KUDIZA 47
Komana Munadiloñeshi Kupapatishewa?
Kufuma himwatachikili kudiza Bayibolu, muneluki yuma yayivulu hadi Yehova. Hadaha munakuzatisha yuma yimunakudiza muchihandilu chenu. Hela chochu, kwatela kudi yuma yinakuyikañesha mubuli kudihana kudi Yehova nikupapatishewa. Akunu kudiza kukuhosha hayuma yakañeshaña antu kupapatishewa nichimunateli kuyishinda.
1. Komana mwatela kwiluka nsañu yejima yamuBayibolu henohu kanda mupapatishewi?
Hakwila mupapatishewi, mwatela “[kwiluka] chalala chikupu.” (1 Timotewu 2:4) Hichinayi mukwila nawu mwatela kwiluka ñakwilu yejima yamalwihu ahosha haBayibolu henohu kanda mupapatishewiku. NiakaKristu apapatisheweli dehi achidi kudiza. (AKolosi 1:9, 10) Ilaña mwatela kwilukaku chalala chamuBayibolu chakutachikilahu. Akulumpi muchipompelu akuyikwasha kulonda mwiluki neyi chakwila muneluki chalala chamuBayibolu.
2. Yumanyi yimwatela kwila henohu kanda mupapatishewi?
Hakwila mupapatishewi, mwatela ‘kubalumuka mumuchima. . . nakufunta.’ (Tañenu Yilwilu 3:19.) Chumichi chinatalishi mukwila nawu mwatela kutiya kutama hanshidi jimwakoñeli nawa mwatela kumulomba Yehova kulonda ayanakeni. Nawa mwatela kudikasa chikupu kubula kwila yuma yatama nakwila yuma yamutiyishaña Nzambi kuwaha. Kubombelahu, mwatela kutachika kuya nakupompa nikushimwina hamu nachipompelu.
3. Muloñadi chimukubulila kwiteja woma wuyikañeshi kupapatishewa?
Amakwawu atiyaña woma nawu hiyakutwesha kwila yuma yamukaniniwu Yehovaku. Eña, mpinji jikwawu mukuluwañeshaña, amayala niambanda atenawu muBayibolu niwena aluwañesheleña. Ilaña Yehova weluka nindi ambuñindi awanina wanyi. (Tañenu Isamu 103:13, 14.) Watiyaña kuwaha neyi munakudishaku kuzata nañovu! Wukuyikwashaña. Mwamweni, Yehova watushiika nindi kwosi chuma “[chinateli] kutwambula kukukeña [kwindiku].”—Tañenu ARoma 8:38, 39.
SANDUJOLENU CHIKUPU
Talenu chimunateli kumanisha kukala kukuyikañesha kupapatishewa neyi mumwiluka Yehova chiwahi nikwiteja wukwashu windi.
4. Mwilukenu Yehova chikupu
Mwatela kumwiluka Yehova kushika hadihi henohu kanda mupapatishewi? Mwatela kumwiluka chiwahi chikupu hakwila mumukeñi nikwila yuma yamutiyishaña kuwaha. Vumishenu VIDIYO kulonda mumoni atudizi aBayibolu mukaayi kejima chinakwilawu mwenimu. Kuhiñahu hanjekenu halwihu lunalondelihu.
-
Muniyi vidiyo, yumanyi yayikwashili antu amakwawu kudiloñesha kupapatishewa?
Tañenu ARoma 12:2, kuhiñahu hanjekenu hanawa malwihu:
-
Komana kudihu yuma yimu yadizishaña Bayibolu yimwajinokaña indi kwiji mwajinokaña neyi chakwila aYinsahu jaYehova adizishaña chalala?
-
Neyi mwajinokaña, chumanyi chimwatela kwila?
