KUDIZA 50
Chisaka Chenu Chinateli Kwikala Ñahi Namuzañalu?—Chibalu 2
Anyana hichawaana kufuma kudi Yehova. Wakeñaña nindi anvwali ahembeña chiwahi ichi chawaana. Yehova wayinka anvwali kufumba kunateli kuyikwasha kuhemba chiwahi anyana. Iku kufumba kunateli nikukwasha anyana kuleta muzañalu muchisaka.
1. Kufumbanyi kwayinkawu anvwali kudi Yehova?
Yehova wakeñaña nindi anvwali akeñi anyanawu nikwikala nampinji yeneni yakwikala nawu. Wakeñaña cheñi nindi anvwali akiñi anyanawu kuyuma yafwana nawa azatisheña yishina yamuBayibolu hakuyidizisha. (Yishimu 1:8) Wayilejaña atata jawantu nindi: “Yikulishenuña [anyanenu] . . . kwesekeja nachakeñañayi Yehova.” (Tañenu AEfwesesa 6:4.) Yehova watiyaña kuwaha neyi anvwali alondelaña wunlomboli windi hakukulisha anyanawu, bayi kuhana mudimu wukwetiwu kudi muntu wacheñiku.
2. Kufumbanyi kwahanayi Yehova kudi anyana?
Yehova wayileja anyana nindi: “Ovwahilenuña anvwali jenu.” (Tañenu AKolosi 3:20.) Neyi anyana alemeshaña nikwovwahila anvwali jawu, akumutiyishaña Yehova nianvwali jawu kuwaha. (Yishimu 23:22-25) Yesu welili chuma chachiwahi chatela kwimbujolawu anyana. Hela chakwila wadiña wawanina, wovwahilileña nikulemesha anvwali jindi.—Luka 2:51, 52.
3. Munateli kuswina ñahi kwakwihi naNzambi hamu neyi chisaka?
Neyi mudi anvwali, chakadi nikujina munakukeña nenu anyanenu amukeñi Yehova neyi chimwamukeña. Munateli kuyikwasha ñahi? Kuhitila mukwila chahosha Bayibolu nawu: ‘Watela kuyidizisha anyaneyi mazu aYehova nikuhanjeka hanawa mazu neyi wunashakami mwitala deyi nawa neyi wunakwenda munjila.’ (Kuhituluka 6:7) ‘Kudizisha’ kwatalisha mukufuntisha-funtishahu yuma yimunakudizisha. Chakadi nikujina, mweluka nenu mwatela kufuntisha-funtishahu yuma yimunakuyileja anyanenu kulonda ayanukeña. Ayinu nsona yinatalishi mukwila nawu mwatela kwikalañaku nampinji yeneni yakuhanjeka nawanyanenu hadi Yehova. Chalema kwikalaku nampinji yakudifukula hamu neyi chisaka mulungu-himulungu. Neyi mudana anyana, ninenu munateli kwikalaku nampinji mumulungu yakudiza Izu daNzambi.
SANDUJOLENU CHIKUPU
Talenu yuma yikuyikwasha kwikala namuzañalu muchisaka chenu nikumona nenu mwakiñewa.
4. Yidizishenuña anyanenu mukukeña
Kudizisha mwana kwekala kwakala. Hanu Bayibolu yinateli kuyikwasha ñahi? Tañenu Yakoba 1:19, 20, kuhiñahu hanjekenu hanawa malwihu:
-
Anvwali anateli kumwekesha ñahi nawu ayikeña anyanawu neyi anakuhanjeka nawu?
-
Neyi nvwali nahili, muloñadi chatela kubulilayi kufumba mwana? a
5. Kiñenuña anyanenu
Hakwila mukiñi anyanenu, chalema kuhosha nawu hansañu yawuvumbi. Munateli kutiya nsonyi kuhosha haniyi nsañu. Vumishenu VIDIYO, kuhiñahu hanjekenu hamalwihu analondelihu.
-
Muloñadi anvwali amakwawu chichayikalilaña kuhanjeka nawanyanawu hansañu yawuvumbi?
-
Anvwali amakwawu ayilumbulwilaña ñahi anyanawu hansañu yawuvumbi?
Neyi chiyaprofweteleñahu dehi, kaayi kaSatana kanakutaminaku ifuku niifuku. Tañenu 2 Timotewu 3:1, 13, kuhiñahu hanjekenu hanilu lwihu:
-
Antu amakwawu atama anashimuniwu muvasi 13 akaamaña nanyana yanyanya chakukanjikija. Dichi chalemenadi anvwali kudizisha anyanawu hansañu jawuvumbi nichinateli kudikiñawu awenawu kudi antu akaamaña nanyana yanyanya chakukanjikija?
