KUDIZA 11

Yuma Yimwatela Kwila Hakwila Bayibolu Yiyikwashi

VUMISHENU

Kudihu mudimu wumwakeñeleña kutachika ilaña mumona nenu mukuwutwesha wanyi? Hadaha mwawambwili muyikunku-yikunku hakwila wuyipeleli kuzata. Dichimunateli kwila nihakutaña Bayibolu. Munateli kudihula nenu, ‘Nukutachikila hadihi?’ Mukunu kudiza, tukuhanjeka hanjila japela jimwatela kwila jikuyikwasha kwikala nampwila yakutaña nikudiza Bayibolu.

1. Muloñadi chitwatela kutañila Bayibolu mpinji yejima?

Muntu watañaña Bayibolu mpinji yejima, hela “nshimbi jaYehova,” wekalaña namuzañalu nawa yuma yamuwahilaña. (Tañenu Isamu 1:1-3.) Hakutachika, esekenuña kutaña mumaminiti antesha hefuku-hefuku. Chimukwilukaña chekala Izu daNzambi, mukudiluñishaña kutaña Bayibolu.

2. Yumanyi yikuyikwasha kudiluñisha kutaña Bayibolu?

Neyi tunakukeña kudiluñisha kutaña Bayibolu, twatela kuhudikila nakutoñojoka hayuma yitunatañi. Twatela kuyitaña “[nikutoñojokahu] chikupu.” (Yoshuwa 1:8, tumazu twaheshina) Chimunakutaña, dihulenu awa malwihu nenu: ‘Iyi nsañu yinakundizishadi hadi Yehova Nzambi? Nateli kuzatisha ñahi iyi nsañu muchihandilu chami? Nateli kuzatisha ñahi awa mavasi kulonda nikwashiku akwetu?’

3. Mpinjinyi yimunateli kutaña Bayibolu?

Komana chayikalilaña kwikala nampinji yakutaña Bayibolu? Etu amavulu chatukalilaña. Esekenuña “[kuzatisha] chiwahi mpinji yenu.” (AEfwesesa 5:16) Munateli kuzatisha chiwahi mpinji yenu neyi mwikala nampinji yakutañilamu Bayibolu ifuku niifuku. Amakwawu afuukulañahu kutaña Bayibolu nantetemena nankashi. Amakwawu afuukulañahu kutaña namwaana, hadaha hampinji yinakunookawu hachayili. Amakwawu niwena atañaña Bayibolu melela henohu kanda ayi nakukaama. Indi enu mpinjinyi yinateli kuyiwahila?

SANDUJOLENU CHIKUPU

Ilukenu chimunateli kudiluñisha kutaña Bayibolu. Talenu chimunateli kuloñesha chiwahi kulonda yuma yimunakudiza muBayibolu yiyikwasheña.

Neyi chitunateli kwikala nachipepa chakuda yakuda yitwabulahu dehi kuda, dichitunateli kutachika nikudiluñisha kutaña Bayibolu

4. Ilukenu chakudiluñisha kutaña Bayibolu

Hakutachika kutaña Bayibolu chinateli kwikala chakala. Hela chochu, tunateli kutachika “[kufwila] chikupu” kutaña Bayibolu, neyi muntu chinateli kutachikayi kudiluñisha yakuda yabulayi kudahu dehi. Tañenu 1 Petulu 2:2, kuhiñahu hanjekenu hanilu lwihu:

Neyi mukutañaña Bayibolu mafuku ejima munakutoñojoka nenu mukudiluñishaña nawa mukukeñaña nenu muyitañeña mpinji yejima?

Vumishenu VIDIYO kulonda mumoni antu amakwawu chatachikiliwu kudiluñisha kutaña Bayibolu. Kuhiñahu hanjekenu hamalwihu analondelihu.

VIDIYO: Atwansi Anakudiza Kukeña Izu daNzambi (5:33)

Muniyi vidiyo, kukalanyi kwashindiliwu awa atwansi?
Yumanyi yayikwashili kutwalekahu kutaña Bayibolu mpinji yejima?
Elili ñahi hakwila atachiki kudiluñisha chikupu kutaña Bayibolu?

Yuma yinateli kuyikwasha kutachika kutaña Bayibolu:

Zatishenu Bayibolu yabalumunawu choloka nawa yikweti mazu anakuzatishawu makonu. Esekenu kuzatisha Bayibolu yaNsona jaKaayi Kakaha neyi mukweti mwidimi denu.
Sambilenu kutaña nsañu yikuyitiyisha kuwaha. Neyi munakukeña kwiluka chimwatela kwila, yenu hachati yinakuhosha nawu “Chakutachika Kutaña Bayibolu.”
Sonekenuña himunakumini kutaña. Zatishenu chati yidi muwunu mukanda yinakuhosha nawu “Sonekenu Himunakumini Kutaña Bayibolu.”
Zatishenu JW Library^®app. Haniyi app, munateli kutaña nikutiyilila kumazu akukwata dehi amuBayibolu kwejima kumudi. Munateli kuzatisha foni hela chozelu chikwawu.
Zatishenu chibalu chansañu jikwawu chidi muBayibolu yaNsona jaKaayi Kakaha. Mudi mamapu, machati nimazu akulumbulula dehi anateli kuyikwasha kutiyishisha yuma yimunakutaña.

5. Loñeshenu henohu kanda mutachiki kudiza Bayibolu

Tañenu Isamu 119:34, kuhiñahu hanjekenu hanilu lwihu:

Kulomba henohu kanda mutachiki kutaña Bayibolu hela himunakuloñesha kudiza kwawahiladi?

Munateli kudiluñisha ñahi kudiza-hikudiza? Chimukuloñeshaña kudiza-hikudiza, esekenu kuzatishaku iyi njila:

Tañenu maparagilafu akutachikilahu adi mukudiza kwejima.
Talenu nsona nawa jitañenu, toñojokenuhu mutali chijinakwatankani nansañu yimunakutaña.
Fundenu mazu hela nyikuku yamazu yinakwakula malwihu; ichi chikuyikwasha chimukudizaña oku kudiza nantañishi yenu.

Komana mweluka?

AYinsahu jaYehova anazatishi maBayibolu ashiyashana. Hela chochu, twakeña nankashi Bayibolu yaNsona jaKaayi Kakaha muloña ayibalumuna choloka, yaswayi kutiya nawa yazatisha ijina daNzambi.—Talenu chibaaba chahaIntaneti chinakuhosha nawu “Komana aYinsahu jaYehova Ekala naBayibolu Yambukaku?”

AMAKWAWU AHOSHAÑA NAWU: “Kudiza Bayibolu kwakala nankashi. Nidana mpinji hela ñovu yakudiza.”

Indochu enu mwatoñojokaña nenudi?

YUMA YIMUNADIZI

Neyi munakukeña nenu nsañu yimunakudiza muBayibolu yiyikwashi, ikalenu nampinji yakuyitaña, lombenuña kulonda mutiyishi yuma yimunatañi nawa loñeshenuña kudiza-hikudiza.