KUDIZA 17

Yesu Wekala Ñahi?

VUMISHENU

Yesu Wekala Ñahi?

Chitukudizaña hayuma yahosheliyi Yesu niyeliliyi hamaseki, tukwiluka yilwilu yikutuswija kwakwihi nayena nikudi Tata yindi, Yehova. Yilwilwinyi yeniyi yayiwahi? Nawa tunateli kumwimbujola ñahi Yesu muchihandilu chetu?

1. Yesu wekala ñahi neyi Tata yindi?

Mwiwulu, Yesu watalaña Tata yindi wukweti kukeña chelañayi yuma nawa nadizili kudi yena hadi yaaka yayivulu. Muloña wachumichi, watoñojokaña, watiyaña nikwila yuma neyi Tata yindi. (Tañenu Yowanu 5:19.) Kafwampi, Yesu wamwekeshaña yilwilu yaTata yindi chikupu, dichahosheleliyi nindi: “Muntu wejima wunamoni ami, namoni niTata.” (Yowanu 14:9) Chimukudizaña chekala yilwilu yaYesu, mukumwiluka chiwahi Yehova. Chakutalilahu, Yesu chatiyilañayi antu wushona chinakumwekesha Yehova chayakamenañayi enu.

2. Yesu wamwekeshaña ñahi nindi wamukeña Yehova?

Yesu wahosheli nindi: “Hakwila nawu kaayi keluki nawu namukeña Tata, inakwila neyi chanlejeliyi Tata kwila.” (Yowanu 14:31) Hampinji yadiñayi hamaseki, Yesu wamwekesheli chikupu nindi wamukeña Tata yindi kuhitila mukumwovwahila hela chakwila hichadiña chaswayiku. Yesu wakeñeli cheñi kuhosha nankashi hadi Tata yindi nikukwasha antu kwikala nawubwambu naNzambi.—Yowanu 14:23.

3. Yesu wamwekeshaña ñahi nindi wayikeña antu?

Bayibolu yahosha nawu Yesu ‘wayikeña nankashi antu.’ (Yishimu 8:31, tumazu twaheshina) Wamwekesheli nindi wayikeña antu kuhitila mukuyikolesha nikuyikwasha chakufuma hamuchima. Wakoñeli yihayamisha yamwekesheleña ñovu yindi niwushona. (Maku 1:40-42) Wayitiyilileña antu luwi nawa wadiña nachaambu wanyi. Mazu indi akundejeleña nikukwasha antu ejima adiña nanyichima yashinshika nawa amutiyilileña kwikala nakuchiñeja. Yesu wadihanini kukabakana nikufwa muloña wakeña antu ejima. Ilaña wakeña nankashi antu alondelaña ntañishilu yindi.—Tañenu Yowanu 15:13, 14.

SANDUJOLENU CHIKUPU

Dizilenuhu nsañu yayivulu hayilwilu yaYesu. Nawa talenu chimunateli kumwekesha kukeña nichisambu neyi chelileñayi.

4. Yesu wamukeña Tata yindi

Yuma yelileñayi Yesu yatudizishaña chitunateli kumwekesha netu twamukeña Nzambi. Tañenu Luka 6:12 niYowanu 15:10; 17:26. Chimwamanisha kutaña nsona-hinsona, muhanjeki hanilu lwihu:

Tunateli kumwekesha ñahi netu twamukeña Yehova neyi cheliliyi Yesu?

Yesu wamukeñeli Tata yindi wamwiwulu nawa wahosheleña nindi mukulomba mpinji yejima

5. Yesu wakamenaña antu anakaankili

Yesu wakameneneña nankashi antu kubadika yomweni. Hela chakwila nazeyi, wazatishileña mpinji yindi niñovu kukwasha antu. Tañenu Maku 6:30-44, kuhiñahu hanjekenu hanawa malwihu:

Muniyi nsañu, njilanyi mwamwekesheleliyi Yesu nindi wayakamenaña antu?—Talenu mavasi 31, 34, 41, ni 42.
Chumanyi chamuletesheleña Yesu kukwasha antu?—Talenu vasi 34.
Chineli Yesu wembujolaña yilwilu yaYehova, yuma yejimiyi yinakuyidizishadi hadi Yehova?
Njilanyi jikwawu mutwatela kumwimbujolela Yesu chakamenañayi antu?

6. Yesu wukweti chisambu

Yesu wadiña nachisambu hela chakwila wadiña nayuma yayivulu wanyi, nawa watukoleshaña ninetu kwikala nachisambu. Tañenu Yilwilu 20:35, kuhiñahu hanjekenu hanilu lwihu:

Kwesekeja nachahosheliyi Yesu, tunateli kwikala ñahi namuzañalu?

Vumishenu VIDIYO, kuhiñahu hanjekenu halwihu lunalondelihu.

VIDIYO: “Mukuhana Mwekala Muzañalu Chikupu”—Kachibalu (4:00)

Yumanyi yitunateli kuhana hela chakwila hitukweti yuma yayivuluku?

Komana mweluka?

Bayibolu yatulejaña nawu tulombeña kudi Yehova kuhitila mwijina daYesu. (Tañenu Yowanu 16:23, 24.) Neyi tukulombaña muniyi njila, tukumwekesha netu tunakulemesha chuma chatwilililiyi Yesu hakutukwasha kwikala amabwambu jaYehova.

AMAKWAWU AHOSHAÑA NAWU: “Nzambi washañaku muchima wanyi neyi tunakukabakana.”