KUDIZA 46
Muloñadi Chitwatela Kudihanina niKupapatishewa?
Twadihanaña kudi Yehova kuhitila mukumukana mukulomba netu tukudifukulaña hohu kudi yena nikutwamijaku nkeñelu yindi muchihandilu chetu. (Isamu 40:8) Kuhiñahu, twapapatishewaña. Neyi mupapatishewa, mukumwekesha kudi antu nenu munadihani. Kudihana etu aweni kudi Yehova dichuma chalema chitwatela kufuukula muchihandilu chetu. Chumanyi chikuyisañumuna mufuukulihu kwila ichi chuma chalema chikuhimpa chihandilu chenu?
1. Chumanyi chamusañumunaña muntu kudihana?
Kukeña dikwatusañumunaña kudihana kudi Yehova. (1 Yowanu 4:10, 19) Bayibolu yatulejaña nawu: “Watela kukeña Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima ninañovu jeyi jejima.” (Maku 12:30) Twamwekeshaña netu twamukeña Nzambi muyuma yitwahoshaña niyitwelaña. Eyala namumbanda adikeña adisumbulaña, munjila yoyimu, kukeña kutwamukeña Yehova dikwatusañumunaña kudihana kudi yena nikupapatishewa.
2. Yumanyi yayiwahi yayililañayi Yehova aYinsahu jindi apapatishewa?
Neyi mupapatishewa, mukwikala muchisaka chaYehova chamuzañalu. Mukumona chikuyimwekeshelañayi kukeña munjila yamboka-mboka nawa mukuswina kwakwihi nayena kubadika chimudi chayinu mpinji. (Tañenu Malaki 3:16-18.) Yehova wukwikala Tata yenu nawa mukwikala nachisaka chakuspiritu chawamanakwetu niahela mwahita kaayi kejima amukeña nawa ayikeña ninenu. (Tañenu Maku 10:29, 30.) Hela chochu, kudi yuma yimwatela kwila henohu kanda mupapatishewi. Mwatela kumwiluka Yehova, kumukeña nikumukuhwelela Mwanindi. Kuhiñahu dinu, himukuhana wumi wenu kudi Yehova. Neyi mwila yuma yejimiyi nawa mupapatishewa, mukwikala namuzañalu haya nyaaka. Izu daNzambi dahoshaña nawu: “Chipapatishu . . . nichena chinakuyamwina enu.”—1 Petulu 3:21.
SANDUJOLENU CHIKUPU
Ilukenu chichalemena enu kudihana kudi Yehova nikupapatishewa.
3. Wejima wetu twatela kutonda wutwatela kukalakela
Kunyima, aIsarela amakwawu atoñojokeleña nawu akudifukulaña kudi Yehova nikudi nzambi wakutwamba Bayali. Yehova watemesheli kaprofwetu kindi Elija kuya nakwolola iyi yitoñojoka. Tañenu 1 Anyanta 18:21, kuhiñahu hanjekenu hanilu lwihu:
-
Chumanyi chateleleli kutondahu aIsarela?
Ninetu twatela kutonda wutwatela kukalakela neyi cheliliwu aIsarela. Tañenu Luka 16:13, kuhiñahu hanjekenu hanawa malwihu:
-
Muloñadi chitukubulila kudifukula kudi Yehova nikudi muntu hela chuma chacheñi?
-
Tukumwekesha ñahi kudi Yehova netu tunatondihu kudifukula kudi yena?
4. Toñojokenuña chikupu hakukeña kwayimwekeshelañayi Yehova
Yehova watwinka yawaana yayiwahi yayivulu. Yumanyi yitwatela kumwinka? Vumishenu VIDIYO.
Munjilanyi munamwekesheliyi Yehova nindi wayikeña? Tañenu Isamu 104:14, 15 ni 1 Yowanu 4:9, 10, kuhiñahu hanjekenu hanawa malwihu:
-
Yawaananyi yayinkayi Yehova yimwamusakililaña nankashi?
-
Nawa iyi yawaana yayileteshaña mumumoneña ñahi?
Neyi tunatambwili chuma chinatutiyishi kuwaha, twatela kumwekesha kusakilila kudi muntu wunatwinkichu. Tañenu Kuhituluka 16:17, kuhiñahu hanjekenu hanilu lwihu:
-
Neyi mutoñojoka hayuma yejima yayililayi Yehova, yumanyi yimukumwinka?
5. Mukudihana mwafumaña yuma yayiwahi
Antu amavulu akuhwelela nawu kuya mpuhu, mudimu wawuwahi hela kwikala namali diyuma yikuyiletela muzañalu. Komana diimu? Vumishenu VIDIYO, kuhiñahu hanjekenu hanawa malwihu.
-
Hela chakwila muntu wudi muvidiyo wakeñesheli kuhema ngunja, chumanyi chaletesheli aleki?
-
Wafuukwilihu kudihana kudi Yehova, bayi kungunjaku. Munakutoñojoka nenu wafuukwili chiwahi? Muloñadi?
Henohu kapostolu Pawulu kanda ekali mukaKristu, wafwilileña kwiñila mudimu wawuwahi. Amudizishili nshimbi jawaYudeya kudi ntañishi waya mpuhu. Ilaña washili yuma yejimiyi nakwikala mukaKristu. Komana Pawulu waditoñesheli hakushiya yumiyi? Tañenu AFwilipi 3:8, kuhiñahu hanjekenu hanawa malwihu:
-
Muloñadi Pawulu chahosheleliyi nindi yuma yeliliyi henohu kanda ekali mukaKristu “hinswadi hohu,” hela majilu?
-
Yumanyi yayiwahi yafuminimu?
-
Mukwesekeja ñahi kumukalakela Yehova nayuma yikwawu yimwafwilaña kwila muchihandilu chenu?
Pawulu chekaliliyi mukaKristu, watambwilili yuma yayivulu kubadika yashiyiliyi
AMAKWAWU AHOSHAÑA NAWU: “Kumukalakela Nzambi muchihandilu cheyi chejima hikumanisha hohu mpinji.”
-
Munakutoñojoka nenu kudihana kudi Yehova kwawahiladi?
YUMA YIMUNADIZI
Kukeña dikwatusañumunaña kudihana kudi Yehova nikupapatishewa.
Kuhitulukamu
-
Muloñadi chitwatela kumukeñela Yehova namuchima wetu wejima nikudifukula kudi yena hohu?
-
Yumanyi yayililañayi Yehova aYinsahu jindi apapatishewa?
-
Mukukeña kudihana enu aweni kudi Yehova?
ILUKILENUHU NSAÑU YIKWAWU
Talenu ñimbi nimukakuhema ngunja chafuukwiliwu kudihana kudi Yehova.
Malwihu Ehulañawu Atwansi—Chumanyi Chinakela Muchihandilu Chami?—Kwanuka Yuma Yakunyima (6:54)
Toñojokenu hayuma yikwawu yikuletesha mudihani.
“Muloñadi Chimwatela Kudihanina Kudi Yehova?” (Kaposhi Kakutalila, January 15, 2010)
Munaka kamina kavidiyo, talenu muzañalu wukwetiwu antu adihanaña kudi Yehova.
Muchibaaba chinakwila nawu “Hadi Yaaka Yayivulu Nadihwileña nami, ‘Muloñadi Chitwekalilaku?’” talenu chaletesheli mumbanda wumu atoñojoki hayuma yalemeshayi.
“Bayibolu Yahimpaña Yihandilu Yawantu” (Kaposhi Kakutalila, November 1, 2012)
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
