Mwafwishahu dehi muntu imwakeña? Haniyi mpinji yakala, munateli kudihula nenu: ‘Chumanyi chatumwekenaña neyi tunafwi? Komana twakadimonahu cheñi nawantaña jetu afwa dehi?’ Mukunu kudiza nikudiza kunalondelihu, tukumona ñakwilu yamuBayibolu yatukundejaña.

1. Chumanyi chatumwekenaña neyi tunafwi?

Yesu wesekejeli kufwa nakukaama tulu twatweni. Muntu wudi mutulu twatweni, welukaña wanyi yuma yinakumwekana. Kufwa kunesekani ñahi nakukaama tulu? Neyi muntu nafwi, watiyaña kukata wanyi. Haneñañaku, hela chakwila wayikeñeli amabwambu jindi niantaña jindi. Bayibolu yahosha nawu “afu hiyeluka chuma hela chimuku.”—Tañenu Mukwakutañisha 9:5.

2. Kwiluka chalala chahosha hadi afu kwatukwashaña ñahi?

Antu amavulu achiinaña kufwa nawa achiinaña niantu afwa dehi. Ilaña yuma yahosha Bayibolu kutalisha hakufwa yinateli kuyikundeja. Yesu wahosheli nindi: “Chalala nichena chikuyifumisha muwuduñu.” (Yowanu 8:32) Kudifukula kukwawu kwatañishaña nawu kudi chuma chatwalekañahu kuhanda neyi muntu nafwi, ilaña ichi dichatañishaña Bayibolu wanyi. Dichi, kwosi muntu wakabakanaña neyi nafwi. Cheñi, chineli kwosi chuma chelukawu afu, hiyanateli kutukatishaku. Dichi, hitwatela kudifukula kudi antu afwa dehi hela kuyilila yuma kulonda abulu kutuhililaku nawa hitwatela kuyilombelakuku.

Antu amakwawu ahoshaña nawu anateli kuhanjeka nawafu. Ilaña ichi chuma chikutwesheka wanyi. Neyi chitunadizi, afu “hiyeluka chuma hela chimuku.” Antu atoñojokaña nawu ahanjekaña nawantaña jawu afwa dehi, ahanjekaña nawandemoni adifwikijaña neyi antu afwa dehi. Dichi kwiluka chalala chahosha hadi afu kwatukiñaña kudi andemoni. Yehova watusoñamishaña nindi tubuleña kuhanjeka nawantu afwa dehi muloña weluka nindi kuhanjeka nawandemoni munateli kufuma yuma yatama.—Tañenu Kuhituluka 18:10-12.

3. Ilukenu chekalawu afu

Mukaayi kejima antu akuhwelela yuma yashiyashana hayuma yatumwekenaña neyi tunafwi. Hela chochu, bayi neyi yuma yejima yakuhwelelawu yalalaku.

• Yumanyi yakuhwelelawu antu amwiluña denu hadi antu afwa?

 4. Kwiluka chalala chahosha hadi afu kwatukwashaña

Kwiluka chalala chahosha hadi afu kwatukwasha kubula kutiya woma afu. Tañenu Mukwakutañisha 9:10, kuhiñahu hanjekenu hanilu lwihu:

• Komana afu anateli kutwila chatama?

Chalala chamuBayibolu chatukwashaña cheñi kubula kukuhwelela yuma yakuhwelelawu antu, yakwila nawu twatela kudifukula kudi afu hela kuyilila yuma kulonda abuli kutuhilila. Tañenu Isaya 8:19 niChimwekeshu 4:11, kuhiñahu hanjekenu hanilu lwihu:

• Munakutoñojoka nenu Yehova watiyaña ñahi namuntu wadifukulaña hela walombaña wukwashu kudi muntu wafwa dehi?

5. Kwiluka chalala chahosha hadi afu kwatukundejaña

Antu amavulu ayidizishaña nawu neyi anafwi akayikabisha muloña wayuma yatama yakoñeleñawu. Ilaña Bayibolu yatukundejaña nawu kwosi muntu wakabakanaña neyi nafwi, kushilahu nimuntu wakoñeleña yuma yatama chikupu. Tañenu ARoma 6:7, kuhiñahu hanjekenu hanilu lwihu:

• Neyi muntu nafwi Nzambi hamumonaña cheñi nindi wudi namuloña hanshidi yakoñeliyiku. Munakutoñojoka nenu muntu wudi wejima wunafwi nakukabakana muloña wayiluwa yakoñeliyi?

Neyi tumwiluka Yehova chikupu tukwiluka netu hetejaña antu afwa dehi kukabakanaku. Tañenu Kuhituluka 32:4 ni 1 Yowanu 4:8, kuhiñahu hanjekenu hanawa malwihu:

• Komana Nzambi wudi nayilwilu yinashimuniwu munawa mavasi, nateli kwiteja kukabisha antu afwa dehi?

• Kwiluka chalala chahosha hadi afu kunayikundeji? Muloñadi?

 YUMA YIMUNADIZI

Neyi muntu nafwi, wumi windi wunakumi. Afu hiyakabakanaña hela kukatisha amomiku.

Kuhitulukamu

• Chumanyi chatumwekenaña neyi tunafwi?

• Kwiluka chalala chahosha hakufwa kwatukwashaña ñahi?

• Kwiluka chalala chahosha hakufwa kwatukundejaña ñahi?