KUDIZA 16
Yumanyi Yeliliyi Yesu Hadiñayi Hamaseki?
Antu amavulu amufwikijaña Yesu neyi mukeki wunabuli wakumukiña, kaprofwetu wamaana hela iyala wudi hakafwilu. Ilaña tunateli kwiluka yuma yayivulu hadi yena kuhitila mukushinshika chadiña chihandilu chindi hamaseki. Mukunu kudiza, tukuhanjeka hayuma yalema yeliliyi Yesu nichiyinateli kuyikwasha.
1. Mudimwinyi weneni wazatileñayi Yesu?
Mudimu weneni wazatiliyi Yesu “[hikushimwina] nsañu yayiwahi yaWanta waNzambi.” (Tañenu Luka 4:43.) Washimwinini nsañu yayiwahi nindi Nzambi wukaleta wanta hela nfulumendi, yakamanisha kukala kwejima kunakumonawu antu. a Yesu wazatili iwu mudimu wakushimwina nsañu yayiwahi hadi yaaka yisatu nachikunku.—Matewu 9:35.
2. Muloñadi Yesu chakoñeleleñayi yihayamisha?
Bayibolu yashimuna ‘nyidimu yayivulu yañovu niyihayamisha niyinjikijilu yakoñeliyi Nzambi kuhitila mudi [Yesu].’ (Yilwilu 2:22) Nzambi wamwinkeli Yesu ñovu yakuwundisha mpepela, kudiisha mazaza awantu, kuuka akata nikusañula antu afwa. (Matewu 8:23-27; 14:15-21; Maku 6:56; Luka 7:11-17) Yihayamisha yakoñeliyi Yesu yamwekesheli chikupu nawu amutemesheli kudi Nzambi. Yamwekesheli cheñi nawu Yehova wudi nañovu yakumanisha kukala kwetu kwejima.
3. Yumanyi yitukudizila kuchihandilu chaYesu?
Yesu wamwovwahilileña Yehova muyuma yejima. (Tañenu Yowanu 8:29.) Hela chakwila amukañesheleña, Yesu welileña yuma yejima yamulejeleñawu kudi Tata yindi kushika nikukufwa kwindi. Wamwekesheli hatooka nindi antu anateli kumukalakela Nzambi hela chakwila anakumona kukala. Dichi, Yesu watushilili “chakutalilahu kulonda [tulondeleña] chikupu mumahaji indi.”—1 Petulu 2:21.
SANDUJOLENU CHIKUPU
Talenu Yesu chashimwininiyi nsañu yayiwahi nikukoña yihayamisha.
4. Yesu washimwinini nsañu yayiwahi
Yesu wendeleña maluña amalehi hamaseki nakuleja antu amavulu nsañu yayiwahi. Tañenu Luka 8:1, kuhiñahu hanjekenu hanawa malwihu:
-
Komana Yesu washimwinineña hohu antu enjileña kudi yena nakumutiyilila?
-
Yesu welileña ñahi hakwila awani antu?
Nzambi wahosheleñahu dehi nindi Mesiya wakashimwina nsañu yayiwahi. Tañenu Isaya 61:1, 2, kuhiñahu hanjekenu hanawa malwihu:
-
Yesu washikijili ñahi iwu wuprofwetu?
-
Munakutoñojoka nenu antu makonu atela kutiyilila kuniyi nsañu yayiwahi?
5. Yesu watañishileña nsañu yalema
Kubombela hakushimwina nsañu yayiwahi yaWanta waNzambi, Yesu watañishileña ninsañu yinateli kukwasha antu. Talenu yakutalilahu yantesha yekala muMpanji yindi yahaMpidi yelukawu nankashi. Tañenu Matewu 6:14, 34 ni 7:12, kuhiñahu hanjekenu hanawa malwihu:
-
Kufumbanyi kwakuwahi kwashimwiniyi Yesu munawa mavasi?
-
Munakutoñojoka nenu iku kufumba kunateli kukwasha antu makonu?
6. Yesu wakoñeli yihayamisha
Yehova wamwinkeli Yesu ñovu yakukoña yihayamisha yayivulu. Neyi munakukeña kumona chakutalilahu chimu, tañenu Maku 5:25-34 hela vumishenu VIDIYO. Kuhiñahu hanjekenu hamalwihu analondelihu.
-
Muniyi vidiyo, mumbanda wakata wakuhweleleli nindidi?
-
Chumanyi chinayitiyishi kuwaha nanichi chihayamisha?
Tañenu Yowanu 5:36, kuhiñahu hanjekenu hanilu lwihu:
-
Yihayamisha yakoñeliyi Yesu “yinakushimuna wunsahu” hachumanyi, hela yinakumwekeshadi hadi yena?
Komana mweluka?
Nsañu yayivulu yitweluka hadi Yesu yekala munyikanda yiwana yamuBayibolu yatenañawu nawu Nyikanda yaNsañu Yayiwahi, Matewu, Maku, Luka niYowanu. Nsoneki wejima waniyi Nyikanda yaNsañu Yayiwahi wabombelelimu nsañu yashiyashana yahosha hadi Yesu. Neyi tutaña iyi nyikanda yejima yiwana, tukwiluka chiwahi chadiña chihandilu chindi.
-
MATEWU
diyi wadiña watachi kusoneka Mukanda waNsañu Yayiwahi. Wakonkomwenaña hansañu yayivulu yatañishiliyi Yesu, sweje-e yatañishiliyi haWanta waNzambi.
-
MAKU
diyi wasonekeli Mukanda waNsañu Yayiwahi wawihi. Wahoshaña hayuma yayivulu yayiwahi yamwekeni.
-
LUKA
watulejaña Yesu chalemesheliyi kulomba nawa walumbulula chalemesheliyi ambanda.
-
YOWANU
watulejaña nsañu yayivulu hadi Yesu chahanjekeleñayi nawamabwambu jindi adikundileñayi nawu niantu amakwawu.
AMAKWAWU AHOSHAÑA NAWU: “Yesu wadiña hohu muntu wamuwahi, kunahu.”
-
Indi enu mwamwiluka nenudi?
YUMA YIMUNADIZI
Yesu washimwinini haWanta waNzambi, wakoñeli yihayamisha nawa wamwovwahilileña Yehova muyuma yejima.
Kuhitulukamu
-
Mudimwinyi weneni wazatiliyi Yesu hadiñayi hamaseki?
-
Yihayamisha yaYesu yamwekeshañadi?
-
Nsañwinyi yalema yatañishileñayi Yesu?
ILUKILENUHU NSAÑU YIKWAWU
Nsañwinyi yahosheleñayi Yesu kakavulu?
“Yesu Chalemesheliyi Wanta waNzambi” (Kaposhi Kakutalila, October 1, 2014)
Talenu chikuletesha tukuhweleli chikupu netu Yesu wakoñeleña yihayamisha.
“Yumanyi Yimunateli Kudizila kuYihayamisha Yakoñeliyi Yesu?” (Kaposhi Kakutalila, July 15, 2004)
Tañenu mumoni kudihana kwaYesu chikwamukwashili iyala wumu kuhimpa chihandilu chindi.
“Nakeñeleña Hohu Kwila Yuma Yakuditiyisha Kuwaha” (Kaposhi Kakutalila, November 1, 2014)
Talenu yuma yamaneni yakoñeliyi Yesu mumudimu windi yinashiwu mundonda.
a Kudiza 31-33 kwakashimuna yuma yayivulu hadi Wanta waNzambi.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