5. Shindenu yuma yakañeshaña antu kupapatishewa
Neyi tufuukulahu etu aweni kudihana kudi Yehova nakupapatishewa, wejima wetu twamonaña kukala. Chakutalilahu, vumishenu VIDIYO, kuhiñahu hanjekenu hamalwihu analondelihu.
-
Muniyi vidiyo, kukalanyi kwateleleli kushindayi Narangerel kulonda amukalakeleña Yehova?
-
Kumukeña Yehova kwamukwashili ñahi kushinda kukala kwamweneñayi?
Tañenu Yishimu 29:25 ni 2 Timotewu 1:7, kuhiñahu hanjekenu hanilu lwihu:
-
Yumanyi yatukwashaña kwikala ahamuka kulonda tushindi kukala?
6. Kuhwelelenu muwukwashu waYehova
Yehova wukuyikwashaña kulonda mumutiyisheña kuwaha. Vumishenu VIDIYO, kuhiñahu hanjekenu hamalwihu analondelihu.
-
Muniyi vidiyo, yumanyi yamukañesheleña kadizi waBayibolu kupapatishewa?
-
Yumanyi yadiziliyi yamukwashili kumukuhwelela Yehova chikupu ?
Tañenu Isaya 41:10, 13, kuhiñahu hanjekenu hanilu lwihu:
-
Muloñadi chimwatela kukuhwelela nenu mwakashikija mumunakani hampinji yimunakudihana?
7. Sakililenuña chikupu hakukeña kwayimwekeshelayi Yehova
Neyi mutoñojokaña hachayikeñayi Yehova, mukusweja kumusakilila nawa mukukeñaña kumukalakela haya nyaaka. Tañenu Isamu 40:5, kuhiñahu hanjekenu hanilu lwihu:
-
Yumanyi yayiwahi yayinkayi Yehova yimwamusakililaña nankashi?
Kaprofwetu Yeremiya wamukeñeli nankashi Yehova niizu dindi nawa wasakilileña hakumutena nejina daYehova. Wahosheli nindi: “Izu deyi dekalili chuma chakunzañalesha nichakutiyisha muchima wami kuwaha, muloña antenaña ijina deyi, eyi Yehova Nzambi wamazaza.” (Yeremiya 15:16) Akulenu awa malwihu:
-
Muloñadi chitukuhoshela netu kwikala Chinsahu chaYehova hikukooleka kwakweni?
-
Munakukeña kupapatishewa kulonda mwiikali Chinsahu chaYehova?
-
Kudihu yuma yinakuyikañesha?
-
Munakutoñojoka nenu yumanyi yimwatela kwila hakwila mupapatishewi?
AMAKWAWU AHOSHAÑA NAWU: “Neluki wanyi neyi nukutwesha kutwalekahu kwikala washinshika nihanyima yakupapatishewa.”
-
Komana dichimwatoñojokaña?
YUMA YIMUNADIZI
Nawukwashu waYehova, mukushinda kukala kwejima kunateli kuyikañesha kupapatishewa.
Kuhitulukamu
-
Mwatela kudiza Bayibolu kushika hadihi hakwila mupapatishewi?
-
Yumanyi yimwatela kuhimpa henohu kanda mupapatishewi?
-
Muloñadi chimukubulila kwiteja woma kuyikañesha kupapatishewa?
ILUKILENUHU NSAÑU YIKWAWU
Talenu chuma chacheni chikuyiletesha mufuukulihu kupapatishewa.
“Komana Munakukeña Kupapatishewa?” (Kaposhi Kakutalila, March 2020)
Ilukenu chimunateli kumanisha kukala kukwawu kunateli kuyifuntisha hanyima.
“Chumanyi Chikunkañesha Kupapatishewa?” (Kaposhi Kakutalila, March 2019)
Talenu iyala wumu chashindiliyi kukala kweneni kulonda apapatishewi.
Hakusambila, iyala wejina daAtaa washintajalileña kupapatishewa. Talenu chuma chamukwashili afuukulihu kupapatishewa.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
