
Yumanyi yashimwineñahu dehi Bayibolu nawu yikamwekana munanu mafuku akukuminina?
Tañenu 2 Timotewu 3:1-5, kuhiñahu hanjekenu hanawa malwihu:
-
Yilwilu yamuchidinyi yinakumwekeshawu antu munanu mafuku akukuminina yashimwineñahu dehi Bayibolu?
-
Hakachi kaniyi yilwilu, yilwilu yimu yidihi yinasweji mudi antu?
AMAKWAWU AHOSHAÑA NAWU: “Bayibolu himukanda watuheka ninsañu yakushankulu.”
-
Enu halwenu, yumanyi yinaleteshi mwiluki chikupu nenu twatela kukuhwelela nsañu yidi muBayibolu?
YUMA YIMUNADIZI
Nsañu yakunyaaka, sayansi niwuprofwetu jejima jinakumwekesha nawu munateli kukuhwelela Bayibolu.
Kuhitulukamu
-
Komana muBayibolu mwekala nsañu yalala tahindi yakulumbisha?
-
Yumanyi yawanawu asayantisiti yesekana nayuma yashimuna Bayibolu?
-
Mukwiteja nenu Bayibolu yashimunaña yuma yikamwekana kumbidi? Muloñadi?
ILUKILENUHU NSAÑU YIKWAWU
Komana muBayibolu mwekalahu nsañu yakutwamba yahosha hasayansi?
“Komana Bayibolu Yesekana naNsañu yaSayansi?” (Chibaaba chahaIntaneti)
Yumanyi yinakumwekesha nawu tunakushakama “mumafuku akukuminina”?
“Wuprofwetu WamuBayibolu Wutanu Nawumu Wunakushikijewa” (Kaposhi Kakutalila, July 1, 2011)
Talenu wuprofwetu wahosha hadi Wanta wawaGiriki chiwashikijeweli.
Talenu wuprofwetu wamuBayibolu chiwahimpili yitoñojoka yamuntu wumu kutalisha hachamweneñayi Bayibolu.
“Nelukili Nami Nzambi Kwosi” (Kaposhi Kakutalila Na. 5 2017)
a Wuprofwetu hinsañu yafuma kudi Nzambi yashimunaña yuma yichidi kanda yimwekani.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
