AFwarisi amuheleli Yesu nawa akeñeleña njila yakumukwatilamu. Ahosheli nawu hatela kuukaña antu haSabataku. HaSabata yimu, Yesu wawanini mputamesu nakulombalomba mumukwakwa. Walejeli atumbanji twindi nindi: ‘Talenu ñovu yaNzambi chiyikumukwasha iwu iyala.’ Yesu wavubili mazeñi indi namaseki nawa wamulambili hamesu. Yesu wamulejeli nindi: ‘Yaña wakaweli mumesu mwijiya daSilowami.’ Dicheliliyi, nawa aka dikadiña katachi kumona kufuma havwalikiliyi.

Antu ahayamini nankashi. Ahosheli nawu: ‘Komana iwu hidiyi ona iyala washakamineña nakulombalombaku, tahindi himuntu hohu wacheñi wunadifwani nindi?’ Yena wahosheli nindi: ‘Yami ona wavwalikili mputamesu!’ Antu amwihwili nawu: ‘Hanu dinu chumanyi chinaleteshi wutachiki kumona?’ Chayilejeliyi chuma chamwekeni, amutwalili kudi aFwarisi.

Iwu iyala wayilejeli aFwarisi nindi: ‘Yesu wanlamba maseki hamesu nawa wanleja kuya nakuyiwelamu. Dichinela, nawa ichi inakumona.’ AFwarisi ahosheli nawu: ‘Neyi Yesu nakuuka haSabata, ñovu yinakuzatishayi hiyinafumi kudi Nzambiku.’ Ilaña amakwawu nawu: ‘Neyi chakwila ñovu jindi hijinafumi kudi Nzambiku, hadi kutwesha kumuukaku.’

AFwarisi atambikili anvwali janiwu iyala nakuyihula nawu: ‘Indi mwanenu natachiki ñahi  kumona?’ Anvwali jindi atiyili woma muloña aFwarisi ahosheleña nawu muntu wejima wukumukuhwelela Yesu, akumuhaña musinagogi. Dichi aakwili nawu: ‘Tuneluki wanyi. Mwihulenu yomweni.’ AFwarisi amwihwili iwu iyala malwihu amavulu sampu nichahosheliyi nindi: ‘Nayileja dehi nsañu yejima yinneluki. Muloñadi chimunatwalekelihu nakuñihula?’ AFwarisi ahilili nawa amuhañili.

Yesu wayili nakumuwana iwu iyala nawa wamwihwili nindi: ‘Wunamukuhweleli Mesiya?’ Yena waakwili nindi: ‘Nadi kumukuhwelela neyi namwiluka.’ Yesu nindi: ‘Yami Mesiya.’ Yesu wamutiyilili luwi. Wamuukili nawa wamukwashili kwikala nachikuhwelelu.