KUDIZA 06
Yuma Yikweti Wumi Yatachikili Ñahi?
“[Nzambi] diyi wukweti nsulu yawumi.” (Masamu 36:9) Ninenu dichimweluka? Antu amakwawu ahoshaña nawu wumi watachikili hohu waweni, kwosi wawuleñeli. Neyi diimu, dikwila nawu twekalilaku hohu chamaposu. Ilaña neyi Yehova Nzambi waleñeli wumi, dikwila nawu kudi chuma chaletesheli awuleñi. a Talenu nsañu yamuBayibolu yashimuna chatachikili wumi nichitunateli kukuhwelela netu iyi nsañu yalala.
1. Mawulu niiseki jatachikili ñahi?
Bayibolu yahosha nawu: “Hakutachika Nzambi waleñeli mawulu niiseki.” (Kutachika 1:1) Asayantisiti amavulu akuhwelela nawu mawulu niiseki, jikweti ntachikilu. Nzambi wajileñeli ñahi? Wazatishili ‘ñovu yindi yazatikaña’ dikwila nawu spiritu yindi yajila hakuleña yuma yamumawulu niyahamaseki kushilahu ninyilalanji, tutumbwa nimapulaneti.—Kutachika 1:2.
2. Muloñadi Nzambi chaleñeleliyi iseki?
Yehova “[waleñeli iseki] nindi dibuli kwikala damukunkulwayi, ilaña wadiwumbili nindi diikali dakushakamamu.” (Isaya 45:18) Waleñeli iseki kwikala iluña dadiwahi dakushakamahu antu haya nyaaka. (Tañenu Isaya 40:28; 42:5.) Asayantisiti ashimuna nawu iseki dambukaku chikupu, diyi pulaneti hohu hanateli kushakama antu.
3. Chumanyi chaletesha antu kwikala ambukaku nawanyama?
Chelili Yehova naleñi dehi iseki, waleñelelihu cheñi yuma yikweti wumi. Wasambilili kuleñelahu nyitondu nianyama. Kuhiñahu, “Nzambi watwalekelihu kuleña muntu muchifwanisha chindi.” (Tañenu Kutachika 1:27.) Chumanyi chaletesha antu kwikala ambukaku? Chineli atuleña muchifwanisha chaNzambi, tunateli kumwekesha yilwilu yindi yidi neyi kukeña niwuñanji. Watuleñeli nawuswa wakudiza madimi, kubanjila yuma yayiwahi nikudiluñisha tumina. Nawa etu antu twadifukulaña kudi Nleñi yetu ilaña anyama nehi.
SANDUJOLENU CHIKUPU
Talenu wunsahu wunakumwekesha nawu yuma yikweti wumi ayileñeli nawa nsañu yamuBayibolu yahosha hayileñaleña yalala. Talenu yilwilu yikweti antu chiyatudizishaña hadi Nzambi.
4. Yuma yikweti wumi ayileñeli
Antu ayihamekaña muloña wayuma yatuñañawu yatalilañawu kuyileñaleña. Hanu dinu hinyi atela kuhamekawu hayileñaleña? Vumishenu VIDIYO, kuhiñahu hanjekenu halwihu lunalondelihu.
-
Yumanyi yinatuñiwu antu yinataliliwu kuyileñaleña?
Itala dejima kudi muntu wadituñaña. Hanu waleñeli yileñaleña yejima hinyi? Tañenu AHeberu 3:4, kuhiñahu hanjekenu hanawa malwihu:
-
Yileñaleñanyi yekalaku yayitiyishaña kuwaha?
-
Komana chinateleli kukuhwelela netu mawulu niiseki niyuma yejima yekalamu ajileñeli? Muloñadi?
Komana mweluka?
Munateli kuwana yibaaba nimavidiyo anakuhosha haniyi nsañu ha jw.org/lun “Komana Achileñeli?” ni “Yitoñojoka Yawantu Kutalisha Hachatachikili Wumi.”
“Kafwampi, itala dejima kudi muntu wadituñaña, ilaña watuñili yuma yejima hiNzambi”
5. Kudi yuma yikuletesha tukuhweleli netu nsañu yamuBayibolu yahosha hayileñaleña yalala
HaKutachika Kapetulu 1, Bayibolu yalumbulula chaleñeliwu Iseki niyuma yikweti wumi yekalahu. Komana mukukuhwelela iyi nsañu tahindi yakulumbisha hohu? Vumishenu VIDIYO, kuhiñahu hanjekenu hamalwihu analondelihu.
-
Komana Bayibolu yadizishaña nawu iseki niyuma yikweti wumi yekalahu ayileñeli mumafuku 6 hohu?
-
Munakutoñojoka nenu nsañu yamuBayibolu yahosha hayileñaleña yalala nawa yatelela? Muloñadi?
Tañenu Kutachika 1:1, kuhiñahu hanjekenu hanilu lwihu:
-
Asayantisiti ahoshaña nawu mawulu niiseki jikweti ntachikilu. Yuma yahoshañawu asayantisiti yinesakani ñahi nayuma yimunadizi muBayibolu?
Antu amakwawu atoñojokaña nawu Nzambi waleñeli kachuma kanyanya kakweti wumi hakuleña yuma yejima yikweti wumi. Tañenu Kutachika 1:21, 25, 27, kuhiñahu hanjekenu hanawa malwihu:
-
Komana Bayibolu yatañishaña nawu Nzambi waleñeli kachuma kanyana kakweti wumi, kuhiñahu hikakubalumuka nakwikala inshi, anyama niantu? Ntahindi waleñeli yuma yejima kwesekeja ‘nanyichidi’ yayu?
6. Antu ayileña kudi Nzambi munjila yambukaku
Twambukaku nawanyama aleñayi Yehova. Tañenu Kutachika 1:26, kuhiñahu hanjekenu hanilu lwihu:
-
Chineli atuleña muchifwanisha chaNzambi, wuswa wutukweti wakumwekesha kukeña niwushona wamwekeshaña nawu Nzambi wekala ñahi?
AMAKWAWU AHOSHAÑA NAWU: “Nsañu yamuBayibolu yahosha hayileñaleña hinsañu yakulumbisha hohu.”
-
Indi enu mwatoñojokañahu nenudi? Muloñadi?
YUMA YIMUNADIZI
Yehova waleñeli mawulu niiseki niyuma yejima yikweti wumi.
Kuhitulukamu
-
Bayibolu yashimunaña nawu mawulu niiseki jatachikili ñahi?
-
Komana Nzambi wafumishili nyichidi yashiyashana yikweti wumi kukachuma kanyanya kakweti wumi, ntahindi wayileñeli yejima?
-
Antu ambukaku ñahi nayuma yikwawu?
ILUKILENUHU NSAÑU YIKWAWU
Talenu yileñaleña yinakumwekesha nawu kwekala Nleñi.
Talenu tata yawantu chinateli kulumbulwilayi mwanindi nsañu yamuBayibolu yahosha hayileñaleña.
Talenu neyi chakwila ntañishilu yakwila nawu yuma yadileñeli yayeni yesekana nachahosha Bayibolu.
Talenu kulonda mwiluki neyi mafwaha akushankulu nichapimawu asayantisiti chamwekesha nawu yuma yikweti wumi ayileñeli indi kwiji yadinjililiku hohu yayeni.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
