CHIBALU 5
Anyi Amutiyilili Nzambi haDibaji Deneni? Nawa Anyi Abulili Kumutiyilila?
Antu amavulu mumafuku aNowa akoñeleña yuma yatama. Kutachika 6:5
Adama naEvu avweli anyana nawa antu avulili nankashi hamaseki. Chimwahitili mpinji, añelu amakwawu adikañili neyi chadikañiliyi Satana.
Enjili hamaseki nawa avwalili nyijimba yawuntu kulonda asumbuli ambanda. Ambanda avweli nyana yawamayala yasweja kutaluka yatiyileñawu antu woma nawa adiña nañovu.
Kaayi kenzeli nawantu akoñeleña yuma yatama. Bayibolu yahoshaña nawu: ‘Kutama kwawantu kwaswejeli hamaseki, nimwafuukwileñawu mwejima nikutoñojoka munyichima yawu mwadiña mwatama hohu bweñi mafuku ejima.’
Nowa welili mwamulejeliyi Nzambi nawa watuñili watu. Kutachika 6:13, 14, 18, 19, 22
Nowa wadiña muntu wamuwahi. Yehova wamulejeli Nowa nindi wakajilumuna antu atama nadibaji deneni.
Nzambi cheñi wamulejeli Nowa kutuña watu weneni nankashi, kulonda chisaka chindi ninyichidi yejima yawanyama yakeñilumu.
Nowa wayisoñamishili antu nindi Dibaji dinakwinza, ilaña antu hiyatiyililiku. Amakwawu amuseheleña Nowa; amakwawu niwena amuheleli.
Chamanishiliyi kutuña watu, Nowa weñijili atunyama muwatu.
