Neyi tudi hakachi kawakwetu akakwitiya, twatiyaña neyi chatiyili Mwanta Davidi nindi: “Talenu! Okuwaha nawa omuzañalu amana kwamuntu kushakama hamu mukunuñañana!” (Isamu 133:1) Kunuñañana kwetu hikwadinjilaña kwakweniku. Wejima wetu twazataña nañovu kulonda twiikali anuñañana.

1. Chumanyi chakuhayamisha chamwekanaña hakachi kawantu jaNzambi?

Neyi mudi kwituña dacheñi nawa muya nakupompa, mukutiyaña idimi dinakuzatishawu wanyi, ilaña mukwikala akasunuka munjila jajivulu. Muloñadi? Muloña twadizaña Bayibolu kuzatisha nyikanda yoyimu mukaayi kejima. Nawa twadimwekeshelaña kukeña wumu namukwawu. Hichikwetu muloña nakutwashakamañaku, wejima wetu “[twatambikaña] hejina daYehova, nakudifukula kudi yena nakunuñañana.”—Zefwaniya 3:9, tumazu twaheshina.

2. Yumanyi yimwatela kwila kulonda muleti kunuñañana?

“Dikeñenu chikupu wumu namukwawu chakufuma hamuchima.” (1 Petulu 1:22) Munateli kuzatisha ñahi iku kufumba? Chatela mushinshikeña hayiluwa yawakwenu, shinshikenuña hayilwilu yayiwahi yikwetiwu. Nawa chatela mudikundeña hohu nawantu akeña yuma yimwakeña, dikundenuña nawamanakwetu niahela akuyitachi yashiyashana. Twatela cheñi kuzata nañovu kulonda tuleki yilwilu yejima yachaambu yitukweti.—Tañenu 1 Petulu 2:17. a

3. Mukwila ñahi neyi mubobola namukwenu mukaKristu?

Twekala anuñañana, ilaña cheñi hitwawaninaku. Mpinji yikwawu twadineñeshaña nikudihilisha wumu namukwawu. Izu daNzambi datulejaña nawu “[tudanakeneña] wumu namukwawu,” dabombelahu nawu: “Neyi chayanakeneniyi Yehova chakufuma hamuchima, ninenu dichimwatela kwila.” (Tañenu AKolosi 3:13.) Twamuneñeshaña Yehova kakavulu, ilaña watwanakenaña. Dichi niyena wakeñaña nindi twanakeneña amanakwetu. Neyi mwiluka nenu munamuneñeshi mukwenu, nyakalenu kuzatilahu kulonda mumanishi kukala.—Tañenu Matewu 5:23, 24. b

 SANDUJOLENU CHIKUPU

4. Lekenu chaambu

Twafwilaña kukeña amanakwetu ejima. Ilaña chinateli kutukalila kukeña muntu itunambukiku nindi. Chumanyi chinateli kutukwasha? Tañenu Yilwilu 10:34, 35, kuhiñahu hanjekenu hanawa malwihu:

• Yehova weteja antu ejima kwikala aYinsahu jindi. Munateli kumwimbujola ñahi munjila mumwamwenaña antu ambukaku nanenu?

• Chaambwinyi chekala mwiluña denu chimwatela kutondolwela?

Tañenu 2 AKorinda 6:11-13, kuhiñahu hanjekenu hanilu lwihu:

• Munakutoñojoka nenu munateli kudikunda ñahi nawamanakwetu niahela akuyitachi yashiyashana?

5. Danakenenuña chakufuma hamuchima nawa letenuña kuwunda

Yehova watwanakenaña chakufuma hamuchima hela chakwila etu hitwatela kumwanakena yenaku. Tañenu Isamu 86:5, kuhiñahu hanjekenu hanawa malwihu:

• Yehova wanakenaña ñahi?

• Muloñadi chimukumwekeshela kusakilila hachanakenañayi?

• Yumanyi yinateli kuletesha chitukalili kuleta kuwunda nawakwetu?

Tunateli kumwimbujola ñahi Yehova kulonda tutwalekihu kwikala anuñañana nawamanakwetu niahela? Tañenu Yishimu 19:11, kuhiñahu hanjekenu hanilu lwihu:

• Neyi muntu ayineñesha, yumanyi yimwatela kwila kulonda muleti kuwunda?

 Mpinji yikwawu twayineñeshaña akwetu. Neyi chuma chamuchidiwu chimwekana, tukwila ñahi? Vumishenu VIDIYO, kuhiñahu hanjekenu halwihu lunalondelihu.

• Muniyi vidiyo, chumanyi chelayi muhela kulonda aleti kuwunda?

 YUMA YIMUNADIZI

Munateli kuleta kuwunda muchipompelu neyi mukuyanakenaña amanakwenu niahela nikuyimwekeshela kukeña.

Kuhitulukamu

• Munateli kuleka ñahi chaambu?

• Chumanyi chimwatela kwila neyi mubobola namukwenu mukaKristu?

• Muloñadi chimwatela kumwimbujolela Yehova kwanakena akwenu?