Mwahitili yaaka kwakwihi na 70 kufuma hafuntiliwu aIsarela amavulu kuYerusalema, ilaña amakwawu achidiña nakushakama mumaluña ashiyashana amuWanta waPeresi. Hakachi kawu hadiña kapristu Ezera, wadizishileña antu Nshimbi jaYehova. Ezera watiyili nindi antu muYerusalema anakulondela Nshimbi jaNzambi wanyi, nawa wakeñeleña kuya nakuyikwasha. Mwanta Atazakisheshi wakuPeresi wamulejeli nindi: ‘Nzambi wakwinkeli maana kulonda wudizishi antu Nshimbi jindi. Yaña, nawa sendaku antu ejima anakukeña kuya naneyi.’ Ezera wadibulakeni nawantu ejima akeñeleña kufunta kuYerusalema. Alombeli kudi Yehova kulonda ayikiñi halwendu lwawu lwalulehi, kufumahu anyamukili nakuya.

Chimwahitili tukweji tuwana, ashikili kuYerusalema. Kwenoku ayilolu amulejeli Ezera nawu: ‘AIsarela anadikañi naYehova nawa anasumbuli ambanda adifukulaña kudi anzambi akutwamba.’ Ezera welili ñahi? Wafukamini kumbidi yawantu nakulomba nindi: ‘Eyi Yehova, wunatwilili yuma yayivulu, ilaña tunakuvulumuni.’ Antu abalumukili munyichima, ilaña atwalekelihu kwila yuma yatama. Ezera watondeli akulumpi niansompeshi kulonda atali haniyi nsañu. Chimwahitili tukweji tusatu, ana abulileña kudifukula kudi Yehova ayihañili.

Mwahitili yaaka 12. Muniyi yaaka, mbañu jaYerusalema ajituñulwili. Dichi Ezera wapompesheli antu mulubanza lwamusumba kulonda ayitañili Nshimbi jaNzambi. Chabakwiliyi mukanda, antu emeni. Wamuhamekeli Yehova, nawa antu anyamwini makasa awu nakwiteja. Kuhiñahu Ezera watañili Nshimbi nikujilumbulula nawa antu atiyilileña chikupu. Etejeli nawu amushiyili cheñi Yehova, nawa adilili. Ifuku dalondelelihu, Ezera watwalekelihu kuyitañila Nshimbi jikwawu. Enjili nakwiluka nawu katataka ekali naChawija chaYisolu. Hohenohu, atachikili kuloñesha yuma yahachawija.

Hadi mafuku 7 achawija, antu azañaleleli nawa amusakililili Yehova nachaañwiliwu yakuda yayivulu.  Kufuma tuhu mumafuku aYoshuwa hikwadiñahu Chawija chaYisolu chidi neyi ichiku. Hanyima yachawija, antu apompeli nawa alombeli nawu: ‘Eyi Yehova, watufumishili muwuduñu, watwinkeli yakuda muchinkalampata nawa watwinkeli ninidi ituña dadiwahi. Ilaña twadikañileña naneyi kapampa kakavulu. Watutemesheleleña atuprofwetu nakutusoñamisha, ilaña etu hitwayitiyilileñaku. Hela chochu, watwalekelihu kudiwunjika. Welili muwamukanini Abarahama. Ichi tunakani netu tukukwovwahilaña.’ Asonekeli mwashiikiliwu nawa ayilolu, aLevi niatupristu alamikiliku chilamiku.