KUDIZA 57
Chumanyi Chimwatela Kwila Neyi Mukoña Nshidi Yahamesu Bwi-i?
Hela chakwila munakuzata nañovu kumukeña Yehova nikutondolwela kwila yuma yikumuneñesha, ilaña mpinji yikwawu munateli kuluwañesha. Hela chochu, nshidi yikwawu yekala yahamesu bwi-i. (1 AKorinda 6: 9, 10) Neyi mukoña nshidi yahamesu bwi-i, anukenu nenu Yehova wuchidi wayikeña; nawa nakukeña kuyanakena nikuyikwasha.
1. Chumanyi chitwatela kwila hakwila Yehova atwanakeni?
Antu amukeña Yehova aneñaña neyi amona nawu anakoñi nshidi yahamesu bwi-i. Ilaña akundejewaña namazu ayishiikayi Yehova antu jindi akwila nawu: “Hela chakwila nshidi jenu jichinana nge-e, akajitookesha neyi sino.” (Isaya 1:18) Neyi tubalumuka mumuchima, Yehova wukutwanakena. Twabalumukaña ñahi mumuchima? Neyi tuditoñesha nayuma yitwelili, twalekaña kukoña yuma yatama nawa twalembaña kudi Yehova netu atwanakeni. Nawa twazataña nañovu kuleka yitoñojoka hela yilwilu yatuletesheli kukoña nshidi nikuzata nañovu kulonda tushakameña kwesekeja nanshimbi jaYehova jaloña.—Tañenu Isaya 55:6, 7.
2. Yehova wazatishaña ñahi akulumpi kutukwasha neyi tunavulumuni?
Neyi tukoña nshidi yahamesu bwi-i, Yehova watulejaña “[kutambika] akulumpi achipompelu.” (Tañenu Yakoba 5:14, 15.) Awa amayala atondawu amukeña Yehova ninyikoku yindi. Ashikahu kutukwasha kuwahisha wubwambu wetu naYehova.—AÑalija 6:1.
Akulumpi atukwashaña ñahi neyi tunakoñi nshidi yahamesu bwi-i? Akulumpi asatu hela ayedi akutufumba kuzatisha Nsona. Anateli cheñi kutukolesha nikutukwasha chitunateli kutondolwela kukoña nshidi cheñi. Anateli cheñi kutulekesha kuzataku nyidimu yimu yawakaKristu sampu wubwambu wetu naNzambi wunawahi. Hakwila akiñi chipompelu kuyuma yatama, akulumpi ahañaña muntu muchipompelu wunakoñi nshidi yahamesu bwi-i nawa wunabuli kubalumuka.
SANDUJOLENU CHIKUPU
Ilukenu chikupu Yehova chatukwashañayi neyi tunakoñi nshidi yahamesu bwi-i.
3. Kushimuna nshidi kwatukwashaña kuhimpa
Nshidi jejima jitwakoñaña twamuneñeshaña Yehova, dichi twamulejañamu. Tañenu Isamu 32:1-5, kuhiñahu hanjekenu hanilu lwihu:
-
Muloñadi chitwatela kushimwina nshidi jetu kudi Yehova chatela tujiswekeña?
Kubombela hakumulejamu Yehova nshidi jetu, tukwikala nakuwunda muyitoñojoka neyi tutambwila wukwashu kudi akulumpi. Vumishenu VIDIYO, kuhiñahu hanjekenu halwihu lunalondelihu.
-
Muniyi vidiyo, akulumpi amukwashili ñahi Canon kufunta kudi Yehova?
Twatela kwikala akasunuka nawakulumpi; ekalilaku kulonda atukwasheña. Tañenu Yakoba 5:16, kuhiñahu hanjekenu hanilu lwihu:
-
Chinateli kuyipelela ñahi akulumpi kutukwasha neyi tuyilejamu yuma yejima?
