KUDIZA 44

Komana Yidika Yejima Yamuzañaleshaña Nzambi?

VUMISHENU

Yehova wakeñaña nindi twikaleña namuzañalu muchihandilu nikudiluñisha mpinji yikwawu. Komana chinayi mukwila nawu yidika yejima nimafuku akunooka amuzañaleshaña? Tunateli kumwekesha ñahi netu twamukeña Yehova muyuma yamuchidiwu?

1. Muloñadi yidika yayivulu chiyamuneñeshelaña Yehova?

Chawushona, yidika yayivulu yashindamena hantañishilu yabula munsona hela ntañishilu yakutwamba. Muyidika yamuchidiwu munateli kwikala nsañu yakundama kukudifukula kwakutwamba. Yinateli kushindamena hakupesha hela hayitoñojoka yakwila nawu wumi hiwafwañaku. Muyidika yikwawu antu akuhwelela mukupanda hela mudi nzambi wakukooleka. (Isaya 65:11) Yehova wayisoñamishaña akakudifukula indi nindi: “Daambulenu . . . nawa lekenu kukwata chuma chamajilu.”—2 AKorinda 6:17. a

2. Yehova watiyaña ñahi nayidika yakusweja kulemesha antu?

Yehova watusoñamishaña nindi bayi tuholokela mumuhetu ‘wakukuhwelela mudi antu hohuku.’ (Tañenu Yeremiya 17:5.) Mafuku akunooka amakwawu alemeshaña anyuuli hela amashidika. Amakwawu akwanuka yifwikija yetuña hela ifuku dakukuulika. (1 Yowanu 5:21) Mafuku akunooka amakwawu akundama kunsañu jamapolitiki. Yehova nateli kutiya ñahi neyi tusweja kulemesha muntu hela izanvu dawantu anakwila yuma yaambukaku nankeñelu yindi?

3. Yilwilwinyi yatamishaña yidika?

Bayibolu yatukaanisha ‘kusweja kunwa walwa, kudiñija muyidika yatama, nikusheta.’ (1 Petulu 4:3) Hayidika yikwawu, antu adiyuulaña wanyi nawa amwekeshaña yilwilu yatama. Hakwila tutwalekihu kwikala amabwambu jaYehova, twatela kutondolwela iyi yilwilu yamajilu.

SANDUJOLENU CHIKUPU

Talenu chimunateli kumuzañalesha Yehova neyi mukufuukula chiwahi hansañu yamafuku akunooka niyidika.

4. Tondolwelenu yidika yamuneñeshaña Yehova

Tañenu AEfwesesa 5:10, nawa hanjekenu hanawa malwihu:

Yumanyi yitwatela kutoñojokahu kulonda twiluki neyi chakwila twatela kwanuka odu ifuku dakunooka hela nehi?
Mafukwinyi akunooka elukawu nankashi kumwashakamaña?
Munakutoñojoka nenu owu mafuku akunooka amutiyishaña Yehova kuwaha?

Chakutalilahu, mwatoñojokahu dehi chatiyañayi Nzambi hansañu yakudiñija muyidika yakwanuka mafuku akuvwalika? Bayibolu hiyashimunahu mukakudifukula waYehova wanukileña mafuku akuvwalikaku, ilaña yashimuna mafuku ayedi akuvwalika anukiliwu antu abulileña kumukalakela. Tañenu Kutachika 40:20-22 niMatewu 14:6-10. Kuhiñahu hanjekenu hanawa malwihu:

Yumanyi yadifwana yamwekeni hanukileñawu awa mafuku akuvwalika ayedi?
Kwesekeja naniyi nsañu yamuBayibolu, munakutoñojoka nenu Yehova watiyaña ñahi nansañu yakwanuka mafuku akuvwalika?

Hela chochu, munateli kudihula nenu, ‘Indi Yehova wukutiya ñahi neyi nanuka ifuku dakuvwalika hela nidiñija muyidika yabula kwitejawu munsona?’ Tañenu Kwidika 32:1-8. Nawa vumishenu VIDIYO, kuhiñahu hanjekenu hamalwihu analondelihu.

VIDIYO: Mafuku aKunooka niYidika Yamuneñeshaña Nzambi (5:07)

Muloñadi chitwatela kushilaku muchima kulonda twiluki yuma yamutiyishaña Yehova kuwaha?
Tunateli kuyiluka ñahi?

