Hanyima yakutonda apostolu 12, Yesu wasulukili hampidi nakuya kwadiña izaza deneni dawantu. Afumini kuÑaliliya, Yudeya, Tira, Sidoni, Siriya nikwishinadi daYodani. Amuleteleli antu akabakeneña nanyisoñu ninowu akabishileñawu kudi andemoni. Yesu wayuukili ejima. Kuhiñahu wayili nakushakama hampidi nawa watachikili kuhosha. Walumbulwili yuma yitwatela kwila neyi tunakukeña kwikala amabwambu jaNzambi. Twatela kwiluka netu Yehova diyi watela kutulombola nawa twatela kumukeña. Ilaña kwila tumukeña Nzambi henohu twahela akwetuku. Twatela kwikala naluwi nikwikala chiwahi nawantu ejima, kushilahu niayilumbu jetu.

Yesu wahosheli nindi: ‘Hiwatela kukeña hohu amabwambu jeyiku. Watela cheñi kukeña ayilumbu jeyi nikwanakena antu chakufuma hamuchima. Neyi mukwenu nakuhilili, nyakalaku kuya nakudanakena. Yilileña akwenu yuma yiwunakukeña neyi nineyi akwilili.’

 Yesu wayilejeli cheñi antu kufumba kwakuwahi kutalisha hamaheta. Wahosheli nindi: ‘Chalema nankashi kwikala ibwambu daYehova kubadika kwikala namali amavulu. Ikombi nateli kukwiyila mali eyi, ilaña kwosi wunateli kukwiyila wubwambu weyi naYehova. Lekaku kwakama hayuma yiwukuda, yiwukunwa, hela yiwukuvwala. Shinshikaku hadi atuda. Nzambi wayinkaña yakuda mpinji yejima. Kwakama kwila kukuletesha kuswijaku ifuku dimu kuwumi weyi nehi. Anukaku neyi Yehova weluka yuma yiwakeñaña.’

Mazaza awantu adiña kanda atiyeñahu dehi muntu wahosheleña neyi Yesu. Akulumpi jawu jakwitiya hiyayidizishilihu nsañu yamuchidiwuku. Chumanyi chaletesheli Yesu ekali ntañishi wabadika? Muloña yuma yejima yatañishileñayi yafumineña kudi Yehova.