KUDIZA 26
Muloñadi Yuma Yatama Chiyamwekenaña, Nawa Antu Akabakenañadi?
Neyi chuma chatama nankashi chinamwekani chidi hohu chiwahi kudihula netu: “Chumanyi chinaleteshi?” Tudi namuzañalu hakwiluka netu Bayibolu yaakula ilu lwihu.
1. Chumanyi cheliliyi Satana hakwila yuma yatama yitachiki kumwekana mukaayi?
Satana Diyabolu wadikañili naNzambi. Satana wakeñeleña ayuuleña akwawu, dichi waluwañesheli antu atachi, aAdama naEva kulonda adikañi hamu nindi. Satana welili mwenimu kuhitila mukumudimba Eva. (Kutachika 3:1-5) Wamuletesheli Eva atachiki kutoñojoka nindi Yehova hakeñeleña nindi ekali nachuma chachiwahiku. Watalishili mukwila nindi antu anateli kwikala namuzañalu neyi abula kumwovwahila Nzambi. Satana watwambili katachi hamulejeliyi Eva nindi wakafwa wanyi. Dihafuma Bayibolu yimuteneña Satana nawu “hisakutwamba nawa diyi tata yakutwamba.”—Yowanu 8:44.
2. Chumanyi chatondelihu aAdama naEva kwila?
Yehova wayinkeli aAdama naEva yuma yejima yakeñekeleña. Wayilejeli nindi atela kuda kunyitondu yejima yadiña mwitempa daEdeni kufumishaku hohu wumu. (Kutachika 2:15-17) Ilaña afuukwilihu kuda mukaabu wakunowu mutondu wayikaanishiliwu. Eva “wakumwiniku mukaabu nakuda.” Kuhiñahu, Adama “niyena wadiili.” (Kutachika 3:6) Wejima wawu adikañili naNzambi. Chineli aAdama naEva adiña awanina, ateleleli kwila chuma chaloña. Ilaña chadikañiliwu naNzambi mumushikila, avulumwini nawa akaanini chiyuulu chindi. Chuma chafuukwiliwu chayiletesheli kukabakana chikupu.—Kutachika 3:16-19.
3. Chuma chafuukwiliwu aAdama naEva chatuletela ñahi etu kukala?
Chavulumwiniwu aAdama naEva ekalili abula kuwanina, dichi asambwishili anyanawu ejima iku kubula kuwanina. Bayibolu yahosha hadi Adama nawu: “Nshidi [yeñilili] mukaayi kuhitila mudi muntu wumu nikufwa kuhitila munshidi, dichi kufwa nikwena kwataandili kudi antu ejima.”—ARoma 5:12.
Kudi yuma yayivulu yaleteshaña tukabakaneña. Mpinji yikwawu twakabakanaña muloña wakufuukula etu aweni chatama. Mpinji yikwawu twakabakanaña muloña wakufuukula kwatama kwawantu amakwawu. Mpinji yikwawu twakabakanaña muloña wakwikala heluña datama hampinji yatama.—Tañenu Mukwakutañisha 9:11.
SANDUJOLENU CHIKUPU
Talenu nsañu yinakumwekesha nawu Nzambi hidiyi wakojejaña yuma yatama nimakabi anakumwekana mukaayi makonuku, nawa talenu chatiyañayi neyi tunakukabakana.
4. Waleteshaña tukabakaneña
Antu amavulu akuhwelela nawu Nzambi diyi wayuulaña kaayi kejima. Komana diimu? Vumishenu VIDIYO.
Tañenu Yakoba 1:13 ni 1 Yowanu 5:19, kuhiñahu hanjekenu hanilu lwihu:
-
Komana Nzambi diyi wakojejaña makabi niyuma yatama kumwekana?
5. Talenu yuma yinafumi muchiyuulu chaSatana
Tañenu Kutachika 3:1-6, kuhiñahu hanjekenu hanawa malwihu:
-
Satana watwambili nindidi?—Talenu vasi 4 ni 5.
-
Yumanyi yahosheliyi Satana yamwekesheleña neyi Yehova hakeñeleña kuyinka antu chuma chachiwahiku?
-
Komana Satana wamonaña nindi antu anateli kwikala namuzañalu neyi Yehova ekala Nyuuli yawu?
Tañenu Mukwakutañisha 8:9, kuhiñahu hanjekenu hanilu lwihu:
-
Chineli Yehova hidiyi Nyuuli wakanu kaayiku, yumanyi yinakumwekana?
-
Adama naEva adiña awaninanawa ashakamineña muParadisa. Ilaña amutiyilili Satana nawa adikañili naYehova
-
Chelili anadikañi dehi, kaayi kenzeli nanshidi, makabi nikufwa
-
Yehova wakafumishahu nshidi, makabi nikufwa. Antu akekala cheñi awanina nawa akashakamaña muParadisa
6. Yehova waneñaña neyi tunakukabakana
Komana Nzambi watwakamenaña neyi tunakukabakana? Talenu chasonekeliyi Mwanta Davidi nikapostolu Petulu. Tañenu Isamu 31:7 ni 1 Petulu 5:7, kuhiñahu hanjekenu hanilu lwihu:
-
Munatiyi ñahi chimuneluki nenu Yehova wamonaña nawa watwakamenaña neyi tunakukabakana?
7. Nzambi wakamanisha makabi ejima anakumonawu antu
Tañenu Isaya 65:17 niChimwekeshu 21:3, 4, kuhiñahu hanjekenu hanilu lwihu:
-
Muloñadi awa mazu chinekaliliwu akukundeja akwiluka netu Yehova wakafumishahu yuma yatama yejima yinakumonawu antu?
Komana mweluka?
Satana hatwambiliyi katachi, wamutwambilili Yehova. Dikwila nawu, watamishili ijina daYehova dakwikala Nyuuli wamuwahi nawa wukweti kukeña. Katatakichi neyi Yehova nafumishihu dehi makabi anakumonawu antu, wakadijilika yomweni. Munjila yikwawu, wakamwekesha nindi chiyuulu chindi hohu dichachiwahi. Kujilika ijina daYehova dichuma chalema nankashi mwiwulu nihanu hamaseki.—Matewu 6:9, 10.
AMAKWAWU AHOSHAÑA NAWU: “Nzambi diyi wakeñaña nindi tukabakaneña.”
-
Indi enu mukuhoshahu nenudi?
YUMA YIMUNADIZI
Satana Diyabolu niantu ayedi atachi diwu aletesha yuma yatama yidi mukaayi. Yehova watiyaña kutama chikupu hamakabi itwamonaña nawa katataka ayifumishihu.
Kuhitulukamu
-
Satana Diyabolu wamudimbili Eva nindidi?
-
Kudikaña kwaAdama naEva kunatuleteli kukalanyi wejima wetu?
-
Tuneluki ñahi netu Yehova watiyaña kutama namakabi itwamonaña?
ILUKILENUHU NSAÑU YIKWAWU
Talenu chalumbulula Bayibolu mwatalisha nshidi.
Tañenu kulonda mwilukilihu nsañu yikwawu hakukala kwaleteliyi Satana Diyabolu mwitempa daEdeni.
“Muloñadi Nzambi Chetejelayi Makabi?” (Kaposhi Kakutalila, March 1, 2014)
Talenu ñakwilu jikuyikundeja jinakwakula lwihu lwakala.
Talenu yuma yadizili iyala wumu hamakabi amweneñawu.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
