“Nzambi. . . wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku. Yuma yakusambila yinahiti dehi.”—Chimwekeshu 21:3, 4, New World Translation.

Mwakazataña nyidimu yayiwahi yakudiluñisha.—Isaya 65:21-23.

Hikwakekala yikatu hela yihuñuku.—Isaya 25:8; 33:24.

Mwakashakama namuzañalu nachisaka chenu niamabwambu jenu haya nyaaka.—Masamu 37:11, 29.

Eña, hamuloña wayuma yiyedi:

• Nzambi wukweti wuswa wakwila yuma yakanayi. Bayibolu yamutena Yehova Nzambi nkawindi nawu diyi “Wañovu Jejima,” muloña wukweti ñovu jabadika. (Chimwekeshu 15:3) Dikwila nawu wudi nawuswa chikupu wakwila mwakanayi kulonda yabalumuni dinu ituña nakudiwahisha chiwahi. Kwesekeja nachahosha Bayibolu, “kudi Nzambi kwosi chuma chakalaku.”—Matewu 19:26.

• Nzambi nakufwila kwila mwakanayi. Chakutalilahu, Yehova ‘nakufwila’ kusha cheñi muuya mudi antu afwa dehi.—Yoba 14:14, 15.

  Bayibolu yatulejaña cheñi nawu Mwana kaNzambi, Yesu, wokileña akata. Muloñadi? Muloña wayitiyilileña wushona. (Maku 1:40, 41) Yesu wembujolileña chiwahi yilwilu yaTata yindi kuhitila mukufwila kukwasha atuzweñi.—Yowanu 14:9.

  Dichi tunakuhweleli netu Yehova niYesu anakukeña kutukwasha kulonda twakadiluñishi yuma yayiwahi yidi kumbidi.—Masamu 72:12-14; 145:16; 2 Petulu 3:9.