KUDIZA 10
Kupompa kwawaYinsahu jaYehova Kunateli Kuyikwasha Ñahi?
Ayitambikahu dehi kukupompa kwawaYinsahu jaYehova? Neyi kanda muyeñahu dehi nakupompa nawu, munateli kutiya woma kuya nakupompa katachi. Hadaha mukudihula nenu: ‘Yumanyi yamwekanaña haniku kupompa? Kwalemenadi? Muloñadi chinatela kuyila nakupompa?’ Mukunu kudiza, mukwiluka kupompa hamu nawakwenu chikunateli kuyiswija kwakwihi naNzambi nikuyikwasha.
1. Muloñadi chichalemena kupompela hamu?
Talenu nsoneki yaBayibolu chalumbulwiliyi chichalemena kupompela hamu nawakwetu, nindi: “Nukumushimeka Yehova muchipompelu cheneni.” (Isamu 26:12) AYinsahu jaYehova niwena atiyaña kuwaha kupompa hamu. Mukaayi kejima, apompaña hamu mulungu-himulungu nakumushimeka Nzambi, kwimba tumina nikulomba. Chaaka nichaaka, ekalaña cheñi nakudifukula hakupompa kwamaneni.
2. Yumanyi yimwakadiza neyi muya nakupompa?
Hakupompa kwetu, twashindamenaña Hezu daNzambi, “[nakudilumbulula] chiwahi nikulumbulula chiwahi mwatalisha mazu.” (Tañenu Nehemiya 8:8.) Neyi muya nakupompa, mwakeluka chekalayi Yehova niyilwilu yindi yayiwahi. Chimukwilukaña chayikeñayi, mukuswina kwakwihi nayena. Mukwiluka cheñi chinateli kuyikwashayi kwikala nachihandilu chachiwahi.—Isaya 48:17, 18.
3. Antu imukudikunda nawu hakupompa akuyikwasha ñahi?
Yehova watulejaña nindi “tudakameneña wumu namukwawu kulonda tudisañumuni kumwekesha kukeña nikukoña nyidimu yayiwahi, bayi tujiñaña kukupompa [kwetuku].” (AHeberu 10:24, 25) Hakupompa kwetu, mwakawana antu adikeña wumu namukwawu nianakukeña kumwiluka Nzambi neyi enu. Mwakatiya anakuhanjeka nsañu yakukolesha yamuBayibolu. (Tañenu ARoma 1:11, 12.) Nawa mwakeluka ajiki niantu adi muwulu adi namuzañalu hela chakwila anakumona kukala. Iyi diyuma yaleteshaña Yehova akeñeña nindi tupompeña hamu mpinji yejima.
SANDUJOLENU CHIKUPU
Ilukenu chekala kupompa kwawaYinsahu jaYehova nichichalemena kuya kuniku kupompa.
4. Kupompa kwawaYinsahu jaYehova
Mumafuku awakaKristu akusambila, akaKristu apompeleña hamu mpinji yejima nakudifukula kudi Yehova. (ARoma 16:3-5) Tañenu AKolosi 3:16, kuhiñahu hanjekenu hanilu lwihu:
-
AkaKristu akusambila adifukwileña ñahi kudi Yehova?
Makonu, aYinsahu niwena apompelaña hamu mpinji yejima hamaluña awu akudifukwila. Neyi munakukeña kumona chapompañawu, vumishenu VIDIYO. Kuhiñahu, talenu mwevulu wunakumwekesha yuma yamwekanaña hakupompa nawa hanjekenu hamalwihu analondelihu.
-
Yumanyi yimwamona muvidiyo yayumanyi yamwekanaña Hetala daWanta yadifwana nayuma yimwataña haAKolosi 3:16?
-
Muvidiyo yimunatali hela munyevulu, kudihu yuma yikwawu yimunamoni yelañawu hakupompa yinayitiyishi kuwaha?
Tañenu 2 AKorinda 9:7, kuhiñahu hanjekenu hanilu lwihu:
-
Muloñadi aYinsahu jaYehova chabulilañawu kufwetesha hakupompa kwawu?
Hitulukenu muyuma yimwakadiza hakupompa kunalondelihu hamu namuntu wunakuyidizisha Bayibolu.
-
Chibalu chakupompa chimu chidihi chinayitiyishi kuwaha hela chikuyikwasha?
Komana mweluka?
Ha jw.org, mukuwana maluña nimpinji jashiyashana japompañawu mukaayi kejima.
-
Kukupompa kwetu kwekalaña jimpanji, yimwenu nimavidiyo. Kupompa kwatachikaña nakamina nikulomba nawa kwamanaña nakamina nikulomba
-
Mumpanji jikwawu hakupompa, izaza dakulañahu
-
Ejima akasunuka kwinza—yisaka, ajiki, akulumpi nianyana
-
Twafweteshaña wanyi. AYinsahu jaYehovah hiyalombaña mali hela kuhitishamu yeñaku
5. Mwatela kuzata nañovu hakwila muyeña nakupompa
Talenu chelileña chisaka chaYesu. Hakwila ayi kukupompa kwekalileñaku hachaaka-hachaaka, endeleña makilomita 100 nakuhita mujimpidi kufuma kuNazareta nakuya kuYerusalema. Tañenu Luka 2:39-42, kuhiñahu hanjekenu hanawa malwihu:
-
Munakutoñojoka nenu chadiña chaswayi hakwila endi kushika kuYerusalema?
-
Muloñadi chimwatela kuzatila nañovu hakwila muyeña nakupompa?
-
Munakutoñojoka nenu kuya nakupompa kwalema? Muloñadi?
Bayibolu yahosha nawu kupompa hamu nakudifukula kwalema nankashi. Tañenu AHeberu 10:24, 25, kuhiñahu hanjekenu hanilu lwihu:
-
Muloñadi wutwatelela kupompa mpinji yejima?
AMAKWAWU AHOSHAÑA NAWU: “Hela chakwila napompi hamu nawakwetu wanyi chidi hohu chiwahi, chakala hohu inakudiza Bayibolu hetala.”
-
Nsonanyi hela chakutalilahwinyi chamuBayibolu chinakumwekesha chuma chakeñañayi Yehova?
YUMA YIMUNADIZI
Kuya nakupompa kukuyikwasha kumwiluka Yehova chikupu, kukolesha wubwambu wenu nayena nikudifukula hamu nawakwenu.
Kuhitulukamu
-
Muloñadi Yehova chatulejelañayi nindi tupompeña hamu?
-
Yumanyi yimwakadiza neyi muya kukupompa kwawaYinsahu jaYehova?
-
Njilanyi jikwawu jimunakutoñojoka nenu kupompa kunateli kuyikwasha?
ILUKILENUHU NSAÑU YIKWAWU
Chumanyi chimwatela kwila neyi munakutiya woma wakuya nakupompa? Talenu iyala wumu watiyileña woma hakusambila chakeñeliyi kupompa.
Talenu iwu mukwenzi chakeñeliyi kupompa nichelileñayi kulonda atwalekihu kupompa.
Talenu antu amakwawu chatiyañawu kuya nakupompa.
“Twayilañadi naKupompa Hetala daWanta?” (Chibaaba chahaIntaneti)
Talenu muntu wadiña mwizanvu dawatupondu chahimpiliyi chihandilu chindi hanyima yakupompa nawaYinsahu jaYehova.
“Nendeleña naWuta Kwejima Kunayileña” (Kaposhi Kakutalila, September 1, 2014)
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
