Yehova wadimini itempa kwiluña dateneneñawu nawu Edeni. Mwitempa mwadiña nkenu, nyitondu nianyama. Kuhiñahu Nzambi wawumbili muntu watachi, Adama, kufuma kulunkuñu nawa wamwoneneni muuya mumazulu. Wuneluki chamwekeni? Iwu muntu wekalili mumi. Yehova wamulejeli Adama nindi ahembeña itempa nikutuumba anyama ejima majina.

Yehova wamwinkeli Adama lushimbi lwalema. Wamulejeli nindi: ‘Nyikaabu yakunyitondu yejima wunateli kuda tuhu kufumishaku hohu mutondu wumu wambukaku. Neyi wuda mukaabu kuniwu mutondu, wakafwa.’

Nkumininaku, Yehova wahosheli nindi: ‘Nukumuleñela Adama nkwashi.’ Wamukaamikili Adama mutulu twatweni nawa Nzambi wazatishili lubavu lwaAdama kumuleñela mumbanda. Ijina dindi Eva.  Adama naEva ekalili chisaka chatachi. Adama watiyili ñahi hakumona ñodindi? Adama wazañaleli nankashi chakwila wahosheli nindi: ‘Talenu lubanji ludi nachuma chinawumbiyi Yehova kuzatisha lubavu lwami! Nakumwekana neyi ami.’

Yehova walejeli aAdama naEva kuvwala anyana nakwinzesha iseki. Wakeñeleña azatileña hamu kwilisha iseki dejima kwikala paradisa, hela iluña dadiwahi neyi chadiña itempa daEdeni. Ilaña yuma hiyazatikili neyi chakeñeleñayiku. Muloñadi? Tukudiza jajivulu mukapetulu kanalondelihu.