KUDIZA 42
Bayibolu Yahosha Nawudi haWujiki nihaWulu?
Muyisemwa yikwawu, antu akuhwelela nawu muntu nateli hohu kwikala namuzañalu neyi asumbula hela asumbuka. Hela chochu, bayi neyi ejima ekala muwulu ekala namuzañaluku, nawa bayi neyi ajiki ejima akweti muzañaluku. Ilaña Bayibolu yahoshaña nawu wujiki niwulu hiyawaana.
1. Yumanyi yayiwahi yekala muwujiki?
Bayibolu yahoshaña nawu: “Muntu wejima wukusumbula hela wukusumbuka neli chiwahi, ilaña muntu wukubula kusumbula hela kusumbuka, diwuneli chachiwahi nankashi.” (Tañenu 1 AKorinda 7:32, 33, 38.) Munjilanyi mujiki mukwililayi “chachiwahi nankashi”? AkaKristu ajiki hiyakweti enikwawu atela kwakamenawuku. Dichi ekala akasunuka chikupu. Chakutalilahu, amakwawu atwalaña mudimu wakushimwina hambidi munjila jashiyashana, chidi neyi kuya nakushimwina nsañu yayiwahi mwituña dacheñi. Sweje-e, ekalaña nampinji yeneni yakuswina kwakwihi naYehova.
2. Yumanyi yayiwahi yafumañamu neyi antu adisumbula kwesekeja nanshimbi?
Neyi chekala wujiki, muwulu nimwena mwekala yuma yayiwahi. Bayibolu yahoshaña nawu: “Ayedi anabadiki wumu.” (Mukwakutañisha 4:9) Sweje-e dinu, akaKristu adisumbula alondelaña yishina yamuBayibolu ekalaña namuzañalu chikupu. Antu adisumbula kwesekeja nanshimbi, adikana kudilemesha nikudikeña wumu namukwawu. Chafumañamu, ekalaña akiñewa kubadika eyala namumbanda ashakamaña hohu hamu. Wulu wamuchidiwu wakwashaña anyana kwiluka nawu akiñewa.
3. Yehova wamonaña ñahi wulu?
Yehova chasumbwishiliyi antu atachi, wahosheli nindi: “Iyala [wakashiya] tata yindi nimama yindi nakukakela kudi ñodindi.” (Kutachika 2:24) Yehova wakeña eyala namumbanda kudikeña nankashi nikukakela kudi wumu namukwawu chakala hohu achidi kuhanda. Weteja hohu kudiseña neyi wumu neli wujila. Neyi wumu ela wujila, Yehova wamwinka muntu wunabuli muloña wuswa wakufuukulahu kuseña mukwawu hela nehi. a (Matewu 19:9) Yehova heteja akaKristu kwikala muwulu wawuhadiku.—1 Timotewu 3:2.
SANDUJOLENU CHIKUPU
Talenu chimunateli kwikala namuzañalu, kulonda mumutiyisheña Yehova kuwaha, hela mudi ajiki hela mudi muwulu.
4. Zatishenuña chiwahi chawaana chawujiki
Yesu wamweneña wujiki nindi hichawaana. (Matewu 19:11, 12) Tañenu Matewu 4:23, kuhiñahu hanjekenu hanilu lwihu:
-
Yesu wazatishili ñahi chawaana chawujiki kulonda amukalakeli Tata yindi niantu?
AkaKristu anateli kuzatisha wujiki wawu neyi cheliliyi Yesu. Vumishenu VIDIYO, kuhiñahu hanjekenu halwihu lunalondelihu.
-
Njilanyi yayiwahi munateli kuzatishilawu akaKristu wujiki wawu chiwahi?
Komana mweluka?
Bayibolu hiyashimuna yaaka yatela kushikijayi muntu hakwila eñili muwuluku. Ilaña yakolesha muntu kuhembelela sampu “nahiti dehi muyaaka yawansi,” mpinji yaluwankanaña yitoñojoka yawatwansi neyi anasweji kutiya wuvumbi.—1 AKorinda 7:36.
5. Tondenu chiwahi muntu wakwiñila nindi muwulu
Kutonda muntu wakwiñila nindi muwulu hichuma chalema chatela kufuukulayi muntu. Tañenu Matewu 19:4-6, 9, kuhiñahu hanjekenu hanilu lwihu:
-
Muloñadi mukaKristu chikubulilayi kulusukila kwiñila muwulu?
Bayibolu yikuyikwasha kwiluka yilwilu yatela kwikala namuntu imunakukeña kudisumbula nindi. Chuma chasweja kulema, tondenu muntu wamukeña Yehova. b Tañenu 1 AKorinda 7:39 ni 2 Akorinda 6:14. Kuhiñahu hanjekenu hanawa malwihu:
-
Muloñadi chitwatela kudisumbwila namukwetu mukaKristu hohu?
-
Munakutoñojoka nenu Yehova watiyaña ñahi neyi twiñila muwulu namuntu wabulaña kudifukula kudi Yena?
Neyi anyama ayedi ashiyashana ayisha mumpaanda yimu akukabakana. Munjila yoyimu, neyi mukaKristu eñila muwulu namuntu wabula kwitiya, akumonaña kukala kwakuvulu
6. Monenuña wulu neyi chawumonañayi Yehova
Mumpinji yawaIsarela, amayala aseñeleña añodi jawu hatuyuma twabula kushikilamu. Tañenu Malaki 2:13, 14, 16, kuhiñahu hanjekenu hanilu lwihu:
-
Muloñadi Yehova chahelelayi kudiseñela hatuyuma twabula kushikilamu?
Wujila nikudiseña janeñeshaña muntu wunabuli muloña nianyana
Vumishenu VIDIYO, kuhiñahu hanjekenu halwihu lunalondelihu.
-
Neyi mudi muwulu namuntu wabula kwitiya, yumanyi yimwatela kwila kulonda mwikaleña namuzañalu muwulu wenu?
7. Londelenuña nshimbi jaYehova jahosha hawulu
Muntu watela kuzata nañovu hakwila alondeleña nshimbi jaYehova jahosha hawulu. c Ilaña Yehova wakiswilaña antu alondelaña nshimbi jindi. Vumishenu VIDIYO.
Tañenu AHeberu 13:4, kuhiñahu hanjekenu hanawa malwihu:
-
Munakutoñojoka nenu nshimbi jahosha hawulu jajiwahi? Muloñadi?
Yehova wakeñaña akaKristu kusonekesha wulu wawu neyi hiyakudisumbula hela kudiseña, chineli dichakeñaña nfulumendi mumatuña amavulu. Tañenu Titusa 3:1, kuhiñahu hanjekenu hanilu lwihu:
-
Neyi mwasumbula hela mwasumbuka, komana wulu wenu awiluki kunfulumendi?
MUNTU NATELI KWIHULA NINDI: “Muloñadi chitwatela kudisumbwila? Komana eyala namumbanda kwila ashakama hohu hamu nehi?”
-
Mukumuleja nenudi muntu wunakuhosha muniyi njila?
YUMA YIMUNADIZI
Wujiki niwulu hiyawaana yahanayi Yehova. Ajiki hela adi muwulu ekalaña namuzañalu chakala hohu anakulondela nshimbi jaYehova.
Kuhitulukamu
-
Muntu nateli kuzatisha ñahi chiwahi wujiki windi?
-
Muloñadi Bayibolu chiyahoshela nawu twatela kudisumbula hohu namukwetu mukaKristu?
-
Antu atela hohu kudiseñela hachumanyi?
ILUKILENUHU NSAÑU YIKWAWU
Kusumbula hela kusumbukila “hohu mudi mwanta” kwatalisha mudihi?
“Malwihu Kufuma Kudi Antañi” (Kaposhi Kakutalila, July 1, 2004)
Talenu mavidiyo ayedi akuyikwasha kufuukula chiwahi neyi munakudiluka kulonda mwiñili muwulu.
Talenu chaleteshaña manakwetu wumu atoñojokeña nindi chuma chamwinkawu kudi Yehova chabadika yuma yalekeliyi.
Yumanyi yatela kutoñojokahu muntu henohu kanda afuukulihu kudiseña hela kwaambuka?
“Lemeshenu ‘Chuma Chinabombiyi Nzambi Hamu’” (Kaposhi Kakutalila, December 2018)
a Talenu Mazu Adi Kunsa 4 anakuhosha hakwaambuka hanabuli muloña wawujila.
b Muyisemwa yikwawu, anvwali atondelaña mwanawu muntu wakwiñila nindi muwulu. Neyi dichekala chisemwa chenu, anvwali akweti kukeña atela kumona neyi owu muntu wamukeña Yehova, bayi kutala hamali akwetiyi hela mudimu wazatañayiku.
c Neyi owu muntu imunakushakama nindi himwadisumbula nindiku, chidi kudi enu aweni kumushiya hela kudisumbula nindi.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
