KUDIZA 19
Komana aYinsahu jaYehova hiyakaKristu Alala?
Etu aYinsahu jaYehova, twakuhwelela netu tudi akaKristu alala. Muloñadi? Talenu hashindamena yuma yitwakuhwelela, ijina datuletesha twiikali ambukaku, nikukeña kutwadikeña wumu nawukwawu.
1. Yuma yakuhwelela aYinsahu jaYehova yashindamena hanka?
Yesu wahosheli nindi: “Izu [daNzambi] hichalala.” (Yowanu 17:17) Kufuma tuhu kunyima, yuma yakuhwelelawu aYinsahu jaYehova yashindamenaña Hezu daNzambi, neyi cheliliyi Yesu. Kufuma tuhu mu 1870, izanvu dawatudizi aBayibolu datachikili kudizila hamu Bayibolu kulonda ayitiyishishi. Yuma yakuhweleleliwu yashindamena hachahosha Bayibolu, hela chakwila yuma yakuhweleleliwu yaambukili nayakuhweleleliwu mumachechi. Kuhiñahu, atachikili kulejaku antu chalala chamuBayibolu chadiziliwu. a
2. Twaditenenañadi netu aYinsahu jaYehova?
Yehova wayitenaña akakudifukula indi nindi hiyayinsahu jindi muloña ashimunaña chalala hadi yena. (AHeberu 11:4–12:1) Chakutalilahu, kunyima Nzambi walejeli antu jindi nindi: “Enu yenu ayinsahu jami.” (Tañenu Isaya 43:10.) Yesu amutena nawu “Chinsahu Washinshika.” (Chimwekeshu 1:5) Dichi, mu 1931, twatachikili kuditena netu aYinsahu jaYehova. Twatiyaña kuwaha kwikala nanidi ijina.
3. AYinsahu jaYehova amwekeshaña ñahi kukeña neyi kwamwekesheliyi Yesu?
Yesu wakeñeli nankashi atumbanji twindi chakwila adiña neyi chisaka chindi. (Tañenu Maku 3:35.) AYinsahu jaYehova niwena hichisaka chanuñañana chamukaayi kejima. Dichaletesha tuditeneña netu amanakwetu niahela. (Fwilemoni 1, 2) Twovwahilaña cheñi lushimbi lwahosha nawu: “Keñenuña anakwenu ejima.” (1 Petulu 2:17) AYinsahu jaYehova amwekeshaña iku kukeña munjila yashiyashana chidi neyi kukwasha akwetu akakwitiya mukaayi kejima adi mukukankila.
SANDUJOLENU CHIKUPU
Ilukilenuhu nsañu yikwawu hachatachikili aYinsahu jaYehova, kulonda mwilukilihu wunsahu wukwawu wunakumwekesha nawu tudi akaKristu alala.
Yuma yakuhwelelawu akaKristu alala yashindamena haBayibolu nawa alejañaku antu iyi yuma
4. Yuma yitwakuhwelela yashindamena haBayibolu
Yehova washimwineñahu dehi nindi twakatiyishisha chalala chamuBayibolu. Tañenu Danyeli 12:4 nitumazu twaheshina, kuhiñahu hanjekenu hanilu lwihu:
-
Yumanyi ‘yakavula’ hadi antu jaNzambi chikutwalekañawu kusandujola nsañu yamuBayibolu?
Talenu izanvu dawatudizi aBayibolu kushilahu niCharles Russell, chadizileñawu Izu daNzambi. Vumishenu VIDIYO, kuhiñahu hanjekenu halwihu lunalondelihu.
-
Muniyi vidiyo, Charles Russell niakwawu Atudizi aBayibolu adizileña ñahi Bayibolu?
Komana mweluka?
Mpinji yikwawu, twahimpaña yuma yitwakuhwelela. Muloñadi? Neyi chaselaña itena nakumwekesha chovu-chovu yuma yidi hamaseki, Nzambi niyena watukwashaña kutiyishisha Izu dindi mukuhita kwampinji. (Tañenu Yishimu 4:18.) Bayibolu yahimpaña wanyi, ilaña neyi tutiyishisha nsañu yekalamu, twahimpaña yuma yitwatañishaña.