Komana mweluka?
AYinsahu jaYehova akweti yitwa yayivulu yinateli kukwasha anvwali kudizisha anyanawu hansañu yawuvumbi nichatela kudikiñawu kudi antu akaamaña nanyana yanyanya chakukanjikija. Chakutalilahu, talenu vidiyo yinakwila nawu:
-
Tupetulu tudi mumukanda waDizilenu Kudi Ntañishi Muneni 10 ni 32
-
“Mulesambilisha Abana Benu pa Kulaalana” (Loleni! Na. 5 2016)
6. Lemeshenuña anvwali jenu
Anyana niatwansi amwekeshaña nawu alemesha anvwali jawu nanochu chahoshañawu nawu. Vumishenu VIDIYO, kuhiñahu hanjekenu hamalwihu analondelihu.
-
Chalemenadi mwana kuhanjeka nawanvwali jindi nakalemesha?
-
Mwana nateli kuhanjeka ñahi nawanvwali jindi munjila yikumwekesha nawu wayilemesha?
Tañenu Yishimu 1:8, kuhiñahu hanjekenu hanilu lwihu:
-
Mwana watela kwila ñahi neyi anvwali jindi amuleja chakwila?
7. Difukulenuña kudi Yehova hamu neyi chisaka
Yisaka yawaYinsahu jaYehova yekalaña nampinji yakudifukula kudi Yehova mulungu-himulungu. Iku kudifukula kwachisaka kwatela kwikala ñahi? Vumishenu VIDIYO, kuhiñahu hanjekenu hamalwihu analondelihu.
-
Chisaka chinateli kwikala ñahi kulonda ekaleña nakudifukula kwachisaka mpinji yejima?
-
Yumanyi yatela kwilawu anvwali hakwila nawu kudifukula kwachisaka kuwaheña?—Talenu mwevulu wakutachikilahu mukunu kudiza.
-
Yumanyi yinateli kuyikañesha kudifukwila hamu?
Yehova walejeli yisaka yawaIsarela kuhanjekaña haNsona mpinji yejima. Tañenu Kuhituluka 6:6, 7, kuhiñahu hanjekenu hanilu lwihu:
-
Munateli kuzatisha ñahi ichi chishina?
Yuma yimunateli kwila hakudifukula kwachisaka:
-
Loñeshenu kupompa.
-
Tañenu nikuhanjeka hansañu yamuBayibolu yikuzañalesha chisaka chenu.
-
Neyi mudi nawanyana, loñololenu hela kupulinta mudimu wawanyana ha jw.org.
-
Neyi mudi nawatwansi, hanjekenu hachibaaba chawatwansi ha jw.org.
-
Hemenu chisela champanji yamuBayibolu nawanyanenu.
-
Talenu vidiyo ha jw.org nawa hanjekenuhu.
AMAKWAWU AHOSHAÑA NAWU: “Anyana kwila atiyishisha chahosha Bayibolu nehi.”
-
Mukuhoshahu nenudi?
YUMA YIMUNADIZI
Yehova nakukeña nindi anvwali akeñi anyanawu, kuyidizisha nikuyikiña; anyana niwena alemesheña anvwali jawu nikuyovwahila; yisaka niyena yidifukwileña hamu kudi yena.
Kuhitulukamu
-
Anvwali anateli kuyidizisha ñahi anyanawu nikuyikiña?
-
Anyana anateli kuyilemesha ñahi anvwali jawu?
-
Yumanyi yayiwahi yafumañamu neyi mwikala nampinji yakudifukula hamu neyi chisaka mulungu nimulungu?
ILUKILENUHU NSAÑU YIKWAWU
Nsañwinyi yimwatela kuhanjeka nawanyanenu yikayikwasha neyi anakuli?
“Amasambililo 6 ayo Abana Balingile Ukusambilila” (Loleni! Na. 2 2019)
Talenu kufumba kwamuBayibolu chikwakwashaña antu ahembaña anvwali akula dehi.
“Bayibolu Yahosha Nawudi haKwakamena Anvwali Akula Dehi?” (Chibaaba chahaIntaneti)
Talenu iyala wumu wabulili kwiluka chakukulisha anyana chekaliliyi nvwali wamuwahi.
Talenu atata jawantu chinateli kukoleshawu wubwambu wawu nawanyanawu awamayala.
a MuBayibolu, “kufumba” kwatalisha mukuleja, kudizisha, nikwolola. Ilaña hikwatalisha mukukabishaku.—Yishimu 4:1.
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
