Wejima wetu kudi chitwakeñaña netu tumwekaneña nimutapu wayakuvwala yitwakeña. Neyi tulondela yishina yantesha yamuBayibolu, tunateli kutonda yakuvwala yitwakeña ilaña yikumutiyisha Yehova kuwaha. Tuhanjekenu haniyi yishina.

1. Yishinanyi yamuBayibolu yinateli kutukwasha kufuukula chitwatela kumwekana nimutapu wayakuvwala yetu?

Twatela kutonda “[yakuvwala] yatelela, nakalemesha nikutoñojoka mwamaana,” nikutwalekahu kumwekesha netu “[twamwakama] Nzambi.” (1 Timotewu 2:9, 10) Talenu iyi yishina yiwana: (1) Nvwalilu yetu yatela kwikala “yatelela.” Neyi chimwamonaña hakupompa, antu jaYehova avwalaña yakuvwala yamboka-mboka, ilaña nvwalilu yetu, ntewilu yetu ninsuki yitwayindaña yamwekeshaña kalemesha kudi Nzambi itwadifukulañaku. (2) Kuvwala “nakalemesha” kwatalisha mukuvwala yuma yikubula kusañumuna wuvumbi, hela yikuletesha antu ataleña hohu etu. (3) Twamwekeshaña netu “[twatoñojokaña] mwamaana” neyi tubula kufwila kwikala nachakuvwala chejima chikwidika. (4) Mmwekenu yetu yatela kumwekeshaña mpinji yejima nawu “twamwakama Nzambi,” kulonda tumwekesheña netu twadifukulaña kudi Nzambi walala.—1 AKorinda 10:31.

2. Muloñadi chitwatela kuyitoñojokelaku amanakwetu niahela neyi hitukutonda yakuvwala?

Hela chakwila tukweti wuswa wakutonda yakuvwala, twatela kutoñojoka chinateli kutiyawu akwetu nammwekenu yetu. Twazataña nañovu kubula kuneñesha muntu wudi wejima, ilaña “[twayililaña] akwetu yuma yayiwahi kulonda tuyikolesheña.”—Tañenu ARoma 15:1, 2.

3. Mmwekenu yetu yinateli kukokola ñahi antu kwinza muchalala?

Hela chakwila twavwalaña chiwahi kwejima kutunakuya, ilaña twashaña muchima chikupu kunvwalilu yetu neyi tunakuya nakupompa nikushimwina. Hitwakeñaña kukañesha antu kutiya nsañu yayiwahi muloña wanvwalilu yetuku. Mwamweni, mmwekenu yetu yinateli kuletesha antu kwiteja chalala “[nikuwahisha] ntañishilu yaNzambi, Chamwinu chetu.”—Titusa 2:10.

 SANDUJOLENU CHIKUPU

4. Mmwekenu yayiwahi yamwekeshaña kalemesha kudi Yehova

Chumanyi chacheni chaleteshaña tusheña maana chikupu kunvwalilu yetu? Tañenu Masamu 47:2, kuhiñahu hanjekenu hanawa malwihu:

• Chineli twamwimenañaku Yehova, nvwalilu yetu yatela kwikala ñahi?

• Munakutoñojoka nenu chachiwahi kusha maana kummwekenu yetu neyi tunakuya nakupompa hela kushimwina? Muloñadi?

 5. Chitunateli kufuukula chiwahi hanvwalilu nimmwekenu

Vumishenu VIDIYO.

Hela chakwila yakuvwala yetu yawuseya hela nehi, yatela kwikala yawunyonji nawa yatelela kwejima kutudi. Tañenu 1 AKorinda 10:24 ni 1 Timotewu 2:9, 10. Kuhiñahu, hanjekenu chitukubulila kuvwala yakuvwala . . .

• yakuselumuna hela yabula kutelela.

• yakwata hamujimba, yinakumwekesha mujimba hela yasañumunaña wuvumbi.

Hela chakwila akaKristu hiyalondelaña Nshimbi jaMosiku, ilaña jamwekeshaña chatoñojokañayi Yehova. Tañenu Kuhituluka 22:5, kuhiñahu hanjekenu hanilu lwihu:

• Muloñadi chitwatela kutondolwela nvwalilu nimmwekenu yamwekeshaña ambanda neyi amayala hela amayala neyi ambanda?

Tañenu 1 AKorinda 10:32, 33 ni 1 Yowanu 2:15, 16, kuhiñahu hanjekenu hanawa malwihu:

• Muloñadi chitwatela kwilukila neyi mmwekenu yetu yaneñeshaña antu amuchituñilu hela amuchipompelu?

• Nvwalilu nimmwekenu yamuchidinyi yekala kumwashakamaña?

• Munakutoñojoka nenu oyu nvwalilu yinateleli akaKristu? Muloñadi?

 YUMA YIMUNADIZI

Neyi tufuukula chiwahi hanvwalilu nimmwekenu yetu, tukumwekesha netu twamulemesha Yehova niakwetu.

Kuhitulukamu

• Nvwalilu nimmwekenu yetu yalemenadi kudi Yehova?

• Yishinanyi yinateli kutukwasha neyi tunakufuukula hammwekenu yetu?

• Mmwekenu yetu yinateli kuletesha antu kumona ñahi kudifukula kwalala?