Tufuntenuku chantesha hanyima. Nehemiya, kambuña aMwanta Atazakisheshi, wadiña kaIsarela washakamineña mumusumba wawaPeresi waShushani. Mana kwaNehemiya wenjili nansañu yatama yafumini kuYuda nindi: ‘Antu afuntili kuYerusalema adi mukukala. Mpwembu jamusumba niyiisu yakisañeniwu kudi aBabiloni hiyayituñululaku.’ Nehemiya watiyili kutama. Wakeñeleña kuya kuYerusalema nakukwashana, dichi walombeli kudi Nzambi kulonda mwanta amwiteji ayi.

Chimwahitili mpinji, mwanta wamweni nindi Nehemiya nadineñi. Wahosheli nindi: ‘Kanda nimoneñahu dehi wunadineñi ñana. Kukalanyi kuwukweti?’ Nehemiya wahosheli nindi: ‘Nukubuliladi kudineña henohu musumba wami waYerusalema anawushiyi kwamahembi?’ Mwanta wamwihwili nindi: ‘Wunakukeña nikwililidi?’ Hohenohu Nehemiya walombeli wumweneni. Kuhiñahu wahosheli nindi: ‘Mwani, ñiiteji niyi kuYerusalema nakutuñulula mpwembu.’ Mwanta Atazakisheshi wamulejeli nindi ayi, nawa wamuloñesheleli yuma yikumukwasha halwendu lwindi lwalulehi. Wamutondeli cheñi Nehemiya kwikala nguvulu wamuYuda nawa wamwinkeli nyitondu yakutuña nachu yiisu yamusumba.

Nehemiya chashikiliyi kuYerusalema, watalatalileña chadiña mpwembu jamusumba. Kuhiñahu wapompesheli atupristu nianyuuli nakuyileja nindi: ‘Iku kukala kweneni. Dichi twayenu tuzati.’ Antu etejeli nawa atachikili kutuñulula mpwembu.

Ilaña ayilumbu jawaIsarela amakwawu ayisupishileña nawu: ‘Mumbu nateli kuhumuna mpwembu yimunakutuña.’ Akakukalakala ashiliku maana wanyi kumazu akasawuntu ilaña atwalekelihu nakutuña. Mpwembu yatuñiliwu yaleheli nawa yakoleli.

Ayilumbu jawu afuukwilihu kwinjila kutubadi twashiyashana kulonda alukuki Yerusalema mukukasumwisha. AYudeya chatiyiliwu aka kafuta, atiyili woma. Ilaña Nehemiya wayilejeli nindi: ‘Bayi mutiya womaku. Yehova wudi  nanetu.’ Washiliku anhembi kulonda akiñeña akakukalakala, nawa ayilumbu hiyatwesheleña kulukukaku.

Mumafuku 52 hohu, mpwembu niyiisu yamanini. Nehemiya waleteli aLevi ejima kuYerusalema kulonda ahani mpwembu. Wayanzañeni mumazanvu ayedi awañimbi. Akandamini hampwembu kuzatisha mankenka akuChiisu chaKaseloki, kufumahu ahitilili kukabadi kakwawu kamusumba. Avumishili mpuña, yifoyu nitudada nawa amwimbilili Yehova. Ezera wayili nezanvu dimu, Nehemiya niyena nezanvu dikwawu, sampu nichadibulakeniwu hatembeli. Antu ejima, amayala, ambanda nianyana amulambwili Yehova nyilambu nawa azañaleli. Ipumba dakuzañalala kwawu datiyakeni nikwakulehi.