Yesu wadiña nawamabwambu jindi asatu adikundileñayi nawu chikupu, ashakamineña muBetani. Adiña Lazaru niahela jindi ayedi, aMariya naMata. Ifuku dimu, Yesu hadiñayi kwishinadi dikwawu daYodani, aMariya naMata amutemesheleli mazu nawu: ‘Lazaru nakati nankashi. Mwani nyakalaku kwinza!’ Ilaña Yesu hayili hohenohuku. Wahembeleleli muhita mafuku ayedi, kuhiñahu walejeli atumbanji twindi nindi: ‘Tuyenu kuBetani. Lazaru nakaami, nawa inakuya nakumuhindwisha.’ Apostolu ahosheli nawu: ‘Lazaru neyi nakaami, chikumuletesha akoli.’ Dichi Yesu wayilejeli chakadi kuhita mumbadi nindi: ‘Lazaru nafwi.’

Yesu chashikiliyi kuBetani, hadiña hahita dehi mafuku awana kufuma hamujiikiliwu Lazaru. Mazaza awantu enjili nakuyikundeja aMata naMariya. Mata chatiyili nawu Yesu nenzi, wayili lufuchi nakumukinkilila. Wahosheli nindi: “Mwanta, neyi wadiña kunu, manakwami hadi kufwaku.” Yesu wamulejeli nindi: ‘Manakweyi wukuhanda cheñi. Mata, wunakuhweleli chumichi?’ Wamwakwili nindi: ‘Nakuhweleli nami wakasañuka hikwakekala kusañuka.’ Yesu wamulejeli nindi: “Yami kusañuka niwumi.”

Kuhiñahu Mata wayili kudi Mariya nakumuleja nindi: ‘Yesu nenzi.’ Mariya wayili lufuchi kudi Yesu nawa izaza damulondeleli. Wafukamini kunyendu yaYesu nawa halekeli kudilaku. Wahosheli nindi: ‘Mwanta, neyi wadiña kunu, manakwetu wadi kwikala wamumi!’ Yesu chamweniyi Mariya nakudila, wamutiyilili wushona nawa niyena watachikili kudila. Izaza dawantu chidamweni nakudila, dahosheli nawu: ‘Talenu Yesu chamukeñeliyi Lazaru.’ Ilaña amakwawu ahosheli nawu: ‘Muloñadi chabulililiyi kumupulwisha ibwambu dindi?’ Chumanyi cheliliyi Yesu?

Yesu wayili kwijamu, kwabutiliwu ilola deneni. Wayilejeli nindi: ‘Fumishenuku ilola.’ Mata wahosheli nindi: ‘Ilaña munahiti dehi mafuku awana! Mujimba windi wukutachika kununka.’ Hela chochu, afumishiliku ilola nawa Yesu walombeli nindi: ‘Tata, nakusakilili chiwunantiyi.  Neluka nami wantiyaña mpinji yejima, ilaña nahoshi nezu datiyakana kulonda awa antu eluki nawu yeyi wantemesheli.’ Kuhiñahu wabidikili nezu datiyakana nindi: “Lazaru, idikakumu!” Kwamwekeni chuma chakuhayamisha: Lazaru wedikili mwijamu, iku wakujiñila mumahina. Yesu wahosheli nindi: “Mukasununenu ayeña.”

Antu amavulu amweni chumichi amukuhweleleli Yesu. Ilaña amakwawu ayili nakuleja aFwarisi. Kufuma tuhu haniyi mpinji, aFwarisi akeñeleña kuyijaha aLazaru naYesu. Yudasi Isakaroti, wumu hadi apostolu 12, wawombolokeli nakuya kudi aFwarisi nakuyihula nindi: ‘Mukunyinka mali añahi chinayikwashaku kumuwana Yesu?’ Aditejeli kumwinka yikunku 30 yasiliva, nawa Yudasi watachikili kukeñakeña mpinji yayiwahi yakumuhaninamu Yesu kudi aFwarisi.