KUDIZA 14
Tunateli Kudifukula Ñahi muNjila Yamutiyishaña Nzambi Kuwaha?
Neyi chinashimuniwu mukudiza kunafumihu, bayi neyi kudifukula kwejima kwamutiyishaña Nzambi kuwahaku. Hela chochu, tunateli kudifukula kudi Nleñi yetu munjila yamutiyishaña kuwaha. “Kudifukula” kwamuchidinyi kwamutiyishaña kuwaha? (Yakoba 1:27) Talenu chahosha Bayibolu.
1. Kudifukula kwetu kwatela kushindamena hankahi?
Kudifukula kwetu kwatela kushindamena haBayibolu. Yesu wamulejeli Nzambi nindi: “Izu deyi hichalala.” (Yowanu 17:17) Kudifukula kukwawu kwadiwulaña chalala chekala Mwizu daNzambi donenewa, Bayibolu. Asinsishañahu ntañishilu yawantu nitushidikilu twawu. Ilaña Yehova watiyaña kuwaha wanyi nawantu “[adiwulaña] nshimbi yaNzambi.” (Tañenu Maku 7:9.) Ilaña neyi kudifukula kwetu kushindamena haBayibolu nawa tulondela kufumba kwekalamu, tukumutiyishaña kuwaha.
2. Twatela kudifukula ñahi kudi Yehova?
Twatela kudifukula kudi Yehova hohu chineli diyi Nleñi yetu. (Chimwekeshu 4:11) Ichi chinatalishi mukwila nawu twatela kumukeña nikudifukula kudi yena hohu, chakadi kuzatisha yifwikija hela ankishi.—Tañenu Isaya 42:8.
Kudifukula kwetu kwatela kwikala ‘kwajila nawa kwetejawu’ kudi Yehova. (ARoma 12:1) Dikwila nawu, twatela kulondelaña nshimbi jindi muchihandilu chetu. Chakutalilahu, antu amukeña Yehova akeña nshimbi jindi jahosha hawulu nawa ajilondelaña. Nawa atondolwelaña yaaku yatama, yidi neyi kuzatisha chatama makanya, yitumbu yashetana hela walwa. a
3. Muloñadi wutwatela kudifukwila kudi Yehova hamu nawakwetu akakwitiya?
Kupompa kwetu kwamukachi kamulungu kwatukwashaña ‘kumushimeka Yehova . . . muchipompelu.’ (Isamu 111:1, 2) Njila yimu mutwamushimekelañamu, hikwimba tumina twakumushimeka Nzambi. (Tañenu Isamu 104:33.) Yehova watulejaña nindi tupompeña muloña watukeña nawa weluka nindi kunateli kutukwasha kwikala namuzañalu haya nyaaka. Neyi tupompa hamu, twadikoleshaña wumu namukwawu.
SANDUJOLENU CHIKUPU
Talenu Yehova chakaanishilayi kudifukula kuzatisha yifwikija. Ilukenu njila jalema mutunateli kumushimekela Nzambi.
4. Hitwatela kuzatisha yifwikija hampinji yitunakudifukulaku
Tuneluki ñahi netu kuzatisha yifwikija kukumuneñesha Nzambi? Vumishenu VIDIYO, kuhiñahu hanjekenu halwihu lunalondelihu.
-
Chumanyi chamwekeni chelili antu jaNzambi amakwawu kunyima adifukuli kudi yena kuzatisha ankishi?
Antu amakwawu azatishaña yifwikija hakudifukula kudi Nzambi muloña atoñojokaña nawu diyi njila yikuyikwasha kuswina kwakwihi nayena. Munakutoñojoka wanyi nenu kuzatisha yifwikija kukuletesha aswini kwakulehi nawena? Tañenu Kwidika 20:4-6 niIsamu 106:35, 36, kuhiñahu hanjekenu hanawa malwihu:
-
Yumanyi hela yifwikijanyi yimwamonahu dehi antu anakuzatisha hampinji yinakudifukulawu?
-
Yehova watiyaña ñahi neyi antu anakuzatisha yifwikija?
-
Munakutoñojoka nenu chidi hohu chiwahi kuzatisha yifwikija hampinji yitunakudifukula?
5. Kudifukula kudi Yehova hohu kwatufumishaña muwuduñu wantañishilu yakutwamba
Talenu kudifukula kudi Yehova munjila yetejayi chikunateli kutufumisha muwuduñu wantañishilu yakutwamba. Vumishenu VIDIYO.
Tañenu Isamu 91:14, kuhiñahu hanjekenu hanilu lwihu:
-
Yehova watukana kutwililadi neyi tumwekesha netu twamukeña kuhitila mukudifukula hohu kudi yena?
6. Twadifukulaña kudi Nzambi neyi tunayi nakupompa
Twamushimekaña Yehova nikudikolesha wumu namukwawu natumina nikwakulahu hakupompa. Tañenu Isamu 22:22, kuhiñahu hanjekenu hanawa malwihu:
-
Ñakwilu yahanañawu hakupompa yinayikwashi ñahi?
-
Kwila muloñesha ninenu kulonda mwakakulihu nehi?
7. Yehova watiyaña kuwaha neyi tulejaku akwetu yuma yitunakudiza
Kudi njila jajivulu mutunateli kulejela akwetu chalala chamuBayibolu. Tañenu Isamu 9:1 ni 34:1, kuhiñahu hanjekenu hanilu lwihu:
-
Yumanyi yimunadizi muBayibolu yimukukeña kulejaku muntu mukwawu?
AMAKWAWU AHOSHAÑA NAWU: “Chakala hohu wamukuhwelela Nzambi, wunateli kudifukula kudi yena munjila yidi yejima.”
-
Mukuhoshahu nenudi?
YUMA YIMUNADIZI
Twamuzañaleshaña Nleñi yetu neyi tudifukulaña hohu kudi yena, kumushimeka hakupompa nikulejaku akwetu nsañu yitunadizi.
Kuhitulukamu
-
Tunateli kwiluka ñahi chakudifukula kudi Nzambi munjila yetejayi?
-
Muloñadi chitwatela kudifukwila hohu kudi Yehova?
-
Muloñadi wutwatela kudifukwila hamu nawakwetu anakukeña kumutiyisha Nzambi kuwaha?
ILUKILENUHU NSAÑU YIKWAWU
Munsañu yinakuhosha nawu, “Hinapeshaña Cheñi Ankishiku,” tañenu kulonda mumoni mumbanda wumu chalekeliyi kupesha ankishi.
“Bayibolu Yahimpaña Yihandilu Yawantu” (Kaposhi Kakutalila, October 1, 2011)
Ilukenu njila jinateli kuyikwasha kwakulahu hakupompa.
“Mushimekenu Yehova muChipompelu” (Kaposhi Kakutalila, January 2019)
Talenu kuya nakupompa chikwamukwashili mukwenzi wumu hela chakwila chamukalilileña kuya nakupompa.
Amavulu akuhwelela nawu kulusu hichinjikijilu chakwilukilaku akaKristu. Komana twatela kuyizatisha hakudifukula?
a Iyi nsañu akayihoshahu mukudiza kudi kumbidi.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