5. Twelaña kwesekeja namwatalisha ijina detu
Chumanyi chaletesheli tutachiki kuditena netu aYinsahu jaYehova? Vumishenu VIDIYO, kuhiñahu hanjekenu halwihu lunalondelihu.
-
Muloñadi ijina dakwila nawu aYinsahu jaYehova chidekala datelela?
Muloñadi Yehova chatondelayi antu kulonda ekali aYinsahu jindi? Muloña alejaña antu nawu diyi Nzambi walala, chineli amutwambilaña nankashi. Tuhanjekenu haniku kutwamba kuyedi.
Kudifukula kukwawu kwalejaña antu jawu nawu Nzambi wakeñaña nindi azatisheña yifwikija hakudifukula. Komana diimu? Tañenu ALevi 26:1, kuhiñahu hanjekenu hanilu lwihu:
-
Kwesekeja naniyi nsona, Yehova watiyaña ñahi neyi tuzatishaña ankishi?
Anlomboli amakwawu amukudifukula atañishaña nawu Yesu hiNzambi. Komana diimu? Tañenu Yowanu 20:17, kuhiñahu hanjekenu hanilu lwihu:
-
Kwesekeja naniyi Nsona, komana Nzambi naYesu himuntu yowumu?
-
Munatiyi ñahi chimuneluki nenu Yehova watemeshaña aYinsahu jindi kulonda ashimwini chalala hadi yena niMwanindi?
6. Twadikeña wumu namukwawu
Bayibolu yesekeja akaKristu nayiidi yamujimba wamuntu yashiyashana. Tañenu 1 AKorinda 12:25, 26, kuhiñahu hanjekenu hanawa malwihu:
-
Chumanyi chatela kwilawu akaKristu alala neyi akwawu akaKristu anakukabakana?
-
Yumanyi yimunamoni yelañawu aYinsahu jaYehova yamwekeshaña nawu adikeña?
Neyi aYinsahu jaYehova anamoni kukala kwiluña dimu, akwawu aYinsahu mwahita kaayi kejima anyakalaña kuyikwasha. Hakwila mumoni chadikwashañawu, vumishenu VIDIYO. Kuhiñahu hanjekenu halwihu lunalondelihu.
-
Mudimu wakukwasha antu adi muwubanji wadimwekenaña wazatañawu aYinsahu jaYehova wamwekeshaña ñahi nawu adikeña?
AkaKristu alala amwekeshaña kukeña kudi antu adi mukukaankila
AMAKWAWU AHOSHAÑA NAWU: “AYinsahu jaYehova hikudifukula kwakuha.”
-
Mpinjinyi yatachikiliyi Yehova kuyitena akakudifukula indi nindi ayinsahu?
YUMA YIMUNADIZI
AYinsahu jaYehova hiyakaKristu alala. Tudi chisaka chamukaayi kejima chawakakudifukula akuhwelela yuma yashindamena haBayibolu nawa ashimwinaña chalala chahosha hadi Yehova.
Kuhitulukamu
-
Chumanyi chaletesheli tutachiki kuditena netu aYinsahu jaYehova?
-
Twamwekeshaña ñahi netu twadikeña wumu namukwawu?
-
Munakutoñojoka nenu aYinsahu jaYehova hiyakaKristu alala?
ILUKILENUHU NSAÑU YIKWAWU
Ilukenu chitwatachikili etu aYinsahu jaYehova.
AYinsahu jaYehova—Kumwekesha Chikuhwelelu muNyidimu, Chibalu 1: Kufuma muMwidima (1:00:53)
Talenu aYinsahu jaYehova chinasololiwu hatooka ntañishilu yakutwamba.
Wanenu ñakwilu jamalwihu imukweti hadi aYinsahu jaYehova.
“Malwihu Avula Kwihulawu Hadi aYinsahu jaYehova” (Chibaaba chahaIntaneti)
Stephen waheleli antu akwacheñi nawa wayilukukileña. Talenu yuma yamweniyi mudi aYinsahu jaYehova yamuletesheli ahimpi.
“Chihandilu Chami Chataminineñaku Hohu” (Kaposhi Kakutalila, July 1, 2015)
a Magazini yetu yaKaposhi Kakutalila, yinatwalekihu kulumbulula chalala chamuBayibolu kufuma tuhu mu 1879.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
