KUDIZA 05
MuBayibolu Mwekala Nsañu Yafuma Kudi Nzambi
Yehova watwinka Bayibolu, chawaana chachiwahi mwekala nyikanda yashiyashana 66. Hadaha mukudihula nenu: ‘Hanu Bayibolu yekaliliku ñahi? Hinyi wayisonekeli?’ Hakwila twakuli ilu lwihu, tuhanjekenu mazu aNzambi ekala muBayibolu chenjiliwu kudi etu.
1. Neyi antu diwu asonekeli Bayibolu, Nzambi wukwikala ñahi Nsoneki yaBayibolu?
Bayibolu ayisonekeli kudi antu 40 hadi yaaka kubadika 1,600, kufuma mu 1513 B.C.E. nakushika kwakwihi na 98 C.E. Awa ansoneki afumini kuyitachi yashiyashana. Ilaña, nsañu yasonekawu muBayibolu yaditadikishaña wanyi. Muloñadi? Muloña Nzambi diyi Nsoneki yaBayibolu. (Tañenu 1 ATesalonika 2:13.) Awa ansoneki hiyasonekeli yitoñojoka yawuku. Ilaña, “ahosheleña jafumineña kudi Nzambi kwesekeja nachayilombweliwu naspiritu yajila.” a (2 Petulu 1:21) Nzambi wazatishili spiritu yindi yajila kwonena hela kusañumuna antu asoneki yitoñojoka yindi.—2 Timotewu 3:16.
2. Komana Bayibolu yinateli kukwasha antu ejima?
Nzambi wahosheli nindi nsañu yidi muBayibolu yakakwasha antu “kunyuza yejima, kunyichidi yejima, kumadimi ejima nikudi antu ejima.” (Tañenu Chimwekeshu 14:6.) Makonu, Bayibolu yidi mumadimi amavulu kubadika nyikanda yejima. Antu ejima anateli kutaña nsañu yidi muBayibolu. Hichikweti muloña nakwashakamañawu hela idimi dahoshañawuku.
3. Yehova nakiñi ñahi Bayibolu?
Bayibolu ayisonekeleli hayuma yabulaña kushimbula, chidi neyi yitembi ninyilela. Ilaña amayala akeñeli Bayibolu ayikopolweli chachiwahi. Hela chakwila antu akweti wuswa akeñeleña kujiyisha Bayibolu, antu amakwawu ashili wumi wawu muwubanji hakwila ayikiñi. Yehova haneteji muntu hela chuma chidi chejima kumukañesha kuhanjeka nanetuku. Bayibolu yahosha nawu: “Izu daNzambi yetu datwalekañahu haya nyaaka.”—Isaya 40:8.
SANDUJOLENU CHIKUPU
Ilukilenuhu nsañu yikwawu hadi Nzambi choneneniyi antu kusoneka Bayibolu, chayikiñiliyi nichayihaniniyi kudi antu.
4. Bayibolu yashimuna Nsoneki yachu
Vumishenu VIDIYO. Nawa tañenu 2 Timotewu 3:16, kuhiñahu hanjekenu hamalwihu analondelihu.
-
Neyi antu diwu asonekeli Bayibolu, muloñadi chayitenenañawu nawu Izu daNzambi?
-
Komana munakutoñojoka nenu Nzambi nateli kuleja antu yitoñojoka yindi kulonda ayisoneki?
Nsoneki nateli kusoneka mukanda, ilaña mazu adi mumukanda amuntu wamuleja kusoneka. Munjila yoyimu, antu asonekeli Bayibolu ilaña nsañu yekalamu yafumini kudi Nzambi
5. Bayibolu akañanya kuyijiyisha
Neyi Bayibolu yafuma kudi Nzambi, twatela kukuhwelela netu wukuyikiña. Kufuma tuhu kunyima, antu amakwawu anazati nañovu nawu ajiyishi Bayibolu. Akulumpi jansakililu anazati nañovu nawu asweki Bayibolu. Hela chakwila ayikañesheleña nikuyitiyisha woma nawu akuyijaha, antu amavulu anashi wumi wawu muwubanji hakwila akiñi Bayibolu. Hakwila mwiluki muntu wumu washili wumi windi muwubanji, vumishenu VIDIYO, kuhiñahu hanjekenu hamalwihu analondelihu.
-
Chineli muneluki dehi antu chadihaniniwu hakwila akiñi Bayibolu, komana munakufwila kuyitaña? Muloñadi?
Tañenu Isamu 119:97, kuhiñahu hanjekenu hanilu lwihu:
-
Chumanyi chinaleteshi antu amavulu kusha wumi wawu muwubanji hakwila abalumuni nikuhana maBayibolu?
6. Mukanda wawantu ejima
Bayibolu dimukanda wabalumunawu nikuwuhana kubadika nyikanda yejima. Tañenu Yilwilu 10:34, 35, kuhiñahu hanjekenu hanawa malwihu:
-
Muloñadi Nzambi chinakukeñelayi nindi Izu dindi adibalumuni nikudihana mukaayi kejima?
-
Chumanyi chinayitiyishi kuwaha haBayibolu?
Kwakwihi
nawantu ejima
mukaayi
akweti Bayibolu mwidimi datiyañawu
Yidi mumadimi kubadika
3,000
yachibalu hela yamukuma
5,000,000,000
MaBayibolu akushika kuniyi naamba diwu edishawu,
kubadika nyikanda yidi yejima
AMAKWAWU AHOSHAÑA NAWU: “Bayibolu himukanda wakunyaaka wasonekeliwu kudi antu.”
-
Mukuhoshahu nenudi?
-
Yumanyi yinakumwekesha nawu Bayibolu hiIzu daNzambi?
YUMA YIMUNADIZI
Bayibolu hiIzu daNzambi nawa Nzambi nazati nañovu hakwila antu ejima ekali nayu.
Kuhitulukamu
-
Chatalisha mudihi neyi tuhosha netu Nzambi woneneni antu nindi asoneki Bayibolu?
-
Chumanyi chinayitiyishi kuwaha haBayibolu chinakañanyiwu kuyijiyisha, chinakuyibalumunawu nichinakuyihanawu?
-
Munatiyi ñahi chineli muneluki nenu Nzambi nazati nañovu hakwila yahanjekeña nenu?
ILUKILENUHU NSAÑU YIKWAWU
Tañenu nsañu yakunyima yahosha haBayibolu chayifumishiliwu mumamanyusikiliputi akunyima nakuyileta mumaBayibolu amakonu.
“Ifyo Cali pa Kuti Baibolo Itwalilile Ukubako Mpaka na ino Nshita” (Loleni!, November 2007)
Talenu Bayibolu chakañanyawu kuyijiyisha kapampa kasatu kiyesekeliwu nankashi.
“Bayibolu—Chiyabulila Kujiya” (Kaposhi Kakutalila Na. 4 2016)
Talenu kukala kwahitilimu antu hakwila nawu abalumuni Bayibolu.
Bayibolu ayikopolola nikuyibalumuna mapampa amavulu. Muneluki ñahi nenu mazu aNzambi ekalamu ayihimpa wanyi?
“Komana Bayibolu Ayihimpa Hela Kufumishamu Nsañu Yikwawu?” (Chibaaba chahaIntaneti)
a Neyi chikalumbululawu muKudiza 07, spiritu yajila hiñovu yaNzambi yazatikaña.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