Shimunenu nshidi jimunakoñi, bayi muyihita akulumpi mumbadiku, nawa itejenu wukwashu waYehova
4. Kuhaña muntu muchipompelu kwakwashanaña ñahi?
Neyi muntu wunakoñi nshidi yahamesu bwi-i akaana kulondela nshimbi jaYehova, hatela kwikala cheñi muchipompeluku. Amuhañaña muchipompelu nawa hitwadikundaña nindi hela kuhosha nindiku. Tañenu 1 AKorinda 5:6, 11 ni 2 Yowanu 9-11, kuhiñahu hanjekenu hanilu lwihu:
-
Neyi iluñi chidavuvumwishaña chikanka, kudikunda namuntu wunabuli kubalumuka kunateli kuluwañesha ñahi chipompelu?
Amavulu ahañiliwu, afunta muchipompelu muloña wakuyibabesha, hela chakwila chayikatileña, chaletesheli abalumuki. (Isamu 141:5) Vumishenu VIDIYO, kuhiñahu hanjekenu halwihu lunalondelihu.
-
Muniyi vidiyo, chamuhañiliwu Sonja muchipompelu chamukwashili ñahi?
Kuhaña muntu muchipompelu . . .
-
kwalemeshaña ñahi ijina daYehova?
-
kwamwekesha ñahi nawu Yehova watoñojokelañaku nawa wukweti kukeña?
5. Yehova watwanakenaña neyi tubalumuka mumuchima
Yesu wazatishili chakutalilahu chatukwashaña kwiluka chatiyañayi Yehova neyi muntu abalumuka mumuchima. Tañenu Luka 15:1-7, kuhiñahu hanjekenu hanilu lwihu:
-
Chumichi chinakuyidizishadi hadi Yehova?
Tañenu Ezekeli 33:11, kuhiñahu hanjekenu hanilu lwihu:
-
Chumanyi chalema chitwatela kwila hakwila tumwekeshi chikupu netu tunabalumuki mumuchima?
Kufwana kabiña, Yehova wakamenaña nyikoku yindi
AMAKWAWU AHOSHAÑA NAWU: “Inakutiya woma kuyilejamu akulumpi nshidi jinnakoñi, muloña akunhaña muchipompelu.”
-
Munateli kumukwasha ñahi muntu wunakutoñojoka muniyi njila?
YUMA YIMUNADIZI
Neyi tukoña nshidi yahamesu bwi-i, ilaña tudanakena nakuleka yuma yatama yitwakoñeleña, Yehova wukutwanakena.
Kuhitulukamu
-
Chawahiladi etu kushimuna nshidi jetu kudi Yehova?
-
Chumanyi chitwatela kwila hakwila nshidi jetu ajanakeni?
-
Muloñadi chitwatela kulejelamu akulumpi neyi tukoña nshidi ahamesu bwi-i?
ILUKILENUHU NSAÑU YIKWAWU
Talenu iyala wumu chamumwekesheleliwu luwi kudi Yehova lwashimunawu haIsaya 1:18.
Ntanjikilu yakuhaña muntu muchipompelu yinateli kutukwasha ñahi wejima wetu?
“Ntanjikilu Yakuhaña Muntu Muchipompelu Chiyawahila” (Kaposhi Kakutalila, April 15, 2015)
Ilukenu chimunateli kumulumbulwila muntu wabula kwikala Chinsahu chahañilañawu antu muchipompelu.
“Komana aYinsahu jaYehova Adiwulaña Antu Adiña muKudifukula Kwawu?” (Chibaaba chahaIntaneti)
Muchibaaba chinakwila nawu “Nakeñeleña kufunta kudi Yehova,” talenu chaletesheli iyala wumu wabulili kukeña chalala eluki nindi Yehova diyi wamukokeli cheñi.
“Bayibolu Yahimpaña Yihandilu Yawantu” (Kaposhi Kakutalila, April 1, 2012)
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
