Yowanu washimwinineña nindi: ‘Wambadika ami nakwinza.’ Yesu hadiñayi nayaaka 30, wafumini kuÑaliliya nakwinza kuKaloña Yodani, kwadiña nakupapatishilayi Yowanu antu. Yesu wakeñeleña nindi amupapatishi kudi Yowanu, ilaña Yowanu wahosheli nindi: ‘Kwila nikupapatisha eyi nehi. Yeyi watela kumpapatisha ami.’ Yesu wamulejeli Yowanu nindi: ‘Yehova nakukeña nindi eyi wumpapatishi.’ Dichi ayili muKaloña Yodani, nawa Yowanu wamujimikili Yesu mumenji.

Yesu chafuminiyi mumenji, walombeli. Hayoyina mpinji, mawulu enzunukili nawa spiritu yaNzambi yenjili hadi yena neyi kapompa. Kuhiñahu Yehova wahosheleli mwiwulu nindi: “Yeyi Mwanami, inakeña; inatiyaña kuwaha.”

Spiritu yaYehova chiyenjili hadi Yesu, wekalili Kristu, hela Mesiya. Aha dihatachikiliyi kuzata mudimu wamutemesheleliwu kudi Yehova hamaseki.

Hanyima yakumupapatisha hohu, Yesu wayili mwisaña nawa washakaminimu mafuku 40. Chafuntiliyi, wayili nakumutala Yowanu. Chenjileñayi kudi yena, Yowanu wahosheli nindi: ‘Iwu diyi Mwana kaMukoku waNzambi owu wakafumisha nshidi yakaayi.’ Chahosheliyi mwenimu, waletesheli antu eluki nawu Yesu diyi Mesiya. Wuneluki yuma yamumwekeneni Yesu hadiñayi mwisaña? Tuyenu tutali.