Bayi neyi Yesu wadiña hohu nañovu yakuuka akata nikusañula afuku, ilaña wadiña ninañovu yakukañesha mpepela ninvula. Chamanishiliyi kulomba hampidi, Yesu watalili haKaluñalwiji kaÑaliliya nawa wamweni nvula yampepela. Apostolu indi adiña muwatu wawu, akañenyeña kuvuwa muloña wampepela. Yesu wakunkumukili nawa watachikili kwenda hamenji nakuya kwadiña watu wawu. Apostolu chamweniwu muntu wunakwenda hamenji, atiyili woma. Ilaña Yesu wayilejeli nindi: ‘Yami. Bayi mutiya womaku.’

Petulu wahosheli nindi: ‘Mwanta, neyi mwamweni yeyi, nleji ninzi kudi eyi.’ Yesu wamulejeli Petulu nindi: ‘Inzaku kudi ami.’ Dichi, iku mpepela yinakukunka, Petulu wafumini muwatu nawa wendeli hamenji nakuya kudi Yesu. Ilaña chashikiliyi kwakwihi nayena, Petulu wamweni mpepela yeneni nawa watiyili woma. Chamweniyi nindi hakutachika kujimina, wabidikili nindi: ‘Mwanta, ñamwini!’ Yesu wamukwatili kuchikasa nakumwila nindi: ‘Muloñadi chiwatachikila kujinoka? Indi chikuhwelelu cheyi chidi kudihi?’

AYesu naPetulu akandamini muwatu, nawa hohenohu mpepela yalekeli. Toñojokaku chatiyiliwu apostolu! Ahosheli nawu: “Chalala eyi wudi Mwana kaNzambi.”

Iyi bayi neyi diyi hohu mpinji yakañesheliyi Yesu chuma chamuchidiwuku. Mpinji yikwawu, chelili Yesu nawapostolu indi akandami watu nakuya kwishinadi dakaluñalwiji, Yesu wayili nakukaama kunyima yawatu. Iku nakaami, kwenjili mpepela yeneni. Mankanda atachikili kweta kuwatu, nawa watu wenzeli namenji. Apostolu amuhindwishili Yesu nakubidika nawu: ‘Ntañishi, keña tufwi! Tukwashi!’ Yesu wahindukili nawa walejeli kaluñalwiji nindi: “Wundaku nzo-o!” Hohenohu, mpepela nikaluñalwiji jawundili. Yesu wayihwili apostolu nindi: ‘Indi chikuhwelelu chenu chidi kudihi?’ Adihoshesheli mulwawu nawu: “Anakumwovwahila nikudi mpepela nikaluñalwiji.” Apostolu adizililiku nawu neyi amukuhweleleli Yesu chikupu hiyadi kutiyaña woma chuma chidi chejimaku.