KUDIZA 22

Munateli Kulejaku Ñahi Antu Nsañu Yayiwahi?

VUMISHENU

Chimukudizaña chalala chamu Bayibolu, hadaha mukutoñojoka nenu, ‘Muntu wejima watela kwiluka ichi chalala!’ Diimu, muntu wejima watela kwiluka ichi chalala. Hela chochu, munateli kutiya woma kulejaku antu nsañu yimunadizi. Tuhanjekenu chimunateli kumanisha woma nichimunateli kutachika kushimwina nsañu yayiwahi yamuBayibolu namuzañalu.

1. Munateli kulejaku ñahi antu imweluka nsañu yimunadizi?

Atumbanji twaYesu ahosheli nawu: “Hitukutwesha kuleka kuhosha yuma yitunamoni nikutiyaku.” (Yilwilu 4:20) Akeñeli chikupu chalala chadiziliwu chakwila akeñeleña nikulejaku antu amavulu. Komana dichimunakutiya ninenu? Neyi dichimunakutiya, wanenu njila yayiwahi yakulejelamu antaña jenu niamabwambu jenu yuma yimunadizi.—Tañenu AKolosi 4:6.

Chimunateli kutachika kushimwina

Neyi munakuhanjeka nantaña yenu, tachikenu kuhanjeka nindi nsañu yamuBayibolu nenu: “Nadiza nsañu yayiwahi nankashi wunu mulungu.”
Hanjekenu nebwambu denu wunakati hela wunakudakamena hansona yinateli kumukundeja.
Neyi mukwenu mumwazatilaña nayihuli chimunakuhanda, mulejenu yuma yimwadiza hakudiza Bayibolu hela hakupompa.
Lejenu amabwambu jenu jw.org webu sayiti.
Lejenu amabwambu jenu enzi amoni chimwadizaña Bayibolu, hela neyi anakukeña kudiza Bayibolu yilejenu chatela kulombawu ha jw.org/lun

2. Muloñadi kushimwina hamu nachipompelu chikunekalili chuma chalema chimwatela kwila?

Atumbanji twaYesu hiyashimwinineña hohu nsañu yayiwahi kudi antu elukiliwuku. Yesu “wayitemesheleñahu dehi ayedi-ayedi munyisumba yejima” nakushimwina. (Luka 10:1) Iyi njila yayiwahi yakushimwinamu, yakwashili antu amavulu kutiya nsañu yayiwahi. Nawa atumbanji azañaleli muloña wakushimwina hamu. (Luka 10:17) Kwila ninenu mufuukulahu kuzatila hamu nachipompelu nehi?

SANDUJOLENU CHIKUPU

Talenu chimunateli kumanisha woma nichimunateli kwikala namuzañalu muloña wakushimwina nsañu yayiwahi.

3. Yehova wukwikalaña nanenu

Antu amakwawu anakukeña kutachika kushimwina, anateli kutiya woma chikuyimonawu kudi antu hela chikutambwilawu nsañu yinakushimwinawu.

Komana munakutiya woma kulejaku antu nsañu yimunadizi? Muloñadi?

Vumishenu VIDIYO, kuhiñahu hanjekenu halwihu lunalondelihu.

VIDIYO: Namulombeli Yehova Nami Ankwashi Nihamuki (4:05)

Awa atwansi aYinsahu alekeli ñahi kutiya woma?

Tañenu Isaya 41:10, kuhiñahu hanjekenu hanilu lwihu:

Neyi munatiyi woma kushimwina, kulomba kunateli kuyikwasha ñahi?

Komana mweluka?

AYinsahu jaYehova amavulu hakusambila amweneña nawu hiyakutwesha kulejaku antu nsañu yayiwahiku. Chakutalilahu, Sergey wadimweneña nindi wamukunkulwayi nawa chamukalilileña kuhosha nawantu. Ilaña chimwahitili mpinji, wadizili Bayibolu. Wahosheli nindi: “Hela chakwila natiyileña woma, natachikili kulejaku antu yuma yinadizileña. Nahayamini, chinatachikili kulejaku antu nsañu yamuBayibolu, chankwashili kwikala wahamuka. Nawa kulejaku antu yuma yinakuhweleleli kwakolesheli chikuhwelelu chami.”

4. Ikalenu nakavumbi

Neyi munakushimwina nsañu yayiwahi, toñojokenuña hayuma yimwatela kuhosha ninjila yimwatela kuhoshelamu. Tañenu 2 Timotewu 2:24 ni 1 Petulu 3:15, kuhiñahu hanjekenu hanawa malwihu:

Munateli kuzatisha ñahi awa mavasi neyi munakuhanjeka nawantu nsañu yamuBayibolu?
Hadaha antaña jenu amakwawu niamabwambu jenu hiyakwiteja nsañu yimukuyilejaku. Mukwila ñahi? Chumanyi chimwatela kubula kwila?
Chawahiladi kwihula malwihu mukubabala chatela tuyilejeña antu yuma yatela kukuhwelelawu?

5. Kushimwina nsañu yayiwahi kwaletaña muzañalu

Yehova wamwinkeli Yesu mudimu wakushimwina nsañu yayiwahi. Yesu wamweneña ñahi iwu mudimu? Tañenu Yowanu 4:34, kuhiñahu hanjekenu hanawa malwihu:

Kuda yakuda yayiwahi kwatukwashaña kutwalekahu kuhanda nawa kwatuzañaleshaña. Muloñadi Yesu chesekejeleliyi kwila nkeñelu yaNzambi nikushimwina nsañu yayiwahi nakuda yakuda?
Muzañalu wamuchidinyi wumunakutoñojoka wunateli kufuma mukushimwina nsañu yayiwahi?

Yuma Yimwatela Kwila

Hakupompa kwamukachi kamulungu, mukadiziliku njila jimunateli kuzatisha hakutachika kuhanjeka nawantu.
Hanjikenu nantañishi yenu kulonda ayileji chimunateli kusonekesha mushikola hakupompa kwamukachi kamulungu. Mpanji yawatudizi yikuyikwasha kudiloñesha chakulejaku antu yuma yimunakudiza.
Zatishenu chibalu chidi muwunu mukanda chinakwila nawu “Amakwawu Ahoshaña Nawu” hela “Muntu Nateli Kwihula Nindi” kulonda mwilukili chadimu chimunateli kwakula malwihu avula kwihulawu antu hela neyi anakaani kuyishimwina.

MUNTU NATELI KWIHULA NINDI: “Nsañwinyi yiwukunlejahu lelu?”