KUDIZA 12
Yumanyi Yikuyikwasha Kutwalekahu Kudiza Bayibolu?
Mukudiza Bayibolu mwafumaña yuma yayiwahi nankashi. Hela chochu, mpinji yikwawu chinateli kwikala chaswayi wanyi. Mpinji yikwawu, munateli kujinoka neyi chakwila mwatela kutwalekahu kudiza Bayibolu. Chalemenadi kuzata nañovu kulonda mutwalekihu kudiza? Yumanyi yikuyikwasha kutwalekahu kudiza hela munakumona kukala?
1. Kudiza Bayibolu kwalemenadi?
“Izu daNzambi dadumi nawa dikweti ñovu chikupu.” (AHeberu 4:12) Bayibolu yalema muloña yatulejaña chatoñojokañayi Nzambi nichatiyañayi hadi enu. Yikuyikwasha kwiluka yuma, kwikala namaana alala nikuchiñeja. Chasweja kulema, yikuyikwasha kwikala ibwambu daYehova. Chimukudizaña Bayibolu, ñovu yayu yikuyikwasha kuhimpa chihandilu chenu.
2. Kwiluka kulema kwachalala chamuBayibolu kukutukwasha ñahi?
Chalala chamuBayibolu chidi neyi maheta alema. Dichaletesha Bayibolu yitulejeña nawu “landaku chalala nawa bayi wuchilandishaku.” (Yishimu 23:23) Neyi twiluka kulema kwachalala chamuBayibolu, tukutwalekahu kudiza hela chakwila tunakumona kukala.—Tañenu Yishimu 2:4, 5.
3. Yehova nateli kuyikwasha ñahi kutwalekahu kudiza?
Chineli Yehova diyi Nleñi yenu wañovu jejima nawa Ibwambu denu, nakukeña nindi mumwiluki. Wukuyinka “muchima wakufwila kukoña yuma niñovu yakwilamu.” (Tañenu AFwilipi 2:13.) Dichi, mpinji yikwawu neyi munakukeña kusweja kwikala nampwila yakudiza hela kuzatisha yuma yimunakudiza, wukuyikwasha. Neyi munakukeña ñovu yakuumika kukala hela ikañesha, wukuyinka. Mulombenuña Yehova mpinji yejima ayikwashi kutwalekahu kudiza Bayibolu.—1 ATesalonika 5:17.
SANDUJOLENU CHIKUPU
Talenu yuma yikuyikwasha kutwalekahu kudiza Bayibolu hela chakwila mukweti yuma yayivulu yakwila indi kwiji anakuyikañesha kudi akwenu. Nawa ilukenu Yehova chinateli kuyikwashayi kutwalekahu.
4. Lemeshenu nankashi kudiza Bayibolu
Mpinji yikwawu, twakasikaña nanyidimu yayivulu chakwila tukumonaña netu tudana mpinji yakudiza Bayibolu. Yumanyi yinateli kutukwasha? Tañenu AFwilipi 1:10, kuhiñahu hanjekenu hanawa malwihu:
-
Munakutoñojoka nenu yumanyi ‘yalema nankashi muchihandilu’?
-
Munateli kulemesha ñahi kudiza Bayibolu?
-
Neyi musambila kushamu wusekulula mumbeketi kuhiñahu mushamu malola, malola akushikilamu wanyi
-
Neyi musambila kushamu malola kuhiñahu dinu mushamu wusekulula mukwikala neluña deneni. Munjila yoyimu, neyi musambila kukeña “yuma yalema nankashi” muchihandilu chenu, mukutwesha kuyizata nawa mukwikala ninampinji yakwililamu yuma yikwawu
Kudiza Bayibolu kwatukwashaña kupama kuspiritu, dikwila nawu tukumwiluka Nzambi nawa tukudifukulaña kudi yena. Tañenu Matewu 5:3, kuhiñahu hanjekenu hanilu lwihu:
-
Yumanyi yayiwahi yafumañamu neyi tulemesha nankashi kudiza Bayibolu?
5. Twalekenuhu hela chakwila anakuyikañesha
Mpinji yikwawu, antu amakwawu anateli kuyikañesha kudiza Bayibolu. Talenu chamumwekeneni Francesco. Vumishenu VIDIYO, kuhiñahu hanjekenu hamalwihu analondelihu.
-
Muniyi vidiyo, amabwambu jaFrancesco nichisaka chindi elili ñahi chayilejeliyi yuma yadizileñayi?
-
Yumanyi yayiwahi yafuminimu chelili atwalekihu kudiza?
Tañenu 2 Timotewu 2:24, 25, kuhiñahu hanjekenu hanawa malwihu:
-
Chisaka chenu niamabwambu jenu anakutiya ñahi nayuma yimunakudiza?
-
Kwesekeja nanawa mavasi, mukwila ñahi neyi muntu natiyi kutama chimunakudiza Bayibolu? Muloñadi?
6. Mushindamenenu Yehova kulonda ayikwashi
Hampinji yitunakuswina kwakwihi naYehova, twafwilaña nankashi kumutiyisha kuwaha. Hela chochu, chinateli kutukalila kuhimpa yuma muchihandilu chetu kulonda twileña yuma kwesekeja nachakeñañayi. Neyi mutiya muniyi njila, bayi muzeyaku. Yehova wukuyikwasha. Vumishenu VIDIYO, kuhiñahu hanjekenu hamalwihu analondelihu.
-
Muniyi vidiyo, aJim ahimpili ñahi hakwila amuzañaleshi Yehova?
-
Yumanyi yinayitiyishi kuwaha nayuma yeliliwu?
Tañenu AHeberu 11:6, kuhiñahu hanjekenu hanawa malwihu:
-
Yehova wakayililadi “antu amukeñakeñaña chikupu,” dikwila nawu antu azataña nañovu kulonda amwiluki nawa amutiyisheña kuwaha?
-
Chumichi chinakumwekesha nawu Yehova watiyaña ñahi neyi ayimona munakuzata nañovu kudiza Bayibolu?
MUNTU NATELI KWIHULA NINDI: “Wunakudiziladi Bayibolu?”
-
Mukumwakula nenudi?
YUMA YIMUNADIZI
Hela chakwila mpinji yikwawu chaswayi wanyi, kudiza Bayibolu kunateli kuyikwasha kwikala namuzañalu haya nyaaka. Twalekenuhu kumushindamena Yehova nawa wakayisomwena.
Kuhitulukamu
-
Chalala chamuBayibolu chalemenadi kudi enu?
-
Munateli kwiluka ñahi “yuma yalema nankashi”?
-
Mukulombeladi kudi Yehova nenu ayikwashi kutwalekahu kudiza Bayibolu?
ILUKILENUHU NSAÑU YIKWAWU
Talenu yuma yiwana yinakwashi antu amavulu kuzatisha chiwahi mpinji yawu.
Talenu Yehova chakwashiliyi mumbanda wumu wadiña nanfumwindi wabulili kwiluka nindi ñodindi wazatileña nañovu kulonda amuzañaleshi Nzambi.
Talenu yuma yayiwahi yamumwekeneni iwu iyala muloña wakuumika kwañodindi.
Mpinji yikwawu aYinsahu jaYehova ayinkaña nyiloña nawu ambulaña yisaka yawantu. Komana diimu?
“Komana aYinsahu jaYehova Ambulaña Yisaka Tahindi Ayinuñañeshaña Hamu?” (Chibaaba chahaIntaneti)
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
