Chelili Yesu nashimwini dehi hadi chaaka chimu nachikunku, kwadiña chuma chalema chateleli kufuukulayi. Anyi adi kutondayi kulonda azatileña hamu nindi? Anyi adi kudizishayi kulonda alomboleña chipompelu chawakaKristu? Hakwila afuukuli mwenimu, Yesu wakeñekeleña wunlomboli waYehova. Dichi wayili kumpidi kwakankawindi nawa walombeli wufuku wejima. Chikwachili nantetemena, watambikili atumbanji twindi amakwawu nawa watondeli apostolu indi 12. Majina awapostolu amu adihi iweluka? Adiña Petulu, Anderi, Yakoba, Yowanu, Fwilipu, Batolomewu, Tomasi, Matewu, Yakoba mwana kaAlafwewu, Tadewu, Shimona, niYudasi Isakaroti.

Awa 12 atachikili kwendela hamu naYesu. Chelili nayidizishi dehi, wayitemesheli nakushimwina nkawawu. Yehova wayinkeli ñovu yakufumisha andemoni nikuuka akata.

Yesu wayiteneneña awa 12 nindi amabwambu jindi nawa wayikuhweleleli. AFwarisi ayimweneña apostolu nawu hiyantu  abula kutaña nawa hiyantu hohu kwawu. Ilaña Yesu wayidizishili chakuzata mudimu wawu. Adiña naYesu mumpinji yalema yamuchihandilu chindi, chidi neyi henohu kanda afwi nihanyima yakumusañula. Hadi awa 12, amavulu afumini kuÑaliliya kwafuminiyi Yesu. Hakachi kawu amakwawu adiña asumbula.

Apostolu adiña awanina wanyi nawa aluwañesheleña. Mpinji yikwawu ahosheleña chakadi kutoñojoka nawa afuukwileña mwaluwa. Mpinji yikwawu akañenyeña kudiwunjika. Ifuku dimu aditaadikishili kulonda eluki wabadika hakachi kawu. Ilaña adiña antu amawahi amukeña Yehova. Diwu akolesheli chipompelu chawakaKristu chelili Yesu nayi dehi.