Chitunateli kwiluka neyi ochu chidika chamuneñeshaña Nzambi

Komana chashindamena hachahosha nsona? Hakwila mwiluki, sandujolenu kulonda mwiluki chichatachikili.
Komana chalemeshaña antu, mazanvu awantu hela yifwikija yetuña? Twalemesha Yehova kubadika yuma yejima nawa twakuhwelela netu diyi wakamanisha kukala kunakumonawu antu mukaayi.
Komana tushidikili niyilwilu yanochu chidika yaambuka nanshimbi jamuBayibolu? Twatela kwikala nayilwilu yayiwahi.

5. Kwashenu antu alemesheña yuma yimwakuhwelela

Chinateli kuyikalila neyi akwenu atachika kuyikanjikija nawu mudiñiji muyidika yamuneñeshaña Yehova. Yilumbulwilenu yuma yimunafuukuli mumesu awunda nawa mukubabala. Hakwila mwiluki chimwatela kwila, vumishenu VIDIYO.

VIDIYO: Yilumbulwilenu Yuma Yimwakuhwelela Mukubabala (2:01)

Tañenu Matewu 7:12, kuhiñahu hanjekenu hanawa malwihu:

Kwesekeja naniyi vasi, komana munateli kulumbulwila antaña jenu abula kwikala aYinsahu nenu hiyatela kwanuka mafuku akunookaku?
Munateli kwila ñahi hakwila mumwekeshi nenu mwakeña chisaka chenu nawa mwachilemesha hela chakwila munadibombi nawu wanyi hakwanuka mafuku akunooka?

6. Yehova wakeñaña nindi twiikali namuzañalu

Yehova wakeñaña nindi tuzañaleleña hamu nawantaña jetu niamabwambu. Tañenu Mukwakutañisha 8:15, kuhiñahu hanjekenu hanilu lwihu:

Iyi vasi yinamwekeshi ñahi nawu Yehova wakeñaña nindi twiikali namuzañalu?

Yehova wakeñaña nindi antu jindi ekaleña nampinji yakuzañalela hamu. Vumishenu VIDIYO kulonda mumoni yuma yamwekanaña hakupompa kwetu kwamatuña.

VIDIYO: Kumwekesha Chisambu haKupompa Kwamatuña (5:40)

Tañenu AÑalija 6:10, kuhiñahu hanjekenu hanawa malwihu:

Komana twatela kwanuka mafuku akunooka aya mpuhu kulonda twilileña akwetu “yuma yayiwahi?”
Kuhana kwamuchidinyi kunateli kuyizañalesha, kuhana chawaana muloña wakwila antu atela kuhana hefuku dakunooka tahindi kuhana chakufuma hamuchima?
AYinsahu amavulu mpinji yikwawu ayiloñeshelaña anyanawu yuma yayiwahi nikuyinka yawaana. Neyi mukweti anyana, yumanyi yayiwahi yimwatela kuyilila?

AMAKWAWU AHOSHAÑA NAWU: “Ntachikilu yefuku dakunooka yalema wanyi. Chuma chalema hikudiluñisha nawamabwambu niantaña.”

Mukuhoshahu nenudi?

YUMA YIMUNADIZI

Yehova wakeñaña nindi twikaleña nampinji yakuzañalala nawantaña niamabwambu. Ilaña wakeñaña cheñi nindi tubuleña kudiñija muyidika yamuneñeshaña.

Kuhitulukamu

Malwihwinyi itwatela kudihula kulonda twiluki neyi oyu yidika yikumuneñesha Yehova hela nehi?
Tunateli kukwasha ñahi chisaka chetu niamabwambu kulonda eluki chinaleteshi tubuli kudiñija mumafuku akunooka?
Muneluki ñahi nenu Yehova wakeñaña nindi twiikali namuzañalu nawa tudiluñisheña?

Namanishi iku kudiza dalelu ha:

Yuma Yimukwila

Zatishenu yuma yimunadizi mukunu kudiza kulonda mumoni neyi mafuku akunooka adiluñishañawu mwiluña denu amuzañaleshaña Yehova hela nehi.

Yikwawu:

Your other goal