Yesu diyi Mutu wachipompelu chawakaKristu. (AEfwesesa 5:23) Makonu, iku wudi mwiwulu, Yesu nakulombola akakumulondela indi hamaseki kuzatisha “nduñu wamaana nikashinshi.” (Tañenu Matewu 24:45.) Yesu yomweni diyi wamutondeli iwu nduñu nawa wamwinkeli wuswa wakutuña nshimbi jimu, ilaña iwu nduñu watela kumwovwahila Kristu nikukalakela amana kwaKristu. Nduñu yeniwu hinyi? Iwu nduñu watwakamenaña ñahi?

1. “Nduñu wamaana nikashinshi” hinyi?

Mpinji yejima Yehova wazatishaña iyala hela izanvu dawamayala kuhana nshimbi jindi kudi antu jindi. (Malaki 2:7; AHeberu 1:1) Chelili Yesu nafwi dehi, apostolu niakulumpi muYerusalema diwu adiña nakulombola. (Yilwilu 15:2) Kulondela iyi ntanjikilu, izanvu danyanya dawakulumpi, dikwila nawu Izanvu Dalombolaña dawaYinsahu jaYehova daloñeshaña yakuda yakuspiritu nikulombola mudimu wakushimwina. Idi izanvu aditenaña nawu “nduñu wamaana nikashinshi atondawu kudi [Yesu].” (Matewu 24:45a) Mamembala ejima Amwizanvu Dalombolaña hiyakaKristu awayishawu naspiritu, atalilaña kuya nakuyuulila hamu naKristu muWanta windi wamwiwulu neyi chihandilu chawu chahamaseki chinamani dehi.

2. Yakudanyi yakuspiritu yaloñeshaña nduñu wakashinshi?

Yesu wahosheli nindi nduñu wakashinshi wakayinka “[akwawu akaKristu] yakuda yawu hampinji yatelela.” (Matewu 24:45b) Neyi chatukwashaña yakuda yitwadaña hakwila twiikali akola kumujimba, yakuda yakuspiritu, dikwila nawu nshimbi jaMwizu daNzambi, jatwinkaña ñovu yakutwalekahu kwikala ashinshika kudi Yehova nikuzata mudimu watwinkayi Yesu. (1 Timotewu 4:6) Twatambwilaña iyi yakuda yakuspiritu hakupompa kwanyanya, kwañinza, kweluña, munyikanda yashindamena haBayibolu nimumavidiyo atukwashaña kwiluka nkeñelu yaNzambi nikukolesha wubwambu wetu nayena.

 SANDUJOLENU CHIKUPU

3. Antu jaYehova atela kwikala adiloñesha

Nawunlomboli waYesu, Izanvu Dalombolaña daloñeshaña mudimu wazataña aYinsahu jaYehova. Chuma chochimu dichadiña nikudi akaKristu akusambila. Vumishenu VIDIYO.

Tañenu 1 AKorinda 14:33, 40, kuhiñahu hanjekenu hanilu lwihu:

• Awa mavasi anamwekeshi ñahi nawu Yehova wakeñaña nindi aYinsahu jindi ekali adiloñesha?

4. Nduñu wakashinshi waloñeshaña mudimu wetu wakushimwina

Kushimwina himudimu walema wazatileñawu akaKristu akusambila. Tañenu Yilwilu 8:14, 25, kuhiñahu hanjekenu hanawa malwihu:

• Hakachi kawakaKristu akusambila, anyi alombweleña mudimu wakushimwina?

• APetulu naYowanu elili ñahi nawunlomboli wawakwawu apostolu?

Kushimwina himudimu walema nankashi waloñeshañawu kudi Izanvu Dalombolaña. Vumishenu VIDIYO.

 Yesu wakonkomweneni hakulema kwamudimu wakushimwina. Tañenu Maku 13:10, kuhiñahu hanjekenu hanawa malwihu:

• Mudimu wakushimwina walemenadi kudi Izanvu Dalombolaña?

• Muloñadi chitunakukeñela “nduñu wamaana nikashinshi” aloñesheña iwu mudimu mwahita kaayi kejima?

5. Nduñu wakashinshi wahanaña nshimbi

Izanvu Dalombolaña dahanaña nshimbi yalondelañawu akaKristu mukaayi kejima. Dafuukulaña ñahi hakwila dihani nshimbi? Talenu izanvu dalombolaña dawakaKristu akusambila chidahanineña nshimbi. Tañenu Yilwilu 15:1, 2, kuhiñahu hanjekenu hanawa malwihu:

• Yumanyi yaleteli wufwinda hakachi kawakaKristu amakwawu akusambila?

• Pawulu, Baranaba niamakwawu ayili kudanyi hakwila amanishi iku kukala?

Tañenu Yilwilu 15:12-18, 23-29, kuhiñahu hanjekenu hanilu lwihu:

• Henohu izanvu dalombweleña kanda difuukuli, yumanyi yeliliwu hakwila eluki wunlomboli waNzambi haniyi nsañu?—Talenu mavasi 12, 15, ni 28.

Tañenu Yilwilu 15:30, 31 ni 16:4, 5, kuhiñahu hanjekenu hanawa malwihu:

• AkaKristu akusambila elili ñahi nawunlomboli wafumini kudi izanvu dalombweleña?

• Yehova wayikiswilili ñahi chovwahililiwu?

Tañenu 2 Timotewu 3:16 niYakoba 1:5, kuhiñahu hanjekenu hanilu lwihu:

• Makonu Izanvu Dalombolaña dafumishaña kudihi wukwashu neyi dinakufuukula?

 YUMA YIMUNADIZI

Izanvu Dalombolaña diyi “nduñu wamaana nikashinshi” atondawu kudi Kristu. Dahanaña wunlomboli niyakuda yakuspiritu kudi akaKristu mukaayi kejima.

Kuhitulukamu

• Hinyi wamutondeli “nduñu wamaana nikashinshi”?

• Izanvu Dalombolaña datwakamenaña ñahi?

• Munakuhweleli nenu Izanvu Dalombolaña diyi “nduñu wamaana nikashinshi”